الجمعة، 27 سبتمبر 2013

عن...مساحتك وحيزك من الفراغ






كل واحد فينا بيشغل مساحة وحيز معين من الفراغ .. مش بس بيشغله بجسمه .. لا
كمان بتفكيره.. كل واحد فينا بيحتاج مساحة حوالين مساحته علشان يعرف يفكر ويتصرف بحريته من غير مايعمل حساب انه هيخبط فى حد..
يلف حولين نفسه لحد مايدوخ.. يصرخ لحد ما صوته يبقى مبحوح.. يرقص .. يتجنن..
هو حر .. طالما مش بيخبط فى اللى حواليه ومراعى حدود نفسه  وحدود مساحة غيره
 الكلام ده حلو اوى بس فى الغالب نظريا .. عمليا بقى فى حاجات بتخليه صعب التنفيذ وفى بلدنا الحاجات دى  بتندرج تحت مسميات غاية فى الروعة زى الصداقة والاخوة والعيلة ومن باب ان الناس عاوزة تطمن عليك وبتحب تعرف اخبارك وهكذا..

نضرب مثال على كده مثلا المدونات..
فى ناس كتيرة عاملة المدونة  مش من باب انها  تكتب اعمالها الادبية  وخلافه..
لأ من باب الفضفضة.. انها تكتب عن اللى مزعلها عن اللى خانقها عن اللى مفرحها..
تكتب مشكلة وحابة تاخد رأى ناس ماتعرفهومش فيها .. تفضفض  بسبب زعلها من ناس ماتقدرش تقولهم انها زعلانة منهم او تتحرج تقول على سبب زعلها
يعنى تخرج مشاعر  واللى ممكن جدا ماتكنش مرتبط بحد معين اكتر منها مشاعر هى حساها فى المطلق

زى ما قلت تفضفض..
تفضفض على سبيل ان المدونة دى من ضمن مساحتها الشخصية اللى رسمتها لنفسها..
 ومن هذا المنطلق فوجئت بناس اصحابى  مخبية مدونتها عن القريبين منها..
اللى مخبى عن خطيبته واللى مخبياها عن جوزها واللى مخبياها عن ابوها او اخوها..
اللى مخبى عن زمايله فى الشغل..

مش علشان هم بيعملوا او بيكتبوا حاجة عيب.. لاء خالص ولكن علشان يقدروا يكتبوا بحرية

يقدروا يكتبوا عن الرومانسية من غير ماحد يسألهم تقصدى بالكلام ده مين انتى فى حد فى حياتك..
يكتبوا مشاعر حزينة من غير ما يجى شريك الحياه ويقولها هو انا مزعلك فى ايه انا ماعملتش اللى انتى كاتبه عنه ده ..
يكتبوا عن خنأتهم من مدير شغلهم من غير ما واحد منفسن من زمايله يديله الاسفين التمام ويروح يدى لينك مدونته بمنتهى البراءة لمدير شغله

يكتب عن حبه الاول  من غير ما خطيبته تمسك فى خناقه وتقوله انت لسه بتفكر فيها..

وهكذا..

بصراحة مش عارفة احدد ان كان ده صح ولا غلط.. انا نفسى ايام ماكنت بحكى يومياتى القريبين منى عرفوا او خمنوا هى مين طنط حشرية :)
وعرفوا كمان من مدير المستشفى ايها ;)

عموما كل واحد فينا محتاج مساحته الشخصية.. وانا شايفة انه من حقه يدافع عن حدودها  باى طريقة تناسبه وبدون احكام من الاخرين 

هناك 16 تعليقًا:

النسر المهاجر يقول...

reemaas

المدونات فى الاساس اتعلملت كنوع من التسجيل ولكن العرب لازم يحطوا التاتش بتاعهم فبقى ليها طعم تانى بس زى مقولتى كده اجمل ما فيها إننا بنتكلم بمطلق الحرية فى أى حاجه وكل حاجه
وكمان بنقرا أفكار غيرنا وبنستفيد حاجات من تجاربهم يعنى هى مدرسة إحنا طلاب ومعلمين فيها فى نفس الوقت

وأجمل ما فى التدوين إذالقينا مدونة جميلة زى مدونتك


تحياتى

رحاب صالح يقول...

ده صحيح جدا ريماس
تعرفي انا عندي مدونة تانية الي هي حوليات رحاب صالح
هتلاقيني كاتبة فيها تقريبا كلها حاجات فضفضة مكتبتهاش ف حياتي لكن مش حرة فيها
حوليات فيها جرأة وفيها مساحة حرية أكتر انا عطيتها لنفسي
مش بكتب فيها اي كلام الا بس كلام عن المشاعر مش بكتب كل يوم زي ما هو مطلوب ...بس بكتب لما احس اني عايزة اقول الي جوايا
المتابعين فيها قليل مش زي حياتي
مش برد علي التعليقات زي حياتي بردو
لان الفضفضة معناها انك تتكلمي وبس ...ممكن تلاقي رد وممكن متلاقيش بس ف الحالتين بترتاحي بعد الفضفضة
حياتي لكن مش حرة فيها مدونتي الاساسية مساحتي الي اتوجدت لي ف الحياة عشان اقدر اعيش
لكن حوليات رحاب صالح هي مساحتي للحرية الحقيقية

سواح في ملك اللــــــــــــــــــه- يقول...

اكيد يابنوتة

المساحة الشخصية دي جزء مهم من

حياتنا

فلا نري القمر قمرا الا وهو بعيدا

عننا

بمسافات لايمكن تداركها الا بالات تم

اختراعها حديثا وماان اقترب الانسان

من القمر وخطا علي ارضه فادرك انه

يشبه كثيرا الآرض التي نعيش عليها

فذهب سحره بالنسبة لرائيه بعد ان فك

طلاسمه وادرك من اين يأتي بنوره

فتلك المساحة الشخصية هي المسافة

بيننا وبين رؤيةالقمر كما نحب ان

نراه

تحيتي لاطيب بنوتة

نيللي علي يقول...

أحيانا الإنسان بيحتاج لمتنفس من الحرية, فعارف أنا اللي حوليه مش سيبين لي المساحة دي وده فعلا حصلي, كنت مضيقة لدرجة أني مش عاوزه أتكلمة مع حد وأنا علي الفيس وكتبت كدا وبردوه يصروه إنهم يكلموني لحد ما تعبت وقفلت الأكونت خالص!!

الإنسان بيحتاج يعبر لكن القيود بتمنعه!

ابراهيم رزق يقول...

بصى يا نووووووووووور

انا بكتب اللى بيجى على بالى و اللى بحسه

يمكن عيبى انى معنديش فلتر الفتر كلامى
لو عملت كده الواحد بيفقد اهم حاجة بحبها فى نفسى و فى غيرى
التلقائية

خليكى نفسك و انسى اللى حولك
و اللى يزعل يزعل

نهر الحب يقول...

دي بقي مشكلة كبيرة جدا
لانك فعلا بتبقي عاوزة مساحة تتكلمي فيها براحتك وده حتلاقيه اول سبب كلنا عملنا عشانه المدونة مينفعش يبقي ليكي رقيب غير نفسك محدش يقعد يقولك قصدك ايه وبلاش تكتبي دي يمكن تتفهم كذا

Bent Men ElZman Da !! يقول...

أنا معاكِ جدااا في حكاية إن لازم كل واحد يبقي ليه مساحتة الخاصه اللي يقدر يتكلم ويفضفض ويتجنن فيها
المدونات في البداية كانت كده
و أنا أول ما عملت المدونة كنت بتعامل منها من المنطلق ده وماكنش القريبين مني اوي يعرفوها
بس مع الوقت الموضوع مابقاش إنتِ بتخبِ عشان في ناس معينه ماتعرفش
بقيت شايفة بصراحة إن من حقي أكتب عن أي حد و أي حاجة
ومش من حق حد يفسر الكلام علي مزاجة ولا يقعد يخمن أنا بتكلم عن مين
ماينفعش يبقي مساحة الحرية الوحيدة ليا
كمان في ناس حاطة مناخيرها فيها !
فـ بقيت أكتب اللي جوايا بطريقة تكاد تكون غير مباشرة
بس المهم إن الواحد بيفضفض في الأخر :)

بنوتة مصرية يقول...

انا بكتب زي ما قلمي واحساسي يقول .. حتي ممكن المساحات الشخصية المسموح بها التعبير عنها حتي ولو بشكل غير مباشر ...
اصل انا فاكرة اني عملت المدونة للمهمة دي " الفضفضة "ولراحتي النفسية مش لترتيب الكلام عشان يظهر في اجمل شيء

اقولك حاجة كوني نفسك فقط

تحياتي يا جميلة ..

reemaas يقول...

Gamal Abu El-ezz

عجبانى فكرة التاتش بتاعنا :)

reemaas يقول...

رحاب صالح

عجبانى فكرة انك بتكتبى وبس ومش لازم تلتزمى برد .. تصدقى بعمل كده اوقات من غير ما احس

reemaas يقول...

سواح في ملك اللــــــــــــــــــه-

الردود النهاردة كل حد ضايفلى حتة جديدة :
عجبنى حكاية مسافتنا والقمر اوى

reemaas يقول...

Nelly Aly

لما ماعرفتش اقفله عملت انا ايه بقى بقيت لو مش عاوزة اتكلم مابتكلمش حتى لو عاز كده طوب الارض

reemaas يقول...

ابراهيم رزق

ايون ايون انت حالة خاصة يا ابو زياد انت بتقول اى حاجة حتى لو مؤلمة وبتغلفها بحتة سكر :)

reemaas يقول...

نهر الحب

اهى تقصد ايه اللى مجنانى

reemaas يقول...

Bent Men ElZman Da !!

ههههههههههههههه ايون مانا عملت كده يانا ياهم بصراحة الناس ام مناخير دى

reemaas يقول...

بنوتة مصرية

انا كمان فاكرة انى عملتها لنفس السبب واعتقد انى كل شوية محتاجة افكر نفسى