الجمعة، 14 ديسمبر 2012

عن ..الربع جنية







من يومين كده كنت بحاسب واحد من الزباين وكان بقيله ربع جنيه,ودار بينا الحوار ده..

انا:ثوانى اجيبلك الربع جنيه الباقى
الراجل: خليه يادكتورة مش مهم
انا: لا ازاى ده حقك 
الراجل :مش مستاهلة ياستى ثم هو بقى لسه فيه حاجة اسمها ربع جنيه ده الجنيه نفسه خلاص الله يرحمه اقولك ولا تزعلى هاتيلى بيه اى حاجة مناديل مثلا..
انا:معلش المناديل بنص !
الراجل(وهو بيضحك): علشان تصدقى لما اقوك مش جايب همه ..اقولك هاتى فوار اهضم بيه اللى بيحصل ..واخده ومشى
طلعت انا بقى الربع جنيه من الدرج وفضلت ابصله..يااااااااااااه اد كده مابقاش ليك قيمة؟!
فين ايام زمان..انا فاكرة كوبس وانا صغيرة قبل مادخل المدرسة على طول.فاكرة لما بابا الله يرحمه كان بيدينى مصروفى اللى كنت ببقى مصممة انه يبقى ربع جنيه..حتى لما كنت باخد نص او جنيه كنت بصمم انه يتفك ارباع..ماكنتش بفرح الا لما امسك الورقة اللى ماعرف ان كان لونها ازرق ولا اخضر!
كنت بشوفها مختلفة عن باقى الفلوس وياسلام لو كانت عيدية..ربع جنيه جديد لانج والوانه زاهية كده وتشد..قمة الفرحة
كان بيجيب وقتها حاجات كتيرة..كان بيجيب كل الحاجات اللى انا بحبها على الاقل..بلونات..شيكولاتات..بومب..كل حاجة وخصووووصا البسبوسة ..

كنت انا واصحابى نروح لمحل الحلويات اللى فى اول الشارع وكل واحد معاه الربع جنيه بتاعه ونديهم للراجل اللى عارف طلبنا اليومى طبعا ..كل واحد قطعة البسبوسة المتينة :)

عدت الايام وفضلت معزتى للربع جنيه زى ماهى..احب ادى لاصحابى فى العيد ربع جنيه جديد مكتوب عليه كلمة حلوة واخد منهم بردو ربع جنيه مكتوب عليه كلمة حلوة..
فضلت معانا العادة دى لحد ما طلعولنا فى يوم بحكاية الربع جنيه المخروم..وبعدين سدوا الخروم وعملوا الربع جنيه المقروض الصغنن ده ..بهدلوه يعنى..وماكتفوش بده ..لا..وصلوا الناس لدرجة الزهد فيه حتى ولو كان حقهم !!
حطيت الربع جنيه فى الدرج تانى ولقتنى بقول ..ايييييييه كانت ايام
 

هناك 33 تعليقًا:

غير معرف يقول...

ياه بس لسة صامد وماسك في إسمه(ربع جنيه)ومعاه ذكريات جميلة
بس على أد ما شدتنى على أد ما ضحكتني
(..اقولك هاتى فوار اهضم بيه اللى بيحصل ..واخده ومشى)هههههههه
دا انت محتاج مصنع فوار ياحج واذا نفع ابقى ......

ابراهيم رزق يقول...

حمد الله على السلامة يا نووووووووووووووور
والله العظيم ليكى وحشة
والله العظيم كنت باسأل عليكى

اما موضوع الربع جنيه فردى ببساطة اغنية الست
عايزنا نرجع زى زمان قول للزمان ارجع يا زمان
وهاتلى عصر لا فيه حسنى الجبان

سلام يا نور عشان انا كمان وحشنى الربع جنيه

سلام

زينب علي حبيب يقول...

كل زمن وليه فلوسو :P

كتير حاجات بنشوفها بعيننا ليها قيمة وغيررنا بيبصلها بطريقة عادية جداً او مبيقيموهاش اساساً :)

بس احسن على الاقل كسبتي الربع جنيه ههههههههههههه

amiraali يقول...

هههههههه والله يا نور ضحكتيني وفركتيني بايام الصيدليه..ده الواحد كان بيشوف عجب...كل حاجه راحت قيمتها مش هتيجي علي الربع جنيه :))

حنين محمد يقول...

صباح الغاردينيا نور
وحشتيني
وحشتيني بجد
وبحب حكاياتك في الصيدليه داأنتي بتشوفي العجب بس عارفه كل حاجة مهما راحت قيمتها ومابقتش زي الاول هتفضل ذكراها جوانا وادي الربع جنيه رجعك لأيام الطفولة الحلوة :)"
؛؛
؛
لروحك عبق الغاردينيا
كانت هنا
reemaas

reemaas يقول...

غير معرف يقول...

حسيت انه عاوزه فعلا المصنع ده :)

reemaas يقول...

ابراهيم رزق

والله وانا ديا بسال عليك يا ابو زياد ومش عارفة اتلايم عليكم اصلا

reemaas يقول...

قطرة وفا

ماهو ده السؤال بقى تفتكرى ايه اللى هينقرض بعد 10 سنين؟

reemaas يقول...

amiraali

ياخووووووووفى لحاجات تانية تروح

reemaas يقول...

ريـــمـــاس

انتى كمان وحشانى جدااااااااا معلش بقى الغيبة طولت

اه بصراحة افتكرت معاه حاجات حلوة اوى

سواح في ملك اللــــــــــــــــــه- يقول...

ازيك يابنوتة يامصرية ياحالمة

فعلا يانور في حاجات كتير حلوة مع الزمن فقدت قيمتها

تحيتي يابنوتة

reemaas يقول...

سواح في ملك اللــــــــــــــــــه

انابس خايفة على الباقى يا خالد

المهم انت ازيك اى اخبارك

ياسمين يقول...

ياااااه كانت أيام!
أصدق كلمة
زمان بئا كان فيه بريزة وشلن
وكانوا بيجيبوا حاجات كثيرة ع فكرة ^_^

hend anwar يقول...

زززمن

غير معرف يقول...

هههههههههههههه ابقى قوليلى وانا اجبلك باكو ارباع ورق مدام بتحبيه اوى كده عندنا منه كتير فالبنك ابعتهولك دليفرى مع كرت مكتوب فيه اى كلام زى مثلا انا مش عارف اكتب اى هع هع هع هع

E73 يقول...

اه والله يا اختي كانت أيام

وتبقى قيمة الربع جنيه في أجرة الميكروباص لما تكون 75 قرش ^_^

nour alqamar يقول...

عجبنى الموضوع اووووي ..
بالتوفيق لك يانور .. ووحشتونى بجد كلكم وسورى على التقصير حقكم عليا :(
تحياتى لك
نور

nour alqamar يقول...
أزال المؤلف هذا التعليق.
P A S H A يقول...

حمداً لله ع السلامة يا دكتورة
:))
الربع جنيه (ممكن) تشتري بيه رغيف عيش يكون محمص تقزقزيه ف السكة :))

نهر الحب يقول...

ريموووووو اخيرا كتبتي وكمان من يومين الي هما اليومين اللي مدخلتش فيهم ع النت عشان بمتحن اهيء اهيء

:)
وحشني كلامك اولا

الربع جنيه بقي يا ستي صحيح بقي ملهوش قيمة لازم يتلغي بيغلبني في الصيدلية وبقعد ادي بيه اي حاجة باقي

بفتكر زمان ايام ما كان اجدع كيس شيبسي والحاجة الساقعة مش بربع كمان بعشرة صاغ

احم احم احنا مش عواجيز اوي كدة
:)

ايييييييييييه ايام
بليز بقي متتأخريش كدة تاني

الاحلام يقول...

رائعه دائما فانىى استمتع جدا بما تكتبين ببساطه التعبير وخفة الدم الجميله
كل سنه وانتى دايما بخير وسعاده
تحياتى ابوداود

Tamer Moghazy يقول...

اهو الأيام اللي انت بتتكلمي عنها دي.. انت رجعتيني ليها بادق ادق التفاصيل..
خاصة وصفك للربع جنيه اللي فعلا ماكوناش بنعرف هو لونه اخضر ولا ازرق..؟!!!

كل سنة وايامك كلها حلوة يا نور
ويارب السنة الجديدة تكون عليك سعيدة :)

مصطفى سيف الدين يقول...

للاسف كل حاجة كنا بنحبها بقت بلا قيمة
علشان كده بطلنا نتعلق و لا نحب حاجة حتى نفسينا

reemaas يقول...

ياسمين

اييييييه كانت ايام

reemaas يقول...

sun of free dom

:)

reemaas يقول...

غير معرف ي

متفقين يا مصطفى

reemaas يقول...

E73 ي

اه صحيح فعلا بيبان وقتها

reemaas يقول...

nour alqamar

انتى اكتر يا نور

reemaas يقول...

P A S H A

تصدق صح الرغيف بقى بربع

تسلم يا باشا

reemaas يقول...

نهر الحب

وحشانى ياسهاد

reemaas يقول...

الاحلام

تسلم يا ابو داوود واعزرنى على تقصيرى

reemaas يقول...

Timo.

يارب يا تامر يارب

reemaas يقول...

مصطفى سيف الدين

اه فعلا انا بطلت اعلق نفسى بحاجة