الأربعاء، 10 أغسطس، 2011

المجنون والنضارة



من يومين كنت رايحة المنصورة وكنا تقريبا الساعه 11 قبل الظهر, ساعة ما ركبت الميكروباص

العربية ماخدتش وقت علشان تحمل كانت صغيرة وكان اخر راكب فيها راجل عجيب كده مارتحتلوش من اول ما شوفته ماعرفش ليه  حتى لومت نفسى وقتها اصل الراجل كان بيعرج برجله بسبب اعاقة 

ممكن اكون مارتحتلوش بسبب ده؟استغفر الله العظيم.....مش عارفة بقى اهو مجرد احساس

كل ده دار فى دماغى فى ثوانى وخلاص نسيت الحكايه  وجت فى دماغى مليون حكاية تانية

اتحركت العربية...وشيلت نظارة الشمس من على عنيا ورفعتها على الطرحة من فوق كده وغمضت عنيا  منتظرة المسافة تعدى ونوصل............

فجأة لقيت الراجل اياه بيتكلم وبيقول بصوت عاااالى سامعه كل  اللى فى العربية"شيل نظارة الشمس دى ياعم واجعة عنيا"
فتحت عنيا كده وضربت عينى فى اللى جنبى واللى قدامى .......انا متاكده ان ماحدش لابس نضارة غيرى!!!!!!!

هو الراجل ده بيكلمنى ولا ايه؟طيب وماله ومال نضارة الشمس وماله ومالى اصلا ؟؟؟؟؟؟؟
طنشت خالص ولا كانى سمعت وخصوصا ماحدش من اللى حواليا اظهر ادنى ادنى تاثير

جايز تهيأت؟
شوية والراجل كرر نفس الكلام بس بطريقة اوقح ولا حد بينطق......وبدأ يحكى حدوتة ويتكلم مع الناس اللى برا العربيه ولا حد بينطق......ويرجع تانى يوجه كلامه للعم اللى لابس النضارة"انا"

وبعدييييييييين بقى؟طيب اشيل النضارة؟لا طبعا كده الكلام موجهلى رسمى؟ارد عليه ؟لا طبعا عيب اذا كان الرجالة اللى بشنبات ساكتين هتلكك انا واتكلم؟
يكونش العربية كلها تبعه وانا اتخطفت؟وارد ماهو مافيش امان؟بس احنا فى عز الضهر وانا راكبة من الموقف؟ثم ان الناس دى ماحدش بيبص فيها للتانى .اكيد مايعرفوش بعض...

ملخص الحكاية انا اترعبت جدا........

شوية ولقيت الراجل بيقول للسواق هدى على جنب عاوز اجيب حاجة من الكشك اللى على جنب

......بما انه راكب فى اخر كرسى فالسواق تطوع وقاله عاوز ايه انا هنزل اجيبلك بدل ماتنزل الناس   .....راح قاله عاوز سيجارتين فك وكبريت لساعه الفطار....ياسلاااااااااااااام

بصيت للى حواليا على اساس يظهر اى تعبير عليهم ولا الهوا..تماثيييييييييييل

السواق نزل وجابله الحاجة والراجل مستمر وبيكلم اللى لابس نضارة"انا"

اداله السجاير وكمل سواقة ومرةواحدة شمينا ريحة دخان ......ايون الراجل ولع السجارة!!!!

وقتها بس كل اللى فى العربية بدأو يبصوله ووقتها بس السواق اتكلم وقاله ياعم انزل من العربية احنا صاييمين.......

وبدأ الراجل يشتم .....وتحرك كل الركاب لمناصرة السائق وطرد هذا الرجل العجيب من العربية فى قارعه الطريق
ووقتها بس عرفت انهم مش معاه!!!!

خرج الراجل وبدا الناس تتكلم ويقولوا راجل مجنون او بيدروش علشان ينزل ومايدفعش الاجرة

وساعتها ماقدرش اتحمل واسكت.....هو انتم يا جماعه اول مرة تاخدوا بالكم انه مش طبيعى؟

ده كان ناقص يحلفلكوا انه مجنووووووووووووون

على رائ الاستاذ ابراهيم...بلد مجانين صحيح

هناك 47 تعليقًا:

ابراهيم رزق يقول...

ده مش مجنون ده بيستهبل

اسوء شىء هو الاستهبال انا اعرف واحد فضل يستهبل علينا 30 سنة و احنا ساكتين

نجتش من واحد بيستهبل عشر دقائق

و بعدين هى فيها ايه نضارتك تكونش بتغنى و بتقول بابا و ماما ههههههه

تحياتى

سواح في ملك اللــــــــــــــــــه- يقول...

ههههههههههههه

ده كان ناقص يحلفلكوا انه مجنون

لا هو مش مجنون يابنوتة ولا حاجة

هو بيستهب غلي راي ابراهيم

ولو مشيت معاه يعني لو كنتوا سكتتواله

كان ياويلكم

ماهو فيه مثل بيقول يافرعون ايه اللي فرعنك

قال مالقتش حد ينزلني من الميكروباص

ههههه

دعاء العطار يقول...

ههههههههههههههههه

عارفه انا اللى ضحكنى انى تخيلت منظرك وانتى حاسه انك بتتخطفى

ياعينى يانور معلشى

" فى قارعه الطريق "

جامده قارعة الطريق دى D:

Tarkieb يقول...

إبسطي ياستى قعدتي تقول عايزة سائق ماهر جالك راكب مجنون...دعوتك استجابت سائق بيمكروباس وبركابه.......وعليهم مجنون

هينو يقول...

هههههههههههههههههههههههههههههه

ريمو إنتي عسل جدا بأفكر إنك تكتبي كوميدي

بس حلو أوي الناس التماثيل دول شكلهم صايمين هههههههههههههههههههههههههههه

blue-wave يقول...

بيستهبل طبعا
بس الحمد لله على انه غار وما اتضريتيش منه

تاكاشى يقول...

فى ناس كتير فى بلدنا كدا

سواء اللى بيتكلم او اللى ساكت

مش عارف امتى هانتغير

واللى زى دا احسن رد عليه هو انك تحتقريه وماتعبريهوش فى الدزمه


اهم من كل دا

نورتنى المنصورة :D

reemaas يقول...

ابراهيم رزق

مش عارفه والله يا استاذ ابراهيم كان ماله ومالها

شككنى فى نفسى الله يسامحه

reemaas يقول...

سواح في ملك اللــــــــــــــــــه-

اه والله يا خالد انا عماله اتخيل لو فضلوا مستمرين فى السكوت كده كان ممكن يعمل فينا ايه

reemaas يقول...

دعاء العطار

اااااااه يادعاء والله شكيت فيهم رسمى ماهم طالما ساكتين اكيد معاه وانا ضحيه الليله

reemaas يقول...

Tarkieb

ههههههههههههه طبعا اصلى مرزقة يا تراكيب من يومى

reemaas يقول...

هينو

والله يا هينو انا بيحصلى حاجات عجب

reemaas يقول...

blue-wave

ايون الحمد لله ربنا سترها والله

reemaas يقول...

تاكاشى

منورة بيك والله الحمد لله جيت بالسلامة :)

قلب ارهقته الاحلام يقول...

هههههههه

يمكن النضارة كان فيها حاجه مضيقاه او شايف نفسه فيها ولا حاجه

بس احساس انك مخطوفه ده صعب اوي بجد جربته كذا مرة من بعد الثورة احساس مميت يعني
بس كويس انها عدت بسلاااام :)

حمد الله ع السلامه

عباس ابن فرناس يقول...

ههههه
معلش من الاول يعنى ..الراجل ياعينى عاجز والمفروض يصعب على اى حد ومعا ذلك انتى مرتحتيلهوش !
ولذلك برضو هوا كمان مرتحلكيش ولذلك نازل رمى عليكى بالكلام !

تحياتى المستعطرة

saragebaly يقول...

ههههههههههه
طيب ازاي عرفتي تكملي الطريق وجالك مجرد احساس عابر انك مخطووووفة :)

بس الي عايزة اعرفه .. هي النضارة كانت مضيقاه اوووووي كدة ليه يا ترى ؟؟
هههههههه
جميلة طريقة سردك :)
تحياتي

reemaas يقول...

قلب ارهقته الاحلام

اه والله احساس بشع حطى عليه بقى نظرية المؤامرة اللى اشتغلتماقولكيش

ربك سترها الحمد لله

reemaas يقول...

عباس ابن فرناس
هههههههههههه ياسلااااااااام يعنى انا الغلطانة؟اه يانى يا مظلومة يانى

reemaas يقول...

saragebaly

والله ياسارة كنت عماله ادعى ربك يسترها ولو كان استمر الموضوع اكتر من كده كان احتمال كبير اسرخ بقى والله اعلم اى اللى هيحصل
بالنوسبة للنضاره فانا نفسىمش فاهمة كان فيها ايه؟

εïз Semsema εïз يقول...

هههههههههههههه

ياما في الميكروباصات عجايب

انا بردو بشوف العجب

..

والناس اللي بتدخن في نهار رمضان دول .. كتير اوي !! انا اتصدمت لما شوفت كدا

dodo, the honey يقول...

لقد جعلتِ فمي يفترُ عن ضحكة كبيرة تزداد مع نهاية كل سطر .
تجربة ممتعة !

تحيآتي لكِ !

هينو يقول...

معلش حبيبي انت الكبير

sun of free dom يقول...

بجاحة .. وزيه كتييييييييييير وفى المنصورة كماان هههههه

reemaas يقول...

εïз Semsema εïз

اه والله على اساس ايه مش فاهمة جايز السجاير مش مفطرة؟
رنا يهدى

reemaas يقول...

dodo, the honey

ممتعه ومرررررررررررررعبه

مبسوطة انى كنت سبب فى الابتسامة دى

reemaas يقول...

sun of free dom

اه والله تخيلى

ربنا يسترها بجد حاجة فظيعه

Lady E يقول...

هههههههههه يا نهار أبيض

يا عيني يا بنوتة احساسك اكيد كان صعب اوي المفروض يقولوا دي الكاميرا الخفية في الأخر :)

موضوع التدخين الصبح في نهار رمضان ده اتصدمت بيه في سنة أولى كلية لقيت شباب كتير بيدخنوا فسألت ولاد عمي فقالولي هما مفكرين ان التدخين مش حرام وهما صايمين علشان التدخين مبينزلش المعدة ومش مغذي :) وجهة نظر

الاحلام يقول...

هو انتى الى كنتى لابسه النظاره يا خبر ما اخدتش بالى منك على ةالعموم حصل خير الراجل بس مخنوق من مراته شويه وعاوز يفرغ الشحنه الى بداخله على شان كده فطر على سيجاره هههههههههههههه
والله اختى العزيزه للاسف النمازج دى كتيره عندنا والاشهار بالافطار فى نهار رمضان شىء خطير جدا لانه اقوى من القتل عند الله سبحانه وتعالى عموما الحمد لله الى ربنا سلم وربنا يحفظك دائما تحياتى الاحــلام

reemaas يقول...

Lady E

انا كنت مستنيه حد يقولى حكايه الكاميرا الخفيه دى بس للاسسسسسسسسسف طلع جد

ولاد عمك غلطانين هم عارفين كويس جدا انها مفطرررة بس بيستهبلوا

reemaas يقول...

الاحلام

اه والله يا استاذ محمد انا كنت حاساها بجاحة علنى ربنا يسترها يارب

Bent Men ElZaman Da !! يقول...

ههههههههههههههههههههههههه
حلوه ناقص يحلفلكوا انه مجنون دى
الناس فى الصيام تقريبا بيتنحوا
عشان كده ماحدش بيرد عليه
بس ليكى حق بجد تترعبى

ريــــمــــاس يقول...

صباحك غاردينيا نور
وحشتيني
وحشتيني
جداااااااااااااااا
بس كمان ضحكتيني جداً
وتخيلتك وانتي بتبصي للمجنون
امم دا لو مجنون دا صراحة باين بيستهبل بس تعالي هنا
هي نظارتك شكلها ايه هههههههه
ماتكونش بتولع بس برضو كنتي في عز الظهر هههههههه
بجد ضحكت وكمان على بلد مجانين صحيح بس بحبها :) "
؛؛
؛
لروحك عبق الغاردينيا
reemaas

Timo.. يقول...

بلاقي نفسي في مدونتك قووووي يا نور..
ايوة المرة دي مش باقولك ري ماس..
ديما بافتح صفحتها واسيبها في الخلفية لانك بجددددد بتعرفي تختاري الاغاني الحلوة والمميزة وكمان الـ(فريدة)
عشان كده عاوز اعترف لك بحاجة..
انا....
بحب...
مدونتك..
.........
.....
............قوي (';')

Timo.. يقول...

شوفتي بقى..
الاغاني الحلوة خلتني انسى اعلق على البوست..
بمناسبة الراجل اللي بيستهبل ده متهيالي ماجاتش عليه يعني..
فيها ايه لما يستهبل دقايق من نفسه اذا كان فيه ناس بتستهبل بقالها سنين..!!

وبالمناسبة بقى..
انت كنت في المنصورة ليييييييييييييه..؟؟؟؟؟؟؟؟؟
والسؤال ده اجباري :)

reemaas يقول...

Bent Men ElZaman Da !!

بيتنحووووووووووووووووووووووا
جيبتى المفيد يا بنوتة اهم كانوا متنحين

reemaas يقول...

ريــــمــــاس

انتى كمان وحشتينى كتيييييييييييييييييير
ايه الغيبة دى كلها يابنتى

اه من ناحيه مجانين فدول رسمى يعنى

reemaas يقول...

Timo..

وش مكسووووووووووووووووف


مش قادرة اقولك الكلمتين الحلوين دول فرحونى اد ايه

يارب ديما تفضل تحب مدونتى كده :)


وميرسى جدااااا انك حاسس ان المدونة(فريدة)
بالنوسبة للاستهبال فهو اه كتير اوى بس لما بيبقى مرعب فبجد الموضوع بيختلف

كنت فى المنصورة ياسيدى علشان اجدد اجازتى من الحكومه مانا محسوبه من اهلها ههههههههه

reemaas يقول...
أزال المؤلف هذا التعليق.
Timo.. يقول...

طيب بما انك موجودة بقى..
ليه مش حاطة ميل ليك او حتى فيس بوك في البوفايل عشان الناس اللي عاوزة توصل لك بسرعة جدا..؟؟

reemaas يقول...

هقولك ليه ياسيدى
علشان انا مش بعرف احطهم
ههههههههههههههههه
http://www.facebook.com/profile.php?id=100000677530802

ده لينك الفيس بوك حاول كده تجيبه وانا منتظراك

Timo.. يقول...
أزال المؤلف هذا التعليق.
reemaas يقول...

لقيتك اكيد

Just Me يقول...

عَـذبُ الـكَـلام

Just Me يقول...
أزال المؤلف هذا التعليق.
Just Me يقول...

السلام عليكم

ياما شفنا من هذه المواقف .... الحمد لله جت سليمه

شكراً لحضرتك علي إعجابك الشديد بالمدونه
والله هذا الإعجاب بالمدونه خلاني أقرر اني أكمل

لأني كنت قررت أو علي وشك أقرر أني أغير ستايل المدونه
لأن المقبلين عليها قلائل ... مش عارف ؟ .. يمكن الناس مش بتدون في رمضان كتير
يمكن ستايل المدونه غريب

مشكله أي مدون مش في تصميم المدونه ده أسهل شئ
المشكله في الجمهور

عارف أني رغيت كتير
شكراً لحضرتك

reemaas يقول...

Just Me

دون انت والناس هتيجى صدقنى

انا اول مادونت ماكنش حد بيتابع وصدقنى ايامها ماكنتش فارقه معايا كنت بدون علشان افضفض بس مع الوقت اتعرفت على مدونين وعجبتنى جدا مدوناتهم وبقم اصحابى ومتابعه جيدة ليهم وبدأوا هم يجولى كمان والحكايه بدأت تاخد مسار تانى خالص