الجمعة، 22 يونيو 2012

عن ....البدايات





كتير من الناس بيشوفوا البدايات عبارة عن امل جديد ..حاجة بتديهم هدف يسعوا ويعيشوا علشان يحققوه...
كل ده صح جدا 
لكنى بخاف من البدايات..

لازم كل ما تيجى بداية جديدة احس بتوتر شديد وحالة الحذر والشك والترقب تبتدى ..مش عارفة ليه

جايز لان البداية مصحوبة بنهاية حاجة انا اتعودت عليها؟ويمكن ده اللى كان بيخلينى ابقى خايفة اوى فى كل بداية مرحلة دراسية..خايفة الناس اللى اتعودت عليهم مالقهومش..خايفة الطريق اللى اتعودت  امشى فيه اغيره..

بخاف على الحاجات اللى عندى لاتقع منى  رغم ان عندى قناعة انى هكسب حاجات غيرها فى بدايتى الجديدة..زى ما اكون عاوزة كل حاجة عاوزة احتفظ بقديمى واكسب جديدى وده مستحيل لان وبالمنطق لازم تفضى مكان فى حياتك علشان تملاه بحاجات تانية...

يمكن بخاف من البداية لانها مجهول..

يمكن بخاف من البداية لانها ممكن تأثر على حالة الاستقرار اللى عندى رغم ان ممكن تكون الحالة دى اصلا مش بسطانى..ممكن ايه ده اكيد!!

جايز لان الوقت اللى بيعدى بين كل بداية وبداية فى حياتى كبير اوى فببقى اتعودت على الدنيا كده..
مش عارفة..
رغم انى فى امس الحاجة لبداية جديدة لكنى فعلا بخاف من البدايات...

هناك 52 تعليقًا:

Unknown يقول...

رائعه جدا الخاطره وفكرتها حلوه جدا مستني جديدك بفارغ الصبر

aya mohamed يقول...

اوقات الخوف بيخلينا نعمل احسن حاجة عندنا وممكن من خوفنا يتولد نجاح عمرنا ما كنا نتخيله
مش مهم تبداى وانتى خايفة المهم مش تخلى الخوف ده يسيطر عليكى ويخليكى مش تبداى اصلا
دايما فى اى بداية بقول لنفسى فى اى بداية كدا او كدا مش هخسر حاجة بس اكيد لما اجرب هكسب نفسى
متخافيش تبداى مش هتخسرى حاجة لما تحاولى بس هتكسبى فرصة جدبدة :)

مصطفى سيف الدين يقول...

الحاجة الى وقفة مع النفس و ااتخاذ منحنى جديد حين تشعر أنك أضعت الطريق هي ضرةرة واجبة
جميلة جدا فكرة التدوينة

Unknown يقول...

ريماس بصي انا بصراحه بخاف بردو ببس مش بحرام يعنى كل ما أبدا حاجه بخاف انها تنتهى نهايه وحشه وانا من الناس اللى بتتأثر جدا بعد كل نهايه بس بردو مابحرمش ابدا ديما بحب ابتدي تانى لاخد وقتى في الحزن والزعل وببدأ ادور على بدايه يمكن ده عشان انا مبحش اقعد ساكته الله أعلم المهم انى عاوزه اقولك الدنيا مش كبيرة اوى عشان نفضل خيفين كده لازم تسيبي نفسك ومحدش بيتعلم اللى لما بيتلسع ربنا يجعل كل بداياتك ونهاياتك سعيده

Bent Men ElZman Da !! يقول...

البدايات دايماً بيكون مصاحب ليها احساس من اتنين
ياما سعاده وانتظار للى جاى
ياما خوف وانتظار بردو للى جاى
واحيان كتير بيكون موجودين الاتنين مع بعض
بس فى النهايه وفى جميع الاحوال احنا بيبقى جوانا امل حتى لو مش حاسين بيه
خوفنا ده وارد يكون لان احنا اصلا نفسنا ننجح فى البدايات دى وخايفين من الفشل
وخوفنا ده اوقات بيضيع علينا حاجات وتجارب كتيييير اوى
بيمنعنا نبدأ فيها خوفنا للاسف
بس البدايات هتفضل مرحله جديد من حياتنا لازم نعدى عليها كل فتره
عشان منها بنوصل للافضل
وده اللى احنا عايشين عشانه

Imane Belâbbes يقول...

انا الاتنين مع بعض
ببقى حاسة بأمل في حاجة جديدة
و في نفس الوقت ببقى خايفة من المجهول
و قليل لما بسيب نفسي للبدايات بسهولة كدة

richardCatheart يقول...

جميل وصح

شوفى لا يخشى البدايات الا من قتل حد التمزيق من النهايات بس مش معنى كدا اننا هنقضيها قلق وتوتر وننسى الاستمتاع بالبدايات عموما وللبدايات متعه خاصه جدااااااااااااا

ابراهيم رزق يقول...

ايه يا نووووووووووووووووووووور

مالها البدايات

واحد من الناس انا كنت خايف من الجواز

و بقالى عشر سنين متجوز اهو و لا اتهزت ليا شعرا و صامد والحمد لله
و اهو ايام اتكتبت علينا بنعديها
هههههههههههههههههه

تحياتى

sahar ( كلمةٌ و نبض ) يقول...

كلنا نخاف البدايات
خصوصاً إذا أوحعتنا النهايات
و لا أخفى عليكى
متعة البداية تكمن فى خوفنا
لأنها تحت وطأة العقل فلا يغيب عن أنظارنا أبداً
عن نفسى بعتبرها مغامرة جديدة
و قلب جرىء كل مرة
أوعى تخاف
تسلم ايديكى ♥

eng_semsem يقول...

البدايات دايما لحظة تحول لحلم بنحققه وخايفين ما نعرفش نكمله وعشان كده بنحس بالقلق ومهما كان ماشي منتظم خايفين من لحظة الانكسار اللي بتكون بدايه لكابوس خايفين نعيشه ومهما كانت المشاكل بتتحل عندنا شعور ان الحل ممكن يقف في اي لحظه وتتصعب الامور
تحياتي

Habiba يقول...

للأســف فى شخصيتى الكثير من اللى قلتيه.. بحاول أصلحه بس محتاجة شـجاعة وجرأة..
المشكلة الكبرى إن الواحد بيفوت فرص كتيرة بسبب الخوف ده ويلاقى نفسه وحده واللى حواليه سبقوه بمراحل..
لابد من التغيير فى النقطة دى بالذات لأن كل ما الواحد بيكبر البدايات بتكثر أمامه إما يلحقها او يفضل واقف مكانه.

نهر الحب يقول...

لان البدايات ديماً جميلة

مش انتي قلتي كدة برضه قبل كدة

البداية بالنسبة لي حاجة تخوف بس مشوقة في نفس الوقت بقعد اقول يا تري حيحصل ايه يا تري الناس اللي ببصلهم دلوقتي باستغراب بعد شوية حبقي عاملة ازاي معاهم

من كتر بداياتنا اللي انتهت نهاية بفقدان ناس بقينا مش بنخاف من البدايات احنا بنخاف الفقد

سندباد يقول...

القلق والخوف شئ طبيعي في الغريزة الانسانية فوق كده طرية تربيتنا بعتبرها السبب الرئيسي في نمطيتنا وروتينا اليومي انا كبرت لاقيت والدي ووالدتي بيعملوا كل يوم نفس الاشياء وفي نفس الوقت تقريبا لاقيت نفسي لوحدي بقلدهم في نفس الاشياء حتي لما عملت لنفسي طقوس خاصة بيا لاقيت نفسي محبوس جواها تلاقئيا
تحياتي

نيسآان يقول...

طبيعي احساس الخوف هذا !!!
لانه البدايه يتبعها تغيير ما تعودنا عليه او في نمط حياتنا لكن برضو حنتعود على الجديد .

Śђąžล ฬąђ٤єĐ ♥ يقول...

الخوف ظاهره صحيه جدا لكن في حدوده الطبيعيه
لا تجعلي الخوف يسلبك أجمل أيام العمر
أو أجمل التجارب حتى وان كانت مؤلمه بعد الشئ
فـ التجربه إضافه .. فلا تخسري الإضافات لروحك وعقلك وحياتك
:))

;كارولين فاروق يقول...

الخوف عدو الانسان
تغلبي علي خوفك وخوضي
البدايات
وتوكل علي الله
تحياتي

رؤى عليوة يقول...

الخوف هنا ممكن يكون ايجابى
وبيعمل حالة يقظة

انا عندى نفس الاحساس فى كل بداية يمكن لانى بكون حريصه انها تكون حاجة مفيده وقيمه لكن النتائج بتكون تمام الحمد لله
اهم شئ ان الخوف ميسيطرش عليكى


دمت بخير

هبة فاروق يقول...

كل بدايه مخيفه
نفس احساسى يارب النهايه تكون جميله فى كل شىء نسعى اليه

حنين محمد يقول...

مساء الغاردينيا نور
البدايات تخيفنا لأننا نخشى البدء بألم جديد وجرح جديد وحب جديد لذلك تبقى البداية مخيفة وغامضة "
؛؛
؛
لروحك عبق الغاردينيا
كانت هنا
reemaas

AbEeR يقول...

صبااح الخير يا قمر ،،

أنا معاكي إنو البدايات ممكن بتخوفنا من المجهول .. وممكن تكون صعبه قوي الخطوه ليها .. بس ده مايعنيش إننا نوقف مكانا وما نتحركش .. ولا ما كناش بنوصل لي التطور اللي بنعيشه بالوقت ده
تأملي بمنظر شروق الشمس .. وشوفي إزاي الشمس بتتخانق مع الليل والظلام في كل يوم بس عشان تنورلينا السما .. استمدي قوتك منها .. شوفي أد إيه هياا قويه وبتبدأ حرب جديده بكل يوم تكسبها بالنهايه ...

...
عبير الكويت كانت هنا

βent Pasha يقول...

غالبا الانسان بيخاف من كل ما هو جديد
وتلاقي أي حد يقوللك هي أول طلعة ، أو هي البداية وبعد كده هتبقى عادي ومش هتخاف

جميل الموضوع
:-)
تسلم الأيادي ياجميل

reemaas يقول...

shreif elsaftty

تسا ياشريف امبارح من كتر متابعتى اللى فى البلد ولا عرفت اعممل اى حاجة

زينب علي حبيب يقول...

عارفة وانا كمان ... بموووت رعب من البدايات ... بتلاقيني خايفةاخطي الخطوةحتىلو متأكدةانها كويسة و انها صح مية بالمية ... هي دي الحياة ... كنت قبل بتشوق للجديد و بحبو ... دلوقت لااا ... بقيت بنرعب منو ...

المهم اننا نضغط على نفسنا و نمشي اول خطوة ... وبعد كدا ان شاء الله بتتسهل ... و لازم نعرف انو الحياة مبتديناش كل حاجة ...

reemaas يقول...

Aya Mohamed

على رايك هنخسر ايه

reemaas يقول...

مصطفى سيف الدين

بس بتعمل توتر مالوش حل

reemaas يقول...

mena moon

عجبانى انك شيفاها صغيرة ومش هنلحق نتوه فيها :)

reemaas يقول...

Bent Men ElZman Da !!

انا فى الغالب الاتنين على فكرة

reemaas يقول...

إيمي

اهى السهولة دى اللى بدور عليها

reemaas يقول...

richardCatheart

عجبنى تحليلك للخوف من البدايات
تصدق صح....

reemaas يقول...

ابراهيم رزق

ههههههههههههههه نفسى ابقى زيك

reemaas يقول...

private notes

وانا فى الجرأة ما بتوصاش الحقيقة :)

reemaas يقول...

eng_semsem

ايووووووووون حصل فعلا كل ده

reemaas يقول...

habiba

انتى هتقوليلى اه والله فرص بالهبل يعنى

reemaas يقول...

نهر الحب


ماهى دى مشكلتها انها جميله ومافيش حاجة جميلة عمرت معايا للاسف وده مبدئ اللى اتلسع من الشربه

reemaas يقول...

سندباد

تسمحلى اقولك شيك هاند

انا حاسه انى هعمل نفس المقلب فى ولادى

reemaas يقول...

نيسآان

صح على فكرة

reemaas يقول...

Śђąžล ฬąђ٤єĐ ♥

بحاول والله واول المحاولة الاعتراف بالمشكلة

reemaas يقول...

;كارولين فاروق

ونعم بالله هحاول والله

reemaas يقول...

رؤى عليوة

بدأت اطمن انى مش لوحدى :)

reemaas يقول...

هبة فاروق


ممكن توصل لمرعبه

reemaas يقول...

ريـــمـــاس

بنجيبها من الاخر ونخاف من نهايتها

reemaas يقول...

AbEeR


ماهى دى المشكلة اوقات الخوف بيخلينا ناخدها من قصيرها

منورانى

reemaas يقول...

βent Pasha

ونفتح على الرابع؟
يااااااااااارب

reemaas يقول...

قطرة وفا


اهو نضغط على نفسنا ده حاسة انى بعمله كتيييييير اوى

كريمة سندي يقول...

أي بداية في حياة أي منا تتعتبر إما خطوة للأمام أو رجوع للخلف المهم أن نخطو ثم نأمل خيرا تحياتي الصادقة

reemaas يقول...

كريمة سندي

صح هى حسبة معروفة فعلا ..

nesma hatem يقول...

لانها ممكن تأثر على حالة الاستقرار اللى عندى رغم ان ممكن تكون الحالة دى اصلا مش بسطانى..ممكن ايه ده اكيد!!

جايز لان الوقت اللى بيعدى بين كل بداية وبداية فى حياتى كبير اوى فببقى اتعودت على الدنيا كده..
مش عارفة..
رغم انى فى امس الحاجة لبداية جديدة لكنى فعلا بخاف من البدايات...

جبتى من الآخر
بقالى فترة فى بالى نفس الفكرة علشان كده أبتسامة كبيرة قد الدنيا لانى مطلعتش لوحدى
:)

reemaas يقول...

nesma hatem


اطمنى جدا جدا انا معاكى قلبا وقالبا:)

الجودي يقول...

على الرغم من إني كتبت بوست عن البدايات ..

و كان أول جمله فيه أعشق البدايات

إلا إني أخاف جدا من البدايات و اكتشفت إني أحمل نفس مشاعرك و أنا أقرأ البوست عن البدايات :)

ومازلت في أول بداية أواجهه صعوبه تصاحبها هرب النوم من عيني الليله التي تسبقها ..

زيارة أولى لمدونتك ولا أعتقد بأنها الأخيره ..

شكرا لك

http://aljoudi.blogspot.com/2011/04/blog-post_09.html

افكار مبعثرة يقول...

تصدقي فعلا صح اويييييييييييييي اكتشفت وانا بقرا ان ده احساسي انا برده
رغم اني دايما ببقى في امس الحاجة لبدايات جديدة لحاجات بتمناها الا اني اكتشفت ان البداية اما بتحصل بتوترني و تدخل جوايا احساس بالخوف من القادم و المجهول و خوف على الحالي اللي زي ما قلتي ممكن يكون في اوقات كتير مش حلو اوي بس اتعودتي عليه ولو اتغير بتقلقي
بوست رائع جدا بجد:)
تحياتي

reemaas يقول...

الجودي


:)

وانا كمان رغم خوفى منها نفسى فيها جدا

منورانى ديما

reemaas يقول...

افكار مبعثرة

حالة عجيبة وواضح انكلنا فيها وباصرار

مبسوطة اوى انه عجبك على فكرة