الجمعة، 5 أغسطس 2011

اريده سائق ماهر............




سألنى احد الاصدقاء مؤخرا اسئلة من النوع الرخم التى لايمل الناس من سؤلها
 ورغم انى مؤخرا ملتزمة الصمت تجاه ذلك النوع من الاسئلة و لانه صديق عزيز ولانه قد يفسر صمتى خطأ ولانه انا اصلا مخنوقة وعاوزة ارغى ولانه لحوح جدا ومش هيسبنى الا لما اجاوبه فلقد دار الحوار الاتى
 هو:ايه يا نور العمر بيعدى والفرص بتقل مش ناوية تتنيلى بقى وتفرحينا؟!


انا:اتنيل؟الله يكرمك والله النية موجودة يعنى بس تقريبا هم اللى خلصوا او ماتوا فى التحرير الله اعلم
   وعموما طالما انت متنحرر كده ماتتصرف يعنى ايدى على كتفك ولاهى طولة لسان فى الفاضى؟
هو:طيب يعنى انتى شروطك فيه ايه عاوزاه مثقف واخلاق ووضع مادى محترم وكده؟


انا:والله مايضرش كلها حاجات جميلة ومنطقيه مع انى مش شايفاها كافيه يعنى؟ ماهو طبيعى يبقى حد مثقف  واخلاق دى لا خلاف عليها ووضع مادى يعنى مابتبهرنيش الحاجات دى بس يا حبذا

هو:يا حبذا؟! طيب خلاص انا فهمتك انتى عاوزة حب بقى وحاجات رومانسية وكده صح؟

انا:هو برده مايضرش يعنى الحب بيدى طراوة كده للحياة رغم انى بردو شيفاه مش كافى او ماعدش كافى فى زمنا ده ثم ان الحب حالة او فكرة ليها عمر وتاريخ صلاحية ممكن تخلص بعد اسبوع او شهر او سنة وعلشان كده هو مش شرط بس وجوده اكيد مرحب بيه وياحبذا.......

هو:امال ايه بقى انتى عاوزة ايه؟
انا:ببساطة انا عاوزة اللى هسمحله يتولى مقعد القيادة فى حياتى يكون سائق ماهر جدا ماهر لدرجة انى ممكن عينى تغفل وانا جنبه وعارفة انه مش هيدخل بينا فى حيطة........
سائق ماهر يعرف يتعامل مع مطبات الحياه بهدوء ..يعرف امتى يسرع وامتى يهدى وامتى يقف وازاى يحترم الاشارات
هو:انتى محسسانى انى قاعد فى المرور

انا:انا شايفاها كده شايفة ان الحياة الزوجية زى رحلة بالعربية بعض البنات بيجدوا نفسهم خارجين منهابحادثة بشعه,وبعض الرجال مش بتخلى عيونهم تغمض ولو لحظة متوقعين لاسوء فى اى وقت
 واسوء الرجال بقى اللى بيخلى مراته هى اللى تتولى القيادة ويفضل هو قاعد جنبها يزعق وخلاص
هو:طب يا فيلسوفة ومافيش اسوء النساء يعنى ولا ايه؟
انا:لا طبعا فيه اسوأهن اللى تكتفى بالنوم وخلاص لازم الست تبقى متأهبة لو شريكها فى رحلة عمرها تعب تتولى هى مكانه لحد ما يقف على رجله تانى ........انا شايفه ان ده دورها

هو:بس خدى بالك فى ست بطبعها قيادية
انا:صدقنى حتى دى بينهاوبين نفسها بتحتاج لراجل هو يتولى القيادة دى طبيعة المرأة وصدقنى عند النساء عموما الرجل الاقدر على توفير الامن هو الاعظم والاكثر جاذبية.......
  ها بقى عندك عريس ولا نكتفى بهذا القدر لحين اشعار اخر؟
                  ولم اتلقى الرد واهو كله كلام واهى كلها احلام.......ونرجع تانى لصمتنا ...        

هناك 39 تعليقًا:

ابراهيم رزق يقول...

كلامك مظبوط و مية مية بس على قدر قدرته على القيادة يجب ان تكونى بنفس القدرة

لكن قوليلى انتى عايزاه سائق درجة اولى او ثانية
ههههههههههههه

طبعا بهزر هو الخوف فقط من ان الست تقعد ورا و تحط رجل على رجل
تحياتى

ياسمين يقول...

عجبني وصفك...بس السائق بيسوق لوحده والحياة مش عايز سائق عايز شريك ويكون ف لعبة مزدوجة الاثنين يكونوا أيد واحد لكن هو ادام الناس هو السائق..
ربنا يرزقك بالزوج الصالح يارب

آخر العنقــــــود يقول...

تشبيهك عجبني اوى يا ريماس
جملة قرأتها تنسب لأحد الشقيري لا أعرف اذا قالها حقا ام لا ولكنها عجبتني

يَحلم الرّجُل بِ إمّرَأةٍ كــآمِلَة!

،وتَحلم المَرأة بِ رَجُلٍ كــآمِلْ!

و لآ يَعْلَمُونَ أَنَّ الله خَلَقَهُم لِ يُكَمِّلا بَعْضَهُمْ البَعْضْ.


ربنا يرزقك الشخص اللي يراعي ويتقي ربنا فيكي

دمتِ بسعادة

سواح في ملك اللــــــــــــــــــه- يقول...
أزال المؤلف هذا التعليق.
سواح في ملك اللــــــــــــــــــه- يقول...

هههههه رائعة يانور في وصفك

بس لازم يبقي اسمه ماهر؟؟؟؟

طب اشمعني ماهر يعني

بس اتمني انه ميكونش قثائد الضربة الجوية

هههههه

نور الزواج ده زي الرزق بيبقي مكتوب معاده

تحيتي يانور
0

faroukfahmy يقول...

مش عارف ليه يا نور بشعر براحة فى كلامك وكأن نفسى تكلمنى وتحاورنى وصراحة بريئة لم اعهدها فى بنات اليوم
فعلا الحياة كلها محتاجه الى سائقين مهرة والسائق الماهر يتميز :
بحنانه قبل الدواء الذى يشفى من كل اصابه
مشاركته بروحه لشركته التى ارتضى لها وجودا وحياة
عفة اللسان عند الكلام ليكون بلسما فى آدابه
قريحته الوقادة شأن كل حكيم نابه
وبالاختصار المفيد قد لا تكون كل هذه الفضائل وغيرها غير موجوده ولكن سحر الحب يشعر معه من يحب وهوه غرقان على الآخر انها موجودة بكل تفاخر وشكوكو زمان قالها مراية الحب عاميه تخللى الكوسه بامية
الفاروق

دعاء العطار يقول...

ياتشبيهاتك يانور

اه يابنتى والله كلنا عايزين هذا الرجل

زى ماقولتى تغمضى عينك وانتى معاه وواثقه انه مش هيدخلك فى حيطه

يارب تلاقيه يانور واياكى ماتعزميناش

(: (:

Tarkieb يقول...

ههههههههه وتقوليله انت جاي تشتغل ايه؟ سواقة ياستو هانم....الاول تيجي العربية يعني الشهادة وبعدين الف سواق ح يترمو قدام عربيتك

reemaas يقول...

ابراهيم رزق

ايون طبعا مانا بقول انها لازم تقدر تقود بس كمساعده له مش بداله الا فى حالات

درجة اووووووولى :)

reemaas يقول...

ياسمين

منورانى يا قمرايه
اه طبعا مشتركة بس لازم يكون له الكلمة الاخيره المركب اللى ليها ريسين بتغرق

reemaas يقول...

آخر العنقــــــود

اه والله هم الاتنين وجهان لنفس العمله

اللهم امين يارب

reemaas يقول...

سواح في ملك اللــــــــــــــــــه

لا لا انا عاوزاه ضربه جويه ياسيدى بس يجى
هههههههههههههههههههههه
ومايكنش اسمه ماهر موضه قديمة ده:p

reemaas يقول...

faroukfahmy58

انا كمان والله يا استاذنا نفسى احاورك جداااااااا بس ده لو انا قدرت

كلامك احلى من اللى كتبته مية مرة

reemaas يقول...

دعاء العطار

انا ماعزمكيش انا
طب ده انا هعمل حفله واعزم كل المدونين واياكم حد مايجيش

reemaas يقول...

Tarkieb

بزمتك لو جيبت العربيه هيحصل ده
على ضمانتك يعنى؟

ابراهيم رزق يقول...

السلام عليكم

ممكن ترسلى وجهة نظرك بتعليق مطول شوية مش للنشر عشان افهم

تحياتى و تقديرى

Casper يقول...

جميل البوست يا ريماس ودمه خفيف

اللهم ارزق بناتنا الازواج الصالحين
وارزق شبابنا الزوجات الصالحات

reemaas يقول...

ابراهيم رزق

مش فاهمة؟

reemaas يقول...

Casper

اللهم امين
تسلم يا اسامة

ツSmiLeY AnGeLツ يقول...

حبيت الحوار
هو السائق ده عتقدي انك هتلاقيه
الزمن ده بيكلف كثير
هههههههههههه

كله قسمة ونصيب
يمكن يكون لك خير وانت لسه ماتزوجتي
ياختي كلنا زي بعض
جالسين مستنين يالعريس يجي ياخذنا ياملك الموت ياخذنا
واحد منهم
وهنشوف مين ليه النصيب فينا
انا دائما كده مش متفائلة خير

رغم ان كثير يقولوا لي تفائلي خيرا تجديه

بس تعرفي اني في كثير من الاوقات احمد ربنا على اني ماتزوجت او حتى اتخطبت
يعني انا جالسة في بيت ابي الكل يحبني فيه
ولو مرضت الكل بيوقف معايا
يعني الدلع ده ممكن ماتلاقيه في بيت زوجك

خليها على ربنا
لو مكتوب لك انك تتزوجي هتتزوجي

ربنا يوفقك ياروح قلبي
ويكتبلك الخير

تقبلي مروري ^_^

Bent Men ElZman Da !! يقول...

تشبيهك عجبنى اوى يانور
ووصفك للراجل اللى اى بنت فينا بتحلم بيه
فعلا اى بنت عايزه انسان يقدر يمشى الحياه ما بينهم بمهاره
لان اى اتنين بتواجههم مشاكل فى حياتهم وبتبقى القياده مطلوبه فى الوقت ده عشان يحددو طريق مصيرهم مع بعض
لازم يكون هو سواق شاطر اوى
بس مش بالطريقه اللى يخليه يتحكم فى حياتها لدرجه انه يكون سواق ديكتاتورى يوصلها للطريق اللى على مزاجه

ربنا يرزقك بيه يارب :)

كلامك كله عاجبنى اوى

ابراهيم رزق يقول...
أزال المؤلف هذا التعليق.
ابراهيم رزق يقول...

واضح انها منظومة مش فاهمة انهاردة ههههههه

تعليقك على البوست الاخير عندى لم افهمه فقلت لكى انا عايز تعليق مطول شوية فيه شرح اكتر لو مش عايز تشرحى اكتر يبقى مش للنشر
هى دى بس الحكاية
رمضان كريم

reemaas يقول...

ابراهيم رزق

اهاااااااااااا
ابسطهالك

انا قريت البوست وعجبنى دى نقرة

النقره التانيه انت سايب فى بوستك كونت غريب ده الل مافهمتوش

reemaas يقول...

خواطري مع الحياة

وانا هقولك معاهم يا رشا تفائلى خير مع انى زيك مش متفائله خاااااااااااالص
ههههههههههههه

ربنا يسهلها حبيبتى ومافيش شك اننا فى بيت اهلنا ملكات المحد لله

reemaas يقول...

Bent Men ElZaman Da !!

لا لا دكتاتور لا
ماهو لازم يفهم ويقدر انهها عاوزاه تسلمه القيادة بمزاجها لانها حابه ده فمالهاش لازمة بقى التحكمات

blue-wave يقول...

تفكير سليم وعاجبنى
ربنا يكرمك بيه يارب

هينو يقول...

سواق أخرتها هيبقى سواق ههههههههههههههههههههههههههههههههههه


بصي يا ريمو كلامك سليم وكل حاجة بس برده في حاجة ناقصة
مش عارفة هي ايه بس فيه حاجة ناقصة
التقدير يمكن؟؟؟؟؟ مش عارفة
شئ غبي إنك تبقى عارفة ان في حاجة ناقصة بس مش عارفة ايه هي

محطات ثقافية يقول...

لا اتفق معك في سياسة الصمت فمن كتب هذه المحاورة بهذه الجمالية والدقة أولى به أن يمحي كلمة الصمت من قاموسه
فعلا كلام منطقي جدا ورزين
ابدعت وكل رمضان وانت بالف خير

reemaas يقول...

blue-wave
مبسوطة انه عجبك

منورنى ديما

reemaas يقول...

هينو


اه ياستى شفتى اخرتها

الحاجة الناقصة بقى كانت حق زمان يا هينو بس اللى حواليا محسسنى انها بقت كماليات مش من حقى اطلبها

reemaas يقول...

حلم

وحضرتك بالف خير
الصمت بس من الخنقه اصلى تعبت من الكلام
او مابقاش جايب همه

هينو يقول...

تعرفي يا ريمو أنا سمعت مرة احد الشيوخ كان بيلقي درس للشباب في كيفية معاملة الزوجة وايه حقوقها وازاي نرقى بالأسرة المسلمة لأعلى مراتب السعادة


أنا سمعت كلام منه حسيت فعلا اننا بنتهان وان احنا من حقنا كتير جدا بس بنسيب حقوقنا نضيع وفي الآخر هندفع التمن

كل واحد له أكيد حقوق ده ميمنعش انه يتنازل عنها
بس بتختلف الأهمية من شخص للتاني ومن هنا بيكون الخلاف كمان بيضايقني أوي كلمة أهي عيشة والسلام وظل راجل ولا ظل حيطة
عندي اعتقاد ان ده جهل معرفش بقى اعتقادي سليم ولا لأ
بس انا ايه اللي يجبرني ويخليني أعيش مش مرتاحة
طالما انا عندي يقين في ربنا وإنه يقدر يرزقني فعلا بكل اللي احتاجه


ربنا يدي كل واحد اللي يتمناه
ويبارك له فيه

اللهم آآآآآآآآآآآآآآمين

reemaas يقول...

هينو

كل حرف كتبتيه صح بس اوقات ضغوط الحياة بتخلى الواحد يسلم

Lady E يقول...

عجبني تشبيهك وكلمة يا حبذا :)

وفعلا الأسئلة دي من النوع الرخم :)

reemaas يقول...

Lady E

مبسوطة جدا انك اخدتى بالك من يا حبذا تصدقى ماحدش خد باله منها مع انها مهمة جدا

نورتينى

هينو يقول...

واهو ده اللي أنا خايفة منه ربنا يستر ...........

Tamer Moghazy يقول...

لازم يكون سائق ماهر يا ري ماس..
ولازم كمان يعرف قيمتك..
ولو حصلت فا انا لازم اعمل معاه انترفيو كمان واعمل له كشف هيئة وقيادة. :)
اقولك...
سيبي الموضوع ده علي :)

reemaas يقول...

Timo..
اسيبه ماسيبوش ليه

هههههههههههههه
ايدى على كتفك