الأحد، 15 أبريل 2012

مع نفسى9




سألتنى صديقة مؤخرا اى اهم حاجة نفسى الاقيها فى البنى ادم اللى هرتبط بيه
ورغم غيظى الشديد من السؤال ده غيظ يصل لمرحلة الكراهية..
لكنى  قولتلها بعد تفكير انه يحسسنى بالاهتمام والامان..
قالتلى :باختصار  يحبك يعنى
قلتلها بسرعة :لا..يحسسنى بالاهتمام والامان.!!
بصتلى مستغربة اوى..وانا سكت ومستغربانى اوى
******************

فى ناس انا بجد مش عارفة استوعبهم..تحبهم وتهتم بيهم ويبقوا احد محاور حياتك بلا مبالغة
ويقابلوا ده ببرود وكأنه شئ طبيعيى او حق من حقوقهم تيجى تلومهم على عدم المعاملة بالمثل يتحججوا بالظروف والحياة والشغل..وكأنك عاطل عن العمل!!
تيجى تكبر دماغك منهم وتتصرف زيهم يلوموك!!
مش فاهمة انا اى البجاحة دى؟

***************

فى ردود كده بجد بعتبرها مستفذه جدا
مثلا تسأل على حد بقاله كتير ما سألش عليك فتقوله شفت انا احسن منك وبسأل اهو..
يقوم قايلك طول عمرك احسن منى..
مش فاهمة ده تثبيت ده ولا اعتراف انه عمره ما بيسأل ولا تنبيه على ان اللى جاى العن واضل سبيل؟؟؟؟
*****************

من فترة ماليش نفس اعمل حاجة حاسة ان دماغى فيها دوشة من جميع النواحى ومحتاجة تتصفى
وفى وسط الدوشة دى لقتنى بكتبله..
هو مين؟
البنى ادم اللى لو فيه نصيب كده هيبقى نصيبى..
اه وربنا ..
ماعرفش ايه طققها فى دماغى ولقتنى محتاجة اتكلم معاه
وعليه..بقالى فتره وفى اوقات مختلفة من اليوم كل ما اتخنق القينى مسكت الورقة والقلم وكتبتله
احكيله على اللى خانقنى او اتكلم معاه او اسأله اسئلة..
جنان رسمى..
 تفتكروا لو جه فعلا وحصلت المعجزة دى هخليه يقرا الكلام ده؟
انا لا اعتقد

هناك 30 تعليقًا:

سواح في ملك اللــــــــــــــــــه- يقول...

صباح الفل يانور

المقطع الاول

قفشتك يانور ههههههه يحسسني بالامان والاهتمام

اه تبقي تقصدي ظابط شرطة ههههههه

نور الطيبة

عايزك تعرفي

البني ادم بيتولد بقدر وميعاد

وبيتجوز بقدر وميعاد

وبيخلف بقدر وميعاد

حتي الابن اللي بيخلفه

بيكون ليه ميعاد وجود علي الدنيا

وربنا محددله مين ابوه ومين امه من قبل مايتولد

وبتنتهي حياته بميعاد

تحيتي يااطيب نور

ابراهيم رزق يقول...

ازيك يا نورررررررررررررر

بصى يا نور هو الحب ايه غير امان و شوية حاجات فوق بعضهم
1 انت عارفة يا نور الحب هو الامان فعلا لانى لو اشعر بالامان مع من احب نسميه حاجة تانية فوار مثلا بمناسبة شم النسيم

ممكن يكون عشم مش كل حاجة على اعصابك يا نوووووووووووووووور

3 ممكن يكون نوع من المجاملة

4 يقرى مين يا ماماانتى عايزة تطفشيه ههههههههههههههههههه
يا رب يا نور اشوفك عروسة و بعدين اشوفك على كتفك عيل و فى ايدك اتنين
يارب يا نور يا بنت ؟؟؟؟
صحيح هى ماما اسمها ايه
مش مهم المهم ربنا عارف نيتى
كل سنة و انتى طيبة بمناسبة شم النسيم
و بمناسبة الصيدليات شغالة الله ينور فوار و ادوية الحموضة و التلبك المعوى
هههههههههههههههه

Amira Yusuf يقول...

ازيك يا نوري :)
المشهد الاول ده على أد ماهو عجيب
على أد مانا حاسه ان لكل واحد طريقته في الحب ولكل واحد برده طريقته في استقبال الحب ده والوصله ما بين الاتنين دي هيا اللي بتعمل مشاكل عشان تحب بجد لازم تسلّك الطريق عشان حبك ده يوصل صح انما انك تحب كده بطريقتك وخلاص تقضية واجب يعني يبقا هوا ده الحب اللي ناقصه الاهتمام
نتواصل عالفيس بقا انا اسمي عليه
amira yosif
هستنا ال add

Bent Men ElZman Da !! يقول...

بصى هو ملخص الكلام ده
ان الواحد اصلا لا الناس بتفهمه ولا هو بيفهمهم
واوقات كتير مش بنفهم نفسنا اصلا
على فكره
لما تلاقيه هتخليها يقرأ اللى كتبتيه ده واللى حتى خوفتى تكتبيه :)
ربنا يرزقك ان شاء الله بالامان والاهتمام والحب وكل حاجه جميله زيك :)

حنين محمد يقول...

صباح الغاردينيا نور
انا اول مابشوف مع نفسي بجي جري لأني بجد بحب مع نفسك دي عشان بتبقى فشة خلق وصدق من قلبك بصي ياعسل أنتي..
بالنسبة للأولى ..الحب لو ماكنش آمان يبقى مش حب وعشان الحب دا يستمر لازم يكون فيه إهتمام يعني مش أحس بالحب ولا بيسأل عني ولا بهتم بمشاعره الحب أنك تحسي بأبسط تفاصيله وتعيشي مشاعره وتشاركيه حزنه قبل فرحه وهو كمان يبقى حاسس بيكي ويهتم بأبسط تفاصيلك ..
الثانية ..كلنا في حياتنا ناس بنهتم ليهم ولما نعاتبهم بيكون من حب بس لما نعمل زيهم ونهملهم عارفةى بيعاتبوكي ليه عشان هما مش متعودين يحسو بكدا منك وعشان أنتي عودتيهم تديهم حبك وأهتمامك ..
الثالثة ..هههههههههه دي ضحكتني بجد اصلي بقولها ساعات لما حد بيسأل عني بس والله بيكون قصدي انه فعلا فيه الخير وجى احسن مني امم يمكن تثبيت مشيها يابنتي هههههه
الرابعه ..عارفة يانور حلوة اوي حكاية الكتابة لشريك حياتك سيبك انتي من عمنا ابراهيم رزق ههههههه وأكتبي ياستي كل مشاعرك عشان لما يجي الي حياخد اجمل نور في الدنيا يكون عايش معاكي كل إحساس حسيتيه حتى قبل مايجي طيب اقولك سر ..قربي كدا عشان اوشوشك احسن حد يسمعنا عارفة انا عندي دفتر صغنن لونه بينك بكتب فيه لبنتي الي لسى ماجتش للدنيا عارفه بكتب لها ايه كل لحظة حلوة وصعبه في حياتي وكل حلم بعيشه وكل يوم بيمر معايا مع ريبال ههههه وساعات بشتكي لها منه <<< شفتي مجنونة كدا :) "
؛؛
؛
لروحك عبق الغاردينيا
كانت هنا
reemaas

P A S H A يقول...

مرهقة الكتابات اللي مع النفس جايز لأنها بتبقى حقيقية وبتحط الواحد فينا قدام نفسه وتخلليه يفكر يا ترى أنا باعمل كده ولا لأ ؟
وبتبقى أصعب كمان لما ييجي يعلق :))

بالنسبة للناس .. الناس دي أجناس ولا حد يعرفها غير الأله وحده هو اللي يعرفها (تقريباً أغنية لـ يوسف شتا)

خالص تحياتي

faroukfahmy يقول...

بجد يا نور انت مراية مكشوفة لنا بالصدق بحس انى مع انسانه بللورية شفافة بتقول اللى فى ذهنها مباشرة بدون مواربة وكأنك تتكلمين عن بنات جنسك جميعا
وهذا هو الفرق بين ما نقراه ونعيش فى حقيقتةالماثلة امامنا
اللى مش قادر اهضمه مسألة المفاضلة والتمييز ... المفاضلة بين من والتمييز عاى من من ؟؟؟؟؟؟؟؟.. اين هم العرسان اللى عليهم العين والنيه فى زمن نحترم فيه الجيوب قيل القلوب

نهر الحب يقول...

لا استني بقي عشان الموضوع كبير كبير كبير
:)

اولا صباح الورد بما ان الدنيا ربيع وكدة يعني

ثانيا بقي
هو انتي واضح ان كل اللي تعرفيهم مستفزين بصراحة مش عارفة ليه؟؟
:DD

اللي بعد كدة يسألك عن اللي عاوزاه في البني ادم اياه قوليله ملكش فيه علي فكرة
:)
اهو شوفتي سهلة ازاي
اصلي يا بنتي الناس اللي زي حالتنا من بلوتو دول الناس اللي علي كوكو الارض هنا بيستغربوهم بس
عادي يعني
:)

.............

الناس قي اللي بنحبهم وبنهتم بيهم واكيد هما هما نفس ذات الناس اللي لما نتصل نسال عليهم يردوا رد مستفز دول
وحشين اوي
:(((

بجد دول فعلا كتير وبعدين تفضلي تسالي نفسك بقي هو انا اللي فيا حاجة غلط والا هو ده العادي
وبعدين تتعلمي بقي متسأليش علي حد ولا تهتمي بحد ولا تعبري حد بسببهم
............

البني ادم اللي حيبقي من نصيبك بقي ان شاء الله ياااارب
:))
اه طبعا يقرا اللي كتبتيه....بس اوعي بقي يبقي شكاك ويطين عيشتك لو شك انك كنتي كاتباه لحد تاني
ههههههههههههههه

كلنا هذا ارجل اللي بيكتب علي فكرة بس المشكلة بقي انك ساعات بتكتبي بقي عن حد وبتتمني ان نفس ذات الحد اللي بتكتبي عنه يبقي هو الحد اللي هو الحد بقي او...ساعتها حتبقي مضطرة تقطعي اللي كتبتيه لو بقي حد تاني
:DDD

هو ده مش جنان علي فكرة
تقولي ايه بقي علي اللي بيكلم حد كانه موجود وواقف قدامه طول الوقت وبيفضفضله ومن غير ما يكتب وكدة
ربنا يستر
:))

اشربي بق ميه قبل ما تنامي بقي

هو كل صيدلة كدة والا ايه
:)

eng_semsem يقول...

ان شاء الله تلاقي اللي يحسسك بالامن والامان والاهتمام وبعدين اكتبي براحتك بس بلاش تخليه يقرا في المستقبل لان هتلاقي حاجات كتير تتناقشوها مش محتاجه كمان تتناقشوا في الماضي
تحياتي

هبة فاروق يقول...

عجبنى حوارك مع نفسك وكتابتك لرجل لم تعرفى حتى أوصافه ولا ملامحه بعد اجمل شىء أنك تكتبى ده علشان لما تلاقيه قريب أن شاء الله يعرف مين نور من غير كلام لان الكتابه تعبير عن حاله الانسان وقت الفرح والضيق
بوست ظريف لطيف دمه خفيف زيك يا قمر

;كارولين فاروق يقول...

ازيك يا نور عامله ايه
وبعدين بيثقلوا عليك ليه بأسئله
زي دي ويضيقوكي هما مالهم
بس احسن انك بتردي
في الصميم
عجبني حوارك جدا
تحياتي

غير معرف يقول...

مساء الورد ريماس

هناك اسئلة غبية ومن يسألها يتوقع

منك إجابة أغبى ترضي مساحة الغباء

المستحكمة في عقله وهذا ما أصاب صاحبة

اللوحة الأولى في نصك ...

أنت دايماً أحسن مني !!!

جواب فقط لإقفال الباب حتى يداري

تقصيره لا أكثر ...

مجموعة خواطر لشخص لم يحضر أتخيل

لو حضر هل ستعطيه كل قصاصات الروح

ليقرأها وإذا قرأها كيف ستكون ردة

فعله وهو يعيش لحظات فائته من فرحك

وحزنك ؟؟ ...

دائماً مبدعة يا ريماس وأستمتع

بنصوصك المختلفة ...

تحياتي وإحترامي

افكار مبعثرة يقول...

حسيت اوي كلمة يحسسني بالامان و الاهتمام فالاهم من الحب و كلمات الغرام الاحساس بالامان فعلا انا مش استغربتك :)))))
حاسة ان لو جالك اللي بتحلمي بيه و نصيبك هتخليه يقرا مش عارفة ليه:)
تحياتي ليكي يا ريمسوووو الحلوة

Miss LoZa يقول...

نوووووووووور
واخيرا بقول نور مش ريماس ;)
بصى انتى ردك على صبحتك ده بيأكد أن دى أهم حاجة لازم تبقى موجودة فيه .. الحاجة الى انتى بجد محتجاها وبتفرق معاكى ..

بالنسبة للناس الى بيكبروا دماغهم ومس بيسالوا فالحل بسيط جدا .. انتى كمان متسأليش ولو لاموكى اديهم فوق دماغهم اصلا

اما عن الشخص المجهول .. هتلاقيه .. وهتقوليله كلام اكبر واكتر من الى بتكتبيه ده بكتيييييييييير اوى اصلا :)

reemaas يقول...

سواح في ملك اللــــــــــــــــــه-


مش هقول لاء ظابط ظابط ههههههههههههههههههههههههههه


ونعم بالله عارفه والله يا خالد بس هو الانتظار وحش

reemaas يقول...

ابراهيم رزق ي


فواااااااااااار هههههههه عجبنى التعبير جدا


يا رب يابو زياد يارب

ام نوووووووور

reemaas يقول...

mira@

صح جدا

هسرشش حالا :)

reemaas يقول...

Bent Men ElZman Da !

معاكى حق والله يا دينا

مش عارفه يارب بس يطلع بيفهم كده ههههههههه

reemaas يقول...

ريـــمـــاس

:)


جابرة بخاطرى انتى ديما يا ريموسة

هم فعلا مابيبقوش متعودين على ده بس نحاول نعودهم علشان يعرفوا قيمة اللى فى اديهم

:)

تثبيت رسمى يا بنتى

طيب افكر واخليه يقرا ولو طفش بقى يبقى نصييييييييييبى

reemaas يقول...

P A S H A


بينى وبينك اه وخصوصا لو هتعترف فيها بحاجات بتحاول تداريها او ماتفتكرهاش بس فى نفس ذات الوقت هى دوا

reemaas يقول...

faroukfahmy58


طاااااااااروا يا استاذنا او كانوا كلهم فى التحرير بقى مش عارفه
هههههههههه
المهم انهم مالهومش اثر ودى اعتقد بقت مشكله
ربنا يستر

:)

ديما رافع معنوياتى

reemaas يقول...

نهر الحب

بق ميه

طيب هجرب واكتر من بق كمان يمكن الحكايه تتظبط

هو جمع بق ايه ؟هههههههههههههههههههههههههههههههه

هشرب كتير يعنى


بالنسبة لكوكو الارض ده يا سهاد يا اختشى حاسة انه ماعدش سايعنا احنا والعالم اللى بتستعبط دى ياحنا ياهم بقى :D

reemaas يقول...

eng_semsem


امييييييييييين يارب
انا برده بقول كده

reemaas يقول...

هبة فاروق

تسلميلى يا هبه
بس تفتكرى هيبقى عاقل ويفكر زيك كده؟
ربنا يستر

reemaas يقول...

;كارولين فاروق

بدل ماتفقع يا كوكى
افقعهم احسن :)

reemaas يقول...

ريبال بيهس

بالنسبة لمساحات الغباء فهى شااااااسعه جدا

يارتنى اعرف ارد على السؤال ده

reemaas يقول...

افكار مبعثرة

والله ياشيمو على حسب درجة عقله يعنى:)

reemaas يقول...

Miss LoZa


ايووووووووون انا هديهم فوق دماغهم اصلا هيستاهلو هه بس :)

عجبنى اسم الشخص المجهول ده ههههههههههه
مستر اكس

وحشانى يا ميهو يا حبيبى

نيللي علي يقول...

ولله العظيم أنتي سكر أخر حاجة بجد عشان بجد كل حاجة كتبتيها ماعدا الورقة وأني أكتبها للي هيبقي نصيبي لأني متجوزة فعلاً..

لكن بجد حصل معيه كللللللللللل اللي أنتي كتبه تهتمي بحد وتحسسك أنها وزيرة وأنتي من عامة الشعب الفاضين والأمر أنتهي أن كل واحدة مننا راحت في طريقها لأن أي إنسان في الدنيا بيحب الأهتمام.

تحياتي :)

reemaas يقول...

نيللى

معلش يا نيلى هى حاجة بتفقع انا عارفة بس نعمل ايه قدرنا