الأحد، 16 أكتوبر، 2011

مع نفسى3




بسلم عليك علشان لقيتك مرة واحدة وحشتنى.......فاكر؟
انا لسه فاكرة

************************

قال لى احد المقربين"احلى حاجة فيكى انك طاقة"
مش عارفة المفروض ده يزعلنى ولا يفرحنى!!

*************************

لماذا تكتبين؟علشان افضفض
طب هتفضفضى بايه؟بكل اللى حصل واللى بفكر بيه واللى بحلم بيه........
صدعتينا..متى سوف تصمتين؟..........
خايفة كتير يجى اليوم ده

***************************

ديما مطلوب منى انى اعامل الناس على قد عقلها.......طب وانا؟!
مين هيعاملنى على اد عقلى؟

****************************

فجأة لقيت رقمك بيرن عليا اتلخمت جدا ومابقتش عارفة
اعمل ايه ,ارد ولا ماردش,طب المفروض اصلا ارد؟
طب لو رديت هقول ايه ولا انت حتى هتقول ايه هو لسه فيه حاجة تتقال؟
طب المفروض لو رديت اكشر وانا برد ولا اعمل مش هممنى ولا ابتسم عادى كده؟
ياترى الكلام هيخرج سليم ولا هتهته بقى ويبقى شكلى وحش؟
وفجأة تحول الاتصال لميسد كول!!!!!!!!!!!!

************************************
احينا بحس انى عاوزة ازعق بعلو حسى"وانتم مالكم؟"


**********************************

كان من احلامى انى اكون مذيعة راديو فى محطة تكون شبابيه ومسموعة
مافيش حد يكتشفنى؟

***********************************


على فكرة مش شرط ابدا اعجب كل الناس..انا مش كل الناس اصلا بتعجبنى 

***********************************


ديما بقابل الناس الغلط فى الوقت الصح او الناس الصح فى الوقت الغلط.....
مش عارفه امتى هتتظبط الحكاية دى

*****************************

صديقتى الانتيم لاحظت انى بوصف الناس فى اى موقف يتحكالى بكلمة"سيكو" كتير
مش عارفة هى بقت لازمة ولا ده احساسى تجاه الكل

******************************

مؤخرا بقيت بتأمل ردود افعال الناس كتير اوى
سبحان الله له فى ذلك حكم!!
*******************************

ليس بالضرورة لكى تكون صادق..ان تكون بجح

********************************



ملحوظة:غيرت اسم البوست من تخارف ل مع نفسى  وده لاعتراض كتير على اسم تخاريف
وكمان لانى لقيت صديقى اسامة عنده تخاريفه :)

هناك 38 تعليقًا:

سواح في ملك اللــــــــــــــــــه- يقول...

************************************
احينا بحس انى عاوزة ازعق بعلو حسى"وانتم مالكم؟"


ديما مطلوب منى انى اعامل الناس على قد عقلها.......طب وانا؟!مين هيعاملنى على اد عقلى؟
بنوتة

ايه الروعة دي

خليكي زي منتي

اوعي اي حد ولا اي موقف يغيرك

هييجي اليوم اللي تعرفي فيه انك كنتي صح

تحيتي يانور

ريــــمــــاس يقول...

صباح الغاردينيا نور
دايماً محتاجين صفحة تبقى مع نفسي معانا بكل مافينا من حزن وفرح وحلم وأمنيات دايماً كوني نور ماتبصيش لحد مش لازم تعجبي الناس كفايه تكوني أنتي هي أنتي على طبيعتك وزي ماتحبي تكوني ..
بالنسبة لتأمل الناس ممكن بجد تخرجي من حالة التأمل دي بحاجة جديدة ماكنتيش تعرفيها "
هههههههه عارفة حكاية فجأة التليفون بيرن طب ارد ولا ماردش اهو لما يتحول لـ ميسد كول تبقي بتعضي صوابعك ندم بعض الكلام بيبقى اجمل لو جى بدون ترتيب بدون ماتفكري انتي تردي وبس :) "
وانا كمان احيانا عاوزة ازعق بعلو صوتي واقول سيبوني احلم دا حلمي انا :( "
المهم يانور انك بتقابلي اخيراً الناس الصح حتى لو في وقت غلط انما مقابلتهم تبقى كفاية على الاقل لما يبقوذكرى حتفتكريهم بـ ابتسامة "
؛؛
؛
نور
احلى مافيكي انك بتحسسيني اني قدامك عشان كدا بقرأ وانا مبتسمة
صباحي جميل بيكي مش نور يبقى صباحي نور:) "
؛؛
؛
لروحك عبق الغاردينيا
كانت هنا
reemaas

قطرة وفا يقول...

على فكرة مش شرط ابدا اعجب كل الناس..انا مش كل الناس اصلا بتعجبنى


دي وحدها حكاية ... عجبتني فوق متتصوري ... وخصوصا لازم افتكرها بجد واهديها لنفسي

أم محمد يقول...

عجبني الميسد كول

أحيانا بنحسبها أكثر من اللازم ..


دي مش تخاريف .. دي سرحان مع النفس .. اسرحي كمان


تحياتي
أم محمد

مصطفى سيف الدين يقول...

نعم هو بوح صادق مع النفس
اعجبتني خواطرك اللي مع نفسك
تسلم ايدك

reemaas يقول...

سواح في ملك اللــــــــــــــــــه-

بحاول والله يا خالد
من باب انى حاسة انى صح احيانا
ومن باب انى بعند معاهم احينا اخرى

reemaas يقول...

ريــــمــــاس

ماهى المشكله انهم بيبقوا صح جدا لكن لسوء التوقيت بردو بيختفو من حياتى وده بيزعل

تسلميلى يا ريموسة والله بحاول ابقى انا على اد ماقدر

reemaas يقول...

قطرة وفا

ودى حقيقة والله لو اتفهمت كده هنهدى خالص

reemaas يقول...

أم محمد


هى احساس وحش اوى صدقينى

reemaas يقول...

مصطفى سيف الدين

تسلم يدرش مبسوطة انها عجبتك

دعاء العطار يقول...

************************************
احينا بحس انى عاوزة ازعق بعلو حسى"وانتم مالكم؟"

مااعرفش يابنتى هما مالهم ... لو كل واحد يخليه مع نفسه كانت الدنيا هتبقى اجمل وابسط بكتيييير ... انا كمان بحتاج ساعات كتير اقول كده


**********************************

كان من احلامى انى اكون مذيعة راديو فى محطة تكون شبابيه ومسموعة
مافيش حد يكتشفنى؟

بصى احنا نشوف حد يتبنانى انا وانتى ... انتى مذيعه وانا فى جرنال ايه رايك ؟

***********************************


على فكرة مش شرط ابدا اعجب كل الناس..انا مش كل الناس اصلا بتعجبنى

صححح الصححح كمان

كونى نفسك وبعدها مايهمش اى حاجه تانيه ... الناس اللى شبهك هى اللى هتحبك وتقتنع وتؤمن بيكى ... والناس اللى مش شبهك ولا تحطيهم ف دماغك اصلاً

............

بحب الدردشه اللى مع نفسنا دى وخاصة لما تكون من نور بتطلع بتلقائيه (:

^_______ ^

نور القمر يقول...

شكرا لك
انتى حلو ه وشخصيتك حلوه اوعي حد فيهم يغيرك من مجرد كلمه ..
يالتوفيق يا قمر
نور

الاحلام يقول...

نور
جميل انك تفضفضى بما فى داخلك ويشعر به من حولك جميل عندما تفكرى بصوت عالى ومن يعلق فتقولى له وانت مالك ؟
احبب القراءه هنا لانه يوجد بها البساطه والسهوله تحياتى لكى نور الخالصه
الاحـــــــــــلام

موناليزا يقول...

حلو اسم "مع نفسى" ليه أصلا تسميها كنتى مسمياها تخاريف:)

reemaas يقول...

دعاء العطار

اه يدعاء خلاص ندور على حد يكتشفنا احنا الاتنين هههههههههههههه

اه برتاح اوى والله يا دودو لما بدردش معاها

reemaas يقول...

نور القمر

ربنا يخليكى يا نور
هحاول والله حاضر

reemaas يقول...

الاحلام

شهادة اعتز بيها يا ابو داوود والله

reemaas يقول...

موناليزا

ماهو انا غيرتها لان كل اللى كان يعلق يقولى دى مش تخاريف هههههههههه
ثم اسامة صاحب مدونة همسات قلب لقيته بيكتب بعنوان تخاريف فعلشان التخاريف ماتدخلش فى بعضها بقى

جايدا العزيزي يقول...

والله معاك حق نور

كتير بنسأل نفسنا كل سؤال سالتيه

دائما يروقنى طرحك

لصدقك وبرائتك

ونصيحه اوعى تتغيرى

خليك دايما احلى وارق بنوته

تحياتى

reemaas يقول...

جايدا العزيزي

فرحاااااااااااانة جدا انك رجعتى تانى

ربنا يخليكى يا ايدى يارب

Tarkieb يقول...

كلما تكلمت عرفناكي اكتر....

شيرين سامي يقول...

أنا كمان ساعات بحس بالحاجات دي... بس نصيحة متركزيش مع الناس أوي عشان متبقيش سيكو زيهم :)
بحب الفضفضه دي أويييييي
:)

أرق تحية لكي

reemaas يقول...

Tarkieb

يارب تكون معرفة خير بس :)

reemaas يقول...

شيرين سامي

اه والله يا شيرين دى بقت حاجة تخوف
ههههههههههههههه

ريبال بيهس يقول...

مساء الورد

مقتطفات رائعة بعضها حمل فلسفة

خاصة بك وبعضها حمل تساؤلات غريبة

ولكنها منطقية في عالم متقلب غريب .

بالفعل كل جزئية أجمل من الثانية .

تحياتي وإحترامي

sabry abo-omar يقول...

أهلا باجمل بنوتة مصرية وكلامها كله مصرى... كلامك كله حكم السنين وكانك عايشة حضارة كام الف سنة .. كمان فعلا انا متفق مع انك طاقة جامدة ومتحمسة عالطول.. انا شخصيا بادخل عندك وبافتكر نفسى كدة من كام وعشرين سنة ... حافظى على طاقتك دى وحافظى كمان على لغتك لانها مليانة حب وبراءة جامدة خالص... تحياتى

نهر الحب يقول...

فجأة لقيت رقمك بيرن عليا اتلخمت جدا ومابقتش عارفةاعمل ايه ,ارد ولا ماردش,طب المفروض اصلا ارد؟طب لو رديت هقول ايه ولا انت حتى هتقول ايه هو لسه فيه حاجة تتقال؟طب المفروض لو رديت اكشر وانا برد ولا اعمل مش هممنى ولا ابتسم عادى كده؟ياترى الكلام هيخرج سليم ولا هتهته بقى ويبقى شكلى وحش؟وفجأة تحول الاتصال لميسد كول!!!!!!!!!!!!


يا نهااااااااااااار
ده انا جدااا بتحصللي كتير
بس ممكن بعد ما تبقي مسد كول ببساطة انا اتصل
بس كتير بكون قوية
مع اختلاف الاحساس والموقف يعني
:D


كان من احلامى انى اكون مذيعة راديو فى محطة تكون شبابيه ومسموعةمافيش حد يكتشفنى؟
ده انا برضه
ومازال عندي الحلم ده
:))

ودي كمان



ديما بقابل الناس الغلط فى الوقت الصح او الناس الصح فى الوقت الغلط.....مش عارفه امتى هتتظبط الحكاية دى


تخاريف فضفضة مع نفسك اي حاجة المهم انك قلتي اللي جواكي..وجوايا...وجوة ناس كتير
:)

شكرا انك عبرتي عني بجزء كبير اوي

فشكووول يقول...

السلام عليكم
ازيك يا ريماس
ما تقلقيش يا ريماس كل شيئ فى ميعاده وربنا سبحانه وتعالى هو اللى بيختار الميعاد وبيظبط لنا كل حاجه
تحياتى

reemaas يقول...

ريبال بيهس

هو فعلا عالم غريب جدا كل حاجة فيه لو ركزت فيها هتولد جواك مليون سؤال

reemaas يقول...

sabry abo-omar

تعليقك فرحنى كتير جدا والله بحاول افضل زى مانا مع انك لو كنت قابلتنى من خمس سنين بس كنت هتشوف الطاقه اللى على حق
ايه قللها؟ صدقنى ماعرفش

reemaas يقول...

نهر الحب

فعلاا والله ياسهاد كنت نفسى اوى فى كل حرف بكتبه فى البوست ده علشان كده بعتبره من اعز الحاجات على قلبى وخصوصا لو حسبت انى ارتحت لما فضفضت بيه

اتصل انا؟
صعبة

reemaas يقول...

فشكووول

ونعم بالله

هو اعلم باللى فى نفسى منى فلو كان خير قادر يقربه

Bent Men ElZman Da !! يقول...

"على فكرة مش شرط ابدا اعجب كل الناس..انا مش كل الناس اصلا بتعجبنى "
عبقريه دى فعلا
صح جدا

فعلا البوست ده ماينفعش يكون تخاريف
عشان ده بيبقى نفسك وبس
الاسم مناسب اوى
وانا بحب البوست ده كمان مع اليوميات :)

reemaas يقول...

Bent Men ElZman Da !!

وانامبسوطة انك ظهرتى وطمنتينى عليكى ;)

eng_semsem يقول...

وانا كمان عايز ازعق واكتب حاجات كتير
محدش يمنعك من انك تعيشي يومك زي ما انت عايزه وانسي كلام الناس اللي مش هينتهي
وزي ما انت قولتي مش كل الناس بتعجبك مهما عملتي مش هيعجب كل الناس
تحياتي

reemaas يقول...

eng_semsem


صح يا سمسم
مستنيه اسمع زعيقك انت كمان
ونفسى اعرف ادخل مدونتك بس مش عارفة خاااااااااااااالص

Timo.. يقول...

"بسلم عليك علشان لقيتك مرة واحدة وحشتنى"
- بداية حلوة بس مش مطمنئنة..!!


"قال لى احد المقربين"احلى حاجة فيكى انك طاقة" مش عارفة المفروض ده يزعلنى ولا يفرحنى!!
- دي الضبط زي ما حد يقولك انك شخصية فريدة من نوعك تماما كا (خلد الماء) .. ساعتها برضة مش ها تبقى عارفة تفرحي ولا تزعلي..!!



"ديما مطلوب منى انى اعامل الناس على قد عقلها.......طب وانا؟!
مين هيعاملنى على اد عقلى؟"
-اكيد الشخص الوحيد اللي ها ينفع تقضي معاه باقي حياتك.. وعشان كده ها يكون مختلف عنهم كلهم و (فريد) جدا :)


"وفجأة تحول الاتصال لميسد كول!!!!"
-عارف قوووووي الاحساس ده..
بس بيبقى رحمنا من التفكير على الاقل واخد القرار ونفذة بالنيابة عنا :)


"على فكرة مش شرط ابدا اعجب كل الناس..انا مش كل الناس اصلا بتعجبنى"
-كلمة اتاكدت منها الفترة اللي فاتت ومحتاج افكر نفسي بيها ديما..!!



"ديما بقابل الناس الغلط فى الوقت الصح او الناس الصح فى الوقت الغلط...مش عارفه امتى هتتظبط الحكاية دى"
-ما تقلقيش يا ري.. مسألة فرق توقيتات مش اكتر.



"صديقتى الانتيم لاحظت انى بوصف الناس فى اى موقف يتحكالى بكلمة سيكو"
- ما هي دي انسب كلمة فعلا..!!


"ليس بالضرورة لكى تكون صادق..ان تكون بجح"
-وليس لمجرد انك بجح فانت صاحب حق صادق..!!


على فكرة.. عجبني كلامك سواء كان تخاريف... او .. مع نفسك :)

reemaas يقول...

Timo..

ايييييييييييه النور ده :)

لا تقلق من البداية مجرد اغنية وعدت;)

مبسوطة كتيييييييييير ان كل حاجة عجبتك كده بفرح انا

بحب كتير تفصيلك لكل الكلام بحس انى عملت حاجة :))

منورنى يا تيمو