شعور غريب ان يبقى فيه حتة منك بين اديك وتلاقى فيها جزء من ملامحك .. بفرح اوى ياعمر لما حد يقولى انك شبهى .. وبفرح اوى لما حد يقول انك شبه ابوك .. حلو الكوكتيل ده 😄 بتنام انت زى باباك وبتضحك زى جدتك واخد عنين ابوك وشفايف امك .. حلو اما يبقى ملامحك من ملامح كل اللى بحبهم❤
شفت اعلان قريب لحازم امام مع بناته وموضح ازاى بيعملوا حركاته بالظبط .. الاعلان ده عبقرى ياعمر وكل ما اشوفه ابصلك وابتسم .. لما تكبر ابقى شوفه
من صغرى انا واختى اتربينا على اننا نحافظ على الحاجة الجديدة مانبهدلهاش .. لو شنطة جديدة او فستان جديد نخليهم للمناسبات ونلعب بالقديم لو جزمة جديدة نخرج فيها فى المشاوير الرسمية ونلعب بالقديم طالما حالته كويس طبعا وكأسرة متوسطة كان ده مناسب لأن الجديد كان بيجى فى العيدين وعلى الدراسة فكان عندنا جديد ديما .. طريقة مصرية صميمة متبعة فى معظم البيوت للتوفير .. بس لما كبرت حسيت ان الطريقة دى غلط .. اصلها علمتنا نأجل السعادة لحد ماتيجى مناسبة .. أجل فرحتى بالحاجة لحد مايجى وقت مناسب .. طب فرضا ان الفستان ضاق او موضته راحت هنعمل ايه؟!
من فترة صاحبتى جت تطلع شنطة كانت عيناها لمناسبة وماخرجتش بيها الا مرة لقت جلدها داب لوحدة من التخزين ! مش لو كانت خرجت بيها فى اي مكان كان زمانها فرحت بيها!
من فترة برده جيت البس جزمة جديدة وعيناها لخروجة لقتها لسة جلدها جامد ووجعتنى فى خروجتى وكرهت الخروجة والجزمة الجديدة ونفسى يومها !
انا مش هأجل فرحتى للوقت المناسب تانى .. ماحدش عارف هيبقى مناسب وقتها ولا هعرف افرح وقتها ولا لأ .. ماحدش عارف هكون انا شخصيا وقتها موجودة علشان افرح ولا لأ
ضحكتك جميلة يا عمر ماشاء الله .. ضحكة غريبة احترت كتيير فى وصفها لحد لما جدتك شافتها ولقتها بتقولك "ضحكتك هنا ياعمر"" .. صح هو ده أحسن وصف ضحكتك هنا بتفرح القلب كدة وبتخلى التعب يهون
ديما كانت امى تقولى العشر سنين اللى مابين عمر العشرين والتلاتين بتعدى هوا ،مابنحسش بيها .. ماكنتش بركز اوى فى الجملة
بعدها قالتهالى اخت واحدة صاحبتى اكبر مننا نفس العبارة تقريبا .. لما كسرت التلاتين فهمت !
هم صحيح عدوا امتى ال10 سنين دول .. عدوا فى ايه وايه اللى عملته فيهم .. ازاى ماحستش بيهم كده .. جايز لأنى ماحققتش فيهم تغيير فى حياتى ،فضلت زى مانا فيهم تقريبا اخسر ناس كتير من اصحاب ثانوى وجامعة لأى سبب كان حتى ولو كان السبب هو ان مافيش وقت نسأل حتى على بعض وقصاد كده ماكسبتش ناس كتير بسبب ظروف شغلى .. ماحققتش فيهم اى حلم تقريبا حتى ماكنتش بقرأ فيهم كتير زى دلوقتى .. يمكن كل اللى زاد عليا انى اشتغلت كتير فيهم كتير جدا لدرجة انى متأكدة ان الشغل ده هو اللى سرق ال10 سنين دول .. والكوميديا بقى انى ماطلعتش منهم بفلوس كتير مثلا احس معاهم انى انجزت .. لا.. كان اللى جاى على اد اللى رايح ماكنتش بحرم نفسى ولا اللى حوليا من حاجة محتاجنها جايز دى الميزة..
الشغل دى هو اللى سرق الوقت الاخير اللى كان لازم أقعده مع بابا الله يرحمه، لكن ده موضوع تانى محتاج فضفضة تانية
ولأن الوقت اتسرق كده بشكل محبط مش حاسة بقى انى فى التلاتينات خالص .. عايش فى العشرينات لسه ومش حسانى كبرت .. اصل الواحد بيكبر فى رأي باللى عمله واللى عاشه وبكده يبقى انا لسه يدوبك بنت 23 سنة
هكبر امتى وهحقق الحاجات المجنونة امتى مش عارفة
قدام الكل انا كبرت بس انا حسانى لسه صغيرة البس البنطلون الجينز والتيشرت واجرى واتنطط ..
مش عارفة دى ميزة ولا عيب لكن جوايا زعل على ال10 سنين اللى فاتوا وخوف على اللى جاى حتى ولو يوم
عاوزة اعيش بقى ومش عارفة ابدأ منين !
ماكنتش اعرف ان البكرية اللبن الطبيعى عندها بيبقى ضعيف وخاصة لو والدة قيصرى وقبل معادها.. ماحدش قال!
لما كنت بتعيط ياعمر ومش عندى لبن طبيعى كنت بحس انى مقصرة اوى بحس انى أم خايبة .. الكل كان بيهدينا واننا هنجيب لبن صناعى .. ماكنوش حاسيين باللى جوايا .. احساس وحش ياعمر
احساس غريب ياعمر .. اول ماشفتك وانت مغمض عنيك وضمام اديك تحت دقنك ومنكمش كده احساس غريب اوى ... انت بقى اللى كنت جوايا كل ده .. كنت دايخة جدا بسبب انسحاب البنج منى لكن فاكرة ملامحك وريحتك لما ابوك قربك منى .. بداية الالم كانت رهيبة بس كان نفسى اشيلك بقى .. طول مانا شايفة كل اللى حواليا شيلينك طول مانا حاسة انك بقيت واقع و انى مابحلمش
