plz 2012>>>>Be Happy

اولا وحشتونى جدا واسفة انى متغيبة عن المدونات اللى متابعاها بقالى فترة

هحاول انى اقرا كل اللى فاتنى واللى اول مادخلت اتصدمت انه كتير جدا...

ايه النشاط اللى انتم فيه دهO.o

الفترة اللى فاتت كنت مكتئبة جدا وماليش نفس اعمل حاجة ولا اكتب حاجة

طب اهرب من الاحساس ده ازاى.؟

زى مابهرب كل مرة اكيد ....

انى اكتب  اى حاجة.......

مجرد انى احاول اعتقد هيبقى كسر للحالة المملة دى

ومن هذا المنطلق  قررت انى احتفل معاكم بمولد سيدى الكريسماس على راى "دياسطى"

اخيرا يا جماعة

اخيرا 2011 هتخلص اهو

اخيرا هتنتهى بخيرها وشرها واحداثها اللى حسستنى  ان الراجل العجيب اللى تنبأ بان نهاية العالم هتبقى فى ديسمبر 2012 كان مفروض يقول 2011

اه والله دى ماكنتش سنة طبيعية زى باقى السنين لا

دى كانت تاريخ بحاله........!

وبستقبل معاكم اهو 2012

بصراحة ماعرفش انتم بتستقبلوها باى احساس

بس انا عن نفسى بستقبلها بامل وقلق شديد فى نفس ذات الوقت

على مستوى بلدى فانا كلى امل انها تبقى زى ما كل المصريين عاوزين

وكلى قلق من انها تبقى عند ظن البعض وتخيب املنا

وبالنسبالى انا فكلى امل فيكى كاى سنة جديدة بتحترم نفسها انك تكونى شيلالى فى  اى يوم من ايامها حاجة جديدة ,فرحة جديدة,مفجأة جديدة تغيرى بيها حياتى

وكلى خوف منك انك تبقى مجرد سنة تعدى زى اللى قبليكى وتتحسبى من سنين العمر على الفاضى

ارجوكى كونى عند حسن ظنى.........

مع نفسى6

حاسة ان فيه مية ايد وايد

مكلبشانى,مثبتناى مكانى

مانعة الضحكة ومانعة الفرحة

وحتى على الحزن ليمانى!

اتصل؟

لا مش هتصل .....ماينفعش اصلا انى اعمل كده

طب ابعت رسالة فيها كلمتين وخلاص؟

طب فرضا ماردش!

طب استنى جايز هو يبعت...

يوووووووه

على الهامش

بعيدا عن العراك الحوارى والاختلاف السياسى القائم بيننا بقاله اسبوع اهو  حابة احكيلكم على حبة مواقف تعرضتلها فى الاسبوع اللى فات ده 

المكان:  هيكون فين يعنى اكيد الصيدلية.......

اول موقف:زبونة داخلة عليا الصيدلية تقريبا كده فى الاربعينات من عمرها   اخدت منها الروشتة و

***********           لقيتها بتعلق على الاخبار اللى شغالة فى التليفزيون

                الزبونة:ياه يا دكتورة انتى لسة عندك قدرة تتابعى اخبار ده انا اعصابى تعبت

                           انا:هعمل ايه بس ادينى بشوف التطورات

                الزبونة:طيب على كده قررتى تنتخبى مين ؟

                انا:هتخب فلان وفلان والحزب الفلانى وسألتها من باب الذوق وحضرتك؟

                الزبونة:لا انا مش هنتخب حد لا فى المجلس ولا الرياسة

                انا:طب المجلس وممكن افهم لكن لرياسة لاء ليه؟!

                الزبونة:لانى ضد النظام الرياسى اصلا وشايفة ان كل ده غلط من اول ثورة يوليو  

                        لحد النهاردة ونفسى النظام الملكى يرجع تانى

                  انا:ماعلقتش وصرفتلها العلاج من سكات ............

    ************************************************************

الموقف التانى:

*********** الزبون كان تقريبا بتاع 18 سنة او 20 مش اكتر وبردوا داخل ياخد روشتة وكان

                شغال فى التليفزيون الراجل رئيس الحزب الاشتراكى الثورى اللى طلع من يومين

                وكان بيشتم فى الجيش وبيدعوا الشعب لتسريح الجيش كله ! 

                الزبون:لا حول ولا قوة الا بالله ده كلام ده  ازاى سامحين للعالم دى  تطلع

                       تتكلم كده

                 انا:عادى ماهو ده من اشكال الديموقراطية المغلوطة اللى فى البلد

                الزبون :عارفة حضرتك حل المشكلة دى اى؟ ان الحرب تقوم واى بلد تهجم 

                        على مصر.......ادعى معايا ان الحرب تقوم

                   انا:وحرصا منى على قواعد الادب المعروفة صرفتله العلاج من سكات....

 *********************************************************

الموقف التالت: وده لسه طازة امبارح بالليل ... مجموعه من الاولاد جابوا سلم وطلعوا علقوا 

                لافته دعايا لحزب الحرية والعدالة من العمود اللى جنب الصيدليه لحد العمود 

                المقابل له من الطريق

                وشووية ومجموعة اولاد تنايين  علقوا لافتة دعايا لحزب النور من نفس العمود 

                 لنفس العمود التانى ووصلوا اللافتتين ببعض

                 شوية ومجموعة ولاد تالتين علقوا لافتة تالته لحزب الوفد على نفس المكان ولكن 

                 تحت اللافتيين الاولنيين بينى وبينكم انا استغربت اى الغباء ده ياربى!!!

                 شوية وجت عربية لورى كبييييييرة وارتفعها عالى جدا اخدت كل اللافتات دى 

                  فى طريقها ومشيت:D

                 شوية كده ولقيت ناس كتير عمالة تتخانق مع بعض وشتايم بقى وضرب وكده

                 طبعا متخييلين السبب...

                 ايوووووون كل مؤييدن حزب مسكوا فى التانيين واتهموهم انهم بيقطعوا الدعايا 

                  بتاعتهم والموضوع كبر والشرطة نزلت لان فى ناس اتتعورت من الضرب وانا 

                  هموت وانزل اقولهم  اللى حصل بس خايفة حاجة تيجى فيا ........

                 لحد ما الظابط اقترح عليهم يسألوا المارة فى الشارع يمكن حد شاف  اللى عمل

                  تلك العملة الشنعاء.....

                  وبما انى المحل او المكان التجارى الوحيد فلقيت الظابط ووراه الناس دى كلها

                   داخليين عندى لسؤالى 

              الظابط:   معلش يا دكتورة ماشوفتيش مين سبب اللى حصل ده من الجماعة دول

                   وماتخافيش ماحدش هيقدر يتعرضلك.!!!! 

              انا: اه شفت......اللورى حضرتك وللاسف ماجاش فى بالى اخد رقمه........!   

رسالة اؤيدها

تنويه:الكلام مش انا صاحبته انا شيرته من صفحة صديقتى زينب على الفيس بس لانى مقتنعة بيه جدا فسجلته هنا وللكل اكيد حق قبوله او رفضه .....

عزيزى المعتصم السيلمى الشريف:

ارجوك لا تعتصم باسمى مرة اخرى,فلقد قمت ومعى خمسة وعشرين مليون موطن بانتخاب من يمثلنا ويحقق اهدافنا.....او هكذا نظن....وهو بالطبع ليس انت..

واذا جاءك جيشى او قوات شرطتنا يفض اعتصامك بالقوة فاعلم اننى انا من ارسله لانه من امن العقوبة اساء الادب.....وارجوك لا تحدثنى عن عنف وعنف مفرط..فانا اعرف عنف فوق المفرط قد ينتج عنه مئات..والاف القتلى.....وقد يحرق بلادى

فانت لاشرعية لك وانت جار مشاغب لى فى وطن اريد ان ابنيه...

تختار انت المعارك وتريدنا جميعا ان نتحمل نتائج تهورك..واعلم ان عدم وجود قيادة ليس ذنبى ولا ذنبك.....

تتجاهل انت كل سنن الكون فى التدرج وتكفر بالديموقراطية اذا لم تعجبك..وتظن ان الصوت العالى هو الحق المطلق...لا والف لا....

اما اذا مت فانا خصيمك امام الله يوم القيامة حيث يغلب على ظنى انك القيت بنفسك الى التهلكة..ووقعت بغشامة فى الفتنة وانا ادعو الله ان ينتقم من قاتلك اين ما كان....

وان لم تسلم السلطة فى 1 يوليو فسننزل معا ولن نعود حتى نموت معا..

لكن قبل هذا التاريخ انت فى نظرى تريد خطف بلدى الى اتجاه بعينه متجاهلا ان الثورة اطلق شرارتها قليل من شباب مصر ..وشارك فيها كل الشعب المصرى وشارك فيها الجيش..وانت تريد ان تقودها لاتجاه ما غير واضح المعالم. 

سواد العسل

عارفة يا بلدى سواد العسل.....اهو ده اللى حالك له وصل!

مش بتكلم على احداث ولا بتكلم على مصايب بتنزل فى دماغنا..خلاص اتعودنا على ده

اتعودنا ان بعد اى حاجة حلوة لازم تحصل كارثة بقى سناريو محفوظ وممل....

لدرجة انى بحاول اتخيل حجم الكارثة اللى هتحصل بعد انتخابات المرحلة التالته..

تفتكروا ممكن قنبلة نووية تترمى !!!!!! ولا الهرم ينفجر؟

بعيدة الحكاية؟!...لا ماعتقدش بعد حريق المجمع العلمى كده كله ممكن....

ومع ذلك مش ده اللى خانقنى برده كده ...

اللى خانقنى حلم الديموقراطية اللى اصبح بالنسبالى كابوس...

لما قامت الثورة ماكنش هدفها اطاحة نظام كان هدفها حرية وعداله اجتماعية وكرامة وعلشان كده انا ايدتها وعلشان كده اختلفت مع نهايتها وقتها زى ماناس كتير اختلفت وكانت شايفه ان مافيش داعى للتنحى وممكن نكمل كلنا لحد شهر 9 وكفى الله المؤمنين شر القتال......

وتداعت الامور وحدث ماحدث وعيشنا واقعنا.......واقع بناء مصر حرة ديموقراطية

كل ده معروف ومعروف كمان كم الاحداث اللى حصلت بعده من استفتاء ومظاهرات واعتراضات لحد ماوصلنا لخطوة الانتخابات .......بداية النهاية للفترة دى 


فى كل مرحلة من المراحل دى كل مواطن كان بيبقى ليه رائ يا اما مع او ضد وده كان مظهر الجمال بالنسبة ليا


ان المواطن بقى بيتكلم فى السياسة عادى من غير خوف ومن غير ماحد يتريق عليه  بقينا كلنا لينا رائ وده  اول ابجاديات الحرية  


لكن الواضح اننا هنقف عند الابجدية دى ومش هنكملها جملة مفيدة..........

لما اخاف اكتب رائ علىstatusفى الفيس او هنا فى اى مدونة لاصدقائ  لايتقال عليا انى عميلة او انى مش فاهمة

لما يتهمش رائ ويتفه لمجرد انى قلت نعم فى الاستفتاء ....يتقال انتم عبط وصدقتوا كدبه الاستفتاء


لما مشاركاتى فى ابداء رأى تبقى مجرد عبط.......يبقى الديموقراطية كابوس


لما يتقالى امبارح فى احد المناقشات على الفيس انتى من الاول كنتى ضد الثورة بتتكلمى ليه يبقى الديموقراطية مجرد حلم.......


لما تقول انا مش عاوز الاخوان يمسكوا او السلفيين يتقالك انت علمانى ليبرالى وضد الاسلام تبقى الديموقراطية  اعياء وليست خلاص


لما يتقال انتم مابتتعلموش ابدا من التجارب والتحرير كلامه هو الل بيمشى بالزوق او العافيه يبقى الديموقراطية كابوس ........


لما يتقال اختار ان تكون مع احرار التحرير او مع عبيد العباسية يبقى ده كارثة محققة وبكل المقاييس
لما يتقال ان اللى خرجوا فى التحرير مؤخرا  هم رجالة مصر وماغير ذلك هم اموات منتظرين اللى يدب فيهم الروح يبقى على الدنيا السلامة




لما اعز الاصحاب يدلتوا بعض او يعملوا بلوك لبعض لانهم اختلفوا فى الرأى السياسى  ومحترموش الاختلاف ده وماقدروش يوصلوا لنتيجة بسيطة وهى ان كل يحبها على طريقته يبقى الله يرحمك يا ديموقراطية

لو لسة بتخاف انك تكتب رائيك على الول عندك او فى مدونتك  لتخسر اصحابك او تتفهم غلط يبقى احنا محتاجين نعيد حسابتنا

لان الخوف لسه كابس على ارواحنا اختلف صحيح من خوف من نظام لخوف من مجرد الكلام بس اسمه خوف


امامنا الكثير حتى نتعلم الديموقراطية......حتى نتعلم ان نستمع للطرف الاخر دون ان يكون  هناك حكم مسبق على رائيه بالجهالة او العمالة او العبط او حتى الخطئ


امامنا الكثير حتى نحترم قناعات الاخر......امامنا الكثير والكثير  والى ان يحدث ذلك


سنظل فى ذلك الصراع وسنفقد الكثير من الاصدقاء فى طريقنا لمجرد اننا اختلفنا ولم نحترم بعض


امامنا الكثير حتى نتعلم انه ليس شرطا ان اكون من التحرير حتى اكون ثورية او وطنية وليس جرما ان اختلف مع التحرير  او ان اختلف مع العباسية


وليس عيبا انى كنت ثوريا فى 25 يانير واختلفت قناعاتى .......


ياسادةكلنا مصريين .......كلنا بنحبها من مواطنين لمجلس لشرطة لحكومة ولازم نوصل لصيغة معينة نتفاهم بها 


نتفاهم حتى نعبر ببلدنا لبر امان وليس للدفاع عن قناعاتنا

يومياتى 10

الحلقة اللى فاتت

هنا 

المكان:النيابة الاداريه

المتهمين:انا بلا فخر....واميرة صحبتى وزميلتى اللى اكيد فاكرنها كويس

ليه احنا بالذات؟انا كمان سألت فى الحكاية دى ولقيت اننا اللى ماضيين على اوامر التوريد اياها... ماحنا فقريين!

بينى وبينكم انا دخلت متوقعه انى هلاقى عساكر ومتهمين برا زى حلاتنا ماهو انا ماعرفش اى الفرق بين النيابة الاداريه والنيابه العامة 

بس لقيت مبنى عادى يعنى شبه مبانى المدارس كده وناس كلها لابسين ملكى ....

وصلت انا الاول وانتظرت وصول اميرة لان معاها الاوراق اللى تثبت برائتنا من وجهة نظرنا

وشوبة وجت  .....بصتلها كده وفطست على نفسى من الضحك ....انتى هتدخلى يتحقق معاكى ببطنك دى ازاى يابنتى  ...والله حساكى هتولدى جوا(اه نسيت اقولكم ان اميرة كانت حامل فى الشهر التامن مع انى مرهناها انها عدت التاسع بمراحل...بس هى ادرى)

فضلنا قعدين منتظرين وكيل النيابة وانا عماله متخيله شكله هيبقى ازاى وانا هقول ايه انا والغلبانة دى 

وفجأة لقيت الحارس بينده على اسمى

دخلت لقيت شاب كده فى التلاتين(عكس توقع ابو زياد;)  ) وجنبه الراجل اللى هيكتب الاقوال..

دخلت قعدت على الكرسى من غير مايقولى اقعدى  وانتظرت بقى انه يسأل

بطاقتك لو سمحتى.....

حاضر....وفتحت الشنطة ادور عليها انى الاقيها ابداااااااا 

بصتله وانا حاسة انى خلاص هتحبس فيها كنت محرجة جدا وانا بقوله :نسيتها انا اسفة

بصلى باستغراب :حد ينسى بطاقته..وكمان جاية نيابة؟

معلش حضرتك اصلى بدلت الشنط الصبح اكيد نسيتها فى الشنطة التانيه(اى اللى انا بلبخه ده!

فضل ببصلى شوية  وراح مبتسم.....

طيب اسمك بالكامل ......مليته الاسم

ماقولك فيما هو منسوب اليكى انتى وزميلتك ؟

يافندم اللى حصل ..... وقعدت اشرح بقى باستفاضة

حاولت اقرا تعابير وشه انه فاهم او انه مقدر او حتى انه مش مصدق مافيش ولا الهوا

امضى على اقوالك .....مضيت

اتصلى بقى باى حد يمليكى رقم البطاقة.....

اتصل بالبيت وطبعا متخييلين ...ماحدش رد

بصتله فى يأس كده وقولتله انا حافظة رقم البطاقة الورق القديمة تنفع؟

قالى ماشى ماشى اى حاجة رحت مملياه للكاتب وخرجت جرى وسماعه بيقولى ابعتيلى زميلتك

دخلت اميرة قعدت بالظبط 4 دقايق وخرجت!

اى اللى حصل اشمعنى انا اتاخرت جوا؟

قالتلى قرالى اقوالك وقالى موافقه عليها؟قلتله اه ومضيت ...

انتى ازاى تنسى بطاقتك يا مجنونة انت؟!

ايه ده هو سيحلى ولا ايه؟

اه كانوا بيضحكوا جوا ساعه مادخلت على الموضوع ده

يادى الفضايح.........

مر بعدها اسبوع وعرفنا ان التحقيق اتحفظ  واسقطوا من علينا تهم اهدار المال العام!

وده كان فى شهر ديسمبر فى مثل هذا الوقت يعنى.....من اول سنة تكليف حكومى لينا!

يومياتى9

اللى مش فاكر كنا بنحكى فى ايه يدخل

هنا 

بعد اخر موقف زى ماقولتلكوا  كلنا جالنا حالة اكتئاب كده وزهق من الشغل وخوف من اللى قدامك ليضربك اذ فجأة وانت مش عامل حسابك

وبدأت نغمة الرغبة فى اخذ اجازة من العمل الحكومى لاننا مش جيلنا من وراه الا وجع القلب وقله القيمة وكان فينا المشجع ليها والمعترض وكنت انا من المعترضين بلا فخر من باب انه لاتراجع ولا استسلام يعنى........وقد اثبتت الايام  انى كنت طيبة ......لدرجة السذاجة

فى يوم من ذات الايام  لقينا المدير الادارى والمالى بتاعنا بينده لينا علشان نستملم شيكات مكفئات طبعا كلنا زقططنا فلوس بقى....

وبعد ما هدينا من الفرحة دى اللمبة اللى فى دماغنا نورت فجأة ......هى الفلوس دى بتاعة ايه

رحنا راجعين للراجل نسأله  واخدنا حتة رد بقى عمركوا ماهتتخيلوه :)

فاكرين لما شرحتلكم المرة اللى فاتت ازاى كنا بنحسب فلوس تذكرة العلاج وازاى الحسبة اتغيرت لما بدأنا نحسب بسعر السوق؟

فيه فرق سعر يعملوا فيه ايييييييه .........يوزعوه على العاملين فى المستشفى!!!

وطبعا اتقسمت بمزاجهم وادوا الصيادلة زى التمريض  واخد الاطباء الهبرة الكبيره 

متخييلين بقى انتم باقى الاحداث ..الصيادله اعترضوا  وههدوا انهم هيشتكوا واعادوا توزيع التركة  وعدت الحكاية

بس شالها فى نفسيته الاخ المبجل مدير المستشفى.......

فى يوم دخل الصيدليه وقالنا يا جماعة بخاخة الازمة مش متوفرة ليه الناس بتشتكى فقلناله احنا طلبناها بس لسه ماتوردتش وفعلا كنا عملنا بيها كذا امر توريد وفى يوم لقينا  كل اوامر التوريد واستعجالتها اتنفذت فى يوم واحد فبقى عندنا كميه كبيرة منها

حمدنا ربنا والناس فرحت لانها كانت ناقصة فعلا وقتها فى السوق الخارجى

وبدأنا نصرف منها واذا فجأة لقينا باب الصيدليه بيخبط وواقف برا راجل مانعرفوش

مين حضرتك؟   انا من الشؤن القانونية!

ايوة يعنى خير حضرتك؟ مدير المستشفى مقدم فيكم شكوى انكم موفرين بخاخات للازمة رغم انكم مش مستشفى صدر !!!!!!

نعم ؟ماهو اللى طاالب ده ثم المريض هنا عنده كل الامراض ومنها الازمة اى المشكله يعنى ؟

لا يجماعة ده اهدار للمال العام ولو عاوزين الموضوع يتلم روحوا للمدير

رحنا للبيه .....مش حضرتك اللى قلت كذا  

انا؟معاكم امر كتابى بده؟ ماعتقدش 

بس عموما يا جماعه دى كانت قرصة ودن بس  وانتم زى اولادى وهنلم الموضوع اتطمنوا

خرجنا واحنا 100 فار بيلعب فى حجرنا الراجل ده بيدبرلنا مصيبة 

عدى تقريبا شهر والحكاية نامت ونسيناها

لحد ما لقيت فى يوم انا واميرة صحبتى اياها استدعاء جيلنا احنا الاتنين من النيابة الاداريه للمثول امام وكيل النيابة الساعة كذا يوم كذا.............

                                               يتبع

 

انا ايضا اتألم....

جلست كعادتها فى نفس الكافية الذى ترتاده يوميا فى فترة البريك من عملها

 جلست تتامل وهى تقلب فى فنجان الشاى وتنظر للدوامة الناتجة.......

اليوم بالتاكيد مختلف بالنسبة لها .......

اليوم هو ذكرى ميلادها ...

الثلاثون....

اليوم فقط اتمت ثلاثين عاما ...

ولم تتزوج......

نظرت بشكل لا ارادى فى اصبعها تبحث عن خاتم الزواج..

عن ذلك الحلم الذى طالما حلمت به ..

عن ذلك الفارس الذى طالما حاولت ان تتخيل ملامحه..

كم حاولت ذلك حتى يأست وكفت عن المحاولة......

لا يوجد خاتم..

خبأت يدها وكأنها  تداريها عن اعين الناس حتى لا ترى بهم نفس الاتهام الذى اعتادت عليه..

كيف وصلتى لهذه السن بلا زواج؟؟؟؟؟؟؟؟

وكأن العالم من حولها محاط بما تريد وهى التى تترفع عنه

كم تعبت من الشرح.....

كم التزمت الصمت...

كم تحملت الامها وحدها محاولة اخفائها...

فهم لايعلمون انها ايضا تتألم...

هى ايضا تنظر الى مستقبلها بنظرة خوف...

تخاف ان يمر عمرها ولا تجد به شريك ......

تخاف ان تظل هكذا وحيدة فى نظرها وبلا فائدة فى نظرهم..

هى ايضا تتألم من الهمسات..من نظرات الشفقة..

تتألم من التساؤلات..من تدبير المواقف المحرجة..

تتألم من نبرات الحزن المصاحبة لدعواتهم ..وكأنها فى كارثة

تتردد فى اذانها كلمات امها وكم تتمنى ان تراها عروس وان تفرح باولادها قبل مماتها

وكانها فى يدها ان تمنحها تلك الفرحة وتبخل عليها بها.....

يا ليتهم يعلمون انها ايضا تتألم

هى ايضا اتعبها ذلك المقعد الفارغ بداخلها..

بلادى حرة......

مصر انتى اغلى درة

فوق جبين الدهر غرة

يا بلادى عيشى حرة

واسلمى كيد الاعادى

مصر اولادك الكرام

اوفياء يرعوا الزمام

سوف نحظى بالمرام

باتحادهم واتحادى

بلادى بلادى بلادى

لكى حبى وفؤادى

*************************

اول مرة احس كلمات النشيد ده من جوه قلبى يابلادى...........

طعم الفراق

اد ايه حلمت اكون معاك فى كل لحظة

 اد ايه حلمت ابنى بيت صغير يجمعنى بيك

اد ايه حلمت يكون عندى  ابن منك يشبهك

اد ايه اتوجعت لما لقيت دى احلامى انا بس!!!!!!

***************************

لسه مكانك زى ماهو

مش قادرة املاه بحد غيرك

مش عارفة كلهم صغيرين اوى كده

ولا انا اللى كنت مدياك مساحة اكبر من اللازم!!!!!!

*************************

اتعودنا نحكى...

اتعودنا نضحك...

اتعودنا نعمل حاجات كتير مع بعض..

وفجأة بقى كل ده ماضى ولا كأنه اتوجد....

تفتكر ده كان موجود اصلا!!!!!

****************************

اتعودت من بعد فراقنا اللى عارفة ان سببه الظروف

انى اكتبلك جواب واحتفظ بيه عندى

كل يوم اكتبلك انا حاسة بايه

لاحظت مع الوقت ان الكلام بيقل

لحد ماجه اليوم اللى مابقتش لاقيه كلام اكتبه!!!!!

*************************

ماتخيلتش ابدا ان كل اللى هيفضل مننا

البوم صور!!!!!!

******************

دورت كتير على سبب لفراقنا ده

ديما كنت بلاقى سبب يخلى صورتك فى عنيا حلوة

يعدى يومين وافوق وارجع ادور على سبب تانى

لحد ما وصلت لاجابة اقنعتنى جدا ومادورتش بعدها

كل الحكاية ان ماكنش ليا محل من الاعراب فى حياتك

هو ده السبب......

يارتنى مادورت!!!!!!!!

مرجيحة

وياه لما الحنين بياخدنا

لمرجيحة بتحضنا......

وياااه وبتعلى فوق سور بيتنا

تاخدنا لفوق وبتسعنا.....

نلاقى الطفل جوانا

عنيه بالفرحة مليانة....

وضحكة مش مفارقانا

فى بشرة خير لايامنا.....

وياااه لما الحنين بياخدنا

لمرجيحة بتحضنا......

ياريت ترجع ليالينا

تاخد من تانى ايادينا ......

تجمعنا

تخلينا نشوف من تانى قدمنا........

واااااااه

لما السنين بتعدى

وتسرق منا احلامنا......

ويااااه لما الحنين بياخدنا

لمرجيحة بتحضنا.....

ويااه وبتحلى بيها دنيتنا

تاخدنا لفوق وبتساعنا...

تلملمنا صديق وصديق

ترجع حلم قلب برئ...

تقول غنوة تبل الريق

وترجع بيها احلامنا...

واااه لما السنين بتعدى

وتسرق منا احلامنا....

واااه دى بتجرى ماتهدى

تضيع ملامحنا وكلامنا.........