زى النهاردة

كل سنة وانتى طيوبة يا ريمو او يا نور.......

 وانتى,وانت طيبة,طيب ميرسى كتير.......

بقالى يومين بسمع الكلمة دى وبرد بنفس الرد

طبيعى

النهاردة عيد ميلادى...........

زى النهاردة من كام سنة انا جيت الدنيا 

زى النهاردة بقى فيه انسانة اسمها نور بتكبر ....

وبتحلم........

وبتحاول تحقق احلامها دى.........

اينعم  قليل منها اللى اتحقق

اينعم حاسة ان لسه كتير اوى ماتحققش رغم العمر ده كله

اينعم نفسى الوقت يمر ببطء حبة لانى حاسة انه مسربعنى بصراحة

لكن مين عالم .........

جايز اللى جاى يبقى احلى

ورغم ان بتنتابنى احسايس متناقضة كل سنة فى نفس اليوم.......

لكنى بفرح لما بلاقى حوليا ناس كتير بيحاولوا يفرحونى فى اليوم ده ولو بكلمة

:)

وليهم كلهم بجد بحبكم

انا بفرح كده.....وانت؟

كنت بحاول اظبط حلقة جديدة من اليوميات .....

لحد مالقيت الكليب ده ادامى.......

لفت نظرى جدا وحسيت ان فيه حاجات بسيطة كتير وفعلا لما بعملها بتسعدنى وبتغير مودى تماما

يعنى مثلا الشيكولاتة دى بتحللى ازمات كتير جدااااا

اطفى النور واسمع مزيكا دى كمان بعملها كتير جدا

بعمل كده لما بقعد على البحر ........

لما بتخنق جدا بشتغل لحد ما احس انى هموت من التعب وبعديها اروح انام مرتاحة من كتر التعب

ساعات بببعت رساله لاصحابى فاضية بس لمجرد انى انكشهم:)

ساعات بخترع حاجات فى المطبخ الحكايه دى مفيدة جداااااااااااااااا بس بتتاكل والله.....

بعمل كده فعلا لما بقابل حد مش فاكرة اسمه......

بفتكر قبل ما انام كل الحاجات الحلوة......

ديما عندى حل لكل مشكلة بتتحكالى.........

ديما بقول الحمد لله لما بتسأل على حالى.......

بجيب لنفسى هدايا .......اه والله

اسمعوا الكليب كويس جداااااااا

وقلولى ايه شدكم فيه

صباحكم سكر

 

مع نفسى3

بسلم عليك علشان لقيتك مرة واحدة وحشتنى.......فاكر؟

انا لسه فاكرة

************************

قال لى احد المقربين"احلى حاجة فيكى انك طاقة"

مش عارفة المفروض ده يزعلنى ولا يفرحنى!!

*************************

لماذا تكتبين؟علشان افضفض

طب هتفضفضى بايه؟بكل اللى حصل واللى بفكر بيه واللى بحلم بيه........

صدعتينا..متى سوف تصمتين؟..........

خايفة كتير يجى اليوم ده

***************************

ديما مطلوب منى انى اعامل الناس على قد عقلها.......طب وانا؟!

مين هيعاملنى على اد عقلى؟

****************************

فجأة لقيت رقمك بيرن عليا اتلخمت جدا ومابقتش عارفة

اعمل ايه ,ارد ولا ماردش,طب المفروض اصلا ارد؟

طب لو رديت هقول ايه ولا انت حتى هتقول ايه هو لسه فيه حاجة تتقال؟

طب المفروض لو رديت اكشر وانا برد ولا اعمل مش هممنى ولا ابتسم عادى كده؟

ياترى الكلام هيخرج سليم ولا هتهته بقى ويبقى شكلى وحش؟

وفجأة تحول الاتصال لميسد كول!!!!!!!!!!!!

************************************

احينا بحس انى عاوزة ازعق بعلو حسى"وانتم مالكم؟"

**********************************

كان من احلامى انى اكون مذيعة راديو فى محطة تكون شبابيه ومسموعة

مافيش حد يكتشفنى؟

***********************************

على فكرة مش شرط ابدا اعجب كل الناس..انا مش كل الناس اصلا بتعجبنى 

***********************************

ديما بقابل الناس الغلط فى الوقت الصح او الناس الصح فى الوقت الغلط.....

مش عارفه امتى هتتظبط الحكاية دى

*****************************

صديقتى الانتيم لاحظت انى بوصف الناس فى اى موقف يتحكالى بكلمة"سيكو" كتير

مش عارفة هى بقت لازمة ولا ده احساسى تجاه الكل

******************************

مؤخرا بقيت بتأمل ردود افعال الناس كتير اوى

سبحان الله له فى ذلك حكم!!

*******************************

ليس بالضرورة لكى تكون صادق..ان تكون بجح

********************************

ملحوظة:غيرت اسم البوست من تخارف ل مع نفسى  وده لاعتراض كتير على اسم تخاريف

وكمان لانى لقيت صديقى اسامة عنده تخاريفه :)

الصمت

قد يكون الصمت ردا....اذا تعلمت كيف تجيب به

قد يكون  الصمت سلاحا....اذا تعلمت كيف تقاتل به

قد يكون الصمت شموخا....اذا تعلمت متى تستخدمه

 لكن اصعب الاحوال عندما يكون الصمت الما..ليس لك حيلة معه

هو ملاذك الاخير........

من قراتى1

كتير عجبهم القصاصات اللى بنزلها فى status على الفيس من فترة للتانية واللى طبعا نبهت اكتر من مرة انها مسروقه من العبقرى احمد خالد توفيق

فقررت اجمعلكم حبة منهم هنا :) وحابة اسمع تعاليقاتكم.........

1\قصاصات عن الاقتصاد

لو ان ابا الهول وجد عقد عمل للخليج

لسافر خلال اسبوع ..الحمد لله انهم لايعطون عقود عمل للتماثيل

********************

2\قصاصات عن السياسة

اختلف مع السادات فى كل شئ فيما عدا مقته الشديد لمدينة القاهرة

فى هذه النقطة انحنى له..كيف يحسب هؤلاء التعساء انهم يعيشون؟

*********************

3\قصاصات عن البشر الظرفاء

ايفت)اللفظة العبقرية التى ابتكرها محمد ابنى للتذمر ..فهم خليط عجيب بين

(اف)و(زفت)و(وييه)اطالب بتسجيلها وحق الاداء العلنى لها

*********************

4\قصاصات عن الفنون

ان للصحفى ميزة الاطلاع السريع على كل المصائب حين تحدث

ويمكنه ان يدخل فى كل مكان ويسأل اى شخص اسئلة لو وجهها غير لتلقى لكمة فى انفه

**********************

5\قصاصات عنهن

لابد ان هناك فى مكان ما مصناعا ينتج الفتايات اللاتى  يلبسن الحجاب والجوب الجينز الضيقة

والحذاء الكوتشى والعوينات ويحملن الموبايل..وهو انشط مصنع فى العالم فلابد ان مديره يابانى

************************

6\قصاصات عن البشر الظرفاء

كانت الحوائط مكسوة بتلك العبارات التى يعتقد متوسطو التعليم انها بليغة جدا

مثل(الخط خطى والدمع يسيل على خدى)او(الذكرى ناقوس يدق عالم النسيان)دعك من الطبيعة الكامنة فيهم ان الاديب لابد ان يكون حزينا..ما ان يمسك الواحد فيهم قلما حتى يتحول الى روح معذبة لم يفهم الناس كم هى رقيقة !

******************************

7\قصاصات عن البشر الظرفاء

قال لى اريد ان اسافر الى امريكا..الى بلد يعرف قدرى

قلت له لماذا تريد ان تسافر الى بلد يعرف قدرك؟لماذا تريد هذه الفضيحة؟

فى بلد طيب متسامح مثل مصر يمكن للحمار ان يظل مستورا وان يأمل فى وجبة العشاء

لكن هناك سيفتضح امرك خلال ربع ساعة......نصيحتى ......ابقى هنا!

******************************

8\قصاصات عنهن

هى ليست غبية..فقط بعد هذه السن لاتستطيع ان تتعلم شئ جديد..

ولا ترى هناك ما يستحق

****************************

9\قصاصات عن..عن..لا ادرى بالظبط

هناك قلب شيخ فى صدرى..من الشيخ تعس الحظ الذى اخذ قلبى الشاب؟!

********************************

10\قصاصات عنهن

المرأة الخيالية او الحالمة هى الجحيم ذاته..لانها لن تجد من تبحث عنه ابدا..

لن تجد فارسها وسوف تكتفى بتعذيب البائس الذى رضيت به

****************************************************

كفاية كده النهاردة وهبقى اسرقلكوا حبه تانيين لو عجبوكوا

يجعله عامر :)

يومياتى7

لمتابعة الجزء السابق اضغط

هنا 

راجل وخمس بنات

***************

هخرجوا شوية من جو العهد والعيانين وادارة المستشفى ..الخ

ونركز مع الدفعة الواردة الجديدة شويه.....لو لاحظتوا احنا جالنا 3 بنات وولد وكدة بقينا بالظبط خمس بنات وولد

وانطلاقا من هذا المنطلق ابتدى الرسم...... اه والله ماهو ده الطبيعى

ولد ومش لابس دبلة,ودكتور,وشكله مش بطال,وفى وشنا ليل نهار ,وشكله يدى على محترم كده,وبشوش ومبتسم على طول ولا بتوع اعلانات سيجنال, واسمه محمد,واحنا كلنا ولله الحمد ماحدش مرتبط فينا .......يبقى ايه؟

يبقى على البركة فعلا

تدخل الصيدليه الصبح تلاقى الكل على سنجة عشرة والبنات متصدرين الشبابيك وشهريار زمانه قاعد على المكتب متولى الاعامل الكتابية!

امبارح الفطار جاى من فلانة,النهاردة العصيرة على علانة,بكرة الساقع من ترتانة,بعده ماعرفش الشاى على مين........وهلم جر

تعدى الايام واخينا شغال توزيع ابتسامات وخلاص....بينى وبينكم انا مش من اصحاب  النفس الطويل فبطلت ارسم وده لكذا سبب الاولانى انه متوقف عند خطوة الابتسامات  وانا ماليش طولة بال لكدة

التانى ان الخمس بنات عينهم فيه ودى حاجة مش لطيفة خالص واخرتها هيبقى فيه ضغائن وكده

التالت بقى ان د|محمد ده حيرنى فعلا ساعات احس من كلامه انه فرى وساعات يقلب على اخوان وساعات تحس كده انه حزب وطنى يعنى الصراحة قلقنى منه فقررت اخرج من المبارة واقعد مع المتفرجين....

ووقتها بقيت صديقة الكل ! ماتفهمش حسوا ازاى انى قررت اسيبنى منه المهم انهم حسوا وبقت كل واحدة تيجى تقولى محمد قلها ايه النهاردة,محمد ضحكلها كام مرة النهاردة,محمد طلب منها كام خدمة النهاردة

ومن ده استنتجت حاجتين مهمين جدااااااااااااا اولهم ان الاربع بنات معيشين نفسهم  اوهام زى الفل

 بس طبعا ماقدرش اقولهم كده هنضرب

التانى وهو الاهم ان محمد عارف ده كله ههههههههه اه والله الواد قاصد ده وبيرمى كلام لايتمسك عليه ولا يدبسه فى حاجة .. وعليها فضلنا عايشين فى المسلسل التركى ده لفترة

لحد ما فى يوم محمد غلط غلطة عمره وابتسم لواحدة منهم   فواحدة تانيه شافته

وبدأت الهمهمات بقى والمراقبة اشتغلت واتحط محمد فى موقف انا نفسى مش هحسده عليه ابداااا

وعدت الايام ....وفى يوم دخلت الصيدليه لقيت سالى هى اللى قاعدة على المكتب  وجنبها بنتين كمان  والخامسة واقفه على شباك .....ومحمد بيمشى شباكين لوحده

الكل بيفطر وبشرب ماعدا هو

فى حاجة غريبة ومش مفهومة الواد وشه اصفر كده والبنات بيبصولوا بنظرة عجيبة .....سكت على امل ان حد يفطمنى ماحدش بينطق

اسأل كل واحدة على جنب فى ايه يابنتى ماحدش ينطق الا بكلمة واحدة.......واطى

اوباااااااا هو عملكوا ايه يا عيال حد ينطق

لقيت سالى بتقرب كده جنب ودنى وبتوشوشنى .......... اصلنا سأنا عليه فى الخباثة كده ,البيه طالع كاتب كتابه من سنة على واحدة من بلدهم  ,صيدلانية بردو وعندها صيدلية,ومخبى!!!

هههههههههههههههههههههههههههههههههههههههه 

                                      وانتابتنى كريزة ضحك ماخلصتش الا تانى يوم ولحد النهاردة كل ماشوف محمد فى اى مناسبه او اجتماع للصيادله اضحك غصب عنى

ولحد النهاردة مش عارفه احدد هو اخوان ولا ثورجى ولا صيدلى ؟؟؟؟؟؟؟؟

يومياتى 6

لمتابعة الجزء اللى قبل كده اضغط  
هنا 

                                    

ازيكم وحشتونى جدا....

اكمل معاكم بقى اللى حصل....

فضلنا انا وصحبتى على حالنا ده تقريبا شهر شايلين الليلة لوحدنا ومنتظرين الفرج....

هتقلولى اى الفرج ده ؟انتم نسيتوا ولا ايه...باقى الدفعة المكلفة...

عرفنا ان هيجيلنا اربعة كمان بس الاربعه دول ياعينى مقدمين تظلمات لبعد المسافة وانهم عاوزين يشتغلوا فى نفس مدينتهم

طبعا المدرية ماعجبهاش الدلع ده وقالت لتستلموا لتستقيلوا ..وكان وقتها ماينفعش حد يقدم على اجازة الا لما يستلم الاول ..وطبعا لو استلم العمل يقلولوا ماينفعش اجازات دلوقتى او موافق مع وجود بديل وطبعا مافيش بديل كل شعب الصيادلة شغال وفى ازمة .....

وهكذا دايرة مغلقة تجيلهم من هنا يجولك من هنا لحد ما الصيدلى يرضى بالامر الواقع ويستلم ..

وقد كان وانا وصحبتى قعدين مطحونين مع الناس وبنصرف فوجئنا بحد بيخبط علينا فتحنا لقيناه نائيب المدير ومعاه اربعة تانيين 3 بنات وولد .....مكشريين جدا ومش طايقين نفسهم والجميل بقى انهم بيبصوا لكل حاجة حواليهم بارف فظيع :)

تم التعارف وعرفنا انهم الى هيستلموا معانا وبابتسامة (معناها انتم جيتوا ياحلوين) سلمنا وكروتنا الناس سريع سريع وقفلنا عليهم وعلينا طبعا الباب واصرينا انهم يستلموا النهاردة ونوزع الشغل وتقسم الايام كل حاجة النهاردة.....اه ماحدش ضامن يرجعوا  يروحوا يفوقوا ولا حاجة......

العيال كانوا حاسيين انهم بيتدبسوا الحقيقة وخصوصا ان سالى صاحبتى كانت فعلا بتتعامل بطريقة هيستيرية اللى هو يسألوها عن حاجة تبصلهم بصة مرعبه كده وفى مرة فقدت اعصابها وزعقت وقالت مش كفايه انكم جايين بعد ما ظبطنا الشغل اومال لو كنتم جايين من الاول!!!!!!

اتدخل انا واحاول اهدى الموقف واشرحلهم تعب الاعصاب اللى عشناه الشهر ده..العيال يترعبوا اكتر طبعا

اخدت سالى على جنب وقلتلها هدى اللعب العيال هيجورا واحنا مش ناقصيين وبعدين ماتقوليش ليهم على كرتونة الزيادات علشان مايبلغوش  والمدير ياخدها.. الله اعلم دول هيبقوا معانا ويوزعوا فيها على الناس ولا هيبقوا مع الاسف..

وقد كان العيال مضوا على العهدة ..

وبعد ما مضوا وضحتلهم موقفنا من ادارة لمستشفى واد ايه احنا مخليين الصيدليه كيان مستقل بعيد عن حيتان المستشفى من اطباء  او مدير 

واتفقنا اننا نبقى ايد واحدة وماحدش يعرف عننا حاجة

                                    وبدأ عهد جديد فى تلك المخروبة (المستشفى الموقر)

ملحوظة:بعد ما اتبعت جواب استيلامهم للشغل المدرية بعتتلهم قرار بخصم شهر من مرتب كل واحد فيهم عقابا على عدم اتسيلامهم من الاول.....وطبعا واخدين بالكم انه اول شهر ليهم:))))