الخميس، 17 مارس 2011

وانا فى الميكروباص

ركوب الميكروباص ده محتاج زهن صافى على فكرة علشان تدقق فى كل اللى بيحصل واللى بيتقال حواليك
وبما انى بحب اسمع جدا اكتر من حبى للكلام<على فكرة دى مش موهبة زى ما الناس فكرة دى حاجة انت بتتعلمها لو حابب>فركوب الميكروباص ده ممتع بالنسبالى لو دماغى فاضيه ومش مشغولة امر جلل يعنى

امبارح بقى كنت رايحة المنصورة والمسافة من مدينتى لمدينة المنصورة ساعه تقريبا
عاوزة اقولكم ان فى خلال الساعه دى اتفتح فى الميكروباص كميه موضوعات صعب جدا حصرها<موضوعات عامة يا جماعة لتفتكروا انى برمى ودانى ولا حاجة>من الموضوعات دى حبة حاجات كده لفتت نظرى هلخصها ليكم فى نقط

اول حاجة:السواق راجل بسيط جدااا واعتقد انه مش متعلم اساسا لقيناه مره واحده
               بيقول الحمد لله يارب انك وريتنى يوم فى مبارك ومراته فالناس ابتسمت
              وسأله واحد انت كنت متضايق منه كده يا اوسطة؟ قال منه هو لا لحد 
              ماتتثبت السرقات وقتها هتضايق بجد فالناس استغربت امال انت ايه
             اللى مزعلك منه رد بقى باغرب رد ممكن اتخيله
              "انا متضايق ومتغاظ من سوزان هى اللى قوت الستات علينا وخلت
               مراتى تخلعنى!!!!!!!!!"
               من هنا عرفت ان كل حد بيدور على شماعه للمصايب اللى حصلتله فى 
                حياته
تانى حاجة:برده كانت السواق الفانى اياه الراجل كان ماشى والطريق زحمة جدا
               وكان شادد الحزام ومرة واحدة لقيناه راح فاكه وبيقول بصوت عالى
               "ده انا الوحيد اللى رابط الحزام فى كل السواقين اللى حواليا ليه يعنى"
               
                وقتها برده عرفت ان مفهوم الحيات عندنا هياخد وقت كبييير على 
                  مايوصل بكل معانيه لكل الناس
 تالت حاجة:اتفتحت موجة من كلام الناس بقى عن الثورة اكيد ولقيت واحد قدامى
                بيقول والله ياجماعه ده انا رايح المنصورة للمرور اشتكى موظف 
                 التراخيص اللى عندنا مش قابل برخصة عربيتى الاجرة وعاوزنى 
                 اغيرها بحاجة تكلفنى 1000ج رد عليه واحد وقاله طب وانت اي اللى 
                 موديك المرور عليك والحاكم العسكرى اللى عندنا الجيش اللى بيحل
                 اى مشكلة  ياسيدى
                رد الراجل صاحب المشكلة لا ياسيدى اروح الاول لاولى الامر ماحلوهاش
                  ابقى اروح للجيش
                  عجبنى جدااااااااا الوعى ده ويارب يبقى عند الكل

رابع حاجة:فى وسط الكلام بتاع الناس لقيت واحدة ست جنبى شايله طفل على ايدها
               بتكلم نفسها وبتقول والله انا نفسى حد يقول لبتوع الجيش دول ان
                الاسعار ولعت ده كيلو الطماطم بقى 4ج وكيلو الخيار بقىب4ج
               وحتى الفول النابت اللى طول عمره ب1ج بقى ب4ج
               ماقدرتش اسكت انا بقى ورحت قولتلها هو سعر موحد ولا ايه كله 
               ب 4 راحت بصتلى كده وقالتلى لا ياستى كيلو الليمون ب8ج احسبيها
               كده معايا الواحد يعمل ايه 
                بصراحة ماعرفتش ارد
خامس حاجة"وسط كل الكلام ده احب انوه ان القراءن كان شغال فى العربية
                   وعالى جدا واذ فجاءة والكل مندمج فى الحديث يطلع واحد من اخر 
                    العربيه ويقول وطى الصوت ياسطة السماعات ورا ودانى دوشتنى
                   طبعا ممكن تتخيلوا اللى اتقال للراجل واللى اتقال بصوت واطى وهو 
                  ماسمعوش
                     ياخى حرام عليك ده قراءن
                    ماهو لو كان اغانى كنت زمانك مبسوط
                      يعنى انت الوحيد اللى تعبان ياسيدى
                      اه والله عنده حق ماحدش سامع اصلا
                    ورينا شكل اللى بيتكلم ده
                     وهوب راح السواق حسم الموقف واطفى الراديو
                      وسكتت الهمهمه


انتهت الساعه على خير والحمد لله وفضلت انا فترة بعدها دماغى مشغول بتحليلات الناس البسيطة للموقف بعيدا عن تعقيدات المحللين 

فضلت افكر ان كل واحد بيحلل الموقف حسب المشكله اللى بيواجها او الموجودة بحياته بعيدا بقى عن قضيه الديموقراطيه والحريات اللى شغلة البعض الاخر

ومن الميكروباص البسيط وجدت ان المشكلة المشتركة حاليا بين الكل هى الامان والاستقرار وماغير ذلك كله عبارة عن اولويات تختلف من شخص للاخر حسب احتياجات
                                                               ويجعله عامر





هناك 19 تعليقًا:

مصطفى سيف الدين يقول...

محدش ينكر اننا في فترة انعدام توازن
والدليل ان كل حاجة ومشكلة ملقاة على عاتق الحاكم العسكري
لازم بقى نفوق ونصحصح ونبدا ننظم نفسنا من جديد
وكل الناس ترجع شغلها وتصبر قبل ما تطالب بالتغيير لازم كل واحد يتمسك بمبادئه
التغيير لا يطول المبادئ والثوابت واي تغيير هيمس المبادئ هتنتشر الفوضى
تحياتي وان شاء الله القادم افضل

reemaas يقول...

اه والله يا مصطفى نفسى ده يحصل بس الحكايه محتاجة وقت فعلا

;كارولين فاروق يقول...

بصي يا نور في مشكله
منتشره جدا وهي ان مثلا
لو حماتي زعلانه مني يبقي السبب في الريس
او لو الدنيا مطره يبقي العيب في الحكومه
حاجات غريبه بصراحه
بس اقدر اقولك ان كله متلغبط علشان
البلد بتقوم من جديد المفاهيم اتشبكت

Casper يقول...

ما الحياة التي نعيشها إلا رحلة قد تجسدت صورة مصغرة منها في هذا الميكروباص وما أدري ماذا أقول أمام ما يحدث وما أراه أنا أيضا لكن ما أستطيع ان أقوله هو إن الله لا يغير ما بقوم حتى يغيروا ما بأنفسهم

_________

خالص التقدير لفكرك وقلمك
تقبلي مروري

Casper

سواح في ملك اللــــــــــــــــــه- يقول...

للشعوب قلوب
قديكونوا عي مستوي غير جيدمن التعلم
بس الشعوب لما بتحس الصدق في قلب الحاكم
ايا كانت مشاكلها اليومية بتحتمل
المشاكل مادام خناك طاقة نور في نهاية النفق
وهذا يجعل صبرهم ذوا معني
من اخطاء الرايس السابق
هو قتل الامل في قلوب المصريين
تحيتي

FAW يقول...

إنتي بقي اللي بتقعد تسمع الناس في الميكروباصات :))

فعلا كلام الناس في المواصلات أكتر حاجة بتعبر عن الرأي العام , عاملة كده زي تعليقات المقالات في الصحف الإلكترونيه , تقدري منهم تفهمي ثقافة شعب بأكمله

أكتر حاجه بتضايقني في المواصلات لما ألاقي حد بيتكلم في الموبايل بصوت عالي و قاعد يتكلم في تفاصيل حساسة في حياته ويقول أسماء و حوارات محدش بجد عايز يسمعها !!

تحياتي

reemaas يقول...

ههههههههههههههه اه والله يا كارولين يعنى مثلا انا سمعت واحد كان عاوز يغير النظام لانه شبه المدام بيتاعته مايصحش يستمر 30 سنة
ههههههههه

reemaas يقول...

تسلم يا كاسبير وهو فعلا التغيير بدء بس هياخد وقت كل اللى اتمناه وبطلبه من ربنا ان الوقت مايطولش بس

reemaas يقول...

اول مرة اتفق معاك على حاجة يا خالد فى الفترة الاخيره
فعلا من اكبر الاخطاء محاولة قتل الامل وبقول محاولة لان اللى بيحصل بيدل انها فشلت

سواح في ملك اللــــــــــــــــــه- يقول...

http://www.youm7.com/News.asp?NewsID=371433


خدي الرابط ده

reemaas يقول...

ايون ايون يا مصطفى مانا ماحبتش اتقل عليكم واحكيلكم تفاصيل حكايه السواق ومراته اللى خلعته ولا تفاصيل الراجل اللى مسود عيشه اخت مراته ماعرفش ليه
اييييييييييييييييه حودايت
منورنى

reemaas يقول...

طب هقولك على حاجة يا خالد من غير ضرب والنبى
انا مش هصدق الا لما النائب العام هو اللى يعلنها لان اليوم السابع لحد يومنا هذا اعلن كذا خر وكذبتهم على التليفزيون بعدها
احنا قولنا من غير ضرب ماشى؟

سواح في ملك اللــــــــــــــــــه- يقول...

ماشي يابنوته
هههههههههه
انا معاكي للاخر
بس اي ثراء فاحش بيبقي ليه دلالات بنشوفها
وافتكر استشراء الفساد ده كان خير دليل
تحيتي يااطيب نور

سندباد يقول...

اعتقد انها فترة وهاتعدي احنا لسه في فترة انعدام ووزن وسنة اولي ديمقراطية انما اتمني ان يكون القادم افضل
سعيد بمروري الاول وليس الاخير انشالله

reemaas يقول...

ان شاء الله تدوم زيارتك يا سندباد ويارب ننجح فى سنة اولى بتفوق

Ahmed Sabry يقول...

السلام عليكم
ازيك يا دكتوره يارب تكوني بخير يارب
في الاول اقولك تسلم ايدك يا جميل
بس تعرفي الناس ده مغيش عندها وعي خالص في المستقبل او ايه الي بيحصل زي ما اقلتي كل واحد بيفكر ازي يحل المشكله بتعته وخلاص اما البلد فيها ايه مع العلم اني في ناس لسه لحد الان مش عارفه في ايه او الي بيحصل وكل الناس بتتكلم على الدستور وكمان الناس بتقول نعم طيب نعم على ايه ولا لا على ايه ومش مفيش حد بيكلم على اهم حاجه وهيه اني فيه
شبكة التجسس الإسرائيلية في مصر وطبعا ده مهم بس مين يفهم صح ولا ايه ربنه يستر على مصر يارب

reemaas يقول...

اكيد يا احمد ربنا يستر على مصر واعتقد ان دى من اهم الاسباب لنعم ان الجيش يرجع لوظيفته بقى

همس الحنين يقول...

صباحك ورد ريماس
انا مش عارفة اتأخرت من اخر مرة كنت هنا ازاي
عارفة بحب في مدونتك بساطتك في الكلام وبحس وانا بقرأ لك وكأني موجودة ساعة الحدث ودا بيدل على صدقك وعفويتك والحقيقة الي بتقليها نيجي بقى للميكروباص ولكلام الناس الي بيحصل دلوقتي في مصر طبيعي والناس مهما مارست حياتها وانشغلت بكل حاجة تفضل مشغولة بمصر نفسها وبكل حاجة عماله تتغير سواء للاحسن او الاسوأ حتى الاطفال الجاية حتكبر على مفاهيم وافكار مختلفة جداً
بجد مبسوطة اني كنت هنا
دمتِ بسعادة ومصر بامان
تحياتي

reemaas يقول...

منورانى يا همس واوعى تتاخرى تانى مفهوووووووم

كلامك اكيد صح وفعلا احلى حاجة ان اولادنا هيكبروا على تفكير مختلف تماما