عن.....مش عارفة!!

عن..انك تكون بتعيش علشان تشتغل

عن..الفرحة اللى بتحنسك تقرب منك تيجى تمسكها ولا كأنها كانت هنا

عن..الحلم اللى مش حلمك وانت اللى بتستعبط ولازق فيه

عن..الصداقة اللى قلبت حب وبعدين وقفت لاعارفة تكمل ولا ترجع زى ماكانت..باظت

عن..الاحلام اللى لسه ماتحققتش

عن..القعدة على لسان راس البر

عن..صفحات الكتاب اللى بتقلبها مش علشان خلصتها لا..علشان تحاول تخفى الصورة اللى عمالة تنطلك كل ماتقلب صفحة

عن..الرسالة اللى على موبايلك واللى مش راضى تمسحها وكل ماتقراها تبتسم وتدمع

عن..دقات القلب اللى بقت عملة زى دقات الساعة..وقت بيعدى وخلاص

عن ..لمعة العيون اللى مانت عارف تفسرها ان كانت دمعة حزن ولا فرح ..ولا تراب مالى الجو

عن..الحاجات المناسبة اللى بتيجى فى وقت مش مناسب

عن ..الحاجات اللى مش مناسبة وبتيجى فى وقت مناسب

عن.. اللايك اللى بتلاقيها على الفيس وبتبقى مش عارف  تفسرها بايه..يعنى كده اتصالحنا ولا لاء

عن..المفجأة اللى بتستناها ومابتجيش

عن..الحد اللى بيختاره قلبك  وكل الناس تقولك مش مناسب..حتى هو

عن..السؤال اللى بيفضل يزن فى دماغك..ياترى دماغه مشغولة بيك كده ولا انت بس اللى تاعب نفسك فى الفاضى

عن..انك تكونى بتحبيه وعارفة ان ده حب عمرك قلبك بيقولك كده بس الكل يلومك ويقولك ماينفعش ده اصعر منك..وكأنه ذنبك

عن..انه يكون حد وحش جدا واذاكى جدا وبرده انتى اللى تتلامى ..انتى اللى اخترتى

عن..انك تقررى تروحى وتقوليله بحبك لانك مش قادرة تستنيه وخايفة الوقت يعدى وهو   ساكت وخايفة ماتقوليش وتضيعى فرصة سعادتك..وبرده يفضل ساكت

عن..انك تكونى صح والكل بيلومك وبيقولك انك غلط فتشكى فى نفسك وتقولى اكيد انتى اللى غلطانة ازاى تكونى صح والكل غلط..بس غلطت فى اى

عن..انك تمشى تمشى تمشى لحد ماتنهجى من كتر التعب وتقف تاخدى نفسك تلاقيكى واقفة فى مكانك

 

 

عن .....انى لسه بعرف احلم!!

كنت حاسة انى بطلت احلم من فترة..

اه مابقولش ده..اه بغنى وبقول لو بطلنا نحلم نموت..

اه بتكلم عن الاحلام مع اصحابى و فى المدونات وسعات كمان بتاخدنى الجلالة وبتكلم عنها هنا فى المدونة..!

بس انا من جواية عارفة انى بطلت احلم..بطلت امنى نفسى بحاجات وفى الاخر مابتحصلش..

عارفة انه نصيب..وعارفة ان اللى حلمت بيه وسعيت له وماتحققش يبقى ربنا مش كاتبهولى..وعارفة ان ممكن يكون الغلط منى وانى انا اللى جايز اكون ماسعتش صح وماشتغلتش على حلمى صح وجايز كمان اكون سعيت للحلم الغلط من الاول!!

بس المحصلة ان غالبية احلامى ماتحققتش..وفى احلام منها خلاص ماعدش ينفع تتحقق..مش يأس بس فى نوعية احلام بتبقى مصحوبة بوقت لو عدى منك خلاص خلصت..

وفى نوعية تانية من الاحلام بتبقى مربوطة بالناس..ودى كتيرة عندى الصراحة  ودى بقى مشكلتها انها حتى لو بذلت فيها اقصى مجهودات علشان تتحقق فى اطراف تانية لازم تشاركك فيها  ودول فى حالتى يا اما مش بيعملوا اللى عليهم يا اما مش بيجوا اصلا..وفى الحالتين الحلم باظ..

المهم..انا بقى تعبت من كتر ما الاحلام دى مش بتتحقق وتقريبا علشان ابطل ازعل  ..بطلت احلم..

لحد ما جه اخى العزيز خالد زين صاحب مدونة سواح فى ملك الله واقترح عليا فى تعليق له على الفيس انى انزل كتاب زى مجموعة المدونين اللى ربنا وفقهم وعملوا ده..

ساعتها تنحت لشاشة الكوبيوتر ولقتنى وبصوت عالى بقول انا؟ انزل كتاب باسمى؟

هو ساعتها انشغل وقعد يدور فى المدونات على خطوات اصدار كتاب وانا سرحت بقى..

ياترى هيبقى اسمه ايه كتابى العزيز ده..ياترى هكتب فيه ايه..ولو جمعت كل اللى كتبته فى المدونة او حتى فى اجندتى ينفع يبقى كتاب..؟

طبعا اول حاجة فى الكتاب لازم اعمل اهداء..هعمل اهداء لروح ابى الحبيب ولامى واختى وامنية صحبتى واكيد للاستاذ خالد اللى طالع عينه وعمال يدورلى دلوقتى ده..

ياترى اختار شكل الغلاف ايه ولونه..اه لونه ده مهمة جداااا..لازم يبقى لون شبهى كده :)

ولا حفل التوقيع ..يوووووووووووه ده هيبقى حتة يوم ..اكيد كل اصحابى هعزمهم وهشوف كل المدونين ..هشوف سهاد ودعاء اللى متشحططة علشان اشوفهم ومش عارفة :) اخيرا هقابلكم يابنات ده حفل توقيع كتابى وممنوع اى اعذااار....

تقدروا تقولوا وبكل ثقة انى حلمت بكل التفاصيل.. ده انا جالى احساس بالخوف المصحوب بالفرحة كمان بغض النظر عن انى مش عارفة هكتب فيه ايه..

الحلم ده اخد منى طول الليلة دى وصحيت تانى يوم لقتنى منشكحة جدا...

اينعم بالليل عرفت ان المسابقة بتاعة النشر لمن يستحق خلصت...واينعم لما فكرت شوية لقتنى مش اد الحكاية لانى بكتب لنفسى اكتر وحاسة انى ماعنديش مادة تنفع للنشر

 كل اللى املكه حبة افكار فى الغالب غير مرتبة ولا تصلح انها تترتب اصلا لانها عبارة عن احاسيس ساعة ما بحسها بكتبها يبقى هرتبها ازاى؟؟؟

اينعم الحلم ماكملش..كالعادة

بس ساب فيا تأثير حلو ونجح انه يخلينى مبتسمة طول اليوم ده من برا ومن جوا كمان :)

احلى حاجة بقى..

انى طلعت لسه بعرف احلم...

عن..بيت البيوت..

كنت بتفرج على حاجة سورى تقريبا او حاجة تركى مدبلجة بالسورى غالبا..وكان فيه طفلة بتلعب لما سألها حد بتعملى ايه قالتله بلعب ((بيت بيوت))..

ساعتها سرحت-وانا بسرح كتير باين اليومين دول- وافتكرت ايام زمان..كنت بحب العب اللعبة دى انا واصحابى كتير بس ماكنش اسمها كده ..كنا مسمينها((سكنة)) -بضم السين- نخلص جرى ونط الحبل وكهربا ولما نحب نهدى بقى نقول يلا يا عيال نسكن..

كل واحدة من صحباتى بتجيب فنجان من فناجين مامتها اللى مستغنية عنها طبعا..وانا عندى الصنية وعندى الورد وعندى المية..وطبعا مفهومة ان المية بنملا بيها الفناجين علشان نشربها والورد علشان ناكله..ايون كنا بنقطع ورقه وناكله :)

وكان بيبقى التجمع عندى بسبب توفر المكان .. واقدملهم بقى-بما انى صاحبة البيت- الصنية عليها فناجين المية والورد ونفضل نشرب وناكل لحد مايجيلنا تخمة او يجى معاد مرواحهم..

ايااااااااام....

 

نفسى ومانفسيش.!!!

كنت بقرا كتاب من فترة ل د/احمد خالد توفيق اسمه ESP

فى الكتاب البطلة عندها قدرة الاحساس الفوق طبيعية او الحاسة السادسة زى ماهى متعارف عليها

طبعا معظم الناس فاكرين ان عندهم الحاسة السادسة دى..وبيتعاملوا مع اللى حواليهم من هذا المنطلق..

الكل عارف اللى قدامه بيفكر فى ايه..الكل متوقع ردود فعل اللى حواليه..الكل موهوب والكل عنده مالايملكه الاخرون...

بارونويا مفهومة ومعروف وممكن التعامل معاها ...
 

لكن هنا بطلتنا كانت فعلا عندها الموهبة دى..كانت بتقرا افكار اللى قدامها وبمجرد سلام عادى ممكن تعرف هو كويس ولا وحش طيب ولا خبيث..

بعد ماقريت سرحت..ياترى لو اعرف اقرا افكار اللى قدامى..ياترى لو عندى موهبة اعرف بتعامل مع حد طيب ولا وحش..

الوجوه المبتسمة اللى بقابلها ليل ونهار دى وراها ايه؟؟

احساس حلو الحقيقة هيخلينى اتفادى الجرح والكدب والخيانات..

موهبة هتوفر عليا وقت كتير فى انى اعرف اللى بتعامل معاه من غير ماحتاج وقت لدراسته..هتعرفنى مين يستحق اثق فيه ومين لاء..

 كنز كنز بجد...حياتى هتتغير جدا..هتبقى احسن بمراحل.

وبعدين لقتنى سكت كده..

طب ياترى لو اكتشفت ان اعز الناس مش كويسين..ياترى لو قريت افكارهم وماعجبتنيش..

ياترى هحب اجرب؟ هحب اعرف؟؟

ياترى لو قريت افكار اللى قدامى هيفضلى  ناس ينفعوا يتصاحبوا؟؟

والسؤال الاهم بقى لو حد قرى افكارى هتبسط؟ ياترى هتفضل فكرته عنى زى ماهى؟

هى مش وحشة ..بس برده تفضل افكارى..حاجة انا حرة ارتبها انكشها..افكار تكون شريرة بطبيعة بشرية بحتة وبعدين ارجع انا لعقلى فى اخر لحظة ومانفذهاش..

افكار ماتمناش حد يعرفها غير ربنا..هو اللى قادر يهديها ويسامح فيها ..

وياسلام لو افكارى دى هى مشاعر ناحية حد وجنابه قراها قبل ماعرف جواه زيها ولا لاء..

يادى التسييح!!!!

لا لا انا كده تمام جدا وفلة على الاخر..

احمدك يارب على نعمة الستر..