الثلاثاء، 22 مارس 2011

يوم حلووووو






من احلى الايام ويمكن احلى يوم عدى عليا من بداية السنة العجيبة دى

ليله 19 مارس ويومها بجد كانوا اكتر من روعه كنت فرحانة فرحانة جدااااا


السبت بالليل اتصلوا عليا شلة المجانين بتاعتى ولقيتهم متفقين بربطة المعلم انهم يتجمعوا عندى وده كان لسببين اولهم انى مش فاضية اروحلهم الصيدليه حكمانى وتانيهم ان المدرسة اللى ناويين نصوت فيها جنب الصيدلية من باب معاينة موقع الحدث يعنى

هاتيجوا امتى يا عيال قالوا على 7ونص كده<ضاعت حلقة العشق الممنوع يلا ماعلينا فدى مصر>
وقد كان على 8 كده اتجمعوا كنا اتنين صيادلة واتنين تربية انجليزى وطبيبة وواحدة دبلوم صناعى ..وانا

متجمعين ليه بقى ؟...علشان نناقش طبعاونشوف هنعمل ايه فى حدوتة بكرة دى

انا وواحدة من الصيادلة والطبيبة كنا نعم والباقى لا ونقنع بقى فى بعض كل واحد مقتنع بسبب وشايف ان ده احسن وضع من وجهة نظره

احسن وضع لايه؟....لبلدنا طبعا
بزمتكم مش حاجة تفرح وانتهت الناقشة على ان كل واحد متمسك برائيه ومقتنع بيه اكتر من الاول وانتهت الليله وروحنا وجه يوم الاحد الموافق 19 مارس2011
احفظوا اليوم ده علشان اصلا مافيش معاكم اى خيار تانى هو كده كده يوم محفوظ فى الذاكرة

اتجمعنا فى الصيدليه عندى على الساعه 2 بعد الظهر ورحنا على المدرسة اللى بتبعد عننا حوالى 100متر واحنا مبتسمين جدا وكل واحدةماسكة بطاقتها فى ايدها

على باب المدرسةاتنين عساكر من الجيش.....مبتسمين!!!ميلت على سماح وقولتلها هم مبتسمين ولا انا اللى بيتهيألى وشايفة كل حاجة بمبمى قالتلى اه يابنتى اهى ابتسامة عريضة اهى

وقفنا فى الطابور اللى ماكنش طويل اوى يعنى ودخلت صناديق وناس بتسهلك كل حاجة وواحد قاعد كده عليه الهيبة عنيه بتراقب كل اللى حواليه بطريقة تحسسك بالامان اخدت الورقة بعد ماسلمت الراجل البطاقة ياخد بيانتها وانا ببص حواليا مافيش ستارة!!   مش مشكلة وبحركة تلقائية والله العظيم حطيت الورقة فوق الصندوق ورحت معلمة على موافق وانا بدارى على الورقة   تسالنى ليه هقولك ماعرفش!  الاحتياط واجب برده  حطيتها جوا الصندوق ومضيت قصاد اسمى وجاية اخرج لقيت اللى بيندهلى ويقولى صوباعك   ....اتلخبطت بينى وبينكم مانا جديدة لنج فى حكاية الصناديق والصوابع دى واصبح صوباعى بمبى ويا له من احساس
 حلو اللون البمبى:)

خرجنا وتفرقنا كل واحدة راحت تشوف حالها بقى وفضل اليوم جميل فى نظرى رغم عدة محاولات لتحويل الاحساس ده لزعل ولغيظ ولكن هيهات

كنت متوقعه انى اسمع ان فى لجان فى مصر حصل فيها خناقات عادى وبالتالى ماندهشتش ولا اتغير احساسى الجميل

عرفت بمحاولة ضرب والتهجم على البرادعى امممممممم يعنى طبعا العنف مرفوض بشتى انواعه بغض النظر عن انى مابحبوش وبغض النظر عن انه غلطان انه يغير لجنته فى اخر لحظة ويختار لجنة فيها ناس كتير كده ومش معروف شعبيته فيها عامله ازاى مش وقت استعراض يعنى  وبغض النظر عن حاجات كتير العنف مرفوض
بس بررررررده انا ماتهزتش مبسوطة لسه

وفضلت الحالة دى معايا وانا مستنية النتيجة ومجهزة نفسى لكل الاحتمالات عادى جدا

نعم ..هى النتيجة   مش عارفة اقول بقى فرحتى كانت علشان نعم فازت ولا علشان عرفنا اللى جاى بصورة عامة شكله ايه ولا علشان صوتى فرق ايا كان النتيجة 

المهم انى فرحاااانة

لحد ماجت العاشرة مساء ومنى الشاذلى وضيفها ضياء رشوانالخبير الاستراتيجى فى مركز الاهرام...كلام مستفذ الى ابعد الحدود عرفته على انه حد محايد لافرح بالاه ولا باللاء مافهمتش ازاى يعنى ماصوتش؟؟

لا هى كانت بتهرج الراجل مصوت وزى الفل وقايل لا عادى يعنى وحلل الموقف على ان اللى قال نعم معظمهم مابيعبروش عن الدستور اد مابيعبروا عن الاخوان او السلفيين او الاقباط او اللى متعودين على نعم وخلاص او اللى شايفين ان الاخضر احلى من الاسوداو.......................مش فاكرة الباقى بس مافيش فيهم حد بيبعبر عن رائيه تقريبا

ويراهن الخبير بوظيفته وبقلمه كصحفى ان اغلبيه اللى صوتوا ماقروش التعديلات اصلا وكأن اللى راحوا دول مابيفهموش او وكأن الحال ماتبدلش واحنا لسه مامالناش رائ
او وكأن الناس مش شايفه التعديلات طول النهار بتتفصص من المناقشة على شاشات التليفزيون بكل اتجاهتها تقريبا

واللى خفت منه حصل .....بدء ضغطى يعلى وكادت محاولة تعكير الفرحة تنجح لولا

الرمود كنترول ربنا يصلح حال اللى اخترعه   وطبعا غيرت القناة

وبقية الفرحة

سؤال بقى وده لجهلى باجابته وليس للسخرية للعلم

هو يعنى ايه خبير استراتيجى؟
                                                                     يجعله عامر   

هناك 6 تعليقات:

سواح في ملك الله- يقول...

صباح الفل يانور

لازال هؤلاء النخبة يقسمون الشعب الي نصفين
النصف الراقي اللي هو يعني بقي فكر كويس
وتوصل لنتيجة ((لا))
والنصف الموجه وهواللي قال نعم
عشان فلول الحزب الوطني عايزين نعم
والاخوان المسلمين عايزين نعم
يعني هما شايفين 77 في المية من المصريين مابيفكروش
طيب سؤال لوالاخوان والوطني قالوا ان الثورة حلوة
تبقي الثورة مش حلوة مثلا؟؟
عشان الاخوان والوطني قالوا انها حلوة؟؟؟
الحقيقة يانور انا شايف ارتباك في مجموعة النخبة اللي بتطلع في التلفزيون
انا شايف انهم لحد دوقتي مش قادرين يفهموا ان شعب
ممصر بيفهم كويس وعا رف مصلحته
واللي بيقولوه ده استخفاف بعقولنا
الظاهر انهم خدوا علي المعا رضة لمجرد المعارضة
وعشان يعا رضوا لازم يدوروا علي حد شايفين انه
قوي ومؤثر عشان يغا رضوه وبالتالي يبقي بيوجه
الناس
اما حكاية خبير استراتيجي دي
يعني محلل سياسي وضياء رشوان ده خبير في شئون
الجماعات الاسلامية
تحيتي يابنوتة

reemaas يقول...

يا صباح الوردات يا خالد اخييييييييييييييييييييييرا اتفقنا
ههههههههههه
اه فعلا انا شايفه ان ده الوضع الحالى وكان لو رئينا اتفق مع الاخوان ومع بواقى الحزب الوطنى يبقى لازم احنا نراجع رائينا

وكان الاخوان والحزب دول ناس احنا مستوردينهم من برا

بالنوسبه للخبير فيخوفى ليكون كل محللنا المحاييدين كده

صباحك سكر

Casper يقول...

بجد كان يوم أكثر من رائع وأظنه أول عيد للديمقراطية في مصر لأول مرة في حياتي أشوف طوابير والناس تتقدم إليها بكل شغف وحب

__________

أي ما كان هذا الخبير الاستراتيجي وأي ما قاله فهو يقول ما يقول فليس ما يقوله قرآنا بل هو مجرد رأي
قد لا يمت للحقيقة في شئ

ويراهن كما يريد وأنا مثلك أسال ما معنى خبير أظنها من وجهة نظري واحد قرا كام كلمة في كام كتاب وخلاص لأنه حينما يقول أو يدعي أو يشير ظاهرا أو مضمونا بأن من قال نعم لا يعرف لما قال نعم إذن فليس هذا بخبير أصلا ...

آخيرا
كل يؤخذ منه ويرد إلا الحبيب صلى الله عليه وسلم

__________

خالص تقديري لفكرك وقلمك
تقبلي مروري

Casper

ابراهيم رزق يقول...

اليوم كان حلو
وسعدت جدا باقبال الناس و سعدت بالنتيجة رغم انها عكس رائى اما الوعى فهو قادم
اما حكاية خبير استراتيجى فارجو ان تزورينى فى مدونتى المتواضعة فقد حاولت الاجابة عليه فى بوست عنوانه التوك توك و التوك شو ك
خالص تحياتى و سعيد بزيارتك للمرة الاولى

reemaas يقول...

منورنى يا كاسبر وفعلا هو كان عيد للديموقراطيه

reemaas يقول...

حالا جايه يا ابراهيم
منورنى