الجمعة، 7 أكتوبر 2011

يومياتى7

لمتابعة الجزء السابق اضغط



راجل وخمس بنات
***************
هخرجوا شوية من جو العهد والعيانين وادارة المستشفى ..الخ
ونركز مع الدفعة الواردة الجديدة شويه.....لو لاحظتوا احنا جالنا 3 بنات وولد وكدة بقينا بالظبط خمس بنات وولد
وانطلاقا من هذا المنطلق ابتدى الرسم...... اه والله ماهو ده الطبيعى

ولد ومش لابس دبلة,ودكتور,وشكله مش بطال,وفى وشنا ليل نهار ,وشكله يدى على محترم كده,وبشوش ومبتسم على طول ولا بتوع اعلانات سيجنال, واسمه محمد,واحنا كلنا ولله الحمد ماحدش مرتبط فينا .......يبقى ايه؟

يبقى على البركة فعلا

تدخل الصيدليه الصبح تلاقى الكل على سنجة عشرة والبنات متصدرين الشبابيك وشهريار زمانه قاعد على المكتب متولى الاعامل الكتابية!

امبارح الفطار جاى من فلانة,النهاردة العصيرة على علانة,بكرة الساقع من ترتانة,بعده ماعرفش الشاى على مين........وهلم جر
تعدى الايام واخينا شغال توزيع ابتسامات وخلاص....بينى وبينكم انا مش من اصحاب  النفس الطويل فبطلت ارسم وده لكذا سبب الاولانى انه متوقف عند خطوة الابتسامات  وانا ماليش طولة بال لكدة
التانى ان الخمس بنات عينهم فيه ودى حاجة مش لطيفة خالص واخرتها هيبقى فيه ضغائن وكده

التالت بقى ان د|محمد ده حيرنى فعلا ساعات احس من كلامه انه فرى وساعات يقلب على اخوان وساعات تحس كده انه حزب وطنى يعنى الصراحة قلقنى منه فقررت اخرج من المبارة واقعد مع المتفرجين....

ووقتها بقيت صديقة الكل ! ماتفهمش حسوا ازاى انى قررت اسيبنى منه المهم انهم حسوا وبقت كل واحدة تيجى تقولى محمد قلها ايه النهاردة,محمد ضحكلها كام مرة النهاردة,محمد طلب منها كام خدمة النهاردة
ومن ده استنتجت حاجتين مهمين جدااااااااااااا اولهم ان الاربع بنات معيشين نفسهم  اوهام زى الفل
 بس طبعا ماقدرش اقولهم كده هنضرب
التانى وهو الاهم ان محمد عارف ده كله ههههههههه اه والله الواد قاصد ده وبيرمى كلام لايتمسك عليه ولا يدبسه فى حاجة .. وعليها فضلنا عايشين فى المسلسل التركى ده لفترة

لحد ما فى يوم محمد غلط غلطة عمره وابتسم لواحدة منهم   فواحدة تانيه شافته
وبدأت الهمهمات بقى والمراقبة اشتغلت واتحط محمد فى موقف انا نفسى مش هحسده عليه ابداااا

وعدت الايام ....وفى يوم دخلت الصيدليه لقيت سالى هى اللى قاعدة على المكتب  وجنبها بنتين كمان  والخامسة واقفه على شباك .....ومحمد بيمشى شباكين لوحده

الكل بيفطر وبشرب ماعدا هو

فى حاجة غريبة ومش مفهومة الواد وشه اصفر كده والبنات بيبصولوا بنظرة عجيبة .....سكت على امل ان حد يفطمنى ماحدش بينطق

اسأل كل واحدة على جنب فى ايه يابنتى ماحدش ينطق الا بكلمة واحدة.......واطى

اوباااااااا هو عملكوا ايه يا عيال حد ينطق

لقيت سالى بتقرب كده جنب ودنى وبتوشوشنى .......... اصلنا سأنا عليه فى الخباثة كده ,البيه طالع كاتب كتابه من سنة على واحدة من بلدهم  ,صيدلانية بردو وعندها صيدلية,ومخبى!!!

هههههههههههههههههههههههههههههههههههههههه 
                                      وانتابتنى كريزة ضحك ماخلصتش الا تانى يوم ولحد النهاردة كل ماشوف محمد فى اى مناسبه او اجتماع للصيادله اضحك غصب عنى

ولحد النهاردة مش عارفه احدد هو اخوان ولا ثورجى ولا صيدلى ؟؟؟؟؟؟؟؟

هناك 30 تعليقًا:

غير معرف يقول...

مساء الغاردينيا نور
ههههههههههههههههه
يادي النيله الي مافيه وحدة من الخمس بنات لحقت تفرح بـ محمد شهريار الصيدليه بجد ياحرام عزومة العصير والمش عارفه ايه والي بتبتسم له وتضحك له والعيون الي عماله تبص من بعيد وتدي في إشارات تنبيه ههههههههههه طيب كويس الي ماكتبتيش فيه قصيدة حب على الفاضي بس الواد زكي عمال يديكم ابتسامات ومايتكلمش هههههههه عشان طبعاً حيتزنق :)"
؛؛
؛
بجد يومياتك عسل زيك
لروحك عبق الغاردينيا
كانت هنا
reemaas

غير معرف يقول...

انا رجعت..
احمدك يارب تعليقي ماطار زي الي قبله يبقى المشكلة بإذن الله اتحلت اما اروح الحق اعلق عند دودو ياحرام من زمان وتعليقاتي بطير من عندها لو عملها بلوجر فيا النهردة كمان انا حنتحر هههههههههههه"
؛؛
؛
يارب سترك
reemaas

موناليزا يقول...

طيب ومش لابس دبلة ليييييه!!!!

دعاء العطار يقول...

ههههههههههههههههههههههههههه

يخرب عقلك يانور ... واطى واطى يعنى ومحطم قلوب العذارى كمان D: D:

كل محمد وانتم طيبييين

D: D:

بجد ضحكتينى خالص :) :)

سواح في ملك اللــــــــــــــــــه- يقول...

والله يابنوتة انتي دمك زي العسل


وداهيه بس بالمعني الحلو بتاعها

جبتي من الاخر وقعدتي تتفرجي

بس انا اكتشفت فيكي حاجة من خلال

الحكاية دي

انتي نوع من الناس مبيحبش يعرض نفسه

ودي ميزة جميلة

يعني نفسك عزيزة عليكي

يومياتك جميلة يانور

كملي
متابعينك

ابراهيم رزق يقول...

ههههههههههههه

بصى حماده ده حاجة من اتنين اخوان عشان بيدور على مصلحته و متعرفيش تمسكى عليه حاجة
يا حزب وطنى عشان لئيم و مش واضح

بس تعرفى بعيد عن كلام الهزار انا لم احترمه ماذا سيستفيد اعتقد انه لو كان واضح من الاول و غلب الزمالة الصداقة و الاخوة كان هيكون مثل ديك البرابر اى اخ فى وسط اربع خمس اخوات لكنه ضيق الافق
سعيد بيومياتك و فى انتظار الباقى
تحياتى

غير معرف يقول...

هههههههههههه

بصراحة كان الواد ذكي عرف كيف

يعيش شهريار بدون ما يرضي واحدة

على حساب الثانية بس ما عمل حساب

أن ممكن واحدة تنشب في حياته وكان

أنتقامهم شديد ...

يومياتك خفيفة ورائعة

تحياتي

nour alqamar يقول...

هههههههههههههههههههههههههههههههههه
رائعه كالعاده ..
ننتظرمنك المزيد
تقبلي مروري
نور

reemaas يقول...

موناليزا

علشان يلعب براحتة بقى

reemaas يقول...

ريــــمــــاس

ماتقلقييييييييييش ماهم طلعوا عليه كل اللى اكله وشربه :)

reemaas يقول...

دعاء العطار

هههههههههههههههه كان مقلب مقلب الحقيقة
يلا نعيش وناخد غيرها

reemaas يقول...

سواح في ملك اللــــــــــــــــــه

والله يا خالد مابقيت عارفه دى حلوة ولا وحشة اصحابى بيقلولى ان ده اللى جايبنى لورا:)

reemaas يقول...

ابراهيم رزق

ماهو ده بقى غباء التخطيط يا استاذ ابراهيم

reemaas يقول...

ريبال بيهس

وجاله يوم عرف ان الله حق فيييييييييه

reemaas يقول...

نور القمر

تسلمى يا نور
:)

فافى يقول...

مساء الفل اول مره اعلق عندك واشوف مدونتك بجد لذيذه والبوست ده دمه خفيف
وأكم من محمد يا حبيبتى فى كل داهيه والله بس خلاص الواحد بقى يفهمها وهى طايره
واتمنى ترد لى الزياره

ريري كربكه يقول...

ايه ده انا المره ديه اتاخرت اوي
في الرد بس ملحقوقه
اليوميات بتعتك مشوقه اوي
وتخليكي عايزه تعرفي وتقولي ها وبعدين

reemaas يقول...

فافى
اه فعلا خلاويص الواحد فهم الفوله
:)

منورانى ديما

reemaas يقول...

ريري كربكه

هههههههههههههه
ان شاء الله الجديد جاى فى السكة
منورانى ياقمرايه

نهر الحب يقول...

ههههههههههههههههه
ضحكتيني اوي يا ريمو
بجد فكرتيني بأيمن بتاع عايزة اتجوز
only uuuuuuuuuuuuuuu
ههههههههههههههههههههههههههه

EMA يقول...

ههههههههههه و الله ضحكتيني بجد يا بنوتة و بعدين دا كان قاصذ بقى بس هو اللى يستاهل برده

تسلمي يا قمر و يسلم طرحك الجميل

تحياتي و اتمنى تنوريني

http://emy-lunar.blogspot.com/

reemaas يقول...

نهر الحب

يارييييييته حصل ايمن
ده ايمن كان محترم ورسم على واحدة لكن ده يابنتى مالوش حل

reemaas يقول...

EMA

ده هم كده رحموووووووه
هههههههههههه
من عيونى ياقمر ومنورانى

Emtiaz Zourob يقول...

يا حرام ، طلع نأبهم على شونة !! " صح هيك ، كتبتها صح ؟؟"

ياخسارة الفطور والعصير والخدمات والحاجات الثانية ..

تذكرت مسلسل عايزة اتجوز ..

استمتعت بالقراءة وضحكت من كل قلبي .. لكن هو طلع ايه في الاخر .. ثورجي ولا فلول ولا صيدلاني ؟؟

سلمت يداك اختي العزيزة.

reemaas يقول...

وجع البنفسج

هههههههههه ايون صح حبيبتى

طلع ماشى مع الرايجة يعنى اللى يكسبه بيلعبه والله اعلم

عازفة الالحان يقول...

ربي يسعدكْ ^ـ^

كنت هنآ

دمتي بخير

reemaas يقول...

عازفة الالحان

منورانى ديما

Bent Men ElZman Da !! يقول...

ههههههههههههههههههههههه
فكرتينى بمسلسل عايزه اتجوز ههههههه
عمل ناصح ومايعرفش ان البنات انصح من عشره زيه ههههههه

reemaas يقول...

Bent Men ElZman Da !!

هههههههههههه اه والله يا دينا ماعرفش بيستغبونا ليه

eng enas يقول...

انا اللي عاجبني في الموضوع اشتغالة الولد ليكوا ههههههههههههههههههههههههههههههه