ركزوا معايا علشان فى احتمال لا بأس به انكم تتلخبطوا او تضيعوا منى هى حبة نقط كده عملالى زحمة فى دماغى وهعرضها بنفس زحمتها........
________________
*قمنا بثورة علشان الحزب الوطنى وقادته كانوا فاكرين مصر عزبة واحنا ضيوف عليهم
*جه الجيش حما الثورة دى فنجحت بالناس وبيه
*الاخوان شموا نفسهم سياسيا وقرروا ياخدوا حقهم المهضوم بقاله سنين ويظهروا على الساحة
*الاخوان قرروا ياخدوا الساحة كلها
ا*الاخوان والجيش ايد واحدة
*الجيش طمعان فى السلطة
*الاخوان والجيش متخانقين
*الاخوان لن يدخلوا السباق على الرياسة
*الاخوان يكتسحوا الانتخابات النقابية
* فصل ابو الفتوح من الاخوان علشان خالفهم وهيرشح نفسه للرياسة
* نجيب عصام شرف علشان ده ابن الميدان وحليف الثورة
*نمشى عصام شرف علشان ده وحش ومش عارف ياخد قرار
*الاخوان يكتسحوا الانتخابات البرلمانية
*النور يساند الاخوان
*النور على خلاف مع الاخوان
*ابو اسماعيل مرشح السلفيين ولكن السلفيين مش مرشحينه
*كمال الجنزورى بيايده الجيش والاخوان
*الاخوان مش عاوزين الجنزورى وعاوزين رئيس حكومة منهم ويا حبذا لو كان الشاطر
*الاخوان عاوزين ينزلوا مرشح للرئاسة وياحبذا لو كان الشاطر
*تفصيل قانون يعفى الشاطر من الاحكام السابقة علشان يعرف يترشح..
*الاخوان مش هينزلوا مرشح للرياسة..بس لو عمر سليمان نزل هينزلوا..
*الاخوان والسلفيين ايد واحدة
*انسحاب كل القوى السياسية من اللجنة التاسيسية للدستور ماعدا الاخوان والسلفيين
*جماعة الاخوان دى جماعة دينية وليس لها اى علاقة بحزب الحرية والعدالة السياسى دى فى طريق وده فى طريق
*المرشد العام يطلع ببيان يقول لازم حكومة الجنزورى تمشى بصفته رئيس جماعة الاخوان اللى مالهاش دعوة بالسياسة
*حزب الاغلبيه وهو الحرية والعدالة يضرب برأى الشعب اللى جابه مجلس الشعب عرض الحائط ويمشى خطة 50%
*حزب الاغلبية وهو الحرية والعدالة يضرب بانسحاب كل الناس معاداه عرض الحائط ومصر يعقد اجتماع اللجنة بكرة......
*المرشد العام لجماعة الاخوان الدعوية اللى مالهاش علاقة بالسياسة يعقد اجتماع لمجلس شوراه علشان يحددوا هيقابلوا انسحابات الاحزاب من الجمعية ازاى واذا كانوا هينزلوا بمرشح ولا لاء واى علاقة عمر سليمان بالحدوتة.........بالمناسبة الاجتماع ده سرى!
*رأى لا بأس به شايف ان الاخوان هينزلوا فى انتخابات الرياسة لان فى احتمال لا بأس به ان طعون مجلس الشعب تتقبل ويتم حله ويبقوا كده خرجوا من االعبه البرلمانية فيلحقوا اللعبة الرئاسية
*عندما سمعت خطاب الاخوان اللى بيفكروا فيه الناس باللى عملوا فيهم عبد الناصر والجيش فى 54 ماعرفش ليه افتكرت اليهود وهم بيفكروا العالم بعمايل هتلر والهولوكست ..وماحدش يتفزلك ويقولى اذاى تجرؤى وتشبهى الاخوان باليهود ولا عبد الناصر بهتلر انا بشبه المشهد بس
والبقية تأتى...بس خلاص
هناك 40 تعليقًا:
بصى بقى
سمك لبن تمر مصرى مش هندى لان الهند نفسها لو شافت اللى بيحصل دا هتقول يا ولاد اللذينا
الشباب قالوا ما ينفعش
وانا مؤمن انه مكانش ينفع .. غير واحد زى البرادعى فى الهبل دا ...
لانه نضيف .. انضف واحد فيهم .. والوحيد اللى اتربى على نضيف مش فى وسط الهبل والتخلف دا .. راجل برؤية واضحة وقالها .. الدستور اولا والجيش لازم يمشى .. والصلاحيات مع حكومة مش مع مجلس عسكرى
الاخوان :
مالهمش الا فى الصفقات دايما شايفهم كدا ... دايما بتوع صفقات مش بتوع مواقف محددة وواضحة
انا لسه كنت بكلم فى واحدة من تبعهم .. وكل لما تقولى انهم بيرجعوا فى حاجة يقولك تغير قرار عادى
تسليم العقول للغير هو اللى ودانا فى داهية
انا شايف ان الاخوان حولوا الانتخابات لاستفتاء على
انت مسلم ولا لا !!
فكل اللى حصل دا لازم يكون متوقع
وفعلا
سمك لبن تمر مصرى
والله يا احمد انا مابقيت فاهمة وحساها لسه عزبه ماعرفش ليه
نور يابنتي
هي السياسة
انا لاامانع في انتخاب اي رايس جمهورية
طالما ان هناك شرطا ان تنتهي ولايته كل اربع سنوات
وينتخب غيره
اما بقي موضوع الاخوان
فده مش مضايقني
لانهم مواطنين مصريين
وانا بشوف الاخوان احسن من الليبراليين
لان الليبراليين كلهم دلوقتي اصبحوا يسعون لاسترضاء الثوار فقط
من باب (تسجيل بطولة ) وهمية
فهم لايعارضون الثوار في فعل خاطئ
ولكن يعارضون المجلس حتي في الافعال الصحيحة
ثانيا موضوع الدستور اللي عاملين هيصة عليه
اول مرة اشوف دستور
عايزين 85 مليون يكتبوه
اللي اعرفه وافهمه
اني لما بجيب مهندس يبني عمارة
مبسألوش انت هتحط قد ايه اسمنت ولا طوب
انا بديله الرسمة وبقولله نفذها
ولو اخطا في الرسومات بقولله مش هستلم الشغل ده
يااما تهده وتعيد بناؤه
يااما تمشي واجيب مهندس تاني
انما شغل لشو الاعلامي اللي انا شايفه ده
والانسحابات الجماعية قبل ان نبدأ البناء
ده بيدل علي ان الناس دي متعرفش يعني ايه مسئوليه
نوررررررررررررررررررر
صلى على النبى
غلطة الاخوان اللى هيندموا عليها طول عمرهم انهم لم يشكطروا الظروف
الديمقراطية لا تعلم فى المدارس و انما تتعلمها الناس بالممارسة
الناس كانت لسه فى امية الديمقراطية فاعطت اصواتها لمن لا يستحق و استفتت على اعلان دستورى و مكشبوه و كله من منطلق دينى لا منطلق علمى او سياسى
الناس بتتعلم و ستسقط شعبية الاخوان با التدريج الا اذا اصلحوا من نفسهم
كل ده انا قلته و صوتى اتنبح لكن مين يقرا و من يسمع و كان دمى تقيل ساعتها
لو رديت على كل اللى قلتيه يحتاج الى مجلد و يمكن تلخيص المجلد فى جملة هى
عندما يختلف الراقصة مع الطبال فى الغالب يكون الضحية الطبال
فمن سيكون الراقصة و من سيكون الطبال
انا بعيد و هتفرج على الصراع باستمتاع و اتمنى الا يتدخل ولاد الحلال و يقولوا الصلح خير
تحياتى
كل ده يانور شايلاه يا بنتى على صدرك
والله مافيش حاجه خلاص فى البلد الواحد يحزن عليها
الناس دى كانوا فين كلهم قبل الثورة الامر والله محتاج تسليك وعلى يد سباك متخصص للمسائل المسدوده
ريحى بالك يانور وكفايا علينا ياحبيبتى ابراهيم رزق بسياسته الهواستجية الرومانسية التخصصية هههههههههههه
معلش يا نورررررررررررر
انا كتبت التعليق و لقيت تعليق اخى سواح و معلش هرد عليه
هو انت يا خالد تنفع تبنى عمارة شرك بينك و بين اتنين تانين تقوم انت تحط مواصفات شقة كل واحد المساحة و عدد الغرف و التشطيب و فى الاخر تشهد الناس على العمارة من الخارج و تقول للناس استفتوا دى عمارة و لا لا طبعا الناس هتقولك دى عمارة لكن الشقق اللى داخل العمارة الناس هتعرفها ازاى
و بعدين هى كلمة الليبراليين بقت شتيمة
طب انا ليبرالى يا عم و ربنا خلقنى ليبرالى و هاموت ليبرالى و احمد عرابى قال
لقد خلقنا الله ليبراليين و لم يخلقنا تراثا و لا عقارا و الله الذى لا اله الا هو لا نستعبد بعد اليوم
العيب يا خالد ان نكرر كلام المتأسلمين و نشوه الغير و كأن كلمة ليبرالى اصبحت كافر و اعوذ بالله
و بعدين مش اليبراليين هما اللى قالوا على حكومة الجنزورى لا تصلح و الاخوان ايدوها
لما مصلحتهم اتعارضت مع الوزارة
قالوا متنفعش مع ان الباقى عليها اقل من شهران
و بعدين مين النكرات و الاشخاص اللى مختارنهم فى اللجنة و النبى يا خالد لما تعرف مين متولى و مين فاطمة ابقى قلى عليهم
سلام يا اخى و يا صديقى و تحياتى ليك يا اجدع شخص
انا معاكى فى كل كلمة
الدنيا معكوكعة ومحدش بقى فاهم حاجة ولاعارف حاجة وهو فعلاا كدة لبن سمك تمر هندى
ربنا يصلح الحال
مع خالص تحياتى
استاذ ابراهيم اخي وصديقي
الليبرالية التي تعني اقصاء الاخرين
واضطهادهم وتسفيه ارائهم
ومحاربة وانتقاد كل اللي مربي دقنه لمجرد انه مربي دقنه
دون النظر الي شخصه او ماذا يفعل
فلا محل لها من الاعراب عندي سوي انهم يظنون انهم يحتكرون الحقيقة
ويفكروا
والباقي اللي مش متبع منهجهم مش فاهم حاجة
وبعدين حضرتك حر تبقي ليبرالي
او اسلامي فخلع مبارك اساسا كان من اجل الحرية
علي فكرة
انا بشوف الديكتاتورية في الليبرالين
واعني اعضاء مجلس الشعب
والمتحدثين التلفزيونين
كعلاء الاسواني او ابراهيم عيسي او يسري فودة
رغم اني من قبل الثورة بسنوات
كنت اري ابراهيم عيسي بطلا حقيقيا
وكنت اري ايضا في الاخوان بطولة
بتحملهم السجن التعذيب من اجل مبدأ
ثق ابراهيم
ان معظم الناس علي الاقل اللي بشوفهم والبسطاء اللي انا منهم ميهمهمش
قصة مين اللي هيكتب الدستور
قد ميهمهم هيطلع شكله ايه الدستور
بمعني نتائج علي الارض
مش مكلمة تلفزيونية وشو انسحابات
الاخ والصديق ابراهيم
اختلاف الاراء لايضايقني
وكونك غير مقتنع برأيي او اني غير مقتنع برأيك
ثق انه لن يفقدنا صداقتنا
تحيتي
يا سواح
كلنا ليبراليين و انا لا ارضى الا ان تكون ليبرالى و هل اليبرالية عكس الاسلام بل ان الانسان جاء من اجل ليبرالية الفرد و المجتمع
نأتى للشىء المهم يا صديقى العزيز
هل يمكن ان يبنى العمارة البقال اللى فى اول الشارع
المقدمات تمهد للنهايات و الاختيارات خاطئة خاطئة و اول من يعرف انها خاطئة الاخوان نفسهم
الاقصاء يا استاذى جاء من السلفيين و الاخوان الدستور توافقى و ليس بالاغلبية و الا فليوضع كل اربع سنوات مع كل دورة برلمانية
تحياتى لك اخى و صديقى و حبيبى
اشكر استاذنا واخونا ابراهيم رزق
لرقيه في الحوار
وسعيه لكي يعلمني ان كلمة ليبرالية
دي مش شئ عيب يعني
يااخي الطيب
كلمة ليبرالية دي علي حد علم اخوك البسيط
تعني الحرية المطلقة
ولكن بعد ان استأثر بها النخبة
التلفزيونيون
اصبحت كلمة سيئة السمعة ههههه
كالضربة الجوية بتاعة مبارك
فالضربة الجوية شئ جميل
ولكن لانه اراد الاستئثار بها
اصبحنا نكرهها ونكره سماعها
اشكرك اخي ابراهيم علي رقي حوارك
واشكر نور انها اتاحت لي فرصة حوار راقي
مع اخ محترم جميل الطباع مثلك
تحيتي الخالصة لك
قالها محمود عبد العزيز زمان
خلطبيطة عبيطة
بالظبط هو ده حالنا
يا مهلبيه يا رز على ملوخيه يا
كله اصبح فى الكلتش
صباحك لبن يا تمر بالعسل
انتي قلتيها فعلا
سمك لبن تمر هندي
انا دلوقتي اما بشوف و بسمع اللي بيحصل بقول ايه اللي جاب القلعة جنب البحر
و النبي لو لقيتي تفسير للي بيحصل ابقي قوليلي يمكن افهم
تحياتي ليكي :)
انتي قلتيها فعلا
سمك لبن تمر هندي
انا دلوقتي اما بشوف و بسمع اللي بيحصل بقول ايه اللي جاب القلعة جنب البحر
و النبي لو لقيتي تفسير للي بيحصل ابقي قوليلي يمكن افهم
تحياتي ليكي :)
وراح معاك كل الصفا ضيعتوا بعندك
يا افه
هكذا قال المهندس المعماري محمود عبد العزيز في فيلم احنا بنتوع البتاو
بصراحه ملقتش لغبطه احلي ولا انقي من اللي بيحصل في مصر
وعلشان كده حاقول تحيه جمهوريه مصر العالميه
دي البطيخة
:DDDDDD
سواح في ملك اللــــــــــــــــــه-
هى الفكرة مش انتخب مين يا خالد انا عارفه انهم هيمشوا
الفكرة فى انهم اصلا مترددين ينزلوا ولا لاء حسابهم للخطوة وترددهم ناهيك عن ان ملهمش كلمة يخوف اى حد
ده غير اللخبطة حدث ولا حرج
سواح في ملك اللــــــــــــــــــه-
فى خناقه الدستور بقى متفقه معاك جدا وشايفه انهم لو خادونى معاهم اعتقد كنت هفيدهم :)
ابراهيم رزق
معاك حق فى موضوع الراقصة والطبال ده
ههههههههه
بس انا مش عارفه احدد مين الطبال ومين الراقصه
رد على حوار ابو زياد وخال
فكلنا ليبراليين وكلنا اخوان وكلنا سلفيين
تصدقوا انا اصلا معترضه على التقسيمة دى لانها عجيبة انا ممكن اقول حزب الوفد او حزب كيت دى الاختلافات لكن هم قسموا الافكار اللى ما بتتقسمش وخلونا نمشى وراهم
faroukfahmy58
ههههههههههه والله معاك حق يا استاذنا انا بس كنت بسجل نقط
Tamer Nabil Moussa
بالظبط برافو عليك
هى معكوكة دى
مصطفى سيف الدين
واى عبط الحقيقة ده سوبر عبط
هبة فاروق
هههههههههههههههه مهلبية تقيله على المعدة يا هبه اووووى
افكار مبعثرة
لا شيمو صدقينى مافيش تفسير دى حكايه لا تفسر
كارولين فاروق
هههههههههههههههه معاه حق يا كوكى والله
نهر الحب
جواب نهائى ؟
هههههههههههههه
مع احترامي الكامل لرايك
الاخوان المسلمين جزء لا يتجزأ من شعب مصر من حقه يكون وزير ونائب وشرطي ورئيس وما نقدرش نمنع الحق ده عن اي مصري
قرارات الاخوان او الحزب لو كانت خاطئه او كانت مش عاجبانا او كانت صح فهي لا تجبر الجميع عليها وعندما عارضت في الاستفتاء حق مشروع والا نبقى عايزين نرجع الديكتاتوريه ونقول لا دول ما بيفهموش ونختار احنا الاحسن ليهم وخلاص
اما حتة اللخبطه اللي انت بتكلمي عليها لسه قدامنا سنتين على الاقل هنععيش فيها لاننا مش واثقين في اختياراتنا واحيانا لان احلامنا كبيره اكبر من تحقيقها
اما عن الغد فهو افضل ان شاء الله لمصر والمصريين لان الحق بيعيش والباطل بيموت
تحياتي
eng_semsem
ماهو انا يا سمسم مش بمنع الحق ده عن الاخوان بالعكس هم اللى منوعه وصرحوا بده اعلاميا واعتقد الكل فاكر خناقتهم وفصلهم لا ابو الفتوح لانه خرج عن امر الجماعه بعدم الترشح لما يطلعوا علينا دلوقتى بانهم رجعوا فى كلامهم يبقى لازم نحط علامات استفهام كتير
ومن ناحية الارغام فهم فعلا ارغمونا بقبول ال50% رغم الاعتراض الواضح عليها واستخدموا فى الارغام ده اغلبيه الحرية والعدالة فى المجلس ده قمة الارغام
صدقنى احنا فى مرحلة لا تحتمل عدم وضوح السياسات وهم وللاسف قمة عدم الوضوع اللخبطة ولو انا كشعب متلخبط المفروض هم يكونوا راسيين عنى والا هنجيب مين يحللنا الازمة ولا هنقضيها تجارب؟
وجهة نظر حضرتك تحترم
وكل واحد حر في رأيه
انا شايف ان فيه تحامل كبير علي الاخوان
وشايف كمان ان فيه متغيرات بتحصل وهم مش مجبرين يعني يقفوا عند حاجه معينه وميغيروش رأيهم فيها
انا شايف انهم اصلح ناس دلوقتي يتولو أمر البلد
دا لأني عاشرتهم فعلا عن قرب وعرفت بيفكروا في ايه
في النهاية دي وجهات نظر
على فكرة أنا بيعجبني جدا كلامك الممزوج دائما بخفة ظل متميزة و معلش مقل في التعليق
و لا احسن الصحفيين يقدر يكتب مقالة زي دي
دا انتي لخصتي الحالة من بداية الثورة حتى الأن بإبداع نادر
beautiful mind
للتوضيح تانى والله انا ما ضدهم انا عرضت الحاجات الموجودة على الساحة فطلعت ضدهم تفرق
ثم متغيراتهم متغيرات جذرية مش متغيرات بتفرضها الظروف ده تغير مبادئ
طب سؤال بما ان حضرتك ليك صله بيهم وبجد نفسى اعرف اجابته
هنفترض ان تغيير قرار لترشيح عن عدمه جه نتيجة للظروف الراهنة طب ليه مارجعوش فى كلامهم بالنسبة لابو الفتوح وقرار فصله بقى؟ افهم
يوميات شحات
ههههههههههه اعمل ايه بس يا شريف من فقعتى كل ما بتابع اى حاجة سياسية باخد حاجة للصداع واحس انى معايا الابتدائية
انتى عارفه يا نور كلامك ده
اللى مخلينا زى اللى رايحين وجايين ما بين الاخوان والجيش والجنزورى وقبله عصام شرف والثوره اللى راحت ومش عارفين هترجع امتا
بيفكرنى بالظبط بحكايه طبق طبقنا خبط فى طبق طبقكم
والله اعرف اللى جاى هيبقى ايه!!
وتظل مصر والاخوان من عجائب الدنيا السبع
يعني بقت 8 عجائب مش سبع
وسبع هنا يعني 7
مش سبع البرومبه
هي دي مصر ياعبلة
Bent Men ElZman Da !!
اه والله معاكى حق واللى يقدر يقولها 10 مرات يحصلهم بقى
شمس النهار
ههههههههههههه عجبنى التشبيه تصدقى ممكن
Tarkieb
طب ايه مافيش امل؟
إرسال تعليق