الثلاثاء، 10 فبراير، 2015

ان تكون كاتبا...4








فى اثناء المعمة اللى فاتت دى جالى دعوة للمشاركة فى كتاب جماعى تبع الدار اللى عملت كتابى الجماعى الاولانى معاها.. ووافقت

طبعا هتسأل سؤال منطقى هنا.. الكتاب الاولانى مانجحش او ماسمعش اوى بسبب دعاياته.. طب ليه بتكررى التجربة مع نفس الدار؟!

لكذا سبب الحقيقة .. اولهم ان عنوان الكتاب او الفكرة اللى كلنا هنكتب عنها هى حاجات خاصة بالبنات.. الكتاب نفسه اسم سكر بنات فمتخيلين بقى الافكار اللى ممكن تستفذ الواحد ويكتب عنها.. واللى قرا كتابى الالكترونى هيلاقى انه بيستهوينى الكتابة فى تفاصيل المشاعر البنوتية بدليل انى عندى فصل كامل فى الكتاب اسمه  (عنها)

السبب التانى انى قلت جايز الدار كانت لسه فى واحدة من التجارب الاولى واهو نبقى كلنا مبتدئين مع بعض

وفعلا تم الاتفاق بسعر الصفحة كالعادة وتحويل الفلوس بالبريد

الكتاب اتجمع واتبعتت بيه نسخة مبدأية علشان كل واحد يراجع جزءه ويبدى ملحوظاته...

انا بقى ماعرفتش اقرأ الجزء بتاعى وبس.. لا فضلت اقرا الكتاب كله واحكم بقى على العمل ككل .. وهنا تكمن المشكلة.. او الكارثة لو حبينا نتحرى الدقة..

بدأت اقرا وكان كله تمام لحد ما وصلت لنُص الكتاب تقريبا لأفاجئ بان فيه قصيدة نازلة فى الكتاب باسم شخص ما على اساس انها من ابداعاته طبعا لكن ده مش حقيقى..القصيدة هى (سأفتقدك جدا) لشهرذاد الخليج.. وحظ المشترك الاسود انى حافظة القصيدة دى كويس جدا لانها من الحاجات اللى بحبها ... القصيدة دى اول مرة اقرأها كان فى اوائل 2008 وعجبتنى جدا كلماتها واول ما عملت مدونتى دى نزلتها فيها مرتين مرة فى 2010 ومرة فى 2011 

دمى اتحرق الحقيقة لما لقيت البيه ناشرها فى الكتاب تحت اسمه ومغير فيها ثلاث او اربع كلمات بالكتير قال اى كده بقت بتاعته بقى !!

قررت انى مستحيل اسكت وراسلت مسؤولة الدعايا فى الدار لانها عندى فى الفريندز على الفيس .. قلتلها الموضوع ولما سألتنى ان كنت متأكدة من كلامى ده بعتلها كل مايثبت كلامى .. وهى بدورها قالت لمسؤول الدار نفسه .. اللى لقيته باعتلى على الخاص يسألنى برده ان كنت متأكدة ولا لاء اتعصبت جدا وقولتله حضرتك ارمى كلامى كله ورا ضهرك وادخل ابحث على جوجل عن اعمال شهر ذاد الخليج وطابق بنفسك وقولى... الراجل عمل كده وبعدها بعتلى رسالة على الفيس يقولى جملة واحدة...( كلامك صحيح وسيتم اتخاذ اللازم)

حسيت انى ارتحت جدا وقولت كده انا عملت اللى عليا وماسكتش عن الحق وعن جريمة السرقة دى..

وعدا شهر وتم الطبع واتبعتت لكل مشارك فينا النسخ المجانية بتاعته.. لأفاجئ بان القصيدة نازلة فى نفس موقعها بنفس كلماتها.. ونفس اسم الكاتب اللى سارقها!!!!!

مش لاقية كلام اوصف شعورى ساعتها ... اعتقد كده كفاية 

هناك تعليقان (2):

P A S H A يقول...


عن نفسي لما كنت بالاقي حاجة كتبتها في منتدى ولا مدونة من غير اسمي كنت بصراحة بازعل شوية بس في الآخر باقول وماله على الله الناس بس تقرا وتنبسط ؛ بعد كده اكتشفت مدونة لواحد مصري في فرنسا واخد مواضيع كتيرة لمدونين ومن ضمنهم العبد لله وناشرها ع المدونة باسمه ؛ بصراحة اتحرق دمي وقلت للناس ودخلنا كلمناه ولا الهوا !! ومع ذلك قلت مش مهم يكفيه أنه بينه وبين نفسه عارف أنه حرامي .. لكن أن البجاحة توصل بحد أنه ينشر مجهود غيره في كتاب ؛ دي اللي مش لاقي لها وصف الصراحة !! لأ واللي حرق دمي أكتر رد فعل مسئول الدار !! .. زي ما يكون بيقول (وأنا آسف في الكلام ده) إذا كان اللي مألف حرامي يبقى اللي هيشتروه أكيد جهلاء ؛ ما استفدش ليه بفلوس الاتنين ؟؟

أبو الفلوس اللي سعرت الناس كده بجد .

Gamal Abu El-ezz يقول...

إنتى عملتى الى عليكى
واذا كان فيه حق لصاحب القصيدة يبقى الى يرفع بيه دعوه الشاعر أو ورثتة يعنى إذا قدرتى توصلى الكتاب للشاعر أو ورثته هما الى ممكن ياخدوا حقهم فى الجريمة دى وإذا مقدرتيش فممكن ترفعى دعوى عنهم لكن طبعا هتدخلى فى مشاكل كتير

وربنا يوفقك للصالح
وتحياتى على أمانتك وشعورك بالمسؤلية