الاثنين، 27 فبراير 2012

بعيدا عن السياسة



ياخالة قمر ياللى عجينك خمر ياللى
 قومى قرصيه
واساعدك فيه
ادينى رغيف
ابيض ونضيف
قومى اخبزيه
كسلانة ليييييه

كانت من احلامى قبل الثورة انى بلدى تبقى نضيفة ,من غير زبالة فى الشوارع
ولسه ده حلمى لحد دلوقتى ...
نفسى امشى مالقاش اكوام زبالة جنب جنينة ولا جنب جامع ولا مكان غير مكانها الطبيعى اللى هو صندوق الزبالة
نفسى اركب عربية ومالقاش حد بيرمى كيس الشبسى ولا المنديل ولاالكانز من الشباك
فى بلد معينة بعدى عليها وانا فى العربية فى طريقى للمنصورة البلد دى اهلها بيعملوا حاجة غريبة
بيحطوا اكياس زبالتهم على الرصيف اللى قاسم الطريق الرئيسى لحارتين رايح جاى
طول مانت ماشى بطول البلد الفاصل مرصوصة عليه الاكياس بدقة عجيبة
الحال ده من زمن على فكرة ونفسى افهم ليه؟!
ياخالة قمر ياللى
ياللى وحشانى
ضمينى تانى
بجناح حنانك
راح فين زمانك
زعلانة منى؟
كان غصصب عنى
وانا اعمل اييييه!!!
بحلم ان الناس تفهم الفرق بين عضو مجلس الشعب والمجلس المحلى
نفسى يبطلوا يحلموا ان عضو مجلس الشعب هو اللى هينضف الشوارع وينور العواميد ويشغل الناس
هو اللى هيزود حصة البلد من انابيب الغاز ولا هو اللى هيخلى اللى بيوزع العيش يعدى فى معاده
نفسى الشباب اللى قام بالثورة واتقسم لانه معملش حزب يجمعه يرشح نفس للمجالس المحلية
علشان تظبط البلد لازم نبتديها من تحت مش من فوق
ياخالة قمر
ايدك معايا
غنى غنايا
القمح جالك
فرح عيالك
قومى اطحنيييه
فيلم ايرانى اخد اوسكار؟
طب يعنى الحكاية مش حكاية احقاد بقى ولا اننا عالم تالت او عرب او مسلمين وهم بقى بيحقدوا علينا وحالفين لنطول السما ولانطول الاوسكار
بحلم انى اشوف فيلم مصرى مفهوم مش على طريقة يوسف شاهين
يدخل وياخد اوسكار ...
بحلم انى اشوف فيلم اكشن مصرى يبهرنى
انى اشوف فيلم خيال علمى مصرى ...
بحلم انى اشوف فيلم رومانسى مصرى يأثر فيا زى تايتنك مثلا
بحلم بده وليه لاء
ياخالة قمر كسلانة ليييه
بحلم ان كل طالب فى مصر يقعد فى الحصة وهو معاه لاب توب بتنزل عليه المناهج اول كل سنة دراسية ,وماتتحزفش المناهج بتاعة السنين اللى عدت بحيث انه يقدر يربط اى معلومة بحاجة هو درسها من قبل
خيالى الحلم؟
ماعتقدش..هيبقى ارخص من طباعة الكتب كل سنة وبعدين بيعها لمحلات اللب والسودانى

بحلم ان المدرس فى المدرسة الحكومية لما يجى يدى معلومة للطلبة مايقلهمش قولوا ورايا يا عيال وبصوت واحد ثورة عرابى قام بها احمد عرابى فى 1919 ..وانت بقى لسوء حظك تعدى جنب المدرسة وتسمع صوت 60 طالب طالع من شباك الفصل بيرددوا المعلومة ورا الاستاذ

ليه مايقعدش بهدوء وبصوت واطى وبدون استذاف للحناجر ويحكيلهم اللى حصل فى الفترة دى ويطلب منهم هم يدورا على المعلومات الثابته على النت مثلا ويناقشهم فى نتايج بحثهم ده فى الحصة الجاية ويبقى ده الواجب بتاعهم ويبقى كده علمهم يدوروا على المعلومة بدل ما بيحفظوها

ياخالة قمر ياللى
تسلم اديكى 
واللى يناديكى 
ردى عليييه


دول حلمين من احلامى وحاسة انهم مش معجزات يعنى
ولا انا بحلم بالمدينة الفاضلة ولا انا مش واقعية ومش عايشة عيشة اهلى
لا
دى اقل اقل الحاجات اللى يستحق يعيشها اهلى
واللى نفسى الاقى ناس فكرت فيها وقاعدة بتجهز ليها دلوقتى

وكل ده بعيدا عن السياسة
نفسى كل واحد فيكم يحط حلم او حاجة نفسه يشوفها بعيدا عن السياسة حتى لوكانت مجنونة 
ممكن نخرج بمجموعة احلام اكيد قابلة للتحقيق
   
     

هناك 34 تعليقًا:

مصطفى سيف الدين يقول...

عندما يعرف كل منا دوره حينها فقط نستطيع ان نقول ان الثورة نجحت
حين يقوم كل منا بعمله على اتم الوجوه حينها تنجح الثورة
للاسف محدش فاهم حاجة و لا حد عارف ايه دوره و عايشين في سلاطة و عايمين في مية البطيخ
تحياتي

سواح في ملك اللــــــــــــــــــه- يقول...

ثقافة شعب يانور يابنتي ههه

مهي الثقافة مش قراية وكتابة

الثقافة تساوي فضائل تساوي اخلاق تساوي مسئولية

كتير اوي يانور بشوف خريجي جامعة لايفقهون

ده بعيد عن اخطائهم الاملائية

ومهاراتهم الانجليزية

مش عارف قلتلك الكلام ده قبل كده والا لا

في مترو الانفاق كان فيه غرامة علي

اللي بيشرب سجاير واللي بيرمي مثلا ورقة وكدة

الناس خوفا من الغرامة والمحاضر والذي منه

اعتادوا علي حكاية الانضباط دي حتي بدون رقابة

يعني لازم كرباك

ولازم غرامة عشان نلتزم

faroukfahmy يقول...

مشكلة البطالة طال امدها واصبح شأنها شأن مشكلة الامن
المجلس المحلى يجب ان يقوم بدوره ويشرع الشباب بالانضمام فى اعضائه ،بس للآسف لا نجد له محل اقامة اليوم ولا محل للآعراب
بالنسبة للآحلام فلا بمكن تجديها الا فى احلامك فقط
وكويس انك بتحلمى يعنى عندك امل

علاء المصرى يقول...

السلام عليكم

الثورات اطاحت بالطغاة ولكن اخذت معها بعض مكارم الأخلاق

علك بلمرور فى مدونتى تتعرفين على الثورة الحقيقية بما يعبر فيها عن كل ما بداخلنا

اسجل مرورى

تحياتى

هبة فاروق يقول...

لازم كل واحد فينا يبدا بنفسه
يعنى القمامه اللى فى الشارع بتتزرع لوحدها ولا فى ناس بترمى الزباله فى الشارع
للاسف الوعى والحفاظ على البيئه معدوم لدى الشعب المصرى
نتمنى ان تكون هناك حملات للنظافه والتوعيه
تحياتى

Ahmed ElGaMmaL يقول...

بصى , هو انتى مش بتحلمى ولا حاجة و دة الطبيعى و يمكن اقل من الطبيعى كمان
بس احنا ادامنا كتير على الحلم بتاعك دة
لان منظومة الاخلاق فى مصر انهارت تماما

amiraali يقول...

والله انا برضوا نفسي في كده...نفسي الاقي البلد نضيفه وجميله...نفسي كل واحد يبدا بنفسه ونبطل كل العادات السيئه ايلي بنعملها.....اهم حاجه ان كل واحد يعرف ايه دوره وايه رسالته ويقوم بيها

Unknown يقول...

ربنا يدينا ويديكي طولة العمر

Tarkieb يقول...

ده مدرس عايز قطع رقبته ثورة عرابي سنة 1919 يالهوي على المعلومات ......

Miss LoZa يقول...

أنا كمان حلمت بحاجات كتيييييييير قوى اصلا للبلد
منها الى أتحقق ومنها الى لسه

خلينا ندعى أن ربنا يزود الوعى علشان البلد تبقة أحسن :)

ريري كربكه يقول...

انا مع استاذ فاروق
البطاله لاني انا نفسي بعاني منها
نفس اشتغل مش هكدب عليكي واقولك
مش علشان الماديات
لا علشان احقق ذاتي في الحاجه اللي درستها وبحبها وانفع بلدي بيها
وطبعا ده حلم كل شاب وفتاه
بنقعد ناخد كرسات كتير بجانب المؤهل العالي ومش بننفع بيهم لا نفستا ولا بلدنا
طيب انا مش مهم طيب والشباب اللي عايز يتجوز ويفتح بيت يعمل ايه
والله بجد انا حزينه
على بلدي
بنخلصلها وبنديها ومش عارفين نعيش فيها
البوست حلو وخلتيني طلعت اللي جوايه
تسلم ايدك يا قمرايه

فشكووول يقول...

يا خاله قمر
يا اللى زى القمر
التراب مالى هدومك
والهباب على كل شعرك
ياخاله قمر
قومى اغسلى هدومك
قومى اغسلى شعرك
دا النيل قدامك
والبحر طرحه عيالك
على شط الليالى قومى واندهى عيالك
يمكن اللى فى بالى يرد على افعالك
افعالك حلوه وانت حلوه .. ليه ناسيه نفسك
يا خاله قمر .. والله قمر .. بس عايزه شوية صابون

على ما قسم ومن القريحه بسرعه .. تحياتى ريماس

reemaas يقول...

Blogger مصطفى سيف الدين

هى المشكلة فى ان كل واحد عارف دورة ومش عاوز يعمله او مش عارف يعمله ودى مصيبة

reemaas يقول...

Blogger سواح في ملك اللــــــــــــــــــه-

لو مش هتيجى الا كده يا خالد بسيطة نعمل غرامات واهو الميزانية تتظبط

reemaas يقول...

faroukfahmy58

ايون يا استاذنا عندى امل ولازم نركز مع المحليات بكد لو انصلحت حاجات كتير هتتظبط

reemaas يقول...

Blogger علاء المصرى

لا لا اختلف معاك الاخلاق ضايعه من قبل كده

reemaas يقول...

Blogger هبة فاروق

عليكى نوووووووور
مافيش حكومة بترمى زباله احنا اللى بنرميها وزى ماعملنا ثورة نقدر نلم الزباله

reemaas يقول...

Blogger RoMa

اممممممم

بالتفكير الكنطقى معاك حق بس لو حسبنا احنا لما اصرينا عملنا ايه فى 18 يوم هتعرف ان ممكن نعمل ده فى وقت قياسى

reemaas يقول...

Blogger amiraali

طب ماتيجى نبتدى كل واحد من الحى بتاعه ونشوف اى النتيجة

reemaas يقول...

Mohamed Amer

هنطول يعنى ؟:(

reemaas يقول...

Tarkieb

تفتكر لو قلت اسمه هيحولونى للجنة القيم :)))

reemaas يقول...

Miss LoZa

ياااااااااااااااااارب

reemaas يقول...

ريري كربكه

مسيرنا هنمشيها على مزاجنا

reemaas يقول...

فشكووول

عجبتنى جداااااااا يا استاذنا بجد

;كارولين فاروق يقول...

انا كمان بحلم بحاجات كتيره يا ريماس
اتأخر ميعادها اوي
اتمني تحقيق احلامنا كلها يا نور
تحياتي حبيبتي

Bent Men ElZman Da !! يقول...

كلنا حلمنا
والمفروض نكون لسه بنحلم
عشان لو بطلنا نحلم مش احنا اللى هنموت
لا بلدنا اصلا اللى هتموت
ربنا يجعل اللى جاى خير

I have changed يقول...

فعلا الحلم ده نعمة من عند ربا لانه بيدينا امل انه بكره ان شاءالله احلي بكتتير ،بس المهم انه كل واحد يبدء بنفسه وميستناش غيره ويقووول "يعني انا اللي حصلح البلد ماكل الناس بتعمل كده"وان شاءالله حلمك يتحقق الي هوحلمنا كلنا
انا اول مرة ادخل هنا وعجبتني المدونة جدا واتمني اكون اخت جديدة ليكي ،احبك في الله

E73 يقول...

أحلام مشروعة

وجميلة

وأعتقد أغلبنا بيحلم بأحلام مشابهة لها

بس أحلامك تقريبا بالنسبالنا هي "السهل الممتنع" >_<

reemaas يقول...

;كارولين فاروق

بدعى انها تتحقق يا كارولين وبسرعه علشان ماتمتش

reemaas يقول...

Blogger Bent Men ElZman Da !

ومن هذا المنطلق يارب حلمى يعيش علشان بلدى تعيش

reemaas يقول...

Blogger I have changed

منورة المدونة وفرحانة كتتيييير انها عجبتك
يارب كل احلامنا تتحقق

Tamer Moghazy يقول...

1- اللي بيرمي الزبالة.. اكيد هما الناس الزبالة..
ولو اقتنعنا بالمنطق ده يبقى اكيد كل البلد زبالة..!!

2-عضو مجلس الشعب ..
عضو المجلس المحلي..
(كلام عيب)

3-مش بس الفيلم الايراني كسب..
لأ.. ده كمان العربية الايراني..
و كمان التقدم الايراني..
و كمان الاسلحة الايراني..
وغيره وغيره
وقد ما هما كسبوا..
قد ما احنا خسرنا..!!

4-..... وعشان كده..بنحط في الأكل مواد (حافظة)مش (فاهمة)..!!


الاغنية دي بتاعت بنت اختي وطول اليوم تغنيهالنا :)

بتوحشني بوستاتك لما باغيب يا نور :)

reemaas يقول...

فرحانة كتييييييير انك هنا ياتيمو

كتير كتير يعنى

وطبيعى تكون دى اغنية بنت اختك القلوب عند بعضها ههههههههه

اخدت بالى انا من موضوع المواد الحافظة ده

تصدق بالله ماردتش اقول ان من احلامى البرنامج النووى هههههههههه هيقولوا عليا شطحت

ابراهيم رزق يقول...

نووووووووووووور

احلمى و انا هاحلم معاكى

كلها احلام بسيطة بس بتبان مستحيلة
احنا شعب طيب اهالينا عودونا علىالرضا و القناعة
بحلم و انا معييش ملعنش الازمات
انتى عارفة سيكشن الكلية كان 100 واحد و طنا بنقعد على الشبابيك عادى و لا يهمنا
ده احنا كنا بنتخانق على الجلوس على الشبابيك
عشان يعنى معاكسة البنات اللى تحت
ههههههه اسكت يا لسانى
و بعدين انتى بتضايقى و انتى معداية من قدام مدرسة امال انا اعمل اية اللى ساكن قدام مدرستين
ههههههههههههه

تحياتى
يا نوووووووووووووووور