الأحد، 23 نوفمبر، 2014

# تجربة كائن فضائى








كنت بتفرج على عسيلى النهاردة وابو حفيظة مستضيفه فجابوا سيرة الاعلام..فقاله بدون ذكر اسماء لو فلان وفلان هم نجوم المجتمع يبقى فيه مشكله والمصيبة انه مابيطلعش يوم واحد فى الاسبوع لا..ده كل يوم كل يوم.. 

يعنى هو زى التعليم .. زى ما بيبوظ مخ العيل بالاستمرارية ده نفس الحكاية..

اقترح العسيلى تجربة.. قال هات اى حد ان شالله كائن فضائى وخليه يتعرض لنفس البرنامج كل يوم  ولاحظ التغيرات اللى هتظهر عليه!!

انا هفترض مثلا اننا جيبنا الكائن الفضائى وعرضناه يوميا مثلا ل وائل الابراشى.. بغض النظر بقى عن انك معاه ولا ضده .. هل هو سيساوى ولا ربعاوى..

اعتقد ان الكائن ده هيتحول لحد شكاك موسوس جدا.. شايف ان اى حد عكسه هو ارهابى .. هيكون شخص كاره جدا لمدارسنا عنده هوس جنسى رهيب وخايف على عياله .. خايف يخرجهم برا باب الشقة ليُغتصبوا من اصحابهم او ابن الجيران او البواب او المدرس او اللى بيبيع اى حاجة فى الشارع..!!

طب تعالى ننفذ نفس التجربة مع  مصطفى بكرى بغض النظر برده عن رأيك فيه كسياسى او من اى مجهة نظر تحب تبصله منها..

الكائن الفضائى  هيتأكد ان مصطفى بكرى ماسك ذلة على الناس والحكومة والرؤساء والا ازاى هيقدر يعرف كمية الاسرار اللى بيطلع علينا هوا كل يوم يقولها دى واللى ماحدش بيطلع يكدبها .. وكأن الحقيقة فى بلدنا بيتعمل منها نسخة  وتتسلم يد بيد لمصطفى بكرى !!

ليست هناك تعليقات: