الاثنين، 4 مارس 2013

عنها3....








قالتلى تعالى معايا اشترى هدية رجالى لصديقى فلان عيد ميلاده قرب ومش عارفه اجيبله ايه..
قلتلها وماله....فى دماغك حاجة معينه؟
قالتلى لا بس عاوزاها حاجة حلوة قيمة ورقيقة..وماتبقاش شبه اى هدية هتجيله انتى عارفه التميز حلو بردو
قلتلها..بتعزيه انتى فلان ده !
قالتلى صديق جدع يابنتى..
ومرت فترة من الصمت افتكرتها هتكتفى بهذا الرد وخلاص لكنى فوجئت بيها بتكمل..
عارفة..حد مريح جدا فى الكلام بحب احكيله احداث يومى..بحب اسمع منه حكاياته واخباره
بحب اخد رأيه فى اى حاجة..على فكرة هو كمان بيعمل كده بيهتم جدا برأيى
تعرفى..بحب اشتكيله حتى لو ماكنش عنده حل لمشكلتى كفاية انى احكيله وخلاص..
بحس انى ضحكتى من القلب معاه ومابعرفش ازعل منه..
كنت اراقب ملامحها وهى بتحكى فلاحظت هى وسكتت..ثم قالت يعنى تقدرى تقولى اعز اصحاب..
ابتسمت انا وقلت اه طبعا فاهمة 
وف سرى لقتنى بقول يارب هو يكون فاهم....

هناك 29 تعليقًا:

حَنيّـن نِضال يقول...

يارب يكون فاهم :)

بس برضه ما قولتيش جبتهم ايه هديه مميزة منكم نستفيد !!

P A S H A يقول...

هي تطبق إيدها في عشرين جنيه وتديهومله
D:

وبعدين هو حتى لو فاهم هايعمل مش فاهم .. ده جواز يا دكتورة !!

احنا نيجي لحد الجواز وتلاقينا كلنا فقدنا الذاكرة D:

قوليلها تلحق تدبسه بسرعة قبل ما غيرها تدبسه وتقعد تعيط ع العشرين جنيه !!

حنين محمد يقول...

صباح الغاردينيا نور
آممممم انتي متأكدة انهم أعر أصحاب بس كدا
مافيش حاجة من هنا ولا هنا امممم انا شامة ريحة حب
:)
وانا بقى انتي عارفاني اجري ورى حكايات الحب هههههه
انتو بقى ياحلوين جبتو ايه هدية :) "
؛؛
؛
لروحك عبق الغاردينيا
كانت هنا
Reemaas❤

AhMeD RaDy يقول...

يارب هو يكون فاهم....
دى اجمل تعليق يتقال اساسا ! تسلم ايدك وربنا يارب يهدى الناس والناس تفهم بسرعة ! وياريتها على الفهم يا صيدلانية الاهم اللى بعد الفهم !

faroukfahmy يقول...

تبادل المشاعر ضرورى لايمكن ان احب نسان ويكون بيكرهنى وبالمثل لا يمكن ان اكره انسان ويكون بيحبنى
الاحساس ان اخطأ مرة لا يخطئ كل مرة يا نور

eng_semsem يقول...

حتى لو فاهم ممكن يعمل مش من هنا
الرجاله دول انا عارفهم ههههههه
تحياتي

أسماء فتحي يقول...

ههههههههههههه
لا واضح ان الصداقة بريئه

فاهم ان شاء الله فاهم

ولو مش فاهم فهميه انتى هههههههههه

تحيــــــــــاتي
كانت هنا ورحلت
Asmaa Fathy

زينب علي حبيب يقول...

ياااا رب يكون فاهم ...

لو مفهمش تبقى مصيبة!

Do3aa El_attar يقول...

المصيبة بقى يانور إنه يكون فاهم وتكون فاهمة وهما الاتنين عاملين عبده العبيط :D :D

افكار مبعثرة يقول...

واضح فعلا صحاب :)
يارب بجد يكون فاهم و ميعملش مش فاهم :)
تحياتي

Bent Men ElZman Da !! يقول...

هى البداية دايماً كده
أعز أصحاب
بس المهم يكون فاهم زى ما قولتى :)

zeze يقول...

ميدخلوا في الموضوع علطوول احسن
دا خير البر عاجلة :))

E73 يقول...

انا لو كنت في الموقف دا هيبقى رد فعلي

إيماءة في البداية دليل "تعجب"
وتتسع ابتسامتي وتلتمع عيني مع سرد سائر الصفات :)

يارب هي تكون فاهمة أو مقتنعة علشان متقعش على بوزها فالآخر وتكتشف انها كانت بتضحك على نفسها

مجلة الأم الصغيرة يقول...

أكيد فاهم طبعا بس هيعمل عبيط لحد ما تقوليله :)
تحياتي لقلمك

reemaas يقول...

حَنيّـن نِضال

لا لا كده هتبقى اعلانات رسمى :)

reemaas يقول...

P A S H A

ههههههههههه حاسةان دى هتبقى اخرتها

reemaas يقول...

ريـــمـــاس

بينى وبينك ياريموسة مش متاكده خالص

reemaas يقول...

AhMeD RaDy

اه والله يا احمد انتم بجد عالم محيرة جدااااااااااااا

reemaas يقول...

faroukfahmy58

اتمنى يا استاذنا والله

reemaas يقول...

eng_semsem

حلو الاعتراف ده السؤال بقى ليييييييه

reemaas يقول...

asmaa fathy

ايون مانا فكرت فيها بس خفت الحقيقة

reemaas يقول...

زينب علي

يارب

reemaas يقول...

doaa elattar

انا حاسة انه فاهم بينى وبينك

reemaas يقول...

افكار مبعثرة

اهو مايعملش دى المهمة

reemaas يقول...

Bent Men ElZman Da !!

يارب

reemaas يقول...

zeze

ناس فاضية

reemaas يقول...

E73

ده اللى انا خايفة منه

reemaas يقول...

مجلة الأم الصغيرة

المشكلة هنا بقى لما اقوله هيعمل اييييييه

غير معرف يقول...

حسيتك بتتكلمي عن وحدة صحبتي هههههه
كانت بداية حكايتهم كده
و لحد دلوقتي >>ايوة هو عارف و فاهم و هي عارفة و فاهمة
بس يا ترى الاهل هيفهموا لما يعرفوا ؟

الأمَــــلْ