السبت، 12 نوفمبر، 2016

أمى

حبيبتى ماما
ماعرفش ليه حاسة دلوقتى انى عاوزة أكتبلك.. يمكن لأنى مش هعرف أقولك الكلام ده بصورة مباشرة إنتى عارفانى بقى مابعرفش أعبر عن اللى جوايا بالكلام بس حسيت انى عاوزة أقولك بحبك أوى  .. بحب عنيكى أوى يا ماما عنيكى اللى محيرة الكل بلونها دى أنا بعشقها  بعشق لمعتها لما تبقى فرحانة وبعشق ضحكتها وبعشق نظرتها اللى ديما قلقانة عليا ونفسى أعرف هتبطلى تقلقى عليا  أمتى .. حاسة ان النظرة دى هتفضل ملازمكى يا أمى حتى بعد ما تجوزت وبقى ليا بيت .  بعشق صوتك وانتى بتغنى وصوتك وانتى فرحانة .. وبعرف صوتك لما بتزعلى .. أه لو تعرفى إحساسى لما بتزعلى .. بحس ان الدنيا صعبة ومش عارفة أعيشها..
عارفة يا ماما انى شبه بابا  جدا بس بفرح لما الناس تقولى انى أشبهلك فى الملامح  أشبهلك فى التعامل ..
أنا اتعلمت ازاى أحب جوزى بسببك على فكرة .. لما شفت انتى كنتى بتحبى بابا ازاى قررت أبقى زيك 
رغم انى عارفة ان كل أم وأب بيحبوا عيالهم لكن جوايا إحساس إن ماحدش حب حد زى ماحبتينى أنا وأختى ولا حد بيشيل هم ولا بيجى على نفسه علشان خاطر عياله زيك  .. مبالغة ؟  وماله لو ماكنتش أبالغ معاكى أبالغ علشان مين؟
نفسى أفرحك ونفسى ترتاحى .. لما بصتلك النهاردة لقيت ملامحك كبرت اوى وبان عليكى السن أوى .. أه لسه جميلة زى مانتى بس برده كبرتى .. خفت يا أمى .. ماعرفش ليه خفت أو عارفة بس مش عاوزة أفكر .. ربنا يديمك ليا نعمة حبيبتى ويديكى الصحة  ويقدرنى أرضيكى وأفرحك

ليست هناك تعليقات: