الجمعة، 23 ديسمبر 2011

على الهامش





بعيدا عن العراك الحوارى والاختلاف السياسى القائم بيننا بقاله اسبوع اهو  حابة احكيلكم على حبة مواقف تعرضتلها فى الاسبوع اللى فات ده 

المكان:  هيكون فين يعنى اكيد الصيدلية.......

اول موقف:زبونة داخلة عليا الصيدلية تقريبا كده فى الاربعينات من عمرها   اخدت منها الروشتة و
***********           لقيتها بتعلق على الاخبار اللى شغالة فى التليفزيون
                الزبونة:ياه يا دكتورة انتى لسة عندك قدرة تتابعى اخبار ده انا اعصابى تعبت
                           انا:هعمل ايه بس ادينى بشوف التطورات
                الزبونة:طيب على كده قررتى تنتخبى مين ؟
                انا:هتخب فلان وفلان والحزب الفلانى وسألتها من باب الذوق وحضرتك؟
                الزبونة:لا انا مش هنتخب حد لا فى المجلس ولا الرياسة
                انا:طب المجلس وممكن افهم لكن لرياسة لاء ليه؟!
                الزبونة:لانى ضد النظام الرياسى اصلا وشايفة ان كل ده غلط من اول ثورة يوليو  
                        لحد النهاردة ونفسى النظام الملكى يرجع تانى
                  انا:ماعلقتش وصرفتلها العلاج من سكات ............

    ************************************************************

الموقف التانى:
*********** الزبون كان تقريبا بتاع 18 سنة او 20 مش اكتر وبردوا داخل ياخد روشتة وكان
                شغال فى التليفزيون الراجل رئيس الحزب الاشتراكى الثورى اللى طلع من يومين
                وكان بيشتم فى الجيش وبيدعوا الشعب لتسريح الجيش كله ! 

                الزبون:لا حول ولا قوة الا بالله ده كلام ده  ازاى سامحين للعالم دى  تطلع
                       تتكلم كده
                 انا:عادى ماهو ده من اشكال الديموقراطية المغلوطة اللى فى البلد
                الزبون :عارفة حضرتك حل المشكلة دى اى؟ ان الحرب تقوم واى بلد تهجم 
                        على مصر.......ادعى معايا ان الحرب تقوم
                   انا:وحرصا منى على قواعد الادب المعروفة صرفتله العلاج من سكات....
 *********************************************************

الموقف التالت: وده لسه طازة امبارح بالليل ... مجموعه من الاولاد جابوا سلم وطلعوا علقوا 
                لافته دعايا لحزب الحرية والعدالة من العمود اللى جنب الصيدليه لحد العمود 
                المقابل له من الطريق
                وشووية ومجموعة اولاد تنايين  علقوا لافتة دعايا لحزب النور من نفس العمود 
                 لنفس العمود التانى ووصلوا اللافتتين ببعض
                 شوية ومجموعة ولاد تالتين علقوا لافتة تالته لحزب الوفد على نفس المكان ولكن 
                 تحت اللافتيين الاولنيين بينى وبينكم انا استغربت اى الغباء ده ياربى!!!

                 شوية وجت عربية لورى كبييييييرة وارتفعها عالى جدا اخدت كل اللافتات دى 
                  فى طريقها ومشيت:D

                 شوية كده ولقيت ناس كتير عمالة تتخانق مع بعض وشتايم بقى وضرب وكده
                 طبعا متخييلين السبب...
                 ايوووووون كل مؤييدن حزب مسكوا فى التانيين واتهموهم انهم بيقطعوا الدعايا 
                  بتاعتهم والموضوع كبر والشرطة نزلت لان فى ناس اتتعورت من الضرب وانا 
                  هموت وانزل اقولهم  اللى حصل بس خايفة حاجة تيجى فيا ........
                 لحد ما الظابط اقترح عليهم يسألوا المارة فى الشارع يمكن حد شاف  اللى عمل
                  تلك العملة الشنعاء.....
                  وبما انى المحل او المكان التجارى الوحيد فلقيت الظابط ووراه الناس دى كلها
                   داخليين عندى لسؤالى 
              الظابط:   معلش يا دكتورة ماشوفتيش مين سبب اللى حصل ده من الجماعة دول
                   وماتخافيش ماحدش هيقدر يتعرضلك.!!!! 
              انا: اه شفت......اللورى حضرتك وللاسف ماجاش فى بالى اخد رقمه........!   

هناك 25 تعليقًا:

سواح في ملك اللــــــــــــــــــه- يقول...

هههههههههه جميلة حكاية اللوري دي

بس مش ملاحظة ان في تحسن في معاملة الشرطة

بصي كنت بجيب فاكهة عقبال عندك كدة

والست الفكهانية دي ست كبيرة كدة وطيبة

دخلت عليهم كانت بتتكلم في السياسة

هي وزبون تاني

وكانوا بيتكلموا في الاوضاع الحالية

اترقبت حديثها

كانت بتقولله بص يابيه

قالها ايوة ياستي

قالتلة احنا شعب معقد

يعني لو عسكري ضربنا يبقي كل العساكر وحشين

لوالرايس اللي فات وحش

يبقي كل الريسا وحشين وحرامية

بناخد كل حد بذنب التاني

عجبني كلام الست دي

وحسيت ان عندها علم اكتر من كتير متعلمين

تحيتي يانور

reemaas يقول...

سواح في ملك اللــــــــــــــــــه-

اه فعلا والله يا خالد انا كمان عجبنى رائيها جدا وفعلا العيب ده موجود فينا من وسع يعنى

reemaas يقول...
أزال المؤلف هذا التعليق.
ابراهيم رزق يقول...

حمد الله على السلامة
ايوه كده سيبك من السياسة

انا لسه جاى من التحرير اهو
و مش هاقولك حصل ايه
هههههههههههه
قلت امسى و اشوف فيه ايه
تصدقى انا كنت زمان بحب الحوار و الكلام
مع الناس البسيطة و الجميلة دى
بس بتنرفز من نوعية حوار الشاب الثانى لا اعرف هل هو جهل او لا مبالاة او من نوعية نحن لا شعب لا تنفع معنا الديمقراطية
لكن الست الاولى وجهة نظر يجب ان تحترم
انا المشطلة التالتة لان الاحزاب عندنا تعتمد على الغرائز و ليس على المضمون
و الغرائز بالمفهوم الابراهيمى هى اثارة غرائز الفتنة و الطائفية
احيكى لانك عرفتى تكتبى بعيدا عن السياسة
تحياتى لكى

amiraali يقول...

ههههههههههههههه..انا بكره اقف في الصيدليه بسبب مواقف الغباء ايلي الواحد بيشوفها...ربنا معاكي

هبة فاروق يقول...

انتى ازاى متخديش رقم اللورى يا نوووور ههههههه حبيبتى بجد الواقفه فى الصيدليه حتخليكى تشوفى وتسمعى كثير
اسمعى من هنا وطلعى من الناحيه التانيه علشان الضغط ميعلاش عليكى
الست بتاعه الملكيه دى عجبتنى ميه ميه
تحياتى لبنوتى الجميله نور

نور القمر يقول...

ههههههههههههههه ربنا يوفقك يانووور وبالتوفيق ليكم ..
تحياتى لك
نور

reemaas يقول...

ابراهيم رزق

هههههههه انا قلت الطيب احسن يا ابو زياد الناس ضربت بوز البوست اللى فات هههههههههههه

مش عاوزة اعررررررررررررررررف

الولد بيقولها عن قناعة وبيعيها من قلبه لدرجة رعبتنى بجد


ماتشوفش منظرهم وهم بيتخانقوا حاجة تكسف وربنا

reemaas يقول...

amiraali

وحياااااااااتك بشوف العجب

reemaas يقول...

هبة فاروق

اه بصراحة يا هوبا لما دورتها فى دماغى بعد ما مشيت لقيت عندها حق بردو

reemaas يقول...

نور القمر

تسللللمى يانور ربنا يخليكى حبيبتى

عباس ابن فرناس يقول...

اكيد اللورى ده فلول
والحمد لله ان محدش كسرلك الصيدليه
علشان تبطلى تنسى بعد كدة هههه

faroukfahmy58 يقول...

تور
1- لماذا صمتتى امام رأيها فاذا كانت فعلا فى سن الاربعين فالملكية انتهت من عام 52 يعتى بقالها دلوقتى ما يقرب من الستين عاما
انا فى عجب كيف حكمت على الملكية دون ان تعيش فيها
2- يمكن فعلا لو قامت الحرب سنكون اكثر تماسكا ووحده بس نكون مستعدين ليها معادلة صعبه اذا مشينا مع المثل القائل
انا واخويا على ابن عمى وانا وابن عمى على الغريب
بدل منحارب انفسنا نحارب الغريب
3-ايه رأيك ان اللورى ده طلع لورى بصحيح وقشط الكل فى خبطه واحده
الفاروق

faroukfahmy58 يقول...

تور
1- لماذا صمتتى امام رأيها فاذا كانت فعلا فى سن الاربعين فالملكية انتهت من عام 52 يعتى بقالها دلوقتى ما يقرب من الستين عاما
انا فى عجب كيف حكمت على الملكية دون ان تعيش فيها
2- يمكن فعلا لو قامت الحرب سنكون اكثر تماسكا ووحده بس نكون مستعدين ليها معادلة صعبه اذا مشينا مع المثل القائل
انا واخويا على ابن عمى وانا وابن عمى على الغريب
بدل منحارب انفسنا نحارب الغريب
3-ايه رأيك ان اللورى ده طلع لورى بصحيح وقشط الكل فى خبطه واحده
الفاروق

AhMeD RaDy يقول...

ههههههههههههههه اللورى دا جدع

جدع يا لورى

بالنسبة بقى لاراء التانية ! فهى بصراحة اراء تستحق الاحترام لكن مش واقعية اوى ... الحرب مش تلات حروف

دى نصيبة ثلايثة الابعاد !!

ربنا يستر علينا بقى من الايم القادمة وتعدى على خير

رحيق الورد يقول...

هههههه والله بجد حلوة بتاع اللوري
ان شاء الله يصير كل خير لمصر
تحياتى لك
ياسمين

reemaas يقول...

عباس ابن فرناس


بينى وبينك انا كنت مرعوبة من ده والله

reemaas يقول...

faroukfahmy58

هى وضحت باختصار كده ان البلد كانت فى ازدهار عن دلوقتى

الحرب خيار صعب للوحدة يا استاذ فاروق

انا بس بستغرب انهم فرضوا شئ واتخانقوا عليه بدل ما يسالوا الاول ناس عجيبة

reemaas يقول...

AhMeD RaDy

يااااااااااارب يا احمد بس انا بقولك اهو
انا عينى الشمال بترف ومش متفائلة

reemaas يقول...

رحيق الورد

يااااااااااااااااارب يا ياسمين يارب

ريــــمــــاس يقول...

صباح الغاردينيا نور
هههههههههههههه
اول مرة اضحك في مدونة مصرية من فترة
بجد حكاية الوري ضحكتني
انما تخيلتك وانتي بتبصي كدا للخناقه
ولاعارفة تتكلمي بس برضو
بنت جدعة :) "
؛؛
؛
لروحك عبق الغاردينيا
كانت هنا
reemaas

E73 يقول...

هههههههههههههه الله يكون في عونك بجد يا بنوتة

بس أحسن حاجة ان طلع عندهم مخ وقرروا يسألوا حد

وعلى كدا كان شعورهم ايه بعدها؟!

وأحيانًا "كتير" فعلا بيكون الصمت ابلغ من كل الكلام

تحياتي وسلاماتي ^^

E73 يقول...
أزال المؤلف هذا التعليق.
reemaas يقول...

ريــــمــــاس

معاكى حق والله يا ريموسة كلنا عايشين حالة نكد من فترة

ربنا يعدى الايام دى على خير
تسلميلى حبيبتى

reemaas يقول...

E73

اتحرجوا جدا رجالة طول بعرض ويطلع منهم كده

لا ولا بصة الظابط ليهم ههههههههههههه

فضيحة