الاثنين، 12 مارس 2012

سكوووت .....هتكلم

اولا وقبل اى كلام بعتذر جدا عن تقصيرى الفظيع فى الردود الفترة الاخيرة بس انا مطحونة اخر حاجة
البنات اللى معايا فى الصيدلية جتلهم شوطة واتخطبوا مرة واحدة و"خواطيبهم " طلبوا منهم اذ فجأة يسيبوا الشغل ..وقد كان..وانا بقى قاعدة طول النهار والليل هناك وبرجع البيت مقتولة انام واصحى علشان نعيده من الاول...........فسامحونى وادعولى يا اما الاقى بنت تشتغل او اتخطب ونقفلها بقى.....



نرجع لموضوعنا

فى الفترة العصيبة السابق ذكرها وبسبب الضغط الشديد ده مابقاش فيا حيل اتكلم فبسمع اكتر
ولقد استغل مجموعة من اصحابى تلك الفترة اسوء استغلال واسمعونى وافرغوا عندى كل احزانهم ومشاكلهم ومواقفهم ..لدرجة انى قربت افرقع الحقيقة..بسمع حكايات غريبة لدرجة انى مش عارفة ارد...جايز لانى تعبانة بس الاحتمال الاكبر انه كلام مايتردش عليه فبكتفى بالاندهاش وفى الغالب اللى بيحكوا مابيبقوش طالبين اراء ..لا دول طالبين ودان بس

لكنى فرقعت وقررت انى ارد هنا..علشان اهدى وعلشان هنا هم مش هيعرفوا رائ فيهم لانهم مايعرفوش هنا اصلا.........

*بالنوسبة لصديقتى العزيزة اللى شاكة فى جوزها...ايون شكك فى محله وده من بدرى انتى لسه واخده بالك؟

*بالنوسبة لصديقتى العزيزة اللى اتصدمت انها اتفهمت غلط لما زودتها فى الهزار ..ماطبعا لازم تتفهمى غلط انا لو ماكنهم افهمك ستين غلط يعنى

*بالنوسبة لصديقتى العزيزة اللى صعبان عليها حال اللى كانت مرتبطة بيه وحاسة انه محتاجها دلوقتى..يؤسفنى اقولك انى دى تلاكيك يا هانم ...

*بالنوسبة لصديقتى الانتيم اللى حاسة ان كل الناس عنيهم عليها علشان لسه مارتبطتتش وحاسة انهم بدأوا يستقصدوها.....خدى بالك الحكاية كده هتقلب معاكى على عقدة نفسية لان ماحدش مركز معاكى اوى كده الا انتى تقريبا.. واحب ابشرك ان دى مشكلة نص بنات مصر مش انتى بس يعنى..

*بالنسبة لصديقى العزيز اللى ماعرفش ايه اللى فكره بيا الايام دى..اسعدنى سؤالك واسعدنى انك لسه فاكرنى من ايام الكلية واحب اسجل استغرابى الشديد من المكالمة اللى ماكنش ليها اى تلاتين لازمة يعنى..

*بالنسبة لاخو صديقتى العزيز..يابنى انت صعبان عليا بجد والله العظيم يعنى انت لو ركزت مع نفسك شوية وسيبتك من اجندة البنات اللى هتهبلك دى ممكن تبقى حاجة فى يوم من الايام..

*بالنسبة للاخ اللى كانت مرتبطة بيه صديقتى وحاسة انه محتاجلها "بتاعة التلاكيك لو كنتم نسيتوا" شوف البنية بتفكر ازاى ! وماتعرفش ياعينى ان نفسيتك وتغييرك ده بسبب انك بتحب صحبتها ومش عارف تعمل ايه.....بزمتك مش مكسوف من نفسك

*واخيرا فى وسط هذا الكم من العلل والحكايات الغريبة والعقليات الاغرب واللى محتاجة فرمطة من اول وجديد جاتلى هدية رائعه من حد اروع قدرت ترسم على وجهى بسمة بجد ..من كل قلبى بجد شكرا..بقولها هنا لانى يمكن ماعرفتش اقولها من اثر المفجأة بشكل يليق بالاحساس اللى سابته جوايا.....شكرا جدا جدا جدا

استريحت
  

هناك 41 تعليقًا:

مصطفى سيف الدين يقول...

يا لهوي ايه التسييح ده كله ؟
انتي شردتيهم يا نور
يعني محدش فيهم يعرف يفك معاكي شوية و يفضفضلك
هههههههههههههه

هبة فاروق يقول...

انا شايفه يا نور ان الكلام ده كان لازم يوصل لاصحابه لانى شايفه انها كلها نصائح
احيانا لما بنبقى جوه المشكله لا بنبقى شايفين حاجه ولا عارفين نحط حلول
انتى استريحتى بس كنتى حتستريحى اكثر لو كنتى واجهتيهم ونبهتيهم حتى لو كان كلامك مش حيعجبهم
واخيرا ربنا معاكى فى شغلك وحياتك ووحشتينى اوى متغبيش تانى بقى

سواح في ملك اللــــــــــــــــــه- يقول...

ازيك يانور

دانتي طلعتي دماااااغ

بصي يانور اللي قدرت استنبطه من

كلامك ده انك محل ثقة ناس كتير

بيستريحولك وبيفضفضوا معاكي في مشاكلهم

وقدرت كمان اعرف ان مخك كبير

وبنت ناس محترمين ومتربية كويس

اما بقي فه نقطة لفتت انتباهي

(((*بالنسبة لاخو صديقتى العزيز..يابنى انت صعبان عليا بجد والله العظيم يعنى انت لو ركزت مع نفسك شوية وسيبتك من اجندة البنات اللى هتهبلك دى ممكن تبقى حاجة فى يوم من الايام..))

انا شايف ان الشاب ده

مش محتاج نصيحة

ده محتاج يتساب كده لما ينقرص قرصة

يعرف ان الله حق وان ليه اخت اللي هي صاحبتك

زي مبيخاف عليها لازم يخاف علي بنات الناس

ويبطل هيافة ومنظرة

عشان كما تدين تدان

تحيتي يااطيب نور

افكار مبعثرة يقول...

ههههههههههههههههههه يا عيني يا بنتي
كل ده شايلاه في قلبك و ساكتهربنا يعينك بجد
بصراحة حكايات غريبة ادمغة اغرب انا لو مكانك كنت صرخت فيهم و قلتلهم بسسسسسسسسسسسسسسسسسسسس اسكتوا شوية بقا
ربنا يكرمك و يريح قلبك زي ما الناس بترتاح و هي بتفضفض معاكي
تحياتي :)

amiraali يقول...

الله يعينك يا نور...وتلاقي حد يساعدك في الصيدليه..ايلي انا بعتبرهه ممله جدا بس ربنا معاكي ويوفقك...او نفرح بيكي قريب بقي ان شاء الله....انتي فضحتيني صحابك يا بنتي ...بس انا برضوا شايفه من الاحسن انك تقوليلهم الكلام ده...
وربنا يسعدك ويفرحك دايما

E73 يقول...

ربنا يريح قلبك يا ريمى ويسعدك

في احيان كتير فعلا الواحد مبيبقاش عارف يرد يقول ايه

أما بالنسبة لصحبتك اللي بتتلكك والشخص اللي بيحب صحبتها

الظاهر ان مراية الحب "عمشة"

E73 يقول...

ونسيت اقولك طبعًا وقبل كل شيء

يا رب تقفلوا الصيدلية قريبًا

طبعا الكلام دا اسلوب بلاغة المقصود به

؛) يا رب نفرح فيكي قريب قولي ان شاء الله

I have changed يقول...

صحيح اللي يشوف مشاكل الناس تهون عليه مشاكله ههههه،ربنا يقدرك وتخففي عن الناس شوية من همومها ،وتمشي من الصيدلية قريب ان شاءالله

Bent Men ElZman Da !! يقول...

هههههههههههههههههههه
انا بيتهيألى انهم هيندموا انهم قالولك حاجه
عشان اهل البلوجر كلهم عرفوا قصتهم كده
بس حاسه ان نصايحك فى محلها عشان انتى بتبصى من بره الموضوع
اللى بيبقى فى المشكله مش بيعرف يشوفها صح

ابراهيم رزق يقول...

ههههههههههههههههههه
نوووووووووووووووووووووور
ايه ده يا نور
بصى يا ستى طبعا ليكى دعوتين دعوة قريبة و دعوة بعيدة
الدعوة القريبة يارب يا نور يا بنت حوا و ادم تتخطبى و نشوفك فى الكوشة و نزغرطلك و نهيصلك قادر ياكريم
الدعوة البعيدة اللى بعد كده هتتمنيها و اسالينا انا خبرة كم سنةانك تلاقى بنت
ههههههههههههههههه
اللى صحيح يا نووووووووووووور هو صحبك بتاع الكلية ايه اللى فكره بيكى يالله احنا مالنا
يا خبر بفلوس بكره يبقى ببلاش
و بكره نقعد على الحيطة وز نسمع الزيطة
اقول ايه دع الخلق للخالق
هههههههههههههههههه
سلام يا نورررررررررررررررررر
ملحوظة هم صحابك ميعرفوش سكة المدونة
اذا احذرينى انا ممكن اقولهم الا اذا
تفتحى مخك و تشوفينى اليومين دول
محسوبك مزنوق فى بامبرز و بيبى اويل و شامبو جونسون و بيبى ميلك و شوية مكلات غذائية من اختيارك على فيتامينات لام زياد و اللى تجودى بيه
شفتى الابتزاز هههههههههههه
سلام مرة تانية

AhMeD RaDy يقول...

هههههههههههههههههههه

انتى بتهزارى ولا دا هزار

ايه يا سوتنا دا ال مش هتتكلمى ال

دا انتى فضحتى البشر دا انا قربت اعرفهم اساسا !

ههههههههههههههه بس بجد انتى مشكلة

وربنا يسهلوا يا عمونا الناس القديمة من ايام الكلية اللى افتكرت

نياهاهاها

وربنا يارب يكرمك ان شاء الله بالزوج الصالح يارب ونشوفك عروسة

faroukfahmy يقول...

انا فرحان يا تور هذه بداية لفتح باب لحل مشاكل القراء
طب ممكن اقول مشكلتى وتحلليها .... لا لا لا عشان تفضحينى فى بابك الجديدهههههههههههههههههه
والله يا نور انت دمك زى الشربات وخليهم يشربو من كيعانهم

faroukfahmy يقول...

انا فرحان يا تور هذه بداية لفتح باب لحل مشاكل القراء
طب ممكن اقول مشكلتى وتحلليها .... لا لا لا عشان تفضحينى فى بابك الجديدهههههههههههههههههه
والله يا نور انت دمك زى الشربات وخليهم يشربو من كيعانهم

faroukfahmy يقول...

انا فرحان يا تور هذه بداية لفتح باب لحل مشاكل القراء
طب ممكن اقول مشكلتى وتحلليها .... لا لا لا عشان تفضحينى فى بابك الجديدهههههههههههههههههه
والله يا نور انت دمك زى الشربات وخليهم يشربو من كيعانهم

faroukfahmy يقول...

انا فرحان يا تور هذه بداية لفتح باب لحل مشاكل القراء
طب ممكن اقول مشكلتى وتحلليها .... لا لا لا عشان تفضحينى فى بابك الجديدهههههههههههههههههه
والله يا نور انت دمك زى الشربات وخليهم يشربو من كيعانهم

faroukfahmy يقول...

انا فرحان يا تور هذه بداية لفتح باب لحل مشاكل القراء
طب ممكن اقول مشكلتى وتحلليها .... لا لا لا عشان تفضحينى فى بابك الجديدهههههههههههههههههه
والله يا نور انت دمك زى الشربات وخليهم يشربو من كيعانهم

faroukfahmy يقول...

انا فرحان يا تور هذه بداية لفتح باب لحل مشاكل القراء
طب ممكن اقول مشكلتى وتحلليها .... لا لا لا عشان تفضحينى فى بابك الجديدهههههههههههههههههه
والله يا نور انت دمك زى الشربات وخليهم يشربو من كيعانهم

faroukfahmy يقول...

انا فرحان يا تور هذه بداية لفتح باب لحل مشاكل القراء
طب ممكن اقول مشكلتى وتحلليها .... لا لا لا عشان تفضحينى فى بابك الجديدهههههههههههههههههه
والله يا نور انت دمك زى الشربات وخليهم يشربو من كيعانهم

faroukfahmy يقول...

انا فرحان يا تور هذه بداية لفتح باب لحل مشاكل القراء
طب ممكن اقول مشكلتى وتحلليها .... لا لا لا عشان تفضحينى فى بابك الجديدهههههههههههههههههه
والله يا نور انت دمك زى الشربات وخليهم يشربو من كيعانهم

faroukfahmy يقول...

انا فرحان يا تور هذه بداية لفتح باب لحل مشاكل القراء
طب ممكن اقول مشكلتى وتحلليها .... لا لا لا عشان تفضحينى فى بابك الجديدهههههههههههههههههه
والله يا نور انت دمك زى الشربات وخليهم يشربو من كيعانهم

faroukfahmy يقول...

انا فرحان يا تور هذه بداية لفتح باب لحل مشاكل القراء
طب ممكن اقول مشكلتى وتحلليها .... لا لا لا عشان تفضحينى فى بابك الجديدهههههههههههههههههه
والله يا نور انت دمك زى الشربات وخليهم يشربو من كيعانهم

نهر الحب يقول...

:)))
انتي عسل
اوي

اولا بقي هو ايه يعني اللي يتخطب يسيب الصيدليةي عني هو ده قانون جديد للخطوبة ؟؟

لا طبعا انا لو منك يا اما اسيبهم خالص او اخد شيفت علي قدي يريحني وخلاص
ماتجيش علي نفسك عشان حد انتي اكيد مجربة
بس ده ميمنعش اني ادعيلك ربنا يرزقك بابن الحلال
:)

صحباتك بقي دول كلهم فقعوني الصراحة ايه ده انا لو منك اقول الكلام ده كل في وش كل واحدة عشان تصحي وتفوق لنفسها
:DD

الواد بقي اللي كلمك بتاع الكلية ده انا بسأل نفس ذات السؤال بتاع ابراهيم رزق
*_*
عاجبني انا ده
تلاقيه مندوب وعايز طلبية او مزنوق في قرشين
هههههههههه
ماحنا فقريين

فضفضي ديما بقي ها

Unknown يقول...

تحياتي و اعجابي ..

منجي / الزمن الجميل

Habiba يقول...

يا ما نفسى تجيلى الجرأة وأتكلم زيك كده...وأرد عليهم كلهم...اعتقد انك ارتحت ولو راحة قليلة بعد كلامك ده كله..وأهم حاجة فى الآخر انك استريحت..يا رب ريحنا كلنا.
تحياتى

حنين محمد يقول...

صباح الغاردينيا يانور
ههههههههههههههه
وانا بقول البت راحت فين والله مش بلومك لو كل دي حواديت صحابك ربنا يكون في عونك بس بجد يانور انتي لازم تردي عليهم الحلو بقى ان انتي انسانة جميلة من جوا والكل بيلجأ لك وبيفضفض لك ربنا يخليكي ياعسولة وبطلي غياب :) "
؛؛
؛
لروحك عبق الغاردينيا
كانت هنا
reemaas

faroukfahmy يقول...

نور المدونات جميعها بلا استثتاء
اعود اليك متلهفا لاسألك عن سبب غياب تعليقك عن بوستى الاخير وبه اشارة الى اسمك الكريم
هل اسأت التعبير ام تعديت نور الاشارة الاخضر
انه مجرد خاطر من عين الخيال
انقدينى ان كنت على خطأ فتعليقك يهمنى ويهم قرائك
مع شكرى واحترامى وتقديرى

reemaas يقول...

مصطفى سيف الدين

هههههههههههه
ازيك يا درش
لا ياعم يحكوا براحتهم بس انا مستغربة من اللى هم فيه بجد

reemaas يقول...

هبة فاروق

بينى وبينك يا هوبا فى كلام قلته لاصحابه وفى كلام خفت اقوله علشان الدنيا هتقيد نار

reemaas يقول...

سواح في ملك اللــــــــــــــــــه-

الله يخليك يا خالد
من ناحية بيتحكالى فاه انا بير من الاسرار
للاسف

ههههههههههههه


ربنا يهديه بس بجد صعبان عليا لانه ذكى وفعلا ممكن يبقى حاجة

reemaas يقول...

افكار مبعثرة

مش صح والنبى
انا كمان نفسى اصرخ فيهم المجانين دول

reemaas يقول...

amiraali

لا لا ربنا مايجيب فضايح ما انتم ماتعرفهومش وهم مايعرفكوش وكده يعنى :)

reemaas يقول...

E73

عمشة جداااااااااا

ياااااااااااااااارب :)

reemaas يقول...

I have changed


يااااااااااااااااارب

reemaas يقول...

Bent Men ElZman Da !

لو هيندموا وماعدوش يحكولى الحاجات دى يبقى احسسسسسسسسسسن

بس ماعتقدش يا دينا

reemaas يقول...

ابراهيم رزق


ههههههههههههههههههه

احتج ده ابتزاز علنى ههههههههههههههههههههههههههههه


يعنى اتخطب ولا انى الاقى بنت طب ياريت واالله هعزمك يا ابو زياد وان شاء الله هتجيب الاسرة الكريمة وتيجى

بس بس انت فهمت غلط او انا مافهمتش هههههههههههههه

reemaas يقول...

AhMeD RaDy


ههههههههه لا مافيهاش نيها ها خالص ده حاجة كده ماكنش ليها لزمة

تفتكر؟

reemaas يقول...

faroukfahmy58

ههههههههههه ياخبر لا طبعا يا استاذنا سرك فى بير
انا بس كنت مفقوعه وفى اسوء حالاتى

reemaas يقول...

نهر الحب

ايون ايون ياسهاد انا عندى نفس الشك الفظيع ماهو استحاله يبقى زى ما ابو زياد قال تلاقيها مصلحة
اه يانى يافقرية يانى

reemaas يقول...

habiba


ماقولكيش ارتجت اد ايه لما كتبت الكلام
جربى جربى

reemaas يقول...

ريـــمـــاس


تسلميلى يا ريموسة والله مانا عارفه ده حلو ولا وحش :)

reemaas يقول...

faroukfahmy58


يا خبر
لا ابدا يا استاذنا خطوط ايه بس والله معزة حضرتك عندى لا توصف

كل الحكاية انى مطحونة فى الشغل جدا بسبب فرة الخطوبة اللى اصابت جميع البنات اللى شغالين معايا معادا انا طبعا
ههههههههههه
فصفصفت عليا انا بفضل تقريبا 12 ساعه فى الصيدلية وبرجع انام قتيله ده سبب الغياب