الجمعة، 15 مارس، 2013

وقال عم صلاح...









بالاسبرين..والسكاكين
وبالمسدس مقتولين
على اعمدة كل الجرايد مصلوبين
شبان صغار
ازهار فى فجر العمر ماشفتش النهار
متكلبشين فى الزنازين او مغروزين
فى الطين فى قصر النيل وعايزين غطاسين

ع المشرحة انسان نحيف
بشنب خفيف اصفر لطيف
خدوده من قيمة يومين مش محلوقين
عنيه على جدار الفراغ متسمرين
وعلى الجبين رفرف سلام الميتين
ماتسألوش كان اسمه ايه
اسمه على المحضر بقى المجنى عليه
اسمه بقى الجثة فى اوراق الدوسيه
ماتسألوش عن قصته كان موته ليه
المسألة صبحت فى ايد المسؤلين

على ذمة التحقيق سجين
انسان حزين
فى قلبه احساس الغريق
مالهش عون
فى دماغه اكتر من حريق
لابس قميص مربعات وبنطلون
وف رجله صندل من زمان مالهش لون
يبص على اخر الطريق
يلاقيه مابين رجليه تمام
ثابت عليه الاتهام
وحياته بين الناس حرام
حرام عليه يركب ترام
حرام عليه الاوتوبيس
حرام عليه الارصفة والفوانيس
والمدرسة والسينمات
مكتوب عليه يعيش مابين المحابيس
فى اللومنات
ماتسألوش ده يبقى مين
شفتوه وبتشفوه كتير فى الجرانين
بلاش سؤال
على اى حال
المسألة صبحت فى ايد المسؤلين

على ناصية الشارع امين
واقف مع حسين واسماعين
وبنيامين
متسرحين ومشمرين
وشوية يوصل مصطفى وعبد السلام
ويبتدى يحمى الكلام
ويغمزوا بعينهم ويمكن يشتموا
ويقولوا لفظ بذئ وهم بيضحكوا
ماتفرحوش لما تشفوهم من بعيد
نازلين هزار وقزقزة
وماتقولوش ياريت زمان التلمذة
يعود علينا من جديد
بيشتموا
وف كل قلب صراخ يحاول يكتمه
بيضحكوا
وف كل صدر عويل ونار راح تهلكه
وتفركه
متفرحوش
وفكروا ازاى نحوش
اللى هيشربله ازازة اسبرين
واللى هيطعن امه اربع سكاكين
من قبل ما الميت يموت
من قبل ما الايام تفوت
والمسألة تصبح فى ايد المسؤلين
 

هناك 6 تعليقات:

asmaa fathy يقول...

جميلة
نقل مميز يصف حالد بلد علي حافة الهاوية

تحيـــــــــــــاتي
كانت هنا ورحلت

Asmaa Fathy

Casper يقول...

والله الواحد ما عارف يقول ايه
من اللى بيشوفه ويسمعه بس كل اللى اقدر اقوله ان احنا في مصر ملناش تمن !!!


========

نحياتي لابداعك
تقبلي مروري

Casper

faroukfahmy58 يقول...

نو رت يا نورنا
من زمان مصر مقهورة
باولادهاقاعده منحورة
ومع كل ده مجبـــوره
مجبوره برغيفهامصبورة
مجبورة بحكامها مظلومه
احسنت الاختيار يا نور بما يتفق ووقت زماننا

AhMeD RaDy يقول...

جميلة جدا ! بس للاسف واقعية

eng_semsem يقول...

ان شاء الله تتغير الاحوال وتتحسن
بس لازم احنا نبني بلدنا بايدينا عشان تكون لينا
تحياتي

هناء محمود " يوميات فرن بالكهربا " يقول...

الكلام ظاهر عندى هيلوغريفى مش عارفة ليه ,, بس قولت أسلم بما إنى دخلت