السبت، 21 سبتمبر 2013

3 سنين !








بعد فترة خمول كبيرة وقبلها فترات خمول اكبر قررت اذ فجأة انى اكتب كل يوم تدوينة(اذا قدرت) جايز علشان حسيت انى محتاجة اكتب وجايز لانى وحشنى التدوين وجايز بردو علشان استعيد نشاط دعوة التدوين اليومى اللى كانت من سنتين  واللى كنت فيها فى قمة النشاط فلك ان تتخيل انك تكتب كل يوم تدوينة ولمدة شهر ومش اى شهر ده على ما اتذكر كان شهر رمضان! وما ادراك ما انشغالة شهر رمضان..

كانت ايام حلوة وحاسة انى محتاجة الحماس ده رغم انه كان ايامها احلى .. احلى بالناس اللى شاركو فيه والله معظمهم بقوا اصحابى وكتير منهم ماشاء الله بقوا كتاب وليهم  كتب حاملة افكارهم واساميهم.. يعنى تقدروا تقولوا عليا مصاحبة ادباء :)

كانت احلى كمان لانها كانت بطعم البدايات.. البدايات فى كل شئ.. من اول الكتابة اللى كانت بالنسبالة لى  خطوة رهيبة ماكنتش متخيلة انى هقدر عليها فما بالك بالالتزام لمدة شهر 30 يوم ب 30 تدوينة الى حد ما مختلفين  وكل واحدة منهم بمشاعر مختلفة ..وحلاوة انك تشارك غيرك كمان بافكارك وفى افكارهم.. كلنا كنا بنتابع بعض وبندى اراء فى كلام بعض البسيط منه قبل  العميق

المهم..

انا حبيت استرجع  شوية من الروح الحلوة دى .. وبقالى كام يوم اهو مواظبة ويارب اقدر اكمل وبشكر جدا كل اللى مهتم وبيتابع رغم انى مش بقدم يعنى الا حاجات بسيطة  من وجهة نظرى فضفضة .. 

جيت بقى اكتب تدوينة النهاردة اللى كانت عن السعادة ! لقتنى عينى كده رايحة على التاريخ

ايه ده! احنا فى سبنمبر؟! وكمان 21 منه؟!
من 3 سنين بالظبط اتعملت المدونة دى..
يعنى مدوونتى العزيزة (جفلت) 3 سنين..
3 سنين وانا بكتب فيها  يومياتى وارائى و احاسيس  مريت بيها او مر بيها ناس قريبين منى

3 سنين متابعة لناس وهم متابعين ليا 

3 سنين... فترة بردة غيرت فيا كتير واضافت ليا كتير كتير كتير
 3 سنين اقدر اقول بكل فخر ان مدونتى دى كانت من اهم احداثها ومن اقربها لقلبى
بلف بلف وبرجع ليها تانى .. بحسها الركن بتاعى .. وان اللى بيتابعنى او بيتكرم فيها ولو بتعليق صغير  .. كانه بيزورنى فى بيتى وجاي واديه مش فاضية :)

وللعلم احساسى بيها ده  ماكبرش الا باللى شجعونى اكملها واللى ديما بيشجعنى اكتب لو لقانى  ركنت
هم عارفين نفسهم واحد واحد طبعا بس احب بردو انور بيهم البوست ده  من باب  العرفان بالجميل  
وهبتدى طبعا بعروستنا الجميلة سهاد وصديقتى الجميلة جدا والمبدعة جدا جدا دعاء العطار وطبعا خالد سواح فى ملك الله واستاذنا ابو زياد :) وتامر المغازى
واخويا وصاحب لقب اكبر متابع واكبر المشجعين محمود 
 فيى غيرهم طبعا كتير  بس يمكن دول  نقدر نسميهم رفاق الدرب لو جاز التعبير :)

الناس دى انا برغى بقالى 3 سنين وهم متابعنى  تقريبا طول الفترة دى .. ياصبركم.. ربنا معاكم الحقيقة :D

بجد..
 
شكرا لانكم هنا  


هناك 18 تعليقًا:

سواح في ملك اللــــــــــــــــــه- يقول...

مساء الفل يانور المدونات الرقيقة

انا اتبسطت جدا اني الاقي اسمي في

قائمة متابعينك

مدونتك يانور من المدونات اللي لما

بمر عليها بحس ان فيها طفلة بؤيئة

وشقية تفضل تتنطط حوالينا بالكلمات

فتسعدنا بضحكاتها وتؤلمنا لآيلامها

ربنا يحفظك يانور الطيبة البنوتة

الطيبة الرائعة

النسر المهاجر يقول...

كل سنة والمدونة وصحبتها بخير وسعادة
وجميل اننا مع كل فتره نحس اانا بنبتدى من جديد
وعالم التدوين له خصوصية عن ى حاجه تانيه على النت لان مش اى حد بيدخل العالم ده او بيتابعه
المهم ان الى يفتح نهر فى عالم التدوين يجب عليه ان يحافظ على جراينه وعدم نضوبه

اتمنى من الله لكى التوفيق والسداد

حَنيّـن نِضال يقول...

كل سنة و المدونة وصاحبتها بالف ترليون خير و تالق .. مدونتك بجد من المدونات الي بستمتع فيها بكل اختلاف المشاعر الي في التدوينات و بحبها جدا .. بالتوفيق دايما

Unknown يقول...

وهنفضل هنا حتى النهاية إذا لم تقومى بطردنا لا قدر الله

نهر الحب يقول...

يعني بجد مش عارفة اقول ايه انا اسمي مكتوب واول اسم كمان
:)

انا بقي حاسة اني مقصرة معاكي ومع ناس كتير اليومين دول عشان ظروف كتير

بس والله وبصراحة جدا اول حاجة بعملها لما بدخل ع النت وانا ع اللاب اقول اشوف نور كتبت ايه وتامر مغازي برضه

وكتير بقرأ والوقت مش بيساعدني اني حتي اعلق
بس عارفة انكوا بتعزروني ديما

كان عيد ميلاد مدونتي في اغسطس يبقي بقالها 7 سنين ومعرفتش احتفل بيها بس كدة انا احتفلت معاكي النهاردة
:)

غير معرف يقول...

كل سنة وانتى طيبة انتى والمدونة اللى احلى واخف دم تحسى كدا هى اساسا موجودة عشان الوواحد يدخل يقرا احلى واجمل مدونة ليخفف عن نفسة و يحس انة بيتكلم كتير عن حالنا كلنا استمرى واحنا معاكى

ابراهيم رزق يقول...

ايه ده يا نور
كل سنة و مدونتك طيبة

كل سنة و انتى طيبة

بصى يا نوووووووووووووور
صلى على النبى
زيدى النبى صلاه

انا مش بتابع اى مدونة غير لو شعرت بالصدق فيها
و مش بالصدق بس بالدفاه كمان
كل سنة و انتى حالمة
كل سنة وانتى بتحولى احلامك لحقيقة
و تحلمى احلام جديدة و تحقيها
و بعد ما تحققيها تحلمى احلام جديدة
و بعد ما تحققيها تحلمى احلام جديدة
و بعد ما تحققيها تحلمى احلام جديدة
و بعد ما تحققيها تحلمى احلام جديدة
و بعد ما تحققيها تحلمى احلام جديدة
و بعد ما تحققيها تحلمى احلام جديدة
و بعد ما تحققيها تحلمى احلام جديدة
و بعد ما تحققيها تحلمى احلام جديدة
و طبعا الحلم الكبير اللى بالى بقالك

ايه ده اسمى مكتوب طيب

تحياتى

P A S H A يقول...

كل سنة وانتي ومدونتك الجميلة طيبين وبخير
:)

reemaas يقول...

سواح في ملك اللــــــــــــــــــه-

تسلم يا خالد واكيد هيبقى اسمك فيها ده طبيعى ولو كنت عملت الكتاب بردو كان هيبقى اسمك فيه :)

reemaas يقول...

Gamal Abu El-ezz

مرسى جدا على التشجيع وعلى متابعتك وان شاء الله تدوم :)

reemaas يقول...

حَنيّـن نِضال

ربنا يخليكى يا حنين يارب دوم :)

reemaas يقول...

mahmoud khalaf

ههههههههههههههه لا تقلق

reemaas يقول...

نهر الحب

كل سنة وانتى طيوووووووبة ولا تقصير ولا حاجة انا مقدرة

reemaas يقول...

غير معرف

تسلم متشكرة اوى واتمنى تقدر تعمل حساب على حوجل علشان اقدر اشكرك بجد بدل غير معروف دى :)

reemaas يقول...

ابراهيم رزق

هههههه اللهم صلى وسلم وبارك على سيدنا محمد
تسلم يا ابو زياد ويارب يارب كل ده يتحقق

reemaas يقول...

P A S H A

تسلم يا باشا :)

zeze يقول...

كل مدونة وانتي طيبة يا نور يا حبيبتي انتي تستاهلي كل خير علي فكرة ويارب دايما منورة بلوجر يا جميلة

reemaas يقول...

zeze

تسلمى يا زيزى ربنا يكرمك حبيبتى