السبت، 3 ديسمبر 2011

طعم الفراق




اد ايه حلمت اكون معاك فى كل لحظة
 اد ايه حلمت ابنى بيت صغير يجمعنى بيك
اد ايه حلمت يكون عندى  ابن منك يشبهك
اد ايه اتوجعت لما لقيت دى احلامى انا بس!!!!!!

***************************

لسه مكانك زى ماهو
مش قادرة املاه بحد غيرك
مش عارفة كلهم صغيرين اوى كده
ولا انا اللى كنت مدياك مساحة اكبر من اللازم!!!!!!

*************************

اتعودنا نحكى...
اتعودنا نضحك...
اتعودنا نعمل حاجات كتير مع بعض..

وفجأة بقى كل ده ماضى ولا كأنه اتوجد....

تفتكر ده كان موجود اصلا!!!!!

****************************

اتعودت من بعد فراقنا اللى عارفة ان سببه الظروف
انى اكتبلك جواب واحتفظ بيه عندى
كل يوم اكتبلك انا حاسة بايه
لاحظت مع الوقت ان الكلام بيقل
لحد ماجه اليوم اللى مابقتش لاقيه كلام اكتبه!!!!!

*************************

ماتخيلتش ابدا ان كل اللى هيفضل مننا
البوم صور!!!!!!

******************

دورت كتير على سبب لفراقنا ده

ديما كنت بلاقى سبب يخلى صورتك فى عنيا حلوة

يعدى يومين وافوق وارجع ادور على سبب تانى
لحد ما وصلت لاجابة اقنعتنى جدا ومادورتش بعدها

كل الحكاية ان ماكنش ليا محل من الاعراب فى حياتك

هو ده السبب......

يارتنى مادورت!!!!!!!!

هناك 25 تعليقًا:

Bent Men ElZman Da !! يقول...

انا مش عارفه اقتبس ايه بالظبط
باختصار اوى
البوست ده وهمى :|

reemaas يقول...

Bent Men ElZman Da !!

ربنا يخليكى يا دينا كزفتينى هههههههههههه

ماعرفش اهى حالة جت للواحد حاولت اقول كل الكلام اللى ممكن يتقال على لسان اللى مروا بيها

مصطفى سيف الدين يقول...

بوست جميل اوي
فراق ولهفة وعشق وفي النهاية جفاء
رائعة

غير معرف يقول...

صباح الغاردينيا نور
ويبقى الفراق بحد ذاته وجع
ذكراه التي سـ تبقى
صوته الذي سـ تسمعينه في كل الأصوات
ملامحه لن تغادر مخيلتك وذكراك
البوم صور كل صوره فيه سـ تحكي حكاية
ضحكة
وفرح
وحضن
ولقاء
مؤلم الفراق والأشد ايلاماً هو الحنين لما مضى "
؛؛
؛
نور
فكرة رائعة بـ أكثر من صورة
جسدت أحساس واحد لاأذاقه الله لأحد"
؛؛
؛
لروحك عبق الغاردينيا
كانت هنا
reemaas

ابراهيم رزق يقول...

1 هوانتى كانت حياتك نوم و حلم و بس اصحى شوية

2 هو كان سمين قوى و لا ايه لازم كان مقاسه اكس لارج

3 طبعا كان موجود هو احنا ورانا حاجة غير الكلام و الضحك

4 طبعا زهقتى كل يوم كتابة كل يوم كتابة لازم تزهقى

5 حمليه على كارت الموبايل و ريحى نفسك هى لسه فى ناس بتستخدم الالبوم

6 ممكن يكون اتصورها ابيض و اسود او ممكن يكون نظرك ضعف شوية

اما بالنسبة لطعم الفراق انا اعرف انه نزل منه طعم الكاتشب و الشطة و الليمون و الجبنة الفرنسية بس بيقولوا نزل منه طعم جديد طعم الجبنة القريش بس لسه ما كلتوش
هههههههههههههههههههههههههههه

بغض النظر عن الهزار اللى فوق بجد جميل جدا و حسيت بنور جديدة و شجن جميل انا بحب الشجن قوى مع انه مش وقته خالص بالنسبة لى
تحياتى

هبة فاروق يقول...

والله بوست رقيق وزى العسل يا نور
زيك كده طعم ولذيذ
تحياتى لاجمل بنوته

reemaas يقول...

مصطفى سيف الدين

تسلم يا درش ربنا يخليك

faroukfahmy يقول...

نور الحياة وحياة النــــــــور
طعم الفراق
"وفجأة بقى كل ده ماضى "
أكتبلك جواب واحتفظبيه عندى "
انا وقفت طويلا امام هذه العبارة الاخيرة حيث يقول علماء النفس انه اذا ضاقت بك الامور ولم تستطع تنفيذها على ارض الواقع تناول ورقه وقلم واكتب ما تريده واحتفظ بها سترتاح كثيرا
فهل هذا يتحقق فى مسائل الحب ؟؟؟؟ ربما !!!!!!!!!!!!!!!!!!!!!!!!!!
الفاروق

faroukfahmy يقول...

نور الحياة وحياة النــــــــور
طعم الفراق
"وفجأة بقى كل ده ماضى "
أكتبلك جواب واحتفظبيه عندى "
انا وقفت طويلا امام هذه العبارة الاخيرة حيث يقول علماء النفس انه اذا ضاقت بك الامور ولم تستطع تنفيذها على ارض الواقع تناول ورقه وقلم واكتب ما تريده واحتفظ بها سترتاح كثيرا
فهل هذا يتحقق فى مسائل الحب ؟؟؟؟ ربما !!!!!!!!!!!!!!!!!!!!!!!!!!
الفاروق

reemaas يقول...

ريــــمــــاس

يااااااااااااارب يا ريماس ماحدش يدوقه يارب

نورتينى حبيبتى

reemaas يقول...

ابراهيم رزق
هههههههههههههه

خضتنى وربنا انا قلت بس شركهولى ووحش


والله يا استاذ ابراهيم هو مود بيجى للواحد مش بالايد

ياريته بالايد

reemaas يقول...

هبة فاروق

تسلميلى يا هوبتى يا حبيبتى

افكار مبعثرة يقول...

اسمحيلي اقولك بجد انك عبرت عن الفراق و مذاقه ووجعه بشكل رائع و موجع في نفس الوقت
تحياتي ليكي

nour alqamar يقول...

الفراق صعب وربي يبعه عنا وعنكم يارب ..
بوست رااائع بجد سلمت ايديك ياقمر
مع تحياتى لك
نور

سندباد يقول...

مش عارف ارد يمكن عشان انتي قلتي كل اللي بقوله وبعمله كل يوم فعلا طعم الفراق وحش اوي خاصة لما يكون الحب كبير اوي وحلو اوي

سواح في ملك اللــــــــــــــــــه- يقول...

اكيد يانور هو خسر اكتر

اللي يكون في حياته انسانة بالبراءة دي

ويسيبها

اكيد هو اللي خسران

دعاء العطار يقول...

انا بجد مش عارفه اتكلم من روعته

قريته مرتين ... محسوس بشكلللللللل يخرب عقلك يانور

فكرة انك تكتبى لغيرك رسايل وانتى واثقه انه مش هيرد عليكى

فكرة انك حاسه ان كل اللى بعده اقل منه ومش ماليين الفراغ اللى سايبه

قبل كده كنت كاتبة نفس المعنى بس بعبارات مختلفه

" جئت فى حياتى فقط ... لتخبرنى ان كل من سيأتوا بعدك أقزاماً .. فلن أستطع أن اكون لك وأبداً لن يعجبنى غيرك "

الجملة دى حصرى عندك يانور مش نشرتها :D

وفكرة انك تعترفى لنفسك انك بالنسبه لحد هو كل حياتك انتى ولااا حاجه فى حياته

وجعتنى الجمله الاخيره اوى

بجد بجد ولا اروع من كده والصور تحفه :)

reemaas يقول...

افكار مبعثرة

مبسوطة انه عجبك وكان نفسى ماوجعش حد بس تيمة الفراق اصلا موجعة

reemaas يقول...

نور القمر

اللهم امين

تسلمى يانور

reemaas يقول...

سندباد

:(

بس اكيد هيروح

اكيد فى حاجة حلوة هتحلى الطعم ده

reemaas يقول...

سواح في ملك اللــــــــــــــــــه-

ربنا يخليك يا خالد
بس هو انا مش البطلة بتاعه كل الاحداث

:)

يعنى انا على خفيف

reemaas يقول...

دعاء العطار

" جئت فى حياتى فقط ... لتخبرنى ان كل من سيأتوا بعدك أقزاماً .. فلن أستطع أن اكون لك وأبداً لن يعجبنى غيرك "


انتى عاوزانى طيب اقول ايه بعد الجملة دى

تحفة طبعا جدا وكونها حصرى دى ماقولكيش عملت فيا ايه :)

هفضل فكراها

حاولت والله يا دعاء الخص تيمة الفراق اللى بشوفها حواليا مع المود الحزينى اللى عايشه فيه فطلعت كده هههههههههههههه

هينو يقول...
أزال المؤلف هذا التعليق.
هينو يقول...

ياريتك ما دورتي ويارتني ما سألت يااااااااااااااريت

لكن هيفيد بإيه الندم وهيفيد بإيه العتاب مع حد مابيقدرش

reemaas يقول...

هينو

ولا باى حاجة غير اننا نقعد نبكت فى نفسنا :)