الأحد، 21 أكتوبر 2012

عن .....انى لسه بعرف احلم!!







كنت حاسة انى بطلت احلم من فترة..

اه مابقولش ده..اه بغنى وبقول لو بطلنا نحلم نموت..

اه بتكلم عن الاحلام مع اصحابى و فى المدونات وسعات كمان بتاخدنى الجلالة وبتكلم عنها هنا فى المدونة..!

بس انا من جواية عارفة انى بطلت احلم..بطلت امنى نفسى بحاجات وفى الاخر مابتحصلش..

عارفة انه نصيب..وعارفة ان اللى حلمت بيه وسعيت له وماتحققش يبقى ربنا مش كاتبهولى..وعارفة ان ممكن يكون الغلط منى وانى انا اللى جايز اكون ماسعتش صح وماشتغلتش على حلمى صح وجايز كمان اكون سعيت للحلم الغلط من الاول!!

بس المحصلة ان غالبية احلامى ماتحققتش..وفى احلام منها خلاص ماعدش ينفع تتحقق..مش يأس بس فى نوعية احلام بتبقى مصحوبة بوقت لو عدى منك خلاص خلصت..
وفى نوعية تانية من الاحلام بتبقى مربوطة بالناس..ودى كتيرة عندى الصراحة  ودى بقى مشكلتها انها حتى لو بذلت فيها اقصى مجهودات علشان تتحقق فى اطراف تانية لازم تشاركك فيها  ودول فى حالتى يا اما مش بيعملوا اللى عليهم يا اما مش بيجوا اصلا..وفى الحالتين الحلم باظ..

المهم..انا بقى تعبت من كتر ما الاحلام دى مش بتتحقق وتقريبا علشان ابطل ازعل  ..بطلت احلم..

لحد ما جه اخى العزيز خالد زين صاحب مدونة سواح فى ملك الله واقترح عليا فى تعليق له على الفيس انى انزل كتاب زى مجموعة المدونين اللى ربنا وفقهم وعملوا ده..

ساعتها تنحت لشاشة الكوبيوتر ولقتنى وبصوت عالى بقول انا؟ انزل كتاب باسمى؟

هو ساعتها انشغل وقعد يدور فى المدونات على خطوات اصدار كتاب وانا سرحت بقى..

ياترى هيبقى اسمه ايه كتابى العزيز ده..ياترى هكتب فيه ايه..ولو جمعت كل اللى كتبته فى المدونة او حتى فى اجندتى ينفع يبقى كتاب..؟

طبعا اول حاجة فى الكتاب لازم اعمل اهداء..هعمل اهداء لروح ابى الحبيب ولامى واختى وامنية صحبتى واكيد للاستاذ خالد اللى طالع عينه وعمال يدورلى دلوقتى ده..

ياترى اختار شكل الغلاف ايه ولونه..اه لونه ده مهمة جداااا..لازم يبقى لون شبهى كده :)

ولا حفل التوقيع ..يوووووووووووه ده هيبقى حتة يوم ..اكيد كل اصحابى هعزمهم وهشوف كل المدونين ..هشوف سهاد ودعاء اللى متشحططة علشان اشوفهم ومش عارفة :) اخيرا هقابلكم يابنات ده حفل توقيع كتابى وممنوع اى اعذااار....

تقدروا تقولوا وبكل ثقة انى حلمت بكل التفاصيل.. ده انا جالى احساس بالخوف المصحوب بالفرحة كمان بغض النظر عن انى مش عارفة هكتب فيه ايه..

الحلم ده اخد منى طول الليلة دى وصحيت تانى يوم لقتنى منشكحة جدا...

اينعم بالليل عرفت ان المسابقة بتاعة النشر لمن يستحق خلصت...واينعم لما فكرت شوية لقتنى مش اد الحكاية لانى بكتب لنفسى اكتر وحاسة انى ماعنديش مادة تنفع للنشر
 كل اللى املكه حبة افكار فى الغالب غير مرتبة ولا تصلح انها تترتب اصلا لانها عبارة عن احاسيس ساعة ما بحسها بكتبها يبقى هرتبها ازاى؟؟؟

اينعم الحلم ماكملش..كالعادة

بس ساب فيا تأثير حلو ونجح انه يخلينى مبتسمة طول اليوم ده من برا ومن جوا كمان :)

احلى حاجة بقى..

انى طلعت لسه بعرف احلم...

هناك 23 تعليقًا:

سواح في ملك اللــــــــــــــــــه- يقول...

لا يانور لي

وانشاء الله هنشوف كتاب قريب للعزيزةنور

نشوف بس ازاي ممكن يتنشر ويتوزع

لآن اخوكي معندوش فكرةعن موضوع الطباعةدي
وانا دورت زيك بس مش عارف اعتر علي الصفحة اللي دخلتها قبل كدة

ممكن تسألي هبة فاروق أو دينا أورؤي

وتسميه كمان يوميات بنوتة مصرية

انتي عندك متفرقات جميلة في الكتبة

reemaas يقول...

سواح في ملك اللــــــــــــــــــه-

:)

مانا يا خالد سالت موناليزا وعرفت ان مسابقة النشر لمن يستحق خلاويص خلصت :)

سواح في ملك اللــــــــــــــــــه- يقول...

مش لازم مشروع النشر لمن يستحق

ممكن اي دار نشر تانية

باحث عن حب يقول...

من حقنا نحلم
الحلم مش بفلوس
الاقتراح
جميل
ولو كان هيغير فى حياتك ابداى فيه
وربنا يكرمك

ابراهيم رزق يقول...

بصى يا نوووووووووووووووور

لو بطلنا نحلم نموت
احيانا بنحس ان احلامنا كانت صغيرة من كتر ما احلام كبيرة اتحققت
الحلم لو اتحقق فقد معناه لانه تحول الى واقع
و انا بستغرب ازاى لحد دلوقتى مفكرتيش فى الكتاب
دور النشر كثيرة وربنا هيوفقك بأذن الله
و تحققى كل احلامك اللى هتتحول الى واقع

تحياتى

eng_semsem يقول...

ممكن الحلم حتى لو مش اتحقق بالصوره اللي كنت عايزاها يبني جواكي حلم تاني وممكن يتاجل ويظهر تاني في ميعاد احسن ليكي
ربنا يوفقك للي فيه الخير
تحياتي

محمد سلامة يقول...

يبقى المشكلة انك مبتحلميش
المشكلة انك مش عارفة تحلمى صح
نصيحتى لو مش حاسة ان خطوة النشر مهمة بلاش
كتير نشروا والسوق مليان كتب بلا قيمة
تحياتى

حنين محمد يقول...

صباح الغاردينيا نور
:)
والله انتي عسل وقلبك ابيض وبحبك وبحب كل حروفك العفوية وبجد انا مع خالد وبشجعك على فكرة الكتاب انا فاكرة حاجات بتكتبيها بتنفع للنشر وزي ماقال خالديوميات بنوتة مصرية عنوان جميل واوعي تبطلي حلم :) "
؛؛
؛
لروحك عبق الغاردينيا
كانت هنا
Reemaas

نهر الحب يقول...

ريموووو
حبيبيتي
متتصوريش انتي فرحتيني قد ايه لما لقيت اسمي موجود في حلمك
:))))

بس احلي حاجة الاحلام
والله بتحقق يا ريمو صدقيني انا بقولك اهو
وحلم الكتاب ده علي فكرة انا حلمته كتير وحاولت فيه كتير وموصلتش لحاجة بس عارفة انه ممكن يتحقق في يوم لما ربنا يريد

بس
كل سنة وانتي كل احلامك متحققة ان شاء الله

Bent Men ElZman Da !! يقول...


فكرتينى بالظبط بتجربتى مع الاحلام يا نور
عمر ما فى حلم من احلامى اتحقق وكنت مقتنعه انى مقصره وكسوله
بس لو فكرتى فيها شويه
هتلاقى فعلا ان فى احلام مستعصيه
مش عشان هى مستحيله
لكن بيكون كل الظروف المحيطه بينا ماشيه عكس خالص ما احلامنا ماشيه

لما حد بيسألنى نشرتى الكتاب ازاى
بقولهم الكتاب ده جه بالصدفه ولحد دلوقتى مش مصدقه ان حلم من احلامى اتحقق
وكنت فاقده الامل نهائى وقدمت اصلا بعد ما كان باب التقديم اتقفل
بس كان فى محاولات بسيطه قبلها انى انشر حاجه

مسابقه النشر لمن يستحق خلصت
بس فى مليون طريق تانى تقدرى توصلى منه
يعنى فى دار اسمها دون كنت بعتلهم قبل كده وطلبوا ابعتلهم الكتاب وهيقولوا رأيهم فيه
جربى مش هتخسرى حاجه ابدا بالعكس ممكن تكسبى كتير ولو حتى هتكسبى محاولتك لتحقيق حلمك ده
وده لينك البيدج بتاعه الدار على الفيس

https://www.facebook.com/DarDawen

وممكن زى ما خالد قالك الكتاب يبقى فيه مواقفك الشخصيه اللى حكتيها هنا

اسفه انى طولت عليكى
بس عايزه اقولك ان الحلم مهما كان مستحيل فيه امل ولو بسيط انه يبقى أقرب لو حاولنا :)

reemaas يقول...

سواح في ملك اللــــــــــــــــــه-

البحث مستمر اهون يا خالد :)

reemaas يقول...

محمود(باحث عن حب)

يااااااارب يا محمود بحاول اهون

reemaas يقول...

ابراهيم رزق

واحد من الاحلام دى مرتبط بيك على فكرة يا ابو زياد :)

reemaas يقول...

eng_semsem

صح ياسمسم ربنا يعينا بس بالصبر

reemaas يقول...

مسلم مصرى

وده مخوفنى مش عاوزة ابقى كماله عدد خالص

reemaas يقول...

ريـــمـــاس

:) هحاول والله يا ريموسة

تسلميلى حبيبتى

reemaas يقول...

نهر الحب
هنحققه ان شاء الله ياسوسو قريب

اكييييييييد انتى فى حلمى

reemaas يقول...

Bent Men ElZman Da !!

ربنا يخليكى يا دينا على جرعة التشجيع دى ونفسى الصراحة

انا بعتلهم رساله على الفيس وربنا يقدم الخير

E73 يقول...

ريري

مش هقولك غير ضاقت ولما استحكمت حلقاتها فرجت وكنت أظنها لا تفرج :)

وعلى رأيك أحسن حاجة انك طلعتي لسة بتعرفي تحلمي

ربنا يحققلك أحلامك ويكتبلك فيها الخير يا رب

reemaas يقول...

E73

ونعم بالله صح ربنا كبييييييييييييير

غير معرف يقول...

طبعا يا روحى لازم نحلم نحلم نحلم كدهو كدهو كدهو

وعلى فكرة يا جماعة ريمو نور خطيبتى روحى حبيبتى
عقبالكم كلكم يارب
اسلام
مجنون نور

reemaas يقول...

غير معرف

ربنا ما يحرمنى منك يارب وتفضل ديما مجنون نورا :)
ويارب عقبال كل اللى لسه مارتبطوش

غير معرف يقول...

الله كريم :)