الصدفة الجبرية خلتنى اشوف جزء من حلقة وائل الابراشى امبارح.. هتقولى ليه جبرية؟! هقولك لان برنامج العاشرة مساء ده شئ مقدس فى بيتنا !!! ماعلينا
كان مستضيف الفنانة شمس(الكويتية).. هتسألنى بردو ليه حطيتى كويتية بين قوسين هقولك لانها تنازلت عن جنسيتها الكويتية بسبب انها تطالب بحريتها انها تقول اللى هى عوزاه وده ماعجبش السلطات هناك..!
وراحت السعودية.. اللى منحوها الجنسية السعودية ولكنهم حاربوها وسحبوها منها او هى تنازلت عنها ماعرفش.. المهم لانها بردوا اتكلمت فى مجال الحريات للمرأة وانها من حقها تسوق السيارة وزى ماهو معروف ده من الكبائر هناك.. المهم الست حاليا تحمل جنسية بريطانية على ما اتذكر.. وقالت ان البلد اللى تعطينى حريتى امارس حياتى كما احب طالما لا اؤذى احد فهى بلدى..
قالها وائل طيب انتى مادفعتيش عن حقك فى وطنك ليه جايز تاخدى حقوقك والدنيا تتغير اديكى شايفة مافيش حاجة بتدوم..
قالتله الاتى
اولا: انت بتقارن مصر بالدول الخليجية؟! دى مقارنة غير عادلة.. انتم هنا عندكم قاعدة حضاريه ممكن تتأملوا بسببها فى تغيير ما قادم..
عندكم حضارة تقدر تستوعب التغيير ولما تثور فيها ممكن تلاقى نتيجة.. انما احنا فى الخليج مجتمع بدوى لا حضارة له وانما مجتمع تمدن بسبب البترول!!
وبالتالى عاداته وتقاليده تعتبرها جزء من دينه
ثانيا: انا ليه احارب واستنى اولادى اللى يعيشوا فى نتيجة التغيير طيب وانا؟! امتى اعيش!!
وائل قالها انتى على كده بتحبى مصر اوى :)
قالت انتم بلد عظيم يا استاذ وائل .. كفاية انك هنا ممكن تعيش سواء معاك 10 جنية أو 1000 جنية فى كلا الحالتين مش هتبات جعان..
ثم انتم بلد مرت عليها مصايب كتييير انتم اكتر بلد اتسرقت واتنهبت ومع ذلك لحد النهاردة بتعافر ولسه ما اعلنتش المجاعة ولا اعلنت الفقر..
لسه واقفة ..!!
***************
مش عارفة انا فضلت اسمع حوارها ومش عارفة اعلق.. كل رد فعلى انى ابتسمت
ابتسمت ابتسامة مريرة ساخرة
ولقتنى بدندن اللحن الشهير
فيها حاجة .....
كمل انت بقى لو تعرف
هناك 5 تعليقات:
جميل البوست ده يا دكتورة .. حقيقي جميل .. وتستحقي نشكر حضرتك عليه
:)
والله يا جدعان مصر حلوة .. حلوة قوي قوي والله .. السنة دي (2015) قررت ألف مصر .. قلت لو ما لفيتهاش وشفتها دلوقت هاشوفها إمتى؟؟ .. وبالفعل .. لفيت فيها كتير قوي .. من إسكندرية للسد العالي لبورسعيد والمطرية والمنصورة والمنوفية والغربية والمحلة والإسماعيلية والفيوم وبني سويف وسوهاج وبلاد تانية كتير عديت عليها في النص (ساعات لما كانت الظروف بتسمح كنت باخد المدام والولاد معايا يشوفوا بلدهم) .. مش عاوز أقول لحضرتك على كمية الجمال الرباني اللي الواحد شافها .. مش أماكن بس .. لأ ناس كمان .. المصريين صدقيني والله في منتهى الطيبة والجدعنة اللي خلقها ربنا .. أه في سلوكيات وحشة كتير وفيه جهل وفقر أكتر وأكتر .. بس صدقيني حضرتك والله ما أعتقدش أنك هتلاقي شهامة وجدعنة زي هنا .. عرفت ناس كتيرة من محافظات مختلفة؛ شفت لهجات وطباع وعادات وطرق حياة مختلفة .. بس في الآخر هتلاقي نفس النخوة والجدعنة وخفة الدم والسخرية م الواقع والعيشة أشياء أساسية مشتركة بينهم كلهم .. مجرد ما واحد بس يرتاح لك ويتطمن لك تلاقيه فتح معاكي في الكلام وكأنك تعرفيه من زمن .. فيه ناس كتيرة كانت معرفتي بيهم غالباً في قطر أو على قهوة .. ورغم كده بنتصل نسأل على بعض من وقت للتاني ولما بينزلوا القاهرة بنتقابل .. تحسي كده أن بقى فيه ما بيننا عشرة :)
آسف جداً ع الإطالة .. خالص تقديري واحترامي
فيها حاجات حلوة
وطبعا كلامها يعتبر شهادة حق للاسف بعض المصريين أنفسهم لا يعترفوا بيها
لانه مستنى البلد تقولة ابقى إنسان غصب عنك
أنا بعتبر كل إنسان بيحب مصر فهو مصرى حتى وإن لم يحمل جنسيتها لأن الجنسية لا تتعدى كونها وضع قانونى فقط وليس كل من يحمل جنسية دولة يحبها
وكفاية إن ناس كتير فاهمه ايه هى مصر
تحياتى وتقديرى
P A S H A
ببقى مقتنعة بوجهة النظر دى اجى اروح شغلى واتعامل مع الموظفين ومع طريقة الشغل اللى تجيب لورا عمرها ماتبنى بالعكس تهدم بلد قوية اقتصاديا فما بالك بوضعنا تحس انك جيبت اخرك
خد غير كده تكسير المقاديف واهدار الطاقة ومافيش نتيجة تلاقيها ملموسة فى حياتك وتيجى تحسبها تلاقيك لسه مانجزتش حاجة تتخنق اكتر
Gamal Abu El-ezz
هى فيها حاجات حلوة بس متغطية بحاجات بشعة.. تراكمات سنين خلت الناس تنابلة وذنوب اجيال بيشيلها جيلنا والله اعلم هنشيلها لكام جيل ورانا.. والتغيير بقى من اللى بشوفه ماعرفش هيجى سنة كام الحقيقة
استاذه
خدوا الحكمه
هو صح مصر حلوه وجميله وكل حاجه حلوه فيها بس احنا محتاجين بقى شويه ضمير علشان نبقى احلى بكتير
إرسال تعليق