الجمعة، 23 أغسطس، 2013

مع نفسى 22










عن فستانى وانا صغيرة واللى لسه امى محتفظة بيه لحد النهاردة وكل ماتشوفه وتبصلى وانا كبيرة كده وتبتسم

عن البوم صورى وانا صغيرة ..اللى فيه صورتين حبانى فيهم اوى صورة وانا بعيط علشان خايفة من الراجل اللى بيصورنى واللى بيعمل قرد علشان يضحكنى والصورة تطلع حلوة.. وصورة وانا مع بابا فى سبوع اختى..( كنت طفلة حلوة على فكرة)

عن البوم صور الجامعة واللى فيه اجمل شلة اصحاب ماعرفش عن كتير منهم دلوقتى حاجة 

عن الشاليموه اللى مربوطة فى بعضها واللى محتفظة بيها من ايام الجامعة وماحدش عارف انها بتاعة مى صاحبتى اللى كانت عندها هواية عمل اشكال من الشليموهات لحد ماسميناها مى شاليمو

عن اخر يوم امتحانات فى الكلية والبلطو اللى خليت كل اصحابى يمضولى عليه ويكتبولى عليه كلام للذكرى  :) 

عن حفلة التخرج والكعب اللى كانت هيتكسر وانا بستلم شهادة التخرج

عن الميدالية اللى فقدت بريقها ولسه محتفظة بيها  وكانت اول هدية عيد ميلاد من اصحابى

عن دوشة .. الدبدوب الجميل الكبير اللى استنيت حد يهدينى بيه ولما ماحدش عملها اشتريته من اول  مرتب ليا وبقى صديقى الصدوق  وكاتم اسرارى

عن اول يوم شغل ليا فى صيدلية او اول يوم شغل ليا فى المستشفى الحكومى

عن اول عريس اتقدملى ولبختى يومها ..

عن ناس كنت فاكرة انى نسيتهم للابد وتيجى حاجة تفكرنى بيهم 

عن ناس كتير كل ما افتكرهم ابتسم واقول ايييييييييه كانت ايام

عن ناس كل مافتكرهم ادمع واسكت

عن حاجات كنت فاكرة انى هعملها وماعملتش منها اى حاجة

عن كتاب اقرر انى اقراه مرة تانية والاقينى كاتبة على الهامش بتاعة اى حاجة وتعجبنى واحاول افتكر انا كتبتها ليه..

عن اجندة الاهداءات اللى لقتها فجأة وانا برتب الكومدينو بتاعى ولقيت فيها كلمات من اصحاب وزمايل ومدرسين ليا من ايام ثانوى

عن رسالة على موبايلى حلوة  ومر عليها سنين ومش عاوزة امسحها

عن ارقام على موبايلى الاقيها وانا بدور وافتكر اصحابها اللى ماتكلمناش من سنين

عن قصص حب لاصحابى كنت طرف فيها ومعظمها باظ..

عن سنين كتير بتعدى وسيبالى ذكريات 


هناك 21 تعليقًا:

mahmoud khalaf يقول...

بغض النظر عن ان التدوينة روعة بس أنا كنت عارف موضوع الشاليمو

Gamal Abu El-ezz يقول...

الذكريات تستحق أكثر من ذلك فكل زكى ما هى الا وردة جميلة فى حديقة العمر فكلما اهتمينا بها ظلت ورده نضرة وجميلة

Menna A يقول...

ازيك !! بس حبيت اعرف ازاي اتواصل معاكي ؟؟

reemaas يقول...

mahmoud khalaf

ههههههههههههه مانا عارفة انك عارف :)

reemaas يقول...

Gamal Abu El-ezz
ده صحيح

reemaas يقول...
أزال المؤلف هذا التعليق.
reemaas يقول...

Menna A

منورانى يا منة يعنى فى الغالب هنا او ممكن تويتر

ابراهيم رزق يقول...

هىىىىىىىىىىىىىىىى دى تنهيدة

هو العمر ايه يا نووووووووووووووور
غير شوية حاجات زى دى جنب بعضيها

تحياتى

doaa elattar يقول...

كالعادة يانور كلامك "من القلب للقلب على طول" :)

حلو طعم البوست جدًا .. مليان دفا ^ـــــ^

نهر الحب يقول...

حححححححححححححح
اه ياني ياني تعبت انا
بقالي كتير مجتش هنا غصب عني عشان من الموبيل

"أهي ذكريات"

كل حياتنا كدة ذكريات حلوة
هي اللي بتعيشنا

جارة القمر يقول...

رائعة


الحياة عبارة عن البوم ذكريات

amiraali يقول...

واهي ذكرياااات :(

Timo.. يقول...

عن اول تدوينة كتبتيها..
عن اول تعليق قريتيه..
عن..
عن..

وحشني وجودي هنا فوق ما تتخيلي :)

Nelly Aly يقول...

هقولك أني فرحتني..عملت جوايا حالة من الفرحة كبيرة..استمتعت بكل دكري وحنيت ليها معكي!!


نيللي علي
مدونة عطر الأحباب

reemaas يقول...

ابراهيم رزق

ربنا يديلك طولة اعمر يا عمنا

reemaas يقول...

doaa elattar

ديما اصلا نصفانى كدهون

reemaas يقول...

نهر الحب

عروستنا الحلوة عذرك معاكى حبيبتى ربنا يفرح قلبك يارب

reemaas يقول...

جارة القمر

تسلميلى :)

reemaas يقول...

amiraali

):(

reemaas يقول...

Timo..

وحشنى تعليقاتك ووجودك هنا فوق ما تتخيل :)

reemaas يقول...

Nelly Aly

تعليقك ده فتح نفسى والله ميرسى اوووووووى