السبت، 7 يوليو 2012

عن...انا ومدونتى(هووم وورك)



تم تكليفى بهذا الواجب من زميلة رحلة التدوين وزميلة الكفاح الصيدلى الجميلة سهاد:)
السؤال الاول
عرف نفسك..
انا نور الشهيرة بريماس او العكس..ماعدتش فارقة حتى اصحابى بدأوا يتلخبطوا اصلا..
بنوتة عادية جدا عندها احلام صغيرة ومع ذلك مابتتحققش بس وراها والزمن طويل يعنى..
متصالحة مع الدنيا لابعد الحدود ويمكن ده اللى غايظها منى:D
************
السؤال الثانى
ما اكثر مايميز شخصيتك
جايز العفوية وعدم الكلكعة..
**************
السؤال الثالث
ماهى اهم نقطة تحول فى حياتك
هم نقط الحقيقة مش نقطة واحدة اولهم كانت وفاة والدى بدأت اتعامل مع الدنيا بدون وسيط بقى
تانيهم ....عدوها
ثالتهم التدوين..فرق معايا كتير جداااا
***************
السؤال الرابع
كيف دخلت عالم التدوين
بالصدفة من سنة ونص تقريبا كنت قاعدة زهقانة فجيبت مدونة غادة عبد العال بتاعة عاوزة اتجوز وكنت متابعاها قعدت اقلب فيها لحد ما لقيت موقف حصل معاها مع احد عرسانها حصل معايا اخوه لدرجة انى شكيت انه نفس العريس..فقلت حلوة الحكاية دى اجرب اكتب وكان بها..
*******************
السؤال الخامس
ماهو اسم مدونتك وكيف اخترته
اسمها بنوتة مصرية..واخترته علشان هو تلخيص ليا...انا كده
****************
السؤال السادس
صف مدونتك
لا هى شعر ولا هى قصة طويلة ولا حتى قصيرة ولا هى يوميات...
تقدروا تقولوا هى زووم..زوم على فكرة طقت فى دماغى او موقف عدى عليا او على حد قريب منى
هى تعبير عن حالة مريت بيها او تخيلت انى مريت بيها
هى تعبير عن احساس ايا كان الاحساس ده بقى 
هى شرح لتفصيلة ايا كانت ...وانا بعشق التفاصيل
***********************
السؤال السابع
من هم اكتر 3 شخصيات اثروا بك من داخل عالم التدوين او خارجه
انا عاشقة للقراية بس اكتر حد اثر فيا هو احمد خالد توفيق..وخصوصا شخصية الدكتور رفعت اسماعيل..بعشقها بجد
عبد الواهب مطاوع..من الناس اللى خلونى من صغرى اعرف ان ورا كل بنى ادم حدوتة وتراجيديا خاصة بيه
داخل التدوين غادة عبد العال اعلمت منها انى ممكن اكتب اللى فى دماغى وبالعامية ويوصل جدا
وان كل موقف يمر بينا يستاهل اننا ندونه
تامر مغازى..حسسنى ان فيه حد غيرى بيعشق التفاصيل وبيهتم باللى بين السطور..
الاتنين اللى مالهمش حل دعاء وسهاد :) سعات بتيجى افكار فى دماغى والاقيهم هم كاتبنها ..بحس ان انا اللى كاتباها اه والله :)
ريماس ..اوقات كده الواحد بيبقى عاوز يحب فى قصة حب..عارفين الحالة دى؟اهو لما بتجيلى بروح مدونة ريماس  نافذة حلم :)
لما احب اضحك من قلبى بقى بروح عند ابو زياد مدونته بتنجح نجاح باهر انها ترسم ابتسامة على وجهى.......

كده 3 شخصيات اعتقد صح ؟:D
*******************
 السؤال التامن
ماهى طقوسك الخاصة فى الكتابة
مافيش..اول ماتيجى فكرة فى دماغى بجرى اكتبها قبل ماتهرب..
والملاحظ انى لو قعدت اعملها مقدمات على ما افضى واكتبها فى الغالب بنس المقدمات وممكن انسى الفكرة كلها وممكن ادخل بيها على حاجة تانية خالص.
******************
السؤال التاسع
ماهو اسلوبك المفضل فى التدوين
ممكن نقول العامية..بحس انى واخدة راحتى وانا بكتب وكأنى بتكلم 
*****************
السؤال العاشر
ما اهم ما يميز تدويناتك
اممممم مش عارفة بس جايز انها تدوينات مودية يعنى تعبر عن مزاجى الخاص

***************

السؤال الحداشر
ماهو تقييمك لعالم التدوين فى الفترة الاخيرة
مابقاليش فترة كبيره بدون يعنى وبالتالى فتقديرى فلة يعنى :)
***************
السؤال الاتناشر
 ماهى اقرب تدويناتك لنفسك
مش عاوزة اقول كلهم ابنائى ...ههههههههه بس نقدر نقول بشكل عام تدوينات مع نفسى وكل تدوينات شهر التدوين بتاع السنة اللى فاتت
******************
السؤال التلتاشر
استعرض اهم المواقف الطريفة اللى صادفتك مع التدوين
يوم تددوينة معطف من قيود لما كان توقف وحاولت اشارك بتدوينة تشجع الناس انها تكمل فيها
كانت اول مرة اكتب قصة ليها بداية واحداث ونهاية  لانى متعودة اكتب مشاهد بس
وكانت حالتى فظيعة تضحك الحقيقة وكل شوية اجى ابص اشوف الناس عجبتهم ولا ايه النظام
******************
السؤال الاربعتاشر
هل احدث التدوين تأير عليك ؟وكيف؟
اينعم
عملنى اقرا اكتر..علمنى اعبر عن نفسى احسن..علمنى اهتم براى الناس اكتر
بفضفض فيه جدا جدا
*****************
السؤال الخمستاشر
اختر اى مدون ووجه له سؤال
مدون واحد بس؟
طويب
خالد وتامر مغازى ومها ودعاء واحمد......انتم فين وبقالكم كتير سكتين ليه
واحد اهون :)
********************
انا هبطت جدا
وامرر هذا الواجب الطويل جدا للاستاذ ابراهيم  رزق علشان يتعب زينا
ولخالد علشان يتشج شوية بدل حالة الكسل دى
              
                

هناك 28 تعليقًا:

حنين محمد يقول...

صباح الغاردينيا يانور
صباحك عسل وعفوية زيك كدا عارفة يانور انا كمان بحب اوي مع نفسي ويمكن قلت لك عليها قبل كدا عارفه ليه عشان بحسك قاعده قدامي وعماله ترغي وانا طبعاً مستمعة جيدة على فكرة ههههههههه بجد بحب عفويتك وروحك الحلوة مش عارفة البنات المصريات طعمات كدا ليه يعني تقريباً أنا صحابي مصريات أكتر من السعوديات يمكن لأني بجد بموت في المصريين دا السبب والتاني لاني بحب خفة الدم الي في المصريين والبساطة والعفوية الي بتبقى في أغلب تدويناتهم عارفة بقولك كدا ليه .؟؟ لأنك بنوتة مصرية :)
حملة التدوين عرفتني بيكي فاكرة السنة الي فاتت كنتي نشيطة ولما غبتي سألت عنك لاني بجد أفتقدتك ومن ساعتها حسيت في حاجة أسمها حب حصلت مابينا ههههههههه على الاقل من ناحيتي يعني بحب اوي حواديتك في الصيدلةهههههههههههه وببقى متخيلة شكلك وانتي في الصيدلية وبتحكي لنا اممم لما تيجي مدونتي وتعملي كومنت بحسك بتحسي بيا اوي رغم انه تعليق بيبقى صغنن بس بجد بحس انك حسيتي بالكلمات من كلامك وإحساسك :)
أنا سعيدة بجد لو بتلاقي حاجة حلوة في نافذة حلم زي ماأنا بلاقي عفوية وصدق في بنوتة مصرية :)"
؛؛
؛
لروحك عبق الغاردينيا
كانت هنا
reemaas

سواح في ملك اللــــــــــــــــــه- يقول...

صباح الفل والورد يانور

صباح مهدي لآطيب بنوتة

اوعي تكوني تقصديني انا بالواجب

تبقي حطتيني في ورطه هههههه

برائتك يانور بتدي احساس للواحد انه لازال هناك علي الآرض طيبة وجمال وعفوية

انتي فعلا كما سميتي نفسك

بنوتة مصرية

شبه مصر الطيبة

تحيتي لآطيب نورر

ضياء عزت يقول...

مبسوط إني اتعرفت على مدونتك وعليكي يا نور
أو
ريماس ^_^


بالتوفيق دايما

مصطفى سيف الدين يقول...

احلى ما يميز اجاباتك انها مثلك تلقائية و بسيطة
اعجبتني اجاباتك جدا
دمتِ بكل خير

beautiful mind يقول...

جميل جدا يا نور او ريماس
حلو اوي البوست دا عشان بيخلينا نقرب اكتر من الناس ونعرفهم كويس
متميزة دائما انت ومدونتك
تحياتي

ابراهيم رزق يقول...

ايه يا نوووووووووووور

الواجب انا عملته بس انتى نايمة
معذورة بقى
الشغل اليومين دول شغال وادوية الضغط و الاكتئاب
و فلوس خارجة و فلوس داخل بقى
هههههههههههههههههههه

بص يا نوووووووووور انا مش بخش مدونة اى لو شعرت بالفة و صدق مع صاحبها
جايز فى مدونات هايلة كتير بس انا مش بحس معاها بكده
فى حاجات زوغتى من اجابتها بس هنمشيها
تحياتى

rona ali يقول...

خدى بالك من كومنت الخال ابراهيم عن موضوع التزويغ واعرفي يقصد ايه كويس هههههههه

المهم الهوم ورك دة احلى هوم شوفته في حياتى تلقائيتك جميله اينعم في حاجات اتمنيت ترغي فيها اكتر بس انتى كنتى زكيه قولتى مقتطفات وقفلتى الحوار ههههههههه

الاحلام يقول...

اجاباتك نور تظهر مدى نقاء قلبك وبساطه كلماتك تظهر مدى طيبته
اسعدكى الله
تحياتى ابوداود

Hebatullah يقول...

احنا كده بقينا خلاص صحاب وان شاء الله انا كمان هاعمل نفس التدوينة بتاعتك دي عشان اعرفك عليا بقي

سندباد يقول...

اجابابت مرحة وبسبطة بتدل فعلا علي بساطتك وخفة دمك
سعداء بالتعرف عليكي
تقبلي مروري

reemaas يقول...

ريـــمـــاس
بلاقى طبعا يا ريموسة ولازم تبقى متاكده من ده

reemaas يقول...

سواح في ملك اللــــــــــــــــــه

ياريتها نافعه يا خالد

ايوووووووون اقصدك انت طبعا

reemaas يقول...

Deyaa Ezzat

وانا كمان جدا يا ضيا

reemaas يقول...

مصطفى سيف الدين

:)
ربنا يخليك يادرش تسلم

reemaas يقول...

beautiful mind

منورنى ديما واتمنى انك تعمله

reemaas يقول...

ابراهيم رزق

وبتحس الاحساس ده عندى....يا حلولى

بس يا ابو زياد بلاش احراج

ياخبر ابيييييض يبقى حالا بالا سافتش مدونتك

reemaas يقول...

rona ali

ههههههههه اخد بالى ديما كده ابو زياد مسيحلى هههههههههههههه

حاولت والله اوضح على اد ماقدر يارونى عارفانى مش رغاية خالص هههههههههههههههههههه

reemaas يقول...

الاحلام

تسلم يا استاذ محمد من ذوق حضرتك

reemaas يقول...

Hebatullah

يسعدنى يا هبه اكيد وهتبع علشان اقراه عندك :)

reemaas يقول...

سندباد
تسلم ياسندباد
منتظراه منك بقى

نهر الحب يقول...

طيب بقي
انا قريت البوست امبارح وكنت مستعجلة عشان نازلة الصيدلية وقلت مقولش تعليق وانا مستعجلة واجي علي روقان

النهاردة المفروض روقان
:))

فرحت اوي لما لقيت اسمي مكتوب
وفعلا بحس اننا شبه بعض

عارفة ساعات بتزعلي اوي انك مش قادرة تبقي اقرب من ناس فعلا شبهك وتبقي حواليكي ناس محدش منهم فاهمك ولا بيحس بيكي

عجبني اوي كلامك عن ريماس بتحب في قصة حب دي
:DD
نفس ذات الاحساس برضه اللي هو حححححححححححح ده عارفاه
ههههههههههههه

انا فاكرة اول حاجة قريتهالك رمضان اللي فات كنتي كاتبه عن اعلانات رمضان وقد ايه غايظاكي وكنتي كاتبه نفس الكلام اللي كنت بقوله كتير اوي ومن يومها حسيت فعلا بقربنا

فرحانة اوي اني عرفتك من المدونة وعلي المستوي الشخصي كمان وعندي امل نقرب اكتر ان شاء الله

جايدا العزيزي يقول...

بنوته رقيقه جريئه

صريحه عفويه

فيه احلى من كده ايه

اجمل اجابات ونجحه بامتياز

اسعدك الله نور

تحياتى

Rozy يقول...

صباحك سكر نور ..

حبيتك مدونتك حسيت انها دمها خفيف زيك
وشعرت بالألفة هنا حسيت انى قاعدة فى أوضه واحدة صحبتى وبنرغى رغى غير هادف زى ما بنقول انا وهما :P
اسمحيلى هاجى هنا كتير ,,

دمتى بسعادة عزيزتى

Rozy

دعاء العطار يقول...

حبيبتي يانووور والله :)

بصي ياسيتي انا مختفيه عشان بعيد عنك اطحنت زيك وبقيت اشتغل 12 ساعة ف اليوم

اي والنعمه 12 ساعة وأحيانًا 13 :(
وبعد الشغل ع طول جيه موضوع سرقة ميلي وفيس بوكي فبعدت خالص بقى عنكم وزعلانه اوي الايام دي عشان كده

عايزه أقولك

انا بحبيكي أوي وخليتيني ابتسم ف أكتر من موضع وبجد خليكي كده يانور عفوية وعسوله ومتصالحه مع الدنيا مهما يحصل منها

ووالله انا هحاول اكتب حاجة النهاردة عشان خاطرك :) :)

وحشتيني ياأحلى نور :)

reemaas يقول...

نهر الحب

ايون صح يا سهاد فاكرة انا البوست ده :)

لو اسمك مش مكتوب اكتب مين بس

reemaas يقول...

جايدا العزيزي


تسلمى يا ايدىكلك زوق

reemaas يقول...

ღ..Rozy.. ღ


انتى تنورى ديما ديما

reemaas يقول...

دعاء العطار


وحشانى اكترررررررررررر شفتى اهو انا اللىمادخلتش من يومها ههههههههههه