الجمعة، 22 فبراير 2013

بعيدا عن السياسة...








ساكتة انا ومابتكلمش عن مرسى ولا عن حكومته ومش راضية اتفتح فيهم واقول يابت مش طالبة نكد..يابت مش طالبة هبل..يابت يعنى هتبقى تسمعى تصريحاتهم وكمان هتردى عليها ؟! لا لا ده كتير..وكل ماسمع حاجة بالصدفة  ولا تحصل كارثة اقول منكم لله  ..

لحد من يومين كده كان عندى مشوار فى المنصورة صحيتله على 9 كده والاقيلكم خير الله ام اجعله خير المية مقطوعة..طب انا اخرج ازاى كده استناها..بقت 11 ولسة المية مقطوعة مابدهاش بقى امرى لله لبست وخرجت على الموقف مافيش عربيات ..نستنى عربية فين وفيييييين على ما جت واحدة السواق نزل منها ولا رئيس الجمهورية وبصوت جهورى الكراسى هنحملها اربعات يا استاذة اللى عاجبه يتفضل واللى مش عاجبه طريقه اخضر مش طالبة خنقة على الصبح!!
وطبعا مش عاوزة حد فيكم يتفزلك ويقولى كنتم خدوه للقسم ولا اشتكوه لبتاع الكارته بصفته مندوب مجلس المدينة فى الموقف لانى هرد عليه واقوله العسكرى كان واقف مع السواقين مظبطينه بشاى وفطار وكان سامع السواق اللى سابنا بعد ما اعلن تهديده وراح ادى المعلوم لبتاع الكارته! 
كان الحل يا نرجع بيوتنا وفى ستين داهية مصالحنا يا كل واحد فينا يظبط 3 ركاب وزنهم مايزيدش عن 65 كيلو علشان نعرف نقعد قاعده بنت ناس..

المهم..ركبنا بطريقة سحرية ماعرفش ازاى واتحركنا للمنصورة..وصلت للمكان اللى فيه مصلحتى بعد حوار مع سواقين التاكسى اللى بيحاولوا يقلدوا تكسيات القاهرة ويرفعوا اجرتهم وناسين انهم مش فى القاهرة اصلا..
وصلت ونزلت الاسانسير وضغطت على السادس  وهووووووووووب بين التالت والرابع النور قطع 

انا اصلا مابحبش الاسانسيرات وما مبحبش الاماكن المغلقة بتخنق فيها..كان معايا طنط كده تقريا معدية ال60 الست بدات تتوتر وانا مش ناقصة ..حاولت اهديها واقولها اكيد خمس دقايق وهيرجع احنا فى محافظة كبيرة اكيد مش هعملوا هنا الاستهبال اللى بيعملوه فى البلد..
قعدنا انا وطنط فى الارض بعد اول ربع ساعة ..لحد ماسمعنا البواب بيصرخ فى حد فى الاسانسييييييييييييير...رديت انا اه ياعم احنا هنا اهو اتنين اى الموضوع؟
 ماتخافيش يا ابلة النور معاه شوية ويجى اطمنى..
طييييييب..
عدى نص ساعة ..
الراجل طلع تانى :انتم كويسييييييييين
اه عايشييين
طب بقولك ايه يا ابلة معاكم مية  واكل؟
لا يا عم ماعملناش حسابنا 
طنط: بس يابنى كلم حد انا عندى ضغط وسكر ومعاييش ميية اخد حباية الضغط حرام عليكم
ساعتها افتكرت فيلم بين السما والارض وابتسمت
 فين وفييييييين بعد ساعة وربع لقينا الاسانسير اترج وراح طالع نزلنا فى الرابع وطنط مصرة انها هتروح علشان حاسة انها هتودع..
سلمت عليها وكانت فرصة سعيدة ! وطلعت على السادس موتورجل بقى
لقيت البنت بتاعة الاستقبال سألتها على اللى كنت ريحاله قالتلى ده لسه نازل مروح من ربع ساعة
يالهوى يعنى مش راجع تانى ؟!!
لا خلاص بقى الساعة بقت 2
ياسلااااام
قضيت كام حاجة وعلى 6 كنت رايحة الموقف علشان اركب تانى ..
اخدت الكرسى الامامى كله علشان اخد راحتى واحس ببقايا ادميتى بقى وهووووب راح النور فى الموقف قاطع..
العربية اتحركت وفضل النور قاطع طوووووووووول الطريق ..الموضوع كان فى الاول هدوء لكن بعد كده بقى مخيف  وسخيف..احنا فى انهى زمن علشان تعيش بلاد كاملة ساعة واكتر فى الضلمة كده؟
يارب نوصل على خير..يارب مافيش حد يطلع علينا يثبت العربية.. يارب العربيات اللى قدمنا تقلب نور بس مش تعمينا بيه
وصلت والنور لسه قاطع
طلعت الكشاف الصينى اللى اشتريته اخر الصيف اللى فات  وشغلته
وصلت بيتنا فى الضلمة 
لقيت ماما مستنيانى وخايفة حبيبتى انتى رجعتى كده ازاى
ربنا سترها يا ماما
انا كلمت بتوع الكهربا والله يابنتى  قالولى ده عمومى
قلتلها اه شكل المحافظة كلها نورها قطع
قالتلى:كلمت بقى بتوع المية وماحدش بيرد
ليه يا ماما هى المية لسه قاطعة من الصبح؟؟؟!!!!!!!!!!!!!!!!!!!
اه يابنتى

ربنا يسلط عليك باسم يوسف يا مرسى انت وحكومتك
حسبى الله ونعم الوكيل

هناك 25 تعليقًا:

ابراهيم رزق يقول...

هههههههههههههههههه

فين النور يا نوووووووووووووووووور

فعلا كل دى مشاكل حقيقية
لكن ليه البواب مرفعش الاسانسير مانويل لاقرب دور

معلش مشيتى و الميه مقطوعة
و رجعتى والمية مقطوعة
مش عارف ازاى البيت يمشى من غير مية
الكهرباء ممكن
لكن المياه
لالالالالالالالالالالالالالالالالالالالالا

منك لله يا مرسى انت وبديع

تحياتى

عباس ابن فرناس يقول...

الحمدلله الذى اعز المعارضه بباسم
وزل الحكومه بقنديل هههه

ازيك يانور اخبارك واخبار تدويناتك الطازحه

تحياتى المستعطره

أسماء فتحي يقول...

مش عارفه اضحك ولا ازعل علي البلد وحالها ولا الموقف نفسه
بجد حاجة مش معقووووووووول
هيسلط عليه باسم اكتر من كده
ده باسم شايف شغله ومبهدله وزيادة شويتين
محتاجين باقي الشعب يشوف شغله ويبهدله هو كمان
مرسي لا يصلح لاي كرسي
هههههههههه

تحيــــــــــاتي
كانت هنا ورحلت

Asmaa Fathy

AhMeD RaDy يقول...

اوعى بعد كدا تسكتى .. كويس ان دا حصلك عشان نعرف اد ايه فى ناس مهضوم حقها ...؟ مرسى خروف .. مرسى فعلا خروف

P A S H A يقول...

كتير أوي ساعة وربع في الأسانسير بجد كان الله في عونك !!
حمداً لله على السلامة

eng_semsem يقول...

انا حاليا مش مقيم في مصر وحصل معانا موقف مشابه بس الفرق الوحيد ان الميه قعدت يومين قاطعه والكهربا كان فيها عطل عمومي قطعت من سبعه ونص صباحا الى 11ونص وعلى فكره انا في العاصمه
كلامي مش دفاع عن الغلط لاني مقتنع تماما انه غلط ومفروض مش يحصل في بلدنا بس احنا سبنا المصدر الرئيسي للاخطاء ده ومسكنا في مرسي يعني سبنا السواق الجشع والعسكري المهمل وعامل الكارته اللي بيمشي الغلط عشان ياخد قرشين وكل دول المفروض انهم مننا وهما السبب الرئيسي في المشكله وهنلاقي ورا مشكلة الميه او الكهربا بدايتها من ناس زي ده اهملت في شغلها
وارجع واقول يارب اصلح بلدنا واصلح احوالنا واكتب لينا الخير
تحياتي

faroukfahmy يقول...

صحيح يا نور المثل اللى بيقول من خرج من داره فى وقتنا زاد ناره ومش هيلاقى ميه تتطفيها هذا المشوار محتاج يوم قبله تجهزى ليه

نهر الحب يقول...

نوووور ومياه ومواصلات
بالاسكندراني كدة بنقولوا احييييييييييييييييييييييييييه

مش عارفة اقولك ايه هو انا ضحكت الحقيقة بس شر البلية ما يضحك فعلا

البلد دي خلااااااااااص مش نافعة والله

reemaas يقول...

ابراهيم رزق

انت هتقولى ده انتحار وتخيل بقى لو كان ده فى الصيف كان زمان اللى يرحمنى

reemaas يقول...

عباس ابن فرناس

فيييييييييينك من زمان يا عبس بتختفى انت كتير
عجبنى وصف الطازجة :)

reemaas يقول...

SHARKawi

اخجلتنى انتى يا شرقاوى مبسوطة انه ضحكك رغم الماساه :)

reemaas يقول...

asmaa fathy

قلت كده قالولى ظالمة والله يا اسماء

reemaas يقول...

AhMeD RaDy

مانا قولتلك انا بقى ليا تار برا :)

reemaas يقول...

P A S H A

ربنا مايكتبها على حد حاجة تخنق

reemaas يقول...

eng_semsem

يا سمسم ده مش بيحصل مرة ولا لعطل ده بقى روتين يومى بس انا ماحستش بيه لانى كنت فى بيتنا النور يقطع ساعتين عادى زمانه جاى لكن برا دى كانت صعبه لكن ده بقى روتين عندنا
ليه مرسى؟ ماهو لو بتاع الكارته والعسكرى كان فيه اللى يحاسبهم واللى يحاسب اللى يحاسبهم ماكنش ده بقى حالنا
لو بيختار من الاول الحد اللى يمشى الشغل صح ماكناش فى المصيبة اللى احنا فيها

reemaas يقول...

faroukfahmy58

انا اصلا اتعقدت

reemaas يقول...

نهر الحب

فكك يا بيبى المهم انك ضحكتى

Unknown يقول...

ياااااااااااااااااااه والله لو تعرفى اللى الواحد بيعانيه بسبب مشروع النهضة كنت هتحمدى ربنا انها جت على قد كده ده أنا شايف الوييييييل
نهضة دى ولا مش نهضة يا متعلمين يا بتوع المدارس
ههههههههههههههههه

أسماء فتحي يقول...

ادعوكِ لزيارة مدونتي المتواضعة
وذكر رأيك في ( في دار المسنين )
آخر كتاباتي حالة عشتها للأسف
وتأثرت بها ولم أستطع نسيانها فقررت أن أكتبها
علي هذا الرابط
http://asmaafathy.blogspot.com/


تحيــــــــــاتي
كانت هنا ورحلت
Asmaa Fathy

AhMeD RaDy يقول...

صيدالانية طمنيى ايه الاخبار فى المنصورة !! انا سامع عن ان الدنيا مقلوبة اساسا !!!! ابقى طمنينى لو سمحت فى اسرع وقت ممكن !!

reemaas يقول...

AhMeD RaDy
اه يا احمد امبارح كان صعب جدا وفى اصابات فى محيط المحافظة وقنابل مسيلة اتخنقنا
الامن مانزلش الا على الساعة 4 العصر النهاردة طريق المحافظة قفلوه خالص بس مافيش اصابات النهاردة

reemaas يقول...

asmaa fathy

عينى يا سمسم معلش انا مقصرة معاكى عارفة والله

reemaas يقول...

mahmoud khalaf ي
نهضة طبعا يابرنس :)

nesma hatem يقول...

يوم مصرى
حسبى الله ربنا يصبرنا
:)

غير معرف يقول...

عندك حق بس لو كان مسموح للى زيك واللى زيى انهم يقولوا اللى نفسهم فيه كده من ستين سنة مكناش وصلنا لكده
واللى كان بيقول زيك كده قبل تلات اربع سنين كان برده بيعيش ف الضلمة بس مش اى ضلمة ده ان عاش
تحياتي