السبت، 5 نوفمبر 2011

يومياتى8


اللى مش فاكر احنا واقفين فين او اللى مش متابع يتدخل




قبل ما احكيلكم احداث اليوم العجيب ده عاوزة اشرحلكم حبة حاجات باختصار كده

 انتم فى غنى عن انى اقولكم ان منظومة العلاج فى مصر مضروبة ضربة سودة ورغم انكم عارفين ده بس بردو حابة اقولها تانى وتالت ........وضع العلاج فى مصر اسوء مما تتخيلوا سواء كان علاج عن طريق المنافذ الحكوميه او عن طريق العيادات والمستشفيات الخاصة..فى الحالتين لو قيمونا بما يرضى الله هناخد اكبر سالب صفر فى التاريخ وده مش تشاؤم خالص اللى عارفنى عارف انى شخصية متفائلة.........

ندى بقى مثال صغنن يعرفكم بسبب مشكلة اليوم بتاعنا..

                                    العلاج على نفقة الدولة
                                 **********************
مصيبة من مصايب الزمن ومعروف  انه كان معمول لهدف ولناس معينة وبقدرة قادر اتغيرت كل الاهداف وكل المنتفعين منه وبقم ناس تانيه خااااااااااالص
المريض كان بيجيب واسطة ويقدم روشتات تثبت ان عنده مرض مزمن قلب بقى او ضغط او سكر او.......الخ
وبعد مايخلص الاوراق يطلعله قرار بمبلغ مالى يسحب بيه علاج ويكشف على نفقة الدولة لمدة سنة او 6 شهور على حسب الحالة ويتقسم المبلغ على الشهور والقرار قابل للتجديد
حلو جدا .......فين بقى المشكلة؟!
اقولكم دى مشاكل
مثلا المريض بيبقى كاشف بره وبيجى عاوز يصرف نفس العلاج اللى ماشى عليه بنفس العلب


يقوم الطبيب يريح دماغه ولا يكشف ولا حاجة ويقوم رصصله نفس العلاج اللى فى الروشتة او نفس اسامى الفوارغ اللى المريض جايبها معاه اصلا فى تذكره العلاج


يقوم المريض يروح  فييييين....ايون ......يجى للصيدلى الغلبان اللى يفضل يفت فى قلبه علشان يشرح للمريض ان فيه حاجات من علاجه موجوده وحاجات لاء ويا اما يتفهم المريض وياخد الموجود يا اما يقعد يدعى على الصيدلى اللى مخبى منه العلاج اللى الطبيبه المعالج امرله بيه .......ودوخينى يا لمونة
وهكذا نشأت علاقة هباب بين الصيدلى والمريض فكل من يعمل بالمستشفى ملائكة على اد مايقدروا من ممرضات لاطباء لمدير مستشفى متفهم جدا واسهل حاجة عنده يأشر على التذكرة "يرجى من السادة الصيادلة صرف العلاج"


مين بقى اللى اخد علاج الناس ومش راضى يطلعه,مين بقى اللى بيضرب بكلام الدكاترة والمدير والروشتات عرض الحائط,مين بقى اللى اخد فلوس القرار فى جيبه وكئن المريض دفعهم مقدما؟...........الصيدلى :)


مشى بينا الحال كده لحد ما وزارة الصحة طلعت قرار الله لايسامحهم عليه لحد النهاردة مش فاهماه


العلاج يا جماعه بيدخل المستشفى عن طريق مناقصة بيتم تقديم اسعار للعلاج فيها اقل من اسعار السوق وبتاخد الوزارة اقل سعر
كنا احنا بقى بندى للمريض علاجه بسعر الكراسة فمثلا حقنة الانسولين ام 31ج فى الكراسه مثلا ب25ج فلو قراره ب50 له حقنتين ده على سبيل المثال  تقوم وزارة الصحة فى يوم تقول لاء يا جماعه حاسبوا المرضى بسعر السوق وبالتالى تم خفض حصة المريض من العلاج.......


المرضى طبعا فيهم اللى تفهم وفيهم اللى مصر اننا حراميه وبنضرب على علاجهم لاسباب لايعلمها الا الله


وده كان سبب المشكلة اللى رغيتلكم كل الرغى ده علشان اوصلها


فى يوم كنا بنصرف وبنتعامل مع الناس من خلال شبابيك الصرف واذ بباب الصيدليه حد بيرزع عليه بطريقه هستيريه
فتحنا الباب لقينا ست واقفه قدمنا وبتزعق جدا انتم اخدتم علاجى حرام عليكم انا كان بيتصرفلى كميه كبيره وانتم خسفتوا بيها الارض ......نشرح ولا الهوى يهديكى يرضيكى ولا فايدة انا هشتكيكم وهوديكم فى داهيه وسيييييييل من الدعوات بقى اللى تقبض قلبك


اميرة زميلتنا قررت انها تسكت الست دى: بس بقى ياست انتى عمالين نفهمك من الصبح لو سمحتى اخرجى برا بدل ما ننده الامن(طبعا مافيش امن ولا نيله ده كان تهويش)

واذ بالست رفعت اديها وضربت اميرة صاحبتنا حتة الم ....


حالة من الزهول والصمت اصبتنا كلنا ....طبعا مافيش امن ولا عمال ...الناس هم اللى اتدخلوا وشالوا الست خرجوها 


ويطبطبوا على اميرة والبت متنحة لابتعيط ولا بتنطق واحنا كذلك.....


لحد ما حد  اتكلم وقلها بصى انتى هتطلعى دلوقتى على القسم تعمليلها محضر وكلنا نشهد ده تهزيق .....انا سعاتها ايدت الفكرة بشدة 


وفعلا اميرة كانت ناوية تعمل ده بس تدخل الناس وعياط الست اللى انهارت بعدها خلى اميرة تتراجع وكمان خوفها من دخول القسم اصل حد قلها انتم بنات ناس مايصحش تدخلوا القسم.........!


الموضوع اتلم بس ساب اثر جامد فى نفوسنا كلنا ....
بقينا اعنف مع الناس,بقينا نتكلم مع الناس وبينا مترين على الاقل..........


اتغير كتير فى ال 6 صيادلة اللى كانوا متعيينين لسه من كام شهر وشايفين انهم هيغيروا منظومة العلاج فى مصر
وكانت دى بداية النهاية.....

هناك 37 تعليقًا:

amiraali يقول...

والله يا بنتي الصيادله دول اصلا مترمتين في البلد... اساسا مش معترفين بينا .. انا دلوقتي في اخر سنه صيدله.. وكل ايلي حواليا مقتنعين اني بياعه وبس وان اي حد يقدر يعمل زي الصيدلي .. طب امال احنا بقي بندرس ليه

reemaas يقول...

amiraali

ده موال تانى خالص يا اميرة
وبينى وبينك حاولنا نظبطه بننا نعدل فى قوانين مزاولة المهنة قلولك لازم نقابه قويه تطالب بده
طب احنا نقابتنا فسكونيا نحاول نغيرها

فوجئنا فى اخر انتخابات ان نفس النقابه كسبت تانى ههههههههههههههههههههههه

βent Pasha يقول...

ربنا يقويكي ويعينك بجد

" وكانت دى بداية النهاية....."
إن ماكانش يضايقك أنا بتعارض معاكي بعض الشئ ع الكلمة دي ، دي مهزلة لازم تقف ، وبهدلة لكل شاب أو شابة أثناء تأدية وظيفته ف البلد..
عندك حق أنكم تتعاملوا أشد مع المرضى ، بس حتى الشدة ممكن تخللي واحد أو واحدة يعملوا نفس اللي عملته الست دي تاني ..
ربنا يسترها علينا وعلى شباب مصر .. اللهم آمين

أسفة ع الإطالة
وكل سنة وانتي بخير وصحة وسعادة وعيد سعيد عليكي بإذن الله

ابراهيم رزق يقول...

ريماس هى الست دى ايديها كانت جامدة قوى
ههههههههههههه
الصراحة النقابة الصيادلة دى غلطانة
المفروض تعملوا وقفة احتجاجية عشان تاخدوا بدل ضرب
صحيح شر البلية ما يضحك
المريض انسان ضعيف بيتعرض لضغوك كثيرة فى مصر و طبعا انتى عارفة و درستى ان الضغط يولد الانفجار و من سوء حظ صاحبتك ان الانفجار جه فيها
تعرفى و ممكن تستغربى انا اتعاطفت مع الست اكثر من صديقتك الضغوك كثيرة و ربنا يكون فى عونها
كل سنة و انتى طيبة عيد سعيد عليكى
و ساحاول اهديكى هدية
واقى للراس مثل لاعبى الملامكمة

نهر الحب يقول...

اه يا ريماس
تعبتيني بقي بحس اني من كتر مانا عارفة بتتكلمي عن ايه بالظبط بتجيلي ازمة نفسية

بصي انا مش نفقة الدولة انا خارجي ابو جنيه التذكرة ده اكيد عارفاه بس جيراننا بتوع نفقة بيصعبوا عليا عشان ديما المريض بيقول دي فلوسي وحقي وانا اختي في مستشفي تانية نفقة الدولة وبتحكيلي

انا اخري مع الناس شباك صغنن كدة لما حد بيقل ادبه بقفله في وشه
:D

بحس اني شريرة ساعتها بس غصب عني

ساعات بيكون عندهم حق بس في نفس الوقت انتي مش عارفة تعملي حاجة عشان الامكانيات اللي في ايديكي

انتي علي فكرة بتغريني اني اكتب مذكراتي انا كمان

لنا الله يا بنتي لنا الله

Unknown يقول...

تعرفي يا نور أنا إشتغلت نفقة دولة لمدة سنه واحده في التكليف...و كنت بقطع العلب قبل ما أديها للعيانين عشان ميبيعوهاش بره...و كنت بتخانق و بزعق لأن الناس كانوا فعلاً قلالات الأدب جداً و بلطجية كمان يعني ممكن يستنونا بره...الكلام ده كان في مستشفى العجوزه.
لدرجة إن خطيبي (زوجي حالياً) مره دخل من جوه الصيدليه و شافني منهمكه مع الناس فسألني كأنه مريض بيصرف تذكره...رُحت لفاله و أنا بزعق (نعم عايز إيه إنت كمان) طبعاً هو مصدقش نفسه مني ساعتها و أنا كان منظري وحش أوي :(
الحمد لله ربنا تاب عليه من زمان...بجد أعصابي باظت الفترة دي.

يااااه يا نور بتفكريني بحاجات

كل سنة و إنت طيبة و بألف خير يا أجمل بنوته :)

Bent Men ElZman Da !! يقول...

انا مستغربه من موقف الست دى
بس اللى يخليها تعمل كده
ان اكيد فاض بيها
بس ده اللى بيوصل فى الاخر ان طريقتكم تتغير مع المرضى
لانهم بتشوفوا مواقف بتأثر عليكم
وموقف على موقف بيخلى نفسيتكم انتم مش مظبوطه انهم تتعاملوا معاهم صح
ده غير ان فى ناس فاهمه ان انتم اللى مواقفين العلاج والا واخدينه
صراحه يا نور ربنا يكون فى عونك

وكل سنه وانتى طيبه
وعيد سعيد عليكى يارب :)

هبة فاروق يقول...

ازيك يا نور يا عسولة
طبعا حالك وحال الصيدلة اللى زيك لا يسر عدو ولا حبيب معلش استحملو شوية لانكم على دراية بالوضع السىء اللى حكيتى عنة اما الناس الثانية مش فاهمة الوضع اية
كل سنة وانتى طيبة

ابراهيم رزق يقول...

ايه هو البوست اتحول لبريد الصيادلة
كل اللى عنده شكوى يقولها
انا فاضل انزل الشارع اجمع لكم تبرعات
ههههههههههههههههه

nour alqamar يقول...

ربي يجعل الاحوال احسن ان شاء الله ..
وكل عام وانتى بخير حبيبتى
مع تحياتى
نور

موناليزا يقول...

لا حول ولا قوة الا بالله
بغض النظر عن الموقف بس كويس بجد انك بتحكى وبتعرفينا الدنيا ماشية ازاى

reemaas يقول...

βent Pasha

وانتى طيوبة يا قمر

المشكلة اننا وقتها كنا شايفين ان مافيش فايدة فعلا ومجهودنا ده هباء ومتشاف تقصير فعلشان كده فينا اللى كبر دماغه وده بيحصل كتير للاسف

reemaas يقول...

ابراهيم رزق

هههههههههههههههههههههههه
كل صيدلى بعد كده يتعين ومعاه اسلحته وخوذته
ههههههههههههههه

والله يا استاذ ابراهيم انا وزمايلى وقتها عارفين ان المتضرر الوحيد من منظومة العلاج هو المريض

الحكايه فيها بلاوى كتير ماحدش عارفها فعلا

بس رد الفعل كمان كان قاسى وغير متوقع

بس اتعلمنا ان التعامل المباشر مع الناس له اضراره للاسف

reemaas يقول...

نهر الحب

شريرة اييييييييييه ده انتى طيبة والله

اصلى مسكت الخارجى يا سهاد بعد النفقة وده له قصص معايا بقى ههههههههه تكنن

اشجعك جدا طبعا تكتبيها هستنى اول حلقه

reemaas يقول...

شيرين سامي

هههههههههههههههه
متخيله يا شيرين وقتها

انا كان نفسى حد يصورنى وانا بتعامل
سياسه الصوت العالى بتجيب نتيجة بشكل مذهل

وانتى طيبه حبيبتى

reemaas يقول...

Bent Men ElZman Da !!

ايون انا اتقالى مرة يا دينا والله بنشوفكوا وانتم بتسرحوا بالعلاج فى سوق التلات ههههههههههههههههههه

بس ده له حكايه اخرى

وانتى طيبه حبيبتى ينعاد عليكى بالخير

reemaas يقول...

هبة فاروق

وانتى طيبه يا هوبا يا حبيبتى
ماهو مافيش للاسف اى حل تانى غير اننا نصبر

reemaas يقول...

ابراهيم رزق

هههههههههه
الموضوع كبييييييييييير صدقنى يا استاذ ابراهيم

مهما سمعت من مهازل فى الصحف مش هتبقى زى ما ابطال الحودتة يحكوها

reemaas يقول...

نور القمر

اللهم امييييييييين

وانتى بالف خير يا نور

sabry abo-omar يقول...

كل سنة وانت طيبة الاول وعيد سعيد.. مشكلة كل الوظائف فى مصر انه مفيش نظام او سيستم واضح وكل شئ متروك بلا ضوابط خالص.. فعلا مش عارف الحل يبتدى منين بس اظن لازم نهد كل حاجة ونبنيها من جديد ودة فى كل مجال مش موضوع الصيادلة والعلاج على نفقة الدولة.. ربنا معانا ومع الأجيال الجاية كمان.. تقبلى مرورى

reemaas يقول...

موناليزا

ماشية بطريقه لو استمرت عليها هتبقى كارثه والله يا مونى

ربنا يستر

reemaas يقول...

sabry abo-omar

اه انا معاك فى ده
انت عارفه احنا اتسبنا نمشى الشغل من اول يوم استلام واحنا طبعا مش مؤهلين
فكل موظف بيحط السيستم اللى يريحه وده كارثه

سواح في ملك اللــــــــــــــــــه- يقول...

بصي يانور يابنتي

انا قلتها كلمة ومصر عليها

نحن شعب يحمل جينات الفراعين عندماتتاح له

الفرعنة

يعني لو انسان طيب نعامله وحش وبنمردة

ولو انسان قليل الادب ومش متربي ودول كتير

بنعاملة برقة وحنية ونبقي احنا اللي

طيبين معاه

لو كل واحد عارف حقه وحدوده

كانت الناس فهمت

تعرفي انهردة

شوفت سواق توكتوك

عمال يتنطط ويشتم في سواق عربية

شرطة البوكس يعني

وكان سواق التوكتوك اللي غلطان

رزحت قلتله مش ده اللي كنت زمان

كنت بتقولله ياباشا

ولو خبطك بالعربية كنت انت اللي بتقولله اسف

حاجات غريبة والله

غير معرف يقول...

صباح العيد والفرح ريماس

أنا لي رجعة ثانية للكلام الجميل

بس اليوم مروري خاص لأهنئك بعيد

الأضحى المبارك

كل عام وأنت بخير

واسأل الله العظيم أن يعيده عليك

بكمال الفرح والصحة في ضل من تحبين

تحياتي وإحترامي

رحيق الورد يقول...

مساء الخير ...
ان شاء الله تتحسن الاحوال ...
وان شاء الله يصير خير
عيدك سعيد
ياسمين

reemaas يقول...

سواح في ملك اللــــــــــــــــــه

لا من ناحية كده معاك حق جدا

المثال اللى انت ضربته ده جيت مرة اقوله لقتنى بقيت من الفلول هههههههههههههههه

reemaas يقول...

ريبال بيهس


كل عام وانت بالف خير يارب
ينعاد عليك وعلى كل حبايبك بالخير

reemaas يقول...

رحيق الورد

اللهم امين
وانتى بالف خير
نورتينى

eng_semsem يقول...

على فكره انا اختي دكتوره صيدليه في مستشفى حكومي وبتحكيلي على حاجات زي ده بس طبعا مش وصلت للضرب
فعلا الخخل كبير في المستشفيات وهو اللي محتاج علاج
تحياتي ومتابع

faroukfahmy يقول...

نورك ياست الكل نور كل المدونات
نــــــور
منظومة العلاج فى مصر محتاجة منظومة
العلاج فى مصر محتاج علاج يشفيـــــه
انت صحيح شخصية متفائلة ولكن فى الصراحة راحة وفى المواجهة وجاهة
كل ماذكرتيه صحيح والصيادلة غلابه الحمد لله ان بناتى كلهن كانت اتجاهاتهن فنيه
الفاروق

دعاء العطار يقول...

حسيت بالقلم وهو بيقع ع خد صحبتك وقلت

اوبااااااااااااا

وبعدين بقى تخيلت الصمت الرهيب والذهول بعدها

بجد الحياه العمليه والشغل والاحتكاك بالناس دى حاجه صعبه اوووى بس برضه بتعلم اووووى

وبنبقى زى الصفحه البيضا تلاقى كل شويه حد خط فيها بخطوط سوداا

كل سنه وانتى طيبه يااحلى نور :)

reemaas يقول...

eng_semsem

ربنا يحميها من المواقف اللى زى دى عموما هى ضريبه التعامل المباشر مع الناس كده فتخيل بقى الناس المضغوطة

reemaas يقول...

الموسوعة الحرة

ينعاد عليكم وعلينا بالخيييييييير يارب
كل سنة وانت طيب

reemaas يقول...

faroukfahmy58

اه والله دى حاجة تستاهل الحمد يا استاذ فاروق

وان جيت للحق المنظومة محتاجة ابااااااااااااادة

reemaas يقول...

دعاء العطار

وانهى سواد يا دعاء دى سواد على حق

وانتى بالف خير حبيبتى

EMA يقول...

معقولة ايه اللي بيحصل دا ..بصراحة الله يكون فى عونكم و الله

هتخليني فعلا نقدر ظروف الموظفين اللى بتتعامل بجفاء مع الناس مع انتو مش موظفين يعني و كمان مفيش حاجة بايديكم ..بس بيني ة بينك صاحبتك غلطانة كان المفروض خدت حقها -و لو انى لو كنت مكانها كان ممكن اتنازل- بس و الله صعبان عليا المنظر اوى ..

كل سنة و انتى طيبة يا ريما و عيد سعسد عليكي يا قمر

reemaas يقول...

EMA

هو الصح انها كانت تاخد حقها اقوله تحس ان كرامتها ماتبعزقتش بس الموقف وقتها كان صعب وهى فعلا خافات تدخل قسم والست صعبت عليها واتكسفت هتروح تقول للظابط ضربونى بالالم؟

مش عارفه بس كان موقف رخم جداااااااا