السبت، 21 أبريل، 2012

عن..التدوين



كنت اتحدث مع صديقة ليا عن التدوين وعن الكلام اللى بكتبه واللى بقراه
لقيتها بتقولى حلو اوى اللى بتعمليه ده اهو شغل للوقت يارتنى اعرف اعمل زيك
فقولتلها وايه مانعك خمس دقايق وتعملى مدونة وابدأى الحكاية مش اختراع
ردت عليا رد عجيب,او انا شيفاه كده

قالتلى بس انا ماعرفش اكتب!!!
قلتلها ازاى يعنى؟
قالتلى ماعنديش موهبه الكتابة ولا اعرف اعبر..مش موهوبة انا

ولصديقتى العزيزة اقول..
مين قال كده؟
مين قال ان التدوين محتاج موهبة ده فهم غلط جدا فى رأى المتواضع
اينعم انا عرفت مواهب فذه عن طريق المدونة مواهب وصلت لدرجة الاحتراف  فى القصة وفى المقال والكاريكاتير وفى الشعر والادب
لكن ده مش شرط التدوين..
التدوين هو حالة من تسجيل الفكرة,تسجيل الحدث سواء شخصى او عام
تسجيل الاحساس..تسجيل الحالة ايا كان هى ايه
تخيل نفسك لو ربنا كاتبلك عمر بعد 10 سنين فتحت مدونتك وقريت رأيك فى الموضوع الفلانى
او وصفك لحالة مريت بيها من 10 سنين وازاى اثرت فيك وقتها
تخيل وانت بتفتح مدونتك دى بعد 10 سنين وبتقرا  تدوبنتك عن يوم الاربعاء الموافق.........فى اليوم ده حصلك كذا وكان رد فعلك كذا واتعلمت كذا
تخيل وانت يومها بتستغرب من الحاجة الفلانيه او بتتريق على الحاجة العلانيه

تخيل وانت بتدلى برأيك المهم وقتها فى الموضوع المهم وقتها
تخيل وانت بتقرا تعليقات الناس وازاى اتعرفت على ناس بيقلولك رأيهم بصراحة من غير ماتعرفهم ولا يعرفوك...

تخيل وانت بتقرا كلامك اللى ممكن يكون مش مترتب او مش مكتوب بطريقة مهنية محترفة بتوصف فيه احساس معين او مشكلة معينة وجدت فى نفسك حرج انك تقولها لحد يعرفك فقررت تبوح بيها فى مدونتك..مكانك الخاص..ولقيت ناس لا تعرفهم ولايعرفوك وقتها اهتموا بكلامك ده وقروه من اوله لاخره ونصحوك باللى قدروا عليه او واسوك على اد ماعرفوا او حتى فرحوا معاعا لفرحك ده بدون مايكون ده واجب عليهم..

تفاصيل كتير فى حياتنا لو اتدونت هتبقى عاملة زى  البوم الصور  كده
ذكريات...
ده التدوين..مش محتاج موهبة فى رأى هو ممكن يظهر موهبة او حتى ينميها
ناس كتير ومنهم انا.. اول ما بدأوا يكتبوا حاجة والنهاردة حاجة
لكن مش شرط اصلا تكون موهوب علشان تكون مدون
التدوين حق لكل مواطن يا صديقتى العزيزة...

هناك 39 تعليقًا:

ياره عبدالله يقول...

السلام عليكم ورحمه الله وبركاته
مساء الخير ريماس
انا معاكى جدا فى كل الى قولتيه
وانا كنت زى صحبتك كده
لحد مجت صديقه ليا شجعتنى انى اكتب
ودلوقتى مبسوطه جدا لانى بقيت اطلع كل الى جوايا كنت الاول بكتم جوايا لا بتكلم ولا بكتب
لاكن دلوقتى الحمد لله بكتب الى جوايا وبلاقى الى يرد عليا ويشاركنى وببقى ف منتهى السعاده لما بشوف ناس حاسه بيا وبترد عليا
انا معاكى جدا ان كل شخص يعمل مدونه ليه
ومش شرط يكتب ممكن لو تعبر بصوره بتبقى ليها معنى تانى اكيد
اسفه طولت عليكى بس انا الموضوع ده مأثر فيا كتير.

reemaas يقول...

ياره عبدالله

ده صحيح
هو فضفضة بحسه ولو مصحوبة بموهبه يبقى يا حبذا

ياريت ديما تطولى :)

منورانى يا يارة

ابراهيم رزق يقول...

نووووووووووووووووور
مين اللى قال كده ان لازم يبقى موهوب

على فكرة فى حفل توقيع شرين سامى اثير موضوع كتابات المدونين
و انا قلت يومها ان اجمل ما فى التدوين عشوائيته
فنحن لا نكتب كلام منمق بها كثير من الحرفية و قليل من الصدق
بل ما يكتب بالتدوين به كثير من الصدق و قليل من الحرفية
اقصد بالحرفية حسابات السوق من اعلانات وتوزيع و مصالح لدى الغير
و بعدين هنروح بعيد ليه
اضربلها مثل بابراهيم رزق
قوللها فى واحد اسمه ابراهيم واخد التدوين بالدراع
هههههههههههههههههه

تحياتى

سواح في ملك اللــــــــــــــــــه- يقول...

نور الطيبة

اتفلسف عليكي بقي شوية هههههه

التدوين تأريخ اي انه يؤرخ لفترة ما في حياة البشر

وحياة الوطن كمان

يعني لو جمعتي كل اللي اتكتب في المدونات

بتاعتك وبتاعة زملاتك او حتي بتاعة ناس

متعرفهيمش هتعرفي وضع مصر كان ازاي قبل الثورة 25 يناير

وليه قامت الثورة وايه اسبابها

وكيف كانت تحكم مصر

وللتدوين ايضا رسالة جميلة

فهو كالمذكرات الشخصية

وتلاقي فيه عقول متناغمة بتخاطب بعضها بدون مصالح

تحيتي يااطيب نور

P A S H A يقول...

"قالتلى بس انا ماعرفش اكتب!!!'
ههههههههههههههههههههههههههههه
يعني احنا اللي بنعرف نكتب أوي اسم الله هههههههههههههههههههههههههههه

بصي خلليها تدخل وتقعد معانا في التختة اللي ورا :))

(طبعاً مع الاعتذار لعمالقة المدونين)

تحياتي

مصطفى سيف الدين يقول...

التدوين هو مساحة فضفضة و تعبير عما بداخلك حتى لا يقتلك الكبت
تحياتي

هبة فاروق يقول...

التدوين تفريغ للطاقه وياحبذا لو كان مصحوب بموهبه حتى يكون هناك استمرار

Tarkieb يقول...

هههههههههه قوليلها ان احلى حاجة في التديون انك بتحسي انك شاعرة ومؤلفة كبيرة مع إنه ده مش حقيقى لان محدش بيقول الا الله ينور...بتحسي ان البلد كلها بتحب على روحها...وان الصبيان اوحش واحد فيهم بجمال براد بيت وان البنات كلهم قممممماير ...وكلهم رومانسية وان الناس في الشارع سايبين الحبيبة ماشيين ايديهم في ايد بعض وممكن يتعانقو وعادي مفيش مشاكل ولو في وقت ممكن يرقصو تانجو والناس اللي في الشارع تنزل ترقص معاهم زي قلولو الحقيقة وسنية ترتر ونجوى فؤاد ....اهم حاجة ان الواحد يطلع اللي جواه وخلاص...وماشي حالك وممكن من كتر الممارسة بتنمو الموهبة بجد...ومشوار الالف ميل يبدا بمدونة

موناليزا يقول...

عندك حق
فالتدوين بمثابة أبوم للذكريات :)

دعاء العطار يقول...

هههههههههههه

عارفه انتى جيبتى التشبيه الصح يانور

كانه البوم صور :)

التدوين احلى مافيه لما تحسى ان البلوج بيتك

وكانك بتكلمى نفسك

ده غير طبعا انك بتحسى ان ليكى جيران واهل زى العسل بقلوب صافيه وطيبه

قوليلها تعملها ومش هتندم :)

Casper يقول...

في رايي التدوين هو فضفضة الكترونية
ربما لا يستطيع اللسان إخراجها

reemaas يقول...

ابراهيم رزق
ياسلااااااااااااام

ولما ابو زياد يبقى واخده بالدراع انا ابقى اييييه بس يا عم ابراهيم :)

reemaas يقول...

سواح في ملك اللــــــــــــــــــه-

ايووووون اهى دون مصالح دى يا خالد هى الهدف الرئيسى

reemaas يقول...

P A S H A

هههههههه ايون ايون عارفه انا التخته دى :)

reemaas يقول...

مصطفى سيف الدين

صح جدااااااااااااا

reemaas يقول...

هبة فاروق

فعلا فعلا وياحبذا

reemaas يقول...

Blogger Tarkieb

هههههههههههههههه
تصدق صح

فعلا فى حاله من الرومانسية تشع فى المنطقة كلها ههههههههههههههههه

مالكش حل يا تراكيبو

reemaas يقول...

موناليزا ي

فينك يا مونى وحشانى جدا

reemaas يقول...

دعاء العطار

بقولها اهو يا دودو

بالحق
الفكيرة بتاعتى خلاويص بح :(

reemaas يقول...

Casper

صح جدا يا اسامة
فينك بقى من زمان

AhMeD RaDy يقول...

ازيك يا صيدالانية الاول وعاملة ايه ؟

والله التدوين حق مكفول للجميع

واهو الكل بيخبط

فا اللى تخبيطه بيطلع ابداع واللى تخبيطه بيطلع اللى جواه

بس الاهم انها تحاول مش هتخسر كتير طالما انها فى الاول وفى الاخر عايزة تكتب عن شئ هى حساه

eng_semsem يقول...

لو التدوين شرط فيه احتراف الكتابه يبقى انا موجود في المكان الغلط هههههههههه
قصدي يعني اني انا اللي غلط في المكان الصح اللي بحس فيه اني بتنفس انقى هوا وايدينا تتمد تمسح دمعتي وايدين تصقف وتفرح وتضحك معايا في سعادتي ولما بتعب ولا بضعف بلاقي ايدينا اصحابنا هنا تتمد تقوي ظهري
خليها تكتب اللي في نفسها وشجعيها
تحياتي

الاحلام يقول...

كثيرا منا يدخل مدونته لتدوين احداث تؤثر فيه يوميه فيكتبها لكنه يكتبها باسلوبه احببنا جميعا حياه التدوين لهذا فالحب يجعلنا نكتب بدون موهبه فانا اتذكر انسانه متميزه فى الفضفضه احبت ان تكتب شعرا وقصه قصيره فكانت متميزه ايضا
تحياتى وتقديرى ابوداود

عباس ابن فرناس يقول...

ممممم
مدونةلكل مواطن فعلا يجب ان يكون ذلك هوا شعار المرحلة .. خصوصا انه فكرة نفيبة المدونين د/نور ههههه

وحشتنى افكارك وكتباتك يادكتورة

تحياتى المستعطرة

reemaas يقول...

AhMeD RaDy

قولتلها بردو كده انها مش هنخسر بالعكس دى هتصدعنا احنا ههههههههههه

reemaas يقول...

eng_semsem

وانا زيك لو كان احتراف كانت تبقى كارثه بالنوسبالى :)

reemaas يقول...

الاحلام
:)

اخجلتنى بصراحة

يارب ديما تشجعنى كده يا ابو داوود

reemaas يقول...

عباس ابن فرناس

هههههههههه حلوة النقيبه دى

طب ايه رايك نفسى نعمل نقابه بجد

انت كمان وحشتنى كتاباتك فينها وفينك؟

Bent Men ElZman Da !! يقول...

ده احلى حاجه على فكره التدوين اللى من غير موهبه ده
بيبقى حاجه كده طالعه من القلب
مش مترتبه ولا متزوقه
ولا قصص ولا اشعار
بتبقى حياه انسانيه وبس

نهر الحب يقول...

صباح الخير يا ريمو

التدوين احلي حاجة عملتها في حياتي
اصلا انا كنت جوايا حاجات كتير مطلعتش غير هنا

بس عارفة ان برضه مش بقدر اكتب كل حاجة جوايا مش عارفة ليه

بس زمان اول حاجة اكتبها كنت اقول مش حكتب تاني اكيد مش حلاقي كلام اكيد وفضلت اكتب بقالي حوالي ست سنين اهو
:))

كلنا نقدر نطلع اللي جوانا

خليها تيجي وتتفرج علي مدونات كتير وحتلاقيها عرفت المعني ده

zeze يقول...

حبيبتي نور عندك حق انا كنت زي صحبتك مش عاملة مدونة وكان نفسي اعملها لنا شفت المدونات بتعاتكو ،وبصراحة كنت خايفة اووي لان كنت شايفة كلامكم حلو ومش حعرف اكتب زيه
بس حبيبتي ريماس شجعتني وعملتلي المدونة هدية ربنا يباركلها
ولحد دلوقتي خايفة اكتب اللي جوايا بصراحة معرفش ليه!
ارجو انك تزوري مدونتي المتواضعة واعرف رأيك لانه يهمني بجد
مش عارفة حتصدقيني ولا لأ بس انا برتاح لما بدخل هنا وحاسة انك صاحبتي من زماان "شكلها اخدت في نفسها مقلب"ههههه
بحبك في الله

ريري كربكه يقول...

عارفه يا ريمو
حلو اوي اني الواحد يكون عنده عالمه الخاص اللي يقول فيه كل اللي جواه ذي مثلا التدوين
بس للاسف انا عن نفسي مش بينفع اقول كل حاجه في المدونه يعني في شويه قيود على الوحد في الكتابه
تحياتي ليكي يا قمر واسفه على تقصيري معك

nellyaly يقول...

أنتي جبتي من الآخر!

رائعة أنتي:)

reemaas يقول...

Bent Men ElZman Da !


ايون يا دينا صح احلى حاجة التلقائية

reemaas يقول...

نهر الحب

على فكرة بقى انا اوقات كتير ويمكن اغلب الوقت بيبقى عندى نفس الاحساس ده :)

reemaas يقول...

zeze


حبيبتى اكيد هتبقى مدونتك سكر زيك ولان ريماس ديما يتهدينا كل الحاجات الحلوة

كلامك فرحنى جدا واسفه على التاخير
هروح طياره

reemaas يقول...

ريري كربكه

مع الوقت ممكن نلاقى حلول تخلينا نتخطى القيود
يعنى مثلا نحكى اللى نفسنا فيه بشخصيات تانيه وكده يعنى
مع الوقت بتمرن ازاى نطلع اللى جوانا

reemaas يقول...

غير معرف nellyaly

:D

shreif elsaftty يقول...

فعلا كلامك صح جدا الموهبه مش بتقولنا انا اهو شوفوني لازم نتفش عليها لازم نتعب شويه عشانها والتدوين من وجهة نظري هي مفكره او نوته بنسجل فيها احساسنا