فستانى

قضيت عمرا احيك ثوب حبنا لالبسه وقت زفافنا........

من ضاق؟! حبنا؟..........انا؟..............انت؟.............!

ام الفستان الذى مازلت انتظر ارتدائه؟؟!!!!!!!!

 

the secret

عاوزين تعرفوه؟

يقال انه سر الحياة.....من امتلكه فقد امتلك القوة امتلك السعادة

يقال ان الاجداد عرفوا هذا السر واحتفظوا بيه لانفسهم بل وحرموا على من يعرفه ان يبوح به لاعتقادهم الشديد ان من يمتلكه ممكن يحقق معجزات

هحاول اشرحلكم السر ببساطة زى مافهمته

نحن نعيش ونتعايش فى الدنيا دى تحت تأثير قوة كبيرة  تسمى قوى الجذب

ايييييييون كل حاجة فى حياتك سواء كنت بتحبها او بتكرهها انت اللى بتجذبها

مش فاهمين؟...............ابسطهالكم

حضرتك هتتخيل نفسك بمنتهى البساطة انك مغناطيس

مغناطيس يجذب كل اللى حوله من احداث وصور وافكار فمثلا لما تيجى فكرة حزينة على بالك او سيئة تفضل تفكر فيها فتكرهها وكل ماتفكر فيها اكتر كل ماحالة الغضب تزيد عندك  لدرجة اكتر بكتير مما كانت عليه مع بداية الفكرة......وكل ده من فكرة!

وعلى فكرة الحكاية دى او القانون ده مالوش دعوة ان كنت انت حد متشائم ولا متفئل

فقانون الجذب لا يرى اشخاص انما يرى الشئ نفسه بغض النظر ان كنت انت عاوزه ولا لاء

ابسطهالكم............ندى مثال

عندما تجول بخاطرك فكرة مثل:انا لا اريد انا اتأخر على عملى

كأنك بتقول انا هتأخر على عملى.......فقانون الجذب ما بيبصش ل اريد او لا اريد

احسنلك تقول:سأصل باكر الى عملى

طول مانت بتفكر قانون الجذب شغال ولازم تاخد بالك ان اللى بتفكر فيه هو اللى هيحدد مستقبلك

وبتغيير طريقة تفكيرك  ممكن تغير حياتك كلها

ده يا جماعة للامانة مش كلامى ده شرحى لمقدمة كتاب يحمل نفس عنوان البوست
the secret الكتاب لفت نظرى مرتين وده اللى خلانى اقراه

مرة قريت اسمه فى رواية كنت بقرأها
ومرة لما عمكم تمورة قال اسمه ف فيلم هيما

مش معقوله يعنى تامر حسنى يبقى عارف الكتاب وانا ماعرفوش

المهم دونته من على النت الكتاب فعلا حلو

ومقنع كمان رغم انى اوقات بحس انه مدى للقوة دى حجم اكبر من حجمها ياريت اعرف رائيكم على الاقل من الملخص اللى قلته ده

طلب بقى معلش
دعاء العطار وشرين سامى نوهوا عندهم على موضوع الكتاب الالكترونى والمشاركة بتدوينة فياريت والنبى ترشحولى واحد اصلى مش قادرة اقرر

كلهم اولاااااااااادى:)  

فقاقيع

تعودت من صغرى ان العب بفقاقيع الصابون واصنع اكبر عدد منها

تعودت من صغرى انا اتباع فقاقيعى بالوانها الزاهيه تحت اشعة الشمس وان اراقب ايهم سوف يذوب اولا

تعودت ان احمل كل واحدة منهم امنية ما  واراقب.....اراقب ايهم سيذوب فى الهواء اولا......لتكون هى اول الامنيات التى سوف تتحقق

لكن ذلك كان فى الصغر................

اما الان فالحال اختلف......مازالت هذه هى لعبتى المفضلة ومازلت اراقب تلك الفقاقيع

واحملها بالامانى لكن الفرق ان التى تذوب اولا فى نظرى اصبحت هى الامنية التى لن تتحقق

وما اكثرها...........!!

نقطة سوداء

لا تحكم على الناس كحكمك على هذه الصورة.........فالغالبية العظمى سوف يرى النقطة السوداء ويترك الفراغ الابيض المحيط  وكأنه مسلم به


كذلك نحن...........نرى عيوب الناس وننسى حسناتهم و مزاياهم وكأنها امر مسلم به

بيض بالعجوة!!!!!!!!

كل يوم يخرج مع اصحابه ويسهر اد مايسهر ويرجع يقعد يتفرج على التليفزيون فى صمت من غير مايوجهلها ولا كلمة

زهق وتعبت وقررت انها تواجهه بقى كفاية سكوت لحد كده


هى:هو انت قاعد ساكت كده ليه مش كفاية انك سهران لبعد نص الليل برا وسايبنى؟

هو:عادى بتفرج وبعددين انا كنت مع اصاحبى

هى :طب يعنى هو اصحابك دول مالهوش بيوت وزوجات انا تعبت من كتر القاعدة لوحدى

هو:ما يردش

هى: طب انتم بتتكلموا مع بعض انت واصحابك ولا ساكتين بردوا

هو:طبعا بنتكلم

هى:طب ماتتكلم معايا انا
هو:مانا بكلمك اهو

هى:بغيظ مكبوت....طيب مش اصحابك دول متجوزين؟

هو: اه


هى:طب ماتعرفنى على مراتتهم يمكن نبقى اصحاب ياسيدى بدل حبستى دى


هو:يبصلها كده بهدوء بصة مالهاش اى معنى ويقولها.....اعمليلى بيض بالعجوة


هى:نعم؟ انا بكلمك فى اى دلوقتى انا بقولك انا زهقانة ياتقعد معايا ياتعرفنى عليهم


هو:وانا بقولك انا جعان وعاوز بيض بالعجوة......




وانتهى الحوار 


مشاركة منى فى حملة اتكلمى

اتكلمى

دخل احدهم الصيدليه عندى لشراء شئ معين وكانت اختى قاعده معايا

الراجل سالنى مش حضرتك الدكتورة فلانة؟قلتله اه.......قالى حضرتك تبقى من العيله الفلانيه؟اه ياسيدى..........مامتك فلانه وبابكى الله يرحمه الاستاذ فلان؟اه والله


مين حضرتك بقى؟انا فلان الفلانى وابتسم ابتسامةمالهاش اى معنى وقالى انا بسأل يعنى علشان جايلك خير...........وراح ماشى وانا واختى بصينا باستغراب وابتسمنا وعادى


بتحصل يعنى وخصوصا ان الراجل ماشتراش حاجة يعنى طبعا فهمتوا الخير هو ايه!!!!!!!!!


روحت البيت ......وحصل الاتى


اختى الفتانة راحت قالت لماما ولقيت ماما بتندهلى


نوووووووووور مش عاوزة نقاش اللى جاى دى هتقبليه وبطلى دلع بقى......

مين يا ماما اللى جاى ؟!!!!!


انتى عاوزة تخبى عليا اختك حكتلى على كل حاجة الخير اللى جايلك اقبليه وماتتعبيش قلبى بقى انا نفسى اطمن عليكى


وعلشان ماتعبش قلبها قلت يابت لايميها كلمة حاضر بتريح........حاضر يا ماما


تانى يوم لقيت خالتى بتتصل عليا ......ازيك يانور والنبى ياحبيبتى اقبلى  بقى احنا نفسنا نفرح بيكى........اقبل ايه يا طنط؟ الخير ياحبيبتى


اممممممم هى الاخبار لحقت وصلت؟حاضر يا طنط ربنا يسهل


وتكررت المكالمات بنت خالتى وعمى وبنات عمى واحدةواحده


صحبتى الانتيم وجارتنا طنط حشرية


الكل يطالبنى بالقبول!


قبول ايه؟الخيييييييييييير انتم نسيتوا ولا ايه


مش مهم الخير ايه ولا مهم مناسب ولا لاء ولا مهم ان كنت هرتاحله ولا هو هيرتاحلى ولا لاء


اصبحت جملة الراجل العجيبة قصة اعايشها والويل وسواد الليل لو رفضت هذا الخير  هبقى بتدلع بقى!!!!!!!!!!


معلش يا جماعة بس ماقدرتش مافضفضش  اسم الحملة اللى قريته فى مدونة دعاء العطار"اتكلمى"........خلانى انفجر

صباحك سكر

احيانا احلم انى سوف استيقظ على صوتك او رسالتك وانت تقولى لى صباح الخير..

ثم افيق من حلمى على حقيقة انك لم تعد موجود فى حياتى.....!

ورغم ذلك..اجدنى اردد...........صباحك سكر!!!!!!!!!

احن اليها

احن الى طفلة صغيرة كل امانيها فى الحياة ان تكبر وتصبح امراءة جميلة
 احن الى طفلة كان فى قلبها فرح باتساع الدنيا.............


تدعى انا.........

هتعملوا ايه؟؟؟؟؟؟

سؤال فرض نفسه الصراحة على تفكيرى بعد ما قريت توبيك مصطفى صاحب مدونة باش كاتب وتطورت العملية لسؤال ملح بعد بوست شرين فى مدونة حدوتة مصرية

المقالتين اتكلموا عن التحرش

وعجبنى جدا اراء الجميع عليهم والرفض والشجب وكل الحاجات الحلوة

السؤال بقى اللى بيطرح نفسه .......او خلينا نقول مجموعه الاسئلة اللى بجد نفسى اعرف رائيكم فيها اى؟


1\رد فعلكم ايه يا بناتيت لو حصلكم كده لا قدر الله هل هتحطوا وشكم فى الارض وتستنوا لما يعدوا؟ ولا هتسرعوا فى مشيتكم وتسموعوا ولا كانكم سمعتم؟ ولا عندكم استعداد تواجهوا وتقفوا  وان لزم الامر تروحوا القسم يحلهلكم؟


2\رد فعلكم ايه ياشباب لو شفتوا الموقف ولحد طبعا فى الغالب مش هتبقوا عارفينوا؟ هتدخلوا وتتخانقوا وتضربوا وتنضربوا؟ولا هتتفرجوا وتنقدوا فى سركم؟


3\طب بردوا ياشباب انتم رائيكم كرجال فى موقف البنت اى المفروض انها تسكت؟ولا المفروض انها تدافع  وتاخد حقها؟


4\طب انتم منكم اللى اصبحوا ابهات وامهات عاوزة اعرف رائيكم كاهالى لو بنتكم جت البيت وقالتلكم انا حصلى كذا وسكت هلى هتذعقولها ولا هتطبطبوا عليها وتقولوليها معلش؟


5\طب رد فعلكم بردو كاباء وامهات لو جت بنتكم وقالتلكم انا حصلى كذا ورديت هتزعقولها ولا هتقولولها جدعه؟


6\طب رد فعلكم كاباء وامهات لو عندكم ولد واتقالكم ان ابنكم عمل كذا كذا هتعاقبوه ولا هتشخطوا فيه ولا ده ولد وغلط وطيش شباب؟


معرفش اسئلة كتير اتزحمت فى دماغى ماهو لازم هيبقى لينا رد فعل مش مجرد نقد وانا حابة جا اعرف ردود افعالكم

يومياتى5

لمتابعة الجزء اللى قبل كده ادخل       هنا







طلعنا على اوضة المدير ........والناس ورانا 

وفى طريقنا كنا وصلنا لقرار

صدرت صحبتى للمدير لانى كنت حاسة ان مش هيبقى بينىوبينه عمار ثم انا اصلا متنرفزة ومش فى افضل حلاتى

وكان قررنا اننا هنكون ابطال فدائين ونحلله الازمة دى بس بشروط
شروط اييييييه؟ده المدير طبعا وهو مبرق لينا

اندفعت انا وقولتله طبعا صاحبة العهدة مش موجودة والله اعلم الحال اى جوا فاحنا هنصرف للناس بس من غير مانمضى على اى حاجة وبعد مانخلص صرف هنبقى نجرد الصيدليه على وضعها الجديد ونستلم على الجديد ده والفرق بقى سواء بالعجز او الزيادة ولا لينا دعوة تسوه انتم او تشيلوا لحد مالناش فيه

الراجل بصلنا كده باستغراب وقال لنا انتم عارفين كل الحاجات دى ازاى مين قالكم على الحل ده؟

بصيناله كده بمكر وطبعا سكتنا.........الحل ده على فكرة كان من بنات افكارى ولله الحمد

المهم الراجل فكر كده شوية وقالى ماشى موافق
وقد كان


خرجنا من عنده لقينا الناس وكالعادة مشيوا ورانا 


رحنا قدام الصيدليه وراحت صاحبتى واقفة على الكرسى استعداد لالقاء خطبة سبق اعدادها بينى وبينها وطبعا هى اللى هتقول لانى بتكسف........:)


وبصوت جهورى عالى طلع منها بالعافيه :دلوقتى يا جماعه النهاردة ايه؟


الجماهير وفى صوت واحد:الخميييييييييييييييس


هى:طيب خلاص انتم هتسلموا التذاكر بتاعتكم لينا دلوقتى وتيجوا السبت ان شاء الله تستلم العلاج هننادى على كل تذكرة باسمها يجى ياخد علاجه 


وقد كان الناس سلمت الحاجة وروحت ودخلنا احنا بقى نتعرف على صيدليتنا


متر ونص فى مترين  .......ركن فيه ارفف وعلاج منتور فى كل حتة  


تلاجة....... 2 كرسى.......تربيزة.........بس!!!!!!!
فين المروحة؟؟؟؟؟؟؟؟ مافيش.........


نهارهم اسود ورحت جرى على المدير انا عااوزة مروحة حالا ماينفعش كده


الراجل راح شايل مروحة المكتب بتاعه وبنفسه وصلنى تانى لحد الصيدلية!!ثبتنى


المهم قفلنا علينا بابنا وشمرنا  وابتدينا نحضر فى التذاكر نحط التذكرة بعلاجها فى كيس ونربط


وصلنا لربع التذاكر تقريبا كده 1500تذكرة وكانت الساعه وصلت تقريبا 6 المغرب


خرجنا لقينا الدنيا اسكت هس طبعا وجرى خرجنا على معاد اننا هنيجى الجمعه من بدرى نخلص الليله دى
وقد كان نزلنا ونزل لينا نايب المدير  وجيبنا معانا الغدى بقى وكانت قاعدة


المهم خلصنا الجمعه كل حاجة ورتبنا حالنا استعداد لمعركة السبت


السبت صباحا


الناس قاعدة فى ترقب مش مصدقين انهم هيخلصوا


وصلت القوة الفادئية انا و صحبتى طبعا ومعانا 2 عمال


العمال هيوزعوا واحنا هنشرف علشان مافيش حاجة تتسرق


واستمر حاله الصرف فى هدوء لمدة يومين كانت اهم ملاحظة فيهم ان الناس لما كنا بنقول ياجماعه تعبنا نكمل بكرة كانت بتستجيب بدون خناق نظرا لانهم تقريبا شافوا حالتنا اللى يرثى لها او لانهم ناس عندها دم وشايفه اننا فعلا بنتعب علشانهم.........


خلصنا ...الحمد لله


بدئنا الجرد لقينا عجوزات وزيادات ماتعدوش كتييييييير جدا طب وبعدين
كده الصيدلانية صاحبة العهدة هتروح فى داهية والزيادة طبعا لو سلمناها للمستشفى كل سنة وانتم طيبين


والحل


صعبت علينا الصيدلانيه العروسة طبعا وقررنا نعاقبها عقاب متفرد شوية 

اخدنا تليفونها من المستشفى واتصلنا عليها كانت فى شهر العسل الهانم متجوزة بقالها تقريبا 4 ايام


اخدنا العنوان وطبينا عليها وحكنيلها على الكارثه اللى هى فيها وجرجرناها هى وجوزها على الصيدليه تظبط عهدتها باديها بقى علشان تستلم منها على وضع سلييييييم


وقد كان تمت المهمة بنجاح وبدون خساير تقريبا


ودول يا جماعه كانوا اطول خمس ايام مروا عليا فى حياتى والحمد لله انتهوا

يومياتى4

تابع الجزء اللى قبل كده من   هنا

كنا وقفنا فيييييين......
اه يوم المستشفى

رحت بقى يا جماعة وهناك عرفت ان صحبتى هتشتغل معايا ودخلنا على المدير اللى استقبلنا بترحاب شديييييد جدا ..شديد شديد يا جماعة لدرجة مريبة والله
 انا شكيت فى الراجل انه معرفة  زميلتى فميلت عليها وسالتها انتى تعرفى الراجل ده؟
قالتلى انا فكراه معرفتك
اوباااااااااا قرون الاستشعار بدأت تشتغل بس سكت جايز الراجل مجامل زيادة

حاجة ساقعه وسخنة وكلام مجاملات وان ماشلتكوش الارض!!
هو احنا ظالمين الحكومة ولا كل المدراء كده؟         بلد اشاعات صحيح

بعد المجاملات حبيت افهم بقى فسالته وهو حضرتك احنا هنمسك اى بالظبط؟

قالى انتم يا داكترة المستقبل  هتمسكوا صيدلية نفقة الدولة واملنا فيكم بعد ربنا كبير 

امممم طب انا ليه حاسة حضرتك؟ انك زى ماتكون بتودعنا كده فى ايه؟

بصوا بقى يابنات انتم روحوا مع الاستاذ فلان استلموا الشغل كده وبعدين تعالولى افهمكم

قمنا رحنا وانا الردار عندى على اخرة وقلت لزميلتى بقولك ايه احنا نستلم شغل اه لكن اوعى تمضى على اى عهد انا حاسة ان فيه مصيبة

رجعناله بعد ما استملنا لقيته بيقولنا صلوا بقى على النبى نفقة الدولة بتاعتنا فيها اكبر عدد من القرارات فى المستشفيات المحيطة    عندنا اكتر من 5000 قرار

الدكتورة اللى ماسكاها غلطت ومضيت لزمايلها على موافقات باجازات لحد ما فضلت وحدها وجه معاد جوزها راحت مقدمة على اجازة وطبعا ماتوفقش عليها فانقطعت عن العمل والصيدليه مقفولة من اول الشهر وانتم عارفين احنا دلوقتى 25 منه والناس الغلابه ماصرفتش علاجها

وانتم بقى يا بنات عليكم المهمه دى......!!!!!!!!!!!
نعم؟!!!

احنا مين حضرتك احنا الاتنين؟

اه.........هو المفروض يجيلكم خمس صيادلة كمان بس لما عرفوا  بالورطة مقدمين تظلمات

يااااااااااااااااااحلاوة واحنا بقى اللى اتدبسنا!!!!!!!

الراجل بصلى بصة تهديد كده وقالى لا طبعا المستشفى هتاخد مع كل اللى عطل العمل اجراء حاسم المهم نعدى من الشهر ده

انا وزميلتى طبعا بصينا لبعض وفى عينى نظرة معناها مش قولتلك انا حاسة ان فيه مصيبة!!

ولقينا جنابه راح قايم وقال تعالوا افرجكم على الصيدلية
رحنا معاه وياريتنا مارحنا


الراجل كان بيدبسنا فعلا
رحنا لقينا امة لا اله الا الله واقفة قدام باب كده وبيخبطوا عليه والباب مقفول
واذ فجاءة المدير صوته على وقال ابشروا يا جماعه الصيادلة الجداد وصلوا


وعينكم ماتشوف الا النور هتافات بقى على دعا لينا على دعا علينا مظاهرة بمعنى كلمة المظاهرة وبقوة الدفع وصلنا للباب المقفول  وطلع المدير المفتاح اللى رمتهولو الصيدلانية صاحبة العهدة زى ماعرفنا بعد كده


فتح الباب وفضل يزق لحد ماقفله.......
وبقينا جوا
جوا الصدليه اللى مساحتها بالظبط متر ونص فى مترين


اتفضلوا يا جماعة الصيدليه اهى والمفتاح اهو وان احتاجتوا حاجة تعالولى المكتب وراح سايبنا وماشى


بصيت لصحبتى وقلتلها  انتى فاهمة حاجة ؟قالتلى انا حاسة ان رجلى مش شيلانى هو في اى؟  كل ده طبعا والناس بتخبط علينا برا
قلتلها لا مابدهاش تعالى نروح للمدير العجيب دهونقله احنا كمان هننقطع عن العمل


خرجنا واذ بالناس ماشية ورانا مع توسلات تقطع القلب وبكا الستات الكبار اللى طلع عينهم وماصرفوش دواهم لحد النهاردة


مأساه وكارثة   واحنا اللى هنشربها...............................!


                           يتبع بكرة بقى ان شاء الله  يا جمعة علشان ماطولش عليكم

يومياتى 3

لمتابعة الجزء اللى قبل كده اضغط  هنا

استمريت فى الصيدلية اياها لمدة 7 شهور وكنت اطول صيدلانية تعمر فيها دليل على قوة الاحتمال طبعا
الى ان جاء جواب التكليف........

فرحة دخلت البيت يومها طبعا فى قلب بابا وماما بنتهم الكبيرة اتعينت .......

رحت وزارة الصحة علشان استلم العمل وجواب التوجيه للمستشفى اللى هشتغل فيها

وبدأت رحلة الامضاءات ......!! ماقدرش اقولكم الصراحة انا مضيت على كام ورقة يوميها لدرجة انى حسيت ان الناس دى بتبيعنى اللى ورايا واللى قدامى!!

بس لان دى الحكومة فطبعا مضيت وبسرعة لانى فهمت ان الحكايه هتبقى على حسب اللى يلحق بمعنى ان اللى يمضى ويستلم الاول هيبقى الاقدم فى التعيين ودى حاجة حلوة..........اينعم انا ماكنتش فاهمة حلوة فى ايه بس بكرة هفهم اكيد

اوقات كنت بقرء اللى بمضيه واوقات لا بس اكتر ورقة صدمتنى وانا بمضيها كانت استمارة المرتب

اساسى المرتب 48جنيه!!!!!!!!!!!!!!!!!!!!!!

بصيت للموظف كده وقولتله بكل براءة فى صفر ناقص قدام الرقم حضرتك!!

قالى ازاى يعنى؟؟

قلتله ماهى اكيد يا اما 480ج او 408ج صح؟

ابتسم ابتسامة صفرا كده مالهاش معنى وقالى لا هى 48ج ......

نعم؟ يعنى انا هقبض مرتبى 48 ج ازاى يعنى دول مايكملوش كرتين شحن!!!

قالى يابنتى ده الاساسى لسه فى اضافى وحوافز

قلتله لما المرتب يبقى 48ج هتبقى حوافزه كام يعنى اى الهبل ده

قالى لا ماهو الاضافى بقى والبدلات بتجيلك على استمارات مختلفه واجمالى اللى هتقبضيه هيبقى فى حدود مثلا 300 بحالهم او اقل شوية

هههههههههههههههه ايوووووووون ده كان رد فعلى والله.........ضحكت

قلتله بغض النظر عن ال300 بحالهم دىولما هو بينضاف ماتضيفوه من اولها وخلاص  ليه شغل ودنك منين ياجحا ده؟؟؟؟؟؟؟

رد الرجل باقتضاب لانهاء النقاش :هى القوانين كده هو ده النظام

فليسقط النظام...........ماكنتش عارفه انى بناقش قضية المرتبات والاجور وقتها طبعا

اخدت الجواب الموجه لمستشفى عام فى مدينة جنب مدينتى

رحت استلم وعرفت هناك ان فيه واحدة بلدياتى هتمسك معايا


هنمسك ايه بالظبط هو ده اللى هحكيه ليكم بس بكرة بقى ان شاء الله وكان لينا عمر 

د.رفعت........

عارفينه؟

اعتقد بعد تجربة بوست رجل المستحيل فى عدد مش بطال منكم عارفينه

ولكنكم لاتعرفون مدى تعلقى بهذا الرجل....هذا الشيخ الكبير المتهالك اللى عاش وحيد

وهيموت وحيد فى مساء ما......

لا تعرفون مدى تعلقى بهذا الطبيب الطاعن فى السن واللى بتحصله حاجات اوقات هو نفسه مابيقدرش يفرق ان كانت هلوسة شيخوخة اصابت عقل  اضناه تصلب الشرايين وامراض الشيخوخة المعروفة ام انها واقع ملموس؟؟!!!!!!!

اشياء لو كان اصغر فى السن قليلا لحاول البحث عن تفسير لها ولكنه يكتفى بالذعر ويترك لك انت التفسير!!!!!

لاتعرفون هذا الشيخ الذى يرفض كل ماهو خارق عن الطبيعة ويحاول جاهدا ان يجد له تفسير ..ثم يكتشف انه كان سااااذج ساااذج

من هو؟

لمن لا يعرفه......هو صديقى الملازم فى اوقات الفراغ وراسم ابتسامة على وجهى فى اغرب الظروف.......وهو الوحيد الى يجعلنى ابتسم ولا فخر عندما ينجح فى ان يرعبنى!!!!!!!!

من هو؟

انه د.رفعت اسماعيل...............استاذ امراض الدم المتقاعد والبالغ من العمر 70 عام

عمرك شفت بطل عمره 70 عام؟

هو الطبيب الاعذب...وطبيعى جدا يكون كده فلاتوجد زوجة تستطيع تحمل مايمر به

هو الرجل الذى لن يكف عن سرد قصص كابوسية الا حين يحين اجله.

هو الرجل الذى لايكتب مذكرات لان ذكرياته من النوع الذى لاااينسى

هو الرجل الذى يعلم انه مريض بكل امراض الدنيا ولكنه وبسبب مايتعرض له من احداث عجيبه يتحول الى مدخنة متحركة لكم رهيب من السجائر .....ويوصيكم من كل قلبه بعدم التدخين !!!!!!!!!!!!!

 هو الرجل الذى يوصيكم دائما فى اول سرده للقصة ان تذكروه بشئ ما مثل ان يصلح ثلاجته او مصباح غرفته ......ثم يعود ويذكركم فى منتصف القصة ثم يعاتبكم على الانشغال بالاحداث وعدم تذكيره.!!!!!!!!!!       

انه صديقى العجيب.....د.رفعت اسماعيل

عندما اكون......

        عندما اكون غاضبة منك فلا تقول لى انك تحبنى حتى لاتفسد بريستيج غضبى

مؤامرة

لم اكن اعلم انك متوغل فى حياتى كل هذا القدر..

انت فى كل الاشياء..وفى كل الاوقات..وفى كل الاحداث....


عندما يقول لى اى شخص اى كلمة تذكرنى بك....

 عندما اسمع تعليق من فيلم او اغنية اجد لك ذكرى...

انت فى كل الالوان وفى كل الاوراق...

انت حتى فى كل الاسرار......

حتى اسمك اصبح فجاءة اشهر الاسامى فكل المحيطون بى يحملونه...

بدأت اشك انها مؤامرة!!!!!...

يومياتى2

لمتابعه الجزء الاول ادخل هنا

  

                                              اول درس

عدت الايام متتابعه فىنفس الصيدلية اللى بدأت فيها حياتى العملية وكنت مبسوطة جدا الحقيقة لانى اكتشفت ان يجى منى كصيدلانيةاكتر مما كنت كطالبة

المجال ممتع جدا والتعامل مع الناس على اد ماهو مرهق على اد ما هو مفيد جداواكتشفت فى نفسى بسببه مواهب كتير منها القدرة على استيعاب الناس

المهم يعنى  عدت الايام وجينا اخر الشهر ..........عرفين معنى اخر الشهر ايه؟

ايوووووووووووووون.......اول مررتب فى حياتى ودى حاجة يعنى مش هينة

استنيت الدكتورة يومها تنزل بفارغ الصبر علشان اقبض بقى وكنت وعدتهم فى البيت بانى هعزمهم عزومة مالهاش حل

استنيت......استنيت.......استنييت...!!!!ومانزلتش

روحت البيت وانا زعلانة وقولتلهم معلش يا جماعه مانزلتش ابتسم بابا يومها وقالى عادى اكيد حصلها ظروف

رحت تانى يوم وانا متفائلة خير .........ولم يختلف كثيرا عن اللى قبله

واللى بعده واللى بعده ......خمس ايام لحد ما الهانم نزلت وقالتلى معلش يا نور نسيتك خالص!!!!!!!!!!!!ولايهمك حضرتك عادى

اخدت المرتب وعزمت بنصه العيله وبالنص التانى اشتريت دوشة"هبقى احكيلكم على دوشة بعدين"

ومرت الايام وجه  اخر الشهر التالى وتكررت نفس الاحداث وطالت المدة من خمس ايام لست ايام 

وعلمت مع الوقت وومع الرغى ان ده بيحصل مع كل الموجودين فى الصيدلية صيادله كانوا او مساعدين والكل مخنوق وهيفرقع

وبما انى كنت متغاظة وساكتة ولقيت الكل كده وبما انى حقنية شويتين وبحب اخد حق الناس طالما اقدر وطالما ماقدرتش اخد حقى

قررت انى اقولها.......مش على مرتبى طبعا لا عيب بردو ماتجيش على مرتب المساعدين الغلابة دول مابدهاش بقى طالما هى سايقه الزاهيمر لازم حد يفوقها

سنيت سنانى واتصلت عليها واقلتلها قالتلى بكل هدوء طيب يادكتورة افتحى الدرج وقبضيهم

اقبض مين حضرتك

قبضى البنات يا حبيبتى..........

حاضر

قفلت السماعه وانا فرحانة بانتصارى ورحت فرحت البنات وادتهم مرتابتهم واذا فجاءة اكتشفت الحقيقة المرة

دى ماقالتليش اقبضى انتى...........!!!!!!!!!

وعليها قبضت مرتبى بعد 10 ايام ماعرفش كان بردو زاهيمر ولا عقاب ليا علشان اتكلمت الله اعلم بالنوايا بقى

المهم انى اتعلمت درس انى لما ربنا يقدرنى وافتح صيدلية عمرى عمرى ما اخر مرتب حد من اللى هيشتغلوا معايا ابداااااااااااااااااااااا

يومياتى

                                                                   اول زبون


مساء الخير عليكم

التعامل مع الناس حرفة وموهبة وخصوصا لو فرض عليك شغلك تعامل يومى مع ناس مش يوميين

بمعنى انك تتعامل يوميا مع ناس مش ثابته وانت مكلف فى كل الاحوال وفى كل الاوقات وفى كل حالاتك المزاجية ان تبتسم فى وجوههم لانهم فى غالب الاحوال مرضى ده غير انهم زباين والقاعدة التجارية الشهيرة بتقولك ايييييييه


  "الزبون ديما على حق"


الكلام ده كله مادرستهوش فى الجامعه طبعا يعنىدى حاجة اتعلمتها من سوق العمل زى مابيقولوا


وانا واحدة من الناس والحمد لله دخلت السوق ده بدرى جدا يعنى اشتغلت اول ماخلصت امتحاناتى ماستنتش حتى لما النتيجة تطلع وكان شغل لا على البال ولا على الخاطر وخصوصا انى ماتدربتش فى صيدليات فترة الدراسة الا قليل جدااااااااا


خلصت امتحانى وقلت هناااام بقى وخصوصا انهم كانوا خاتمين الامتحانات بصيدلة صناعية وللى مايعرفهاش فيكوا فهى مادة الرخامة فى صيدلة المنصورة هى ودكاترتها وكل مايمت ليها بصلة ...........ماعلينا


صحيت تانى يوم على تليفون من صيدلانية اكبر منى  بتقولى انتىمش خلصتى امتحانات انا عندى ليكى شغل.........بينى وبينكم انا اتخادت شغل اي يابنتى ده انا الروشتة بالنسبالى طلاسم


قالتلى لازم من مرة اولى وكده كده دى خطوة لازم هتخطيها والصيدليه كويسه وهداية وانا مرشحاكى


بينى وبينكم انا اتمكعت كده مرشحانى دى يعنى شايفه ان يجى منى وماله اجرب


رحت تانى يوم الانترفيو مع صاحبة الصيدلية وطبعا سالتنى بتعرفى تقرى روشتات  قولتلها اه طبعا ده انا بريمو.......!.


قالتلى ماشى هتيجى تفتحى الساعه 8 وانا هبقى معاكى فى الاول


للعلم الصيدليه مش فى نفس مدينتى دى فى قرية جنبنا 


المهم رحت تانى يوم على اساس انها هتبقى معايا اتصلت 8 وربع تقولى انها مش هتعرف تيجى وانها متوسمة فيا خير وواثقه فيا...........!.!


قفلت سماعه التليفون وانا بدعى ربنا يسترها وفجاءة وانا لسه بخلص الدعاء لقيت واحد بلديتنا داخل الصيدليه


قمت وانا واثقه من نفسى كده وقولتله خير يا حج


قال:الله يسترك يابنتى انا بتمشى باليل شوفيلى حاجة تكون كويسة


انا:نعم؟؟؟؟؟؟؟


هو:بتمشى بالليل ولا مؤاخذه يعنى امال هى الدكتورة فين؟


انا:انا ياسيدى الدكتورة خير  بقى؟.......طبعا وانا دمى محروق هو بيسال عليها ليه 

                                          انا مش ماليا عينه


هو:طب ياستى هاتيلى حاجة تكون قوية كده تشيل الحكايه دى


انا:حكاية اى بقى فهمنى


هو:وبدء صوته يعلى.....بقولك بتمشى بالليل اى هو انا بتكلم اجنبى


انا:وبحاول اهديه     اه ياحج يعنى بتمشى وانت نايم مثلا مانا مش فاهمة بتتمشى
                 بالليل ازاى ولا مؤاخذه
هو: بمشى وانا نايم اى بس ! هو انتى لسه تلميذه ولا اى  يابنتى بدجل الحمام 
             كتير يعنى


انا:اسهال يعنى طب ماتقول كده من الصبح لازم يعنى تحورها"اى الاصطبحة اللى زى
                     بعضها دى"
               وابتسمت طبعا تطيب لخاطر الراجل اللى كان اول زبون اتعامل معاه فى حياتى ...................ومش ممكن هنساه ابداااااااااااا

لسة ممكن

تحت ضغوطات الحياة اليومية اجدنى احيانا اخرج من يومى بحالة من اليأس 

نعم يأس من ان يحدث جديد...........اى جديد

روتينية الحياة تكاد تخنقنى ......تكاد تحطم احلى مابادخلى من امال تحت عجلاتها

واغمض عينيى واجد دمعة تحارب كى تفر منها.........نعم مستحيل ان يتغيرشئ

ثم فجاءة ينبعث صوت بداخلىيقول لى..............لما مستحيل؟؟؟!!!

من المحتمل جدا ان تجدى غدا شئ جديد فى عملك

من المحتمل غدا ان اسمع خبر جديد يغير ترتيب احداث يومى 

من المحتمل غدا ان اسمع خبر جديد يغير ترتيب احداث عمرى باكمله

من المحتمل غدا ان اقابل شخص يلون لى حياتى

من المحتمل غدا ان ....................

نعم كل شئ من المحتمل ان يحدث غدا

سوف انتظر غدى هذا بفارغ الصبر لعله يأتى.. 

اخيرا هنبنى

اعتصامات واضرابات وجمع غضب وحاجات لا بتودى ولا بتجيب فى نظرى وبلد الله اعلم ماشية ورايحة على فين

ده الحال اللى انا حساه بقالى فترة كبيرة وجايبلى اكتئاب الصراحة

النهاردة حسيت ان فيه امل ان حد يعمل حاجة غير الكلام

سمعت حلقة بكرة احلى بتاعه عمرو خالد ولقيته مستضيف محمد صبحى وهو بيعلن عن فكرة مشروع بناء مساكن فى العشوئيات

هىماعدتش فكرة خلاص ده بقىمشروع له دراسة واتفتحله حساب للتبرعات كمان وده اللى خلى عندى امل

جمعوا او حصروا عشوائيات مصر وقرروا يبدؤا باكتر خمس اماكن متفرقه فى الجمهورية نبتدى نبنيا ونعمل فيها مساكن ادمية تحل مصيبة العشويات اللى محزمة البلد زى حزام الديناميت دى

الامكان هتبقى على ما اتذكر   القاهرة والاسكندريه وبورسعيد ومحافظتين  كمان ده مبدئيا

تم فتح حساب فى البنك المركزى وتحت اشرافه لتلقى التبرعات وكان اول تبرع اعلن عنه المشير طنطاوى من الجيش المصرى بمبلغ 50 مليون جنيه مصرى

كما تعهد الجيش ببناء 6000وحدة سكنية تحت اشراف الجيش فى مدة 6 شهور وطبعا الجيش اد كلمته

والاجمل كمان ان اى عامل بنا فى المنطقه العشوائيه اللى بتتبنى ان كان بناء ولا نجار ولا مبلط ولا اى صنايعى هيشارك فى البناء بتاع المساكن باجر

الفكرة بجد روعه وخطوة فعلا للامام بجد .......زتخيلوا معايا محتاجين كام 6 شهور لو كملنا بنفس العزم

وهتبدء حنان ترك بصفتها احد مشرفى جماعه الاغاثة الاسلاميه بحمله جمع تبرعات عن طريق الجمعيه من المصريين بالخارج تحت مسمى حمله 25مليار واللى ممكن جدا حسب التوقعات توصل ل 50 كمان

تخيلوا كده لو عملنا جمعة التبرع واتلم من كل واحد هيقف  فى الميدان خمسة جنيه او حتى جنيه واحد

افتكروا ديما ان مستشفى سرطان الاطفال اتبنت من تبرعات الشعب

افتكروا ديما ان جامعه القاهرة اتبنت بالاكتتاب وعن طريق مشروع التعريفة ايامما كان ليها قيمة

نا عن نفسى شايفة ان دى خطوة وغيرها خطوات كتير ممكن تتعمل

رقم الحساب يا جماعه للى يحب يشارك هو 555666|7 البنك المركزى

رجل المستحيل

عارفينه؟

اكيد فى ناس كتيرة منكم قرأت روياته وفى ناس منكم كمان شافت روياته فى ادين اخوات او اصحاب ....وممكن يكونوا اتريقوا عليهم كمان اعترفوا اعترفوا

وجايز بردو يكون منكم حد زى متابع السلسلة كلها .........بقول جايز

بداية معرفتى برجل المستحيل كانت وانا فى الصف الخامس الابتدائى يعنى تقريبا كده من حواااااالى .......سنة     ههههههه عمر بحاله اهو

كانت روايه  وجدتها فى ايد صحبتى واحنا فى درس العربى واخدتها منها اقراها وكانت البداية

بدأت اسالها عن اعداد تانية عندها..وبدأت ادور عليها عند اصحاب تانين وعند اصحاب الاصحاب لدرجة انى اتعرفت على ناس كتير من اصحابى بسببها

بدأت اخلى امى كل ماننزل المنصورة تشتريهالى وبدأت ارتبط جداااااااا بالصفات الخيالية اللى كان يملكها البطل "ادهم صبرى"

فى فترة من الفترات شكل ادهم صبرى صفات فتى الاحلام عندى ولقيت ده موجود كمان عند كتير من اصحابى

وصلت للمرحلة الجامعيه وفضل الشغف ده معايا واللى خلانى اجمع اى عدد ينزل واحرص على كده حرص خلىكتير من اصحابى يقولولى اكبرى بقى هو حد لسه بيقرا عن الراجل اللى بيضرب كل الناس ده؟

ولو ياجماعه انتم ليه زعلانين انا كده مرتاحة وبعدين مانتم بتتفرجوا على افلام جيمس بوند وسلفستر وهم بردوا بيضربوا كل اللى فى الفيلم ولاحد بيكلمهم ولا احنا مانصدقش الا الاجنبى بس

دفاع مستميت الصراحةوعن قناعة جدا يعنى

ولحد يومنا هذا لما اشوف اى حلقة من csi ايا كان بقى اسمها استغرب ليه ماعندناش من ده  ليه ماعندنا حاجة تعرف الناس على شغل مخابراتنا ولا شغل الامن عندنا دعايه زى الامريكان ماهم عاملين وهم خرافى لامكانيتهم الامنية نعمل احنا كمان

يعنىمش ناقصين كتاب ولا ممثلين ولا فلوس 

طب هقولكم على حاجة بسيطة انتم تعرفوا ان رجل المستحيل هو الشخصية الروائية الوحيدة فى تاريخ الادب العربى كله؟!وكل ماعداها عبارة عن سير لشخصيات تم سحبها من التاريخ واضافة صفات عليها

معظم الدول لديها ابطال خارقون
يعنى مثلا عندكم سوبرمان فى امريكا وجيمس بوند  وشرلوك هولمز فى انجلترا واحنا ماعندناش الا ادهم صبرى فى الوطن العربى.........

نرجع لبطلنا.......

فرحت جدااااااااا لما الدكتور نبيل فاروق صرح ان شخصية ادهم صبرى هى تحوير لشخصية حقيقية موجودة فى جهاز المخابرات المصرية وتتمتع بقدر كبير من المهارات اللى مصورها لينا الكاتب فى الاعداد

مازلت حتى الان من عشاق تلك السلسة
ومازلت حتى الان احب قراءة تلك الاعداد للمرة المليون

ومازلت حتى الان اجمع فى اعداد مطبوعه ومش على النت لان قراية قصة مطبوعه متعةمابعدها متعه.........................

خمسة فرفشة

بما انى مش لاقية حاجة اكتبها النهاردة والمزاج مش رايق خااااااااالص ماااااااااالص قلت اضحكوا حبة واعرف رائيكم كمان فى الفديو ده

هابى تايمز ليكم كلكم

صديقى الوحيد

                                                                    كتابى



انه صديقى الوحيد الذى احرص كل ليلة منذ سنوات على ان يكون اخر من اراه كل مساء

ملاذى من الهموم والافكار واحيانا من الذكريات

لم يخذلنى يوم ففوق المعرفة والمساعدة على ترتيب الافكار وتقويم التفكير وتغذية العقل وكل ماهو معروف له من فواد

رغم كل ذلك هو صديق شخصى لى دائما يتلون بلون مودى والحالة النفسية التى امر بها

دائما اجده عند حسن ظنى به فهو اوقات الهدوء عميق ,واوقات الفرح لطيف خفيف,واوقات الملل مسلى جدا ومبهج

يتشكل بروحى وحالتى فلو سيطرت عليا حالةمن الرومانسية اجده ولو سيطرت عليا حالة من الجد اجده حتى حالات الكئابة والحزن يحتملنى فيها

ان اردت ان ابكى يساعدنى وان اردت ان اضحك يساعدنى

هو صديقى الابدى

ولكن منذ فترة ولاول مرة اشعر انه غاضب منى واشعر ان حروفه تتساقط

اشعر انى لاجد فيه السلوى وانه لايجد من الكلمات ما يلقيه على مسامعى كل مساء


امسكه بين يدى املة ان يأخذنى كعادته من عالمى الى عالمه ولا يتركنى الا وهو مطمئن انى  قد اغلقت عيونى وغرقت فى الاحلام

ولكنه لم يعد قادر على ذلك!!!!!!

احاول ان اساعدهوان احتضن كلماته بنظراتى ولكنى اجد تلك الكلمات تتداخل وتغير ترتيبها حتى تفقد معناها وتسقط.......نعم تسقط الى حيث لا استطيع اللحاق بها

اغلقه حائرة واحاول ان اعتمد على نفسى بدونه

لست ادرى هل الخطئ خطئ انا ام خطئه هو؟!!!!