بعيدا عن السياسة...

ساكتة انا ومابتكلمش عن مرسى ولا عن حكومته ومش راضية اتفتح فيهم واقول يابت مش طالبة نكد..يابت مش طالبة هبل..يابت يعنى هتبقى تسمعى تصريحاتهم وكمان هتردى عليها ؟! لا لا ده كتير..وكل ماسمع حاجة بالصدفة  ولا تحصل كارثة اقول منكم لله  ..

لحد من يومين كده كان عندى مشوار فى المنصورة صحيتله على 9 كده والاقيلكم خير الله ام اجعله خير المية مقطوعة..طب انا اخرج ازاى كده استناها..بقت 11 ولسة المية مقطوعة مابدهاش بقى امرى لله لبست وخرجت على الموقف مافيش عربيات ..نستنى عربية فين وفيييييين على ما جت واحدة السواق نزل منها ولا رئيس الجمهورية وبصوت جهورى الكراسى هنحملها اربعات يا استاذة اللى عاجبه يتفضل واللى مش عاجبه طريقه اخضر مش طالبة خنقة على الصبح!!

وطبعا مش عاوزة حد فيكم يتفزلك ويقولى كنتم خدوه للقسم ولا اشتكوه لبتاع الكارته بصفته مندوب مجلس المدينة فى الموقف لانى هرد عليه واقوله العسكرى كان واقف مع السواقين مظبطينه بشاى وفطار وكان سامع السواق اللى سابنا بعد ما اعلن تهديده وراح ادى المعلوم لبتاع الكارته! 

كان الحل يا نرجع بيوتنا وفى ستين داهية مصالحنا يا كل واحد فينا يظبط 3 ركاب وزنهم مايزيدش عن 65 كيلو علشان نعرف نقعد قاعده بنت ناس..

المهم..ركبنا بطريقة سحرية ماعرفش ازاى واتحركنا للمنصورة..وصلت للمكان اللى فيه مصلحتى بعد حوار مع سواقين التاكسى اللى بيحاولوا يقلدوا تكسيات القاهرة ويرفعوا اجرتهم وناسين انهم مش فى القاهرة اصلا..

وصلت ونزلت الاسانسير وضغطت على السادس  وهووووووووووب بين التالت والرابع النور قطع 

انا اصلا مابحبش الاسانسيرات وما مبحبش الاماكن المغلقة بتخنق فيها..كان معايا طنط كده تقريا معدية ال60 الست بدات تتوتر وانا مش ناقصة ..حاولت اهديها واقولها اكيد خمس دقايق وهيرجع احنا فى محافظة كبيرة اكيد مش هعملوا هنا الاستهبال اللى بيعملوه فى البلد..

قعدنا انا وطنط فى الارض بعد اول ربع ساعة ..لحد ماسمعنا البواب بيصرخ فى حد فى الاسانسييييييييييييير...رديت انا اه ياعم احنا هنا اهو اتنين اى الموضوع؟

 ماتخافيش يا ابلة النور معاه شوية ويجى اطمنى..

طييييييب..

عدى نص ساعة ..

الراجل طلع تانى :انتم كويسييييييييين

اه عايشييين

طب بقولك ايه يا ابلة معاكم مية  واكل؟

لا يا عم ماعملناش حسابنا 

طنط: بس يابنى كلم حد انا عندى ضغط وسكر ومعاييش ميية اخد حباية الضغط حرام عليكم

ساعتها افتكرت فيلم بين السما والارض وابتسمت

 فين وفييييييين بعد ساعة وربع لقينا الاسانسير اترج وراح طالع نزلنا فى الرابع وطنط مصرة انها هتروح علشان حاسة انها هتودع..

سلمت عليها وكانت فرصة سعيدة ! وطلعت على السادس موتورجل بقى

لقيت البنت بتاعة الاستقبال سألتها على اللى كنت ريحاله قالتلى ده لسه نازل مروح من ربع ساعة

يالهوى يعنى مش راجع تانى ؟!!

لا خلاص بقى الساعة بقت 2

ياسلااااام

قضيت كام حاجة وعلى 6 كنت رايحة الموقف علشان اركب تانى ..

اخدت الكرسى الامامى كله علشان اخد راحتى واحس ببقايا ادميتى بقى وهووووب راح النور فى الموقف قاطع..

العربية اتحركت وفضل النور قاطع طوووووووووول الطريق ..الموضوع كان فى الاول هدوء لكن بعد كده بقى مخيف  وسخيف..احنا فى انهى زمن علشان تعيش بلاد كاملة ساعة واكتر فى الضلمة كده؟

يارب نوصل على خير..يارب مافيش حد يطلع علينا يثبت العربية.. يارب العربيات اللى قدمنا تقلب نور بس مش تعمينا بيه

وصلت والنور لسه قاطع

طلعت الكشاف الصينى اللى اشتريته اخر الصيف اللى فات  وشغلته

وصلت بيتنا فى الضلمة 

لقيت ماما مستنيانى وخايفة حبيبتى انتى رجعتى كده ازاى

ربنا سترها يا ماما

انا كلمت بتوع الكهربا والله يابنتى  قالولى ده عمومى

قلتلها اه شكل المحافظة كلها نورها قطع

قالتلى:كلمت بقى بتوع المية وماحدش بيرد

ليه يا ماما هى المية لسه قاطعة من الصبح؟؟؟!!!!!!!!!!!!!!!!!!!

اه يابنتى

ربنا يسلط عليك باسم يوسف يا مرسى انت وحكومتك

حسبى الله ونعم الوكيل