السبت، 10 أغسطس 2013

مع نفسى ... 21








بقالى فترة كبيرة مش مبسوطة مش عارفة علشان الروتين ولا علشان حال البلد ولا علشان الاحلام الكتير اللى متكربسة ولا بيتحقق منها حاجة ولا علشان كل ده مع بعض..
المهم انى مش مبسوطة
وبصراحة انا زهقت من الحالة دى وعاوزة اخرج منها فقررت انى اعمل حاجة تفرحنى جايز افلح..
فكرت ..فكرت.. اعمل ايه
اوك ارتب افكارى الاول واكتب الحاجات اللى بتفرحنى  واهو تبقى مرجع لما اتزنق "وانا زنقاتى كتير" ممكن ارجعله وافكر نفسى
 1/ببقى مبسوطة لما اكل شيكولاتة.. دى اول حاجة جت فى دماغى الصراحة :)

2/ لما بقعد فى موكا  واشرب بوريو من عنده وحط كذا خط تحت من عنده دى  او اخد البتاع اللى مش عارفة اسمه ده واللى بيبقى فيه ايس كريم وطالع منع اربع انواع من الشيكولاته :) وعلى فكرة لما اجى اطلبه بقوله كده ههههه

3/ اقرأ حاجة لاحمد خالد توفيق الحقيقة الراجل كلامه بيظبطنى ويسلام بقى لو حاجة فيها رفعت اسماعيل :) ولو مخنوقة اوى يا حبذا لو حاجة انا قريتها قبل كده وضامنة مفعولها زى مثلا اسطورة البيت i love it :)

4/ اكتب تدوينة من تدوينات مع نفسى  ماعرفش بحس انى بفضفض فيها 

5/ انزل اشترى لبس .. وبما انى بتخنق كتير فبشترى لبس كتير .. الحكاية دى مبوظالى مزانيتى على الاخر بس مش مشكلة  المهم انى ببقى مبسوطة

6/ اشترى رواية جديدة وتكون حلوة 

7/ اشوف فيلم اجنبى حلو والحكاية مابتخرجش عن فيلمين يا اما Definitely may be or The Holiday او حاجة لحلمى 

8/ افتكر اى ذكريات حلوة بس الحل ده مش بعتمد عليه كتير لان فى الغالب بتقفل الذكرى دى بحاجة مش حلوة او حتى بتسلمنى لذكرى مش حلوة فيعتبر ده حل مش مضمون عواقبه اوى فبلاها احسن

9/ لو كل ده  بقى مافلحش او كان حل مؤقت فكده بعرف ان مافيش حل ..غير النوووووووووووووووووم
 

هناك 8 تعليقات:

موناليزا يقول...

تقريبا نتشابه كثيرا
1 الشوكلاتة ..واو يعني وخصوصا لو جلاكسي بندق

2-
(لا المكان ولا المشروب اللي كتبتيهم اعرفهم الصراحة :) )

3- أحمد خالد توفيق.. بيعملي دماغ جامدة جداً
ورفعت اسماعيل له عندي مكانة خاصة جدا

4- الكتابة عموما بالنسبة لي حياة

5- اممممم احساسي انه في كل مرة بشتري فيها أي حاجة حتى لو صغيرة بيتضحك عليا ده بيكرهني اشتري حاجة

6- اقتناء الكتب عموما بالنسبة لي متعة والروايات بصفة خاصة

7- الأفلام الأجنبي بتعملي حالة فوق الوصف وخصوصا لو لجوليا روبرتس

8- اممم الذكريات برضه زي المشتريات مشكوك في أمرها بالنسبة لي

9- النوم معناه بالنسبة لي إني خلاص دخلت في دور اكتئاب

reemaas يقول...

موناليزا

اه لو ابقى زيك فى موضوع انى اكره الشرا علشان بينضحك عليا دى يا مونى اعتقد كان زمانى بقيت من الاغنيا هههههههههههههههه

سواح في ملك اللــــــــــــــــــه- يقول...

نور البنوتة الطيبة البريئة الرائعة

كل سنة وانتي طيبة وبخير

اخبارك ايه

بوست رائع كعادتك

عديت اسلم

تحيتي لاطيب نور

SHARKawi يقول...

ربنا يسعد أيامك يارب .
ويبعد عنك اي ملل من بعيد أو من قريب .
كل اللي قولتية بيدل على قد اية انتي بسيطة وشقية . هادية كمان وعفوية .

حلو انك تكتبي اي حاجة تيجي في بالك باي طريقة واي وسيلة .
حلو كمان فكرة انك تكتبي الحاجات اللي بتبسطك وتسعدك .

تشكراتي . كامل احترامي وتقديري . دعواتي وتحياتي

جارة القمر يقول...

رائعة

حلو جدا انك تعرفي نفسك والمداخل بتاعتها وتعرفي ترضيها ازاي ربنا يسعدك

reemaas يقول...

سواح في ملك اللــــــــــــــــــه-

منورنى ديما ومفتقدة كلماتك جدا يا خالد

reemaas يقول...

SHARKawi

بحاول وسعيدة ان المحاولة عجبتك :)

reemaas يقول...

جارة القمر

حسااها طيبة اصلا وسهل تتراضى :)