اللى مش فاكر كنا بنحكى فى ايه يدخل
بعد اخر موقف زى ماقولتلكوا كلنا جالنا حالة اكتئاب كده وزهق من الشغل وخوف من اللى قدامك ليضربك اذ فجأة وانت مش عامل حسابك
وبدأت نغمة الرغبة فى اخذ اجازة من العمل الحكومى لاننا مش جيلنا من وراه الا وجع القلب وقله القيمة وكان فينا المشجع ليها والمعترض وكنت انا من المعترضين بلا فخر من باب انه لاتراجع ولا استسلام يعنى........وقد اثبتت الايام انى كنت طيبة ......لدرجة السذاجة
فى يوم من ذات الايام لقينا المدير الادارى والمالى بتاعنا بينده لينا علشان نستملم شيكات مكفئات طبعا كلنا زقططنا فلوس بقى....
وبعد ما هدينا من الفرحة دى اللمبة اللى فى دماغنا نورت فجأة ......هى الفلوس دى بتاعة ايه
رحنا راجعين للراجل نسأله واخدنا حتة رد بقى عمركوا ماهتتخيلوه :)
فاكرين لما شرحتلكم المرة اللى فاتت ازاى كنا بنحسب فلوس تذكرة العلاج وازاى الحسبة اتغيرت لما بدأنا نحسب بسعر السوق؟
فيه فرق سعر يعملوا فيه ايييييييه .........يوزعوه على العاملين فى المستشفى!!!
وطبعا اتقسمت بمزاجهم وادوا الصيادلة زى التمريض واخد الاطباء الهبرة الكبيره
متخييلين بقى انتم باقى الاحداث ..الصيادله اعترضوا وههدوا انهم هيشتكوا واعادوا توزيع التركة وعدت الحكاية
بس شالها فى نفسيته الاخ المبجل مدير المستشفى.......
فى يوم دخل الصيدليه وقالنا يا جماعة بخاخة الازمة مش متوفرة ليه الناس بتشتكى فقلناله احنا طلبناها بس لسه ماتوردتش وفعلا كنا عملنا بيها كذا امر توريد وفى يوم لقينا كل اوامر التوريد واستعجالتها اتنفذت فى يوم واحد فبقى عندنا كميه كبيرة منها
حمدنا ربنا والناس فرحت لانها كانت ناقصة فعلا وقتها فى السوق الخارجى
وبدأنا نصرف منها واذا فجأة لقينا باب الصيدليه بيخبط وواقف برا راجل مانعرفوش
مين حضرتك؟ انا من الشؤن القانونية!
ايوة يعنى خير حضرتك؟ مدير المستشفى مقدم فيكم شكوى انكم موفرين بخاخات للازمة رغم انكم مش مستشفى صدر !!!!!!
نعم ؟ماهو اللى طاالب ده ثم المريض هنا عنده كل الامراض ومنها الازمة اى المشكله يعنى ؟
لا يجماعة ده اهدار للمال العام ولو عاوزين الموضوع يتلم روحوا للمدير
رحنا للبيه .....مش حضرتك اللى قلت كذا
انا؟معاكم امر كتابى بده؟ ماعتقدش
بس عموما يا جماعه دى كانت قرصة ودن بس وانتم زى اولادى وهنلم الموضوع اتطمنوا
خرجنا واحنا 100 فار بيلعب فى حجرنا الراجل ده بيدبرلنا مصيبة
عدى تقريبا شهر والحكاية نامت ونسيناها
لحد ما لقيت فى يوم انا واميرة صحبتى اياها استدعاء جيلنا احنا الاتنين من النيابة الاداريه للمثول امام وكيل النيابة الساعة كذا يوم كذا.............
يتبع
هناك 23 تعليقًا:
صباح الخير ريماس حبيبتى ..
شكرا لك استمتعت بالقرائه بجد واتنظر الباقي :)
تحياتى لك
نور
صباحك طيب
شكرا لك الموضوع عجبنى وفى انتظار الباقى
تحياتى لك
ياسمين
نور
احنا مش قلنا شغل المسلسلات ده نبطله
بلاش المط و التطويل و شغل الاعلانات ده
خشى فى الموضوع على طول احنا بننسى اللى فات لطول الفقرة الاعلانية
قبل ما ننسى
ايه حصل ايه فى النيابة الادارية
اصل انا عارفها اغلبها بنات
تحياتى
الموضوع جميل بس توهت شويه
مافهمتش شويه حاجات بس
انا بحب اقرأ لك يا نور
دائما
تحياتي اختي
ايه المدير الجزمه ده :|
ربنا يكون فى عونك يا نور
نور القمر
يسعدلى صباح يا نور
منورانى
رحيق الورد
هحاول ماتخرش يا ياسمين
ابراهيم رزق
ان عارفه انك اول واحد هتزعقلى
هههههههههههه
حاضر هنزل الباقى بكرة ان شاء الله
;كارولين فاروق
معلش حبيبتى علشان بس مش معانا من البدايه
هى قربت تخلص اصلا
:)
Bent Men ElZman Da !!
يلا بقى ربنا يتولاه مطرح ماهو قاعد
ايه ده يانور
الراجل ده هيخليكوا سواااابق والا ايه
الله يخرب بيته
نيابة يانور
وادارية كمان
لالالا ربنا معاكوا ياصيادلة
هههه متزعليش يانور
هنقوملك اجدع محامي
بصى يا ريماس
لان الموضوع دا اتقرصت من ه بس مش للدرجاتى لكن نصيحة
امشى ميرى ... ميرى اوى كله بالورقة والقلم .. !
على فكرة هى دى الطريقة اللى هتخلى ليكى انياب رغم انف الجميع وهتخلى الناس تغلط معاكى غلطة .. وما تخافيش من الميرى حقى وحقك ..!
لما هتعدى فى البيت محدش هيطلع من جيبه ويديكى حاجة ولا حد هيسال فيكى !
وما فيش داعى تجربى اليومين دول بالذات !
ومحدش بيتعلم بالساهل
سواح في ملك اللــــــــــــــــــه
هيخلينا؟
مابقينا خلاص يا خالد واللى كان كان :)
AhMeD RaDy
معاك حق فى دى يا احمد ماحدش فعلا بيتعلم بالساهل
بس دى ذكريات بقى اللى حصل حصل :)
صباح الغاردينيا نور
ايه ده يابنتي
والله حرام عليكي
انتي غاويه مسلسلات وفواصل
وكمان الساعة كدا ومش عارفة ايه
ويتبع ...:(
ايه الي حصل في النيابة الاداريه
الي كلها بنات زي ماقال ابو زياد
ههههههههههههه اصله مايعرفش انه
فيها بنات "
؛؛
؛
لروحك عبق الغاردينيا
كانت هنا
reemaas
يا لهوووى هىه فيها نيابه ومحاكم
عايزين نطمن يا نور حصل ايه متخضنيش
انزلى بالباقى الله يكرمك
صباح القرنفل ريماس
دى مغامرات صيدلية فى مستشفى ,بتفكرنى بأختى عشان هى صيدلانيه بردوا ,ربنا يعدى كل اموركم ع خير ,ومنتظرين الباقى
ربنا يكون فى عونك بصراحة
ايه الناس المؤذية ربنا يكفينا شرهم
معلش اعملى اللى عليكي و طول ما انتى بتراعى ربنا هو مش هيتخلى عنك
تحياتي ليكي حبيبتي
ريــــمــــاس
هقولكم حاااااااااااااالا يا ريموسة
هبة فاروق
من عيوناتى يا وهوبا
نيللى
اللهم امين يا قمرايه هقلك حالا
EMA
ربنا موجوووووووود قادر يوديهم بورتو طرة هما كمان
اخصصصصصصصصص يا نهار ازرق
ريماس انتي بتخوفيني اكتر واكتر من العمل الحكومي وانا فيه اساسا
اللي يضحك في وشك ويروح يفرقع فيكي بومبة
ربنا يستر
إرسال تعليق