الأحد، 18 ديسمبر 2011

سواد العسل





عارفة يا بلدى سواد العسل.....اهو ده اللى حالك له وصل!

مش بتكلم على احداث ولا بتكلم على مصايب بتنزل فى دماغنا..خلاص اتعودنا على ده

اتعودنا ان بعد اى حاجة حلوة لازم تحصل كارثة بقى سناريو محفوظ وممل....

لدرجة انى بحاول اتخيل حجم الكارثة اللى هتحصل بعد انتخابات المرحلة التالته..

تفتكروا ممكن قنبلة نووية تترمى !!!!!! ولا الهرم ينفجر؟

بعيدة الحكاية؟!...لا ماعتقدش بعد حريق المجمع العلمى كده كله ممكن....

ومع ذلك مش ده اللى خانقنى برده كده ...

اللى خانقنى حلم الديموقراطية اللى اصبح بالنسبالى كابوس...

لما قامت الثورة ماكنش هدفها اطاحة نظام كان هدفها حرية وعداله اجتماعية وكرامة وعلشان كده انا ايدتها وعلشان كده اختلفت مع نهايتها وقتها زى ماناس كتير اختلفت وكانت شايفه ان مافيش داعى للتنحى وممكن نكمل كلنا لحد شهر 9 وكفى الله المؤمنين شر القتال......

وتداعت الامور وحدث ماحدث وعيشنا واقعنا.......واقع بناء مصر حرة ديموقراطية

كل ده معروف ومعروف كمان كم الاحداث اللى حصلت بعده من استفتاء ومظاهرات واعتراضات لحد ماوصلنا لخطوة الانتخابات .......بداية النهاية للفترة دى 


فى كل مرحلة من المراحل دى كل مواطن كان بيبقى ليه رائ يا اما مع او ضد وده كان مظهر الجمال بالنسبة ليا


ان المواطن بقى بيتكلم فى السياسة عادى من غير خوف ومن غير ماحد يتريق عليه  بقينا كلنا لينا رائ وده  اول ابجاديات الحرية  


لكن الواضح اننا هنقف عند الابجدية دى ومش هنكملها جملة مفيدة..........

لما اخاف اكتب رائ علىstatusفى الفيس او هنا فى اى مدونة لاصدقائ  لايتقال عليا انى عميلة او انى مش فاهمة

لما يتهمش رائ ويتفه لمجرد انى قلت نعم فى الاستفتاء ....يتقال انتم عبط وصدقتوا كدبه الاستفتاء


لما مشاركاتى فى ابداء رأى تبقى مجرد عبط.......يبقى الديموقراطية كابوس


لما يتقالى امبارح فى احد المناقشات على الفيس انتى من الاول كنتى ضد الثورة بتتكلمى ليه يبقى الديموقراطية مجرد حلم.......


لما تقول انا مش عاوز الاخوان يمسكوا او السلفيين يتقالك انت علمانى ليبرالى وضد الاسلام تبقى الديموقراطية  اعياء وليست خلاص


لما يتقال انتم مابتتعلموش ابدا من التجارب والتحرير كلامه هو الل بيمشى بالزوق او العافيه يبقى الديموقراطية كابوس ........


لما يتقال اختار ان تكون مع احرار التحرير او مع عبيد العباسية يبقى ده كارثة محققة وبكل المقاييس
لما يتقال ان اللى خرجوا فى التحرير مؤخرا  هم رجالة مصر وماغير ذلك هم اموات منتظرين اللى يدب فيهم الروح يبقى على الدنيا السلامة




لما اعز الاصحاب يدلتوا بعض او يعملوا بلوك لبعض لانهم اختلفوا فى الرأى السياسى  ومحترموش الاختلاف ده وماقدروش يوصلوا لنتيجة بسيطة وهى ان كل يحبها على طريقته يبقى الله يرحمك يا ديموقراطية

لو لسة بتخاف انك تكتب رائيك على الول عندك او فى مدونتك  لتخسر اصحابك او تتفهم غلط يبقى احنا محتاجين نعيد حسابتنا

لان الخوف لسه كابس على ارواحنا اختلف صحيح من خوف من نظام لخوف من مجرد الكلام بس اسمه خوف


امامنا الكثير حتى نتعلم الديموقراطية......حتى نتعلم ان نستمع للطرف الاخر دون ان يكون  هناك حكم مسبق على رائيه بالجهالة او العمالة او العبط او حتى الخطئ


امامنا الكثير حتى نحترم قناعات الاخر......امامنا الكثير والكثير  والى ان يحدث ذلك


سنظل فى ذلك الصراع وسنفقد الكثير من الاصدقاء فى طريقنا لمجرد اننا اختلفنا ولم نحترم بعض


امامنا الكثير حتى نتعلم انه ليس شرطا ان اكون من التحرير حتى اكون ثورية او وطنية وليس جرما ان اختلف مع التحرير  او ان اختلف مع العباسية


وليس عيبا انى كنت ثوريا فى 25 يانير واختلفت قناعاتى .......


ياسادةكلنا مصريين .......كلنا بنحبها من مواطنين لمجلس لشرطة لحكومة ولازم نوصل لصيغة معينة نتفاهم بها 


نتفاهم حتى نعبر ببلدنا لبر امان وليس للدفاع عن قناعاتنا



هناك 18 تعليقًا:

هبة فاروق يقول...

عسل اسود وطعمه بقى مش عسل بقى مر
بجد حال لا يسر عدو ولا حبيب
يارب تنتهى هذه المأساه قريب
سلمتى يا مصر من كل اذى
معنديش حاجه اقدمها غير الدعاء
تحياتى يا بنوته

سواح في ملك اللــــــــــــــــــه- يقول...

تحولوا من نفاق مبارك

الي نفاق الثوار

هذا حال الاعلام

موووضة الثورة

ايوة موضة الثورة

مين اللي قال ان الاعتصام في الظروف

اللي البلد فيها لايجرم

الاعتصام في مثل هذه الظروف جريمة

كل من هب ودب بيهاجم وبس

طب بتهاجم مين وليه

هو مش فاهم مووووضة

اه الموضة دلوقتي عغشان تبقي بطل قومي تروح التحرير

تثور او تعتصم لاتفه الاسباب

قال ايه عشان مصر

مين قال ان مصر عايزةثورات دلوقتي

مصر عايزة تتبني ويتجمل وجهها

معاكي يانووور

وموافقك في كل كلمة

انتي قلتي كلمة حق الان في وجه سلطان جائر
(والسلطان الجائر هنا مدعوا الثورة))
لايحكموا البلاد ولانرتضي بحكمهم

ولايعجبنا منهجهم ولا اسلوبهم

Emtiaz Zourob يقول...

نفس اغمض عين وافتح عين والاقي كل الأمور انتهت على خير في مصر الحبيبة .. متى يا ترى ؟؟

ربنا معاكم ..

رحاب صالح يقول...

انا كمان زي هبة فاروق
مش عارفة اقول حاجة غير يارب سلم مصر من كل سوء بيحصل فيها وبدعي انه ميحصلش سوء اكتر
بجد خايفة اووي مع اني مش ببين خوفي

faroukfahmy يقول...

اتجاهك المتعدد فى تناول الامور والموضاعات حاز كامل اعجابى
اضم دعائى الى دعاء ابنتى هبه بان تسلم مصر من كل سوء

faroukfahmy يقول...

اتجاهك المتعدد فى تناول الامور والموضاعات حاز كامل اعجابى
اضم دعائى الى دعاء ابنتى هبه بان تسلم مصر من كل سوء

ابراهيم رزق يقول...

الديمقراطية لا يتم تعلمها الا بالممارسة

دعينى نتعلم نصيب و نخطىء حتى نتعلم

الضوء المبهر بعد السواد الحالك دائما ما يزغلل العيون
هذه ليست المشكلة
المشكلة فى اصحاب المصالح الذين يرتدون اثواب الملائكة و الناس مصدقاهم
تحياتى لكى و لا تخشى ان تقولى رايك حتى لو كنتى الوحيدة المقتنعة به
لكن الذكاء الا نغلق عقولنا على افكارنا ربما تكون خطأ

نيللي علي يقول...

كل إنسان حر فى رأيه ..ربنا خلقنا أحرار مش عبيد ..وعلى فكره اسهل حاجه الشتيمه والأتهامات ,بس اللى بيشتم ويتهم هو اكيد مش فهم اى حاجه لأن الصعب هو الكلام بهدوء والأقناع والأدب

نيللي علي يقول...

احنا أصلا مش فى عصر الديمقراطيه ,أحنا فى عصر الهبل الديمقراطى..

وتسلمى على كل كلمه كتبتيها

nour alqamar يقول...

بالتوفيق لك يامصر العظيمه وربي يحمي الشعب ..
مع تحياتى لك
نور

رحيق الورد يقول...

مساء الخير نور ..
الله يحفظ ومصر الغالية وجميع المسلمين والبلدان العربية من كل سوء وشر
وان شاء الله تتحسن الاوضاع ويصير خير
تحياتى لك
ياسمين

AhMeD RaDy يقول...

بنوتة مصرية

مش هحاول اشوف التعليقات عشان اعرف تعليق حتى لو اتكرر مع حد

لكن بصى

المشكلة على فكرة مش فى الاختلاف ولا المشكلة فى ابداء الراى .. انا شايف ان الناس بقى عندها قدرة كبيرة اكبر بكتير من الاول


لكن اللى بيحصل هو قلب للحقائق عملية انكار جميل فظيعة ومفظعة .. الخيانة وقلة الادب والدمار والهدم بقى التحرير !!!

مع ان التحرير هو اللى بنى وخلى الرجالة رجالة بجد !

مش عارف بقى هو يتقال ايه اساسا بس بجد الشباب هناك اثبتوا ان احساسهم الصادق ومطالبهم بالتغير اليوم وليس الغد هو الشئ اللى بجد

احنا بنتكلم بسبب دماء الشهداء والمصابيين ولولا دمهم كان فى ناس كتير هتفضل زى الفيران بالظبط !

عملية المساومة المعنوية اللى بيعملها الجيش هى بجد المصيبة !

امنك ولا كرامتك .. الحرية ولا اكل عيشك !!!!!!!!!

ولكن شوفوا ربنا بيكشفهم كل يوم واشارات واضحة اوى اوى اوى اوى !

افهموا بقى يا اصحاب العقول يا اولى الالباب

فكروا ... فكروا ... فكروا ! وبعدها هتكتشفوا ان التحرير هو التحرير

بالمناسبة صحيح

هفضل اكرارها فى كل مكان

كل واحد بيتظاهر فى مكانه الاحرار فى التحرير والم..... فى العباسية !!

اه صحيح يا ترى لو حسنى كان اعد لغاية دلوقتى كان ايه اللى حصل !

وليه فى 18 يوم بس تم تسليم السلطة !؟

غير معرف يقول...

صباح الغاردينيا نور
فعلاً الي حصل في مصر الفترة الاخيرة
بقى مزعج بس مش للمصريين بس
لينا كل ولكل شخص بيحب مصر
بجد مصرماتستاهلش الي بيحصل "
؛؛
؛
لروحك عبق الغاردينيا
كانت هنا
reemaas

دعاء العطار يقول...

لسه يانور قدامنا كتير اوى عشان نتعلم الديمقراطية ونحترم وجهات نظر بعض

المهم ان مصر تعدى الفتره دى ع خير يارب

Unknown يقول...

(نتفاهم حتى نعبر ببلدنا لبر امان وليس للدفاع عن قناعاتنا )

هو ده المطلوب .. ربنا يبارك في قلمك

;كارولين فاروق يقول...

اعتقد ان القنوات الخاصه اصبحت
تتسابق علي خراب البلد متخيلين
انهم غير مفهومون لدي الشعب
عنوان سوادالعسل شدني كثيرا
واعجبني وتحليلك في منتهي الدقه
والعمق وانا معك في وجه نظرك
وربنا يسلم مصر من كل شر
تحياتي

جايدا العزيزي يقول...

ياسادةكلنا مصريين .......كلنا بنحبها من مواطنين لمجلس لشرطة لحكومة ولازم نوصل لصيغة معينة نتفاهم بها


نتفاهم حتى نعبر ببلدنا لبر امان وليس للدفاع عن قناعاتنا

هو ده الكلام يا احلى بنوته

كل كلمه مليون لايك

برافو عليكى

مقال رائع غاليتى استمرى

تحياتى

Bent Men ElZman Da !! يقول...

احنا بكل اللى بيحصل دلوقتى عايشين فى كابوس اصلا
ولسه للاسف مش قادرين نتقبل فكره الاختلاف فى الرأى
وكتير شايفين ان اللى بيختلف معاهم فى الرأى جاهل ويستحق القتل!!
فى ثقافات كتير اوى محتاجه تتغير عندنا