السبت، 7 يوليو 2012

عن....الخوف!!!






وحشتونى..بقالى يجى اسبوع ماشركتش باى حاجة فى الحملة بس فعلا مش لاقية حاجة اقولها!
ولما لقيت صديقتى العزيز سهاد صاحبة مدونةنهر الحب مديانى هوم ورك حلو اوى ففرحت وقلت تمام لقيت حاجة اقولها..لسة بكتب وبقول ياهادى لقيت ماما داخلة عليا الاوضة وبتسألنى بتعملى ايه..قلتلها بحاول اكتب..
بصتلى وابتسمت وقالت طيب انتى نازلة بكرة المنصورة ان شاء الله صح؟
قولتلها اه مانتى عارفة..

سكتت شوية وقالتلى طيب هقولك حاجة وتسمعى الكلام ماشى..لو حد قابلك وانتى ماشية ووقفك وقالك المفروض تلبسى عباية وانتى خارجة وخمار او حتى نقاب عاوزاكى ماتتحاوريش معاه او معاها قولى ان شاء الله او قولى حتى انك نازلة تشترية..علشان خاطرى ما تدخليش فى جدل مع الناس دى.........

صدقونى انا ماعرفتش انطق..بلمت وحسيت ان دماغى سابتنى ومشيت!!
قولتلها بصوت مبحوح ..حاضر!
وهى سابتنى وسط حيرتى وخرجت..
ايه اللى يخلى امى..السيدة الفاضلة مربية الاجيال اللى بيطلقوا عليها لقب ضمير ابلة حكمت من كتر ماهى ديما بتعمل الصح ولا تخشى فى الحق لومة لائم..ايه اللى يخلى شخصية زى دى تقول كلام زى ده؟

الخوف.....مافيش اجابة غيرها!!  للاسف 

على الهامش: هعمل الهوم ورك بالليل يا سهاد ان شاء الله ..استوعب نفسى بس

هناك 26 تعليقًا:

rona ali يقول...

فعلا الخوف هو لجمنا للاسف

انا مستنيه الهوم ورك بقي يا اختى

^_^

Hossam Saber يقول...

:)

هبة فاروق يقول...

حبيبتى ريموس
انا لسه كاتبه حاجه تشبه اللى بتقووليه كلنا خايفين من بكره ربنا يستر حبيبتى

ابراهيم رزق يقول...

ايه يا نوووووووووووور

لو عملوا كده يبقى نجحوا و وصلوا للى هما عايزينه

المجتمع اللى يعمل كده مجتمع مريض و كذاب و منافق

لن نكون منافقين و مزدوجين
لن نكون الا نحن
بعباية بحجاب بنقاب بستريتش بهاف ستموك لن يكون كل شخص الا هو

بس خلاص كفاية عليكى كده انهاردة

تحياتى

Deyaa Ezzat يقول...

أيوة هو الخوف يا ريماس طبعا
وللأسف عندها حق.. في الظروف دي

بس في الموضوع ده قالو إن اللي بيعمل كدة امناء شرطة وبلطجية تابعين لأمن الدولة ولو وقفوكي صوتي ولمي عليهشم الناس عشان يتفضحو وفعلا لما كذا بنت عملت كدة طلعو بيشتغلو مع امن الدولة واتنشر الموضوع في أكتر من مكان

خوف مامتك له أسبابه .. بس ف الآخر اعملي الصح ومتخافيش

السكوت في حد ذاته جريمة

ربنا يسلمك انتي وكل اخواتنا وبناتنا

نهر الحب يقول...

:)))))))
ماااااااااااااااشي مستنية الهوم وووورك جداااااااااا علي فكرة

الخوف
الخوف بيعمل حاجات كتير اوي فينا يا ريم والله

بس المشكلمة لما يبقي مافيش حاجة تخوف اصلا وناس يحاولوا يخوفونا وخلاص
اكيد فاهماني

ربنا يسترررررررررر

habiba يقول...

السلام عليكم
أولا كويس انك رجعت تمتعينا بكتاباتك الجميلة.
ثانيًا بقى الحاجة الوحيدة اللى لازم نكون عرفنها كويس ان دول ليس لهم صلة بالإسلام..
لا سلفية ولا إخوان..منعًا للانقســام والتفرقة.
والخوف والحذر منهم مطلوب للأســف..
وإن شاء الله ربنا يكفينا شــرهم وينتقم منهم ومن الناس اللى بتدفع لهم.

مصطفى سيف الدين يقول...

معاها حق
لأن الناس دي مش هينفع معاها نقاش او جدال
الناس دي قاصدة تجر شكل و بس
واذا خاطبهم الجاهلون قالوا سلاما

سواح في ملك اللــــــــــــــــــه- يقول...

نور الطيبة

ثقي يانور ان الكلام ده لن يحدث

ولكنها نظرية الآعلام الللي مش عارف شغال ايه بالظبط

سندباد يقول...

هو احنا بقالنا 30 سنة بنعمل ايه مش كنا خايفين برضه ولو فضلنا نخاف هانفضل 30 سنة عبيد
متخفيش وقولي اللي في نفسك

beautiful mind يقول...

يمكن عشان الناس اللي بتعمل كدا وبتوقف الناس بتبقي مستنيه ان حد يشد معاهم في الكلام
مهو مفيش امن ومحدش بيحاسب حد
عموما نصيحة حلوة وهنصح بيها كل اللي اعرفه
تحياتي

reemaas يقول...

rona ali

رايحة اعمله اهون

reemaas يقول...

Hossam Saber

:)

reemaas يقول...

هبة فاروق

ربنا يسترها يا هوبا

reemaas يقول...

ابراهيم رزق

ايون ماهو احنا هنقام بس صدمنى انها وصلت لحد انا متاكدة من تفكير الف فى الميه بس قلب الام بردو

reemaas يقول...

Deyaa Ezzat

لا ماهو بالقبض عليهم اتاكدوا ان اتجاهم تبع التشدد الاسلامى للاسف

ربنا يسترها

reemaas يقول...

نهر الحب

ايوووووووووون هى دى الكارثة
خلق الرعب

reemaas يقول...

habiba


اه طبعا انا لا احسبهم الا على انفسهم فوزرهم هيتحملوه دنيا واخرى ربنا يجازيهم يارب

reemaas يقول...

مصطفى سيف الدين

وده اللى خلانى ماجدلش المشكلة انى فعلا مش هعرف اجادلهم

reemaas يقول...

سواح في ملك اللــــــــــــــــــه-

اتمنى انه يكون اعلام وبس يا خالد انا لما شفت والد احمد حسيت انى هموت من الغيظ

reemaas يقول...

سندباد

يلا زى ماتيجى بقى ربنا يسترها

reemaas يقول...

beautiful mind


اعتقد هيبقى رد فعلهم شبهى كده :)

ريـــمـــاس يقول...

صباح الغاردينيا نور
أنا فاهمه اوي ايه الي حاسة فيه اي بنت أو ست مصرية من حكاية الخمار والعباية والي بتحاول تعمله الناس الي بتلاقوها في اي مكان وبتلمح لكم بالطلب دا انا بصراحة مستغربة طيب أنا سعودية وانتي عارفة انه في بلدي بنلبس العباية والخمار او حتى البعض يلبس نقاب بس في حاجة يمكن ناس كتير ماتعرفهاش احنا كمان في ناس مش بتلبس حاجة على وشها يعني بلبس عباية وطرحه تتلف ومن غير نقاب ولا غيره ورغم انه في هيئة امر بالمعروف والنهي عن المنكر بس مش في كل مكان في اماكن معينه زي مول زحمة مثلا زي مناسبات معينه ومحدش يجبر حد على حاجة مش عاوزة وعاوزة اقولك لبس العباية مش دليل انه البنت دي ملتزمة وماشيه في حالها ولا الي كاشفة وشها معناته منحلة وعديمة الاخلاق دا يرجع للبنت نفسها عمر لبس العباية او الذقن الطويل عند الرجل دليل دين وإلتزام طب والله لما بمشي في مول بتعاكس من راجل كبير في السن ودقنه على صدره اكتر من شباب مراهق عارفه دا معناه ايه ؟؟انه الغلط والصح بيبقى من الشخص نفسه مش فرض العبايه .."
؛؛
؛
لروحك عبق الغاردينيا
كانت هنا
reemaas

reemaas يقول...

ريـــمـــاس

ده ارهاب نفسى مالوش حل يا ريموسة الحقيقة مش عارفة اقولك هدفه ايه غير اننا ننشغل بحاجات زى دى ونسيب بنا البلد اللى المفروض يبقى همنا الاول

ربنا يسترها

Bent Men ElZman Da !! يقول...

الخوف بقى بجد بيقتل حاجات كتييير جوانا
يمكن من يومين بالظبط دار بينى وبين ماما واختى نفس الحوار ده
بس ماما كان ردها العكس تماما
مش عارفه هى كده صح والا لا بردو !!
الغريبه ان احنا مش قادرين حتى نحدد الخوف ده فى محله والا لا

E73 يقول...

بنوتة

عاوزة اقولك ان فيوم ماما قالتلي حوار مشابه

قلتلها ماما العمر واحد والرب واحد انتي خايفة ولا ايه

قالتلي اه لازم اخاف :)

بأمانة مش فاكرة الحوار أساسا او الكلام اللي بدأ الحوار بيني وبين ماما فالموضوع دا