الاثنين، 28 فبراير 2011

فى تغيير

مافيش شك ان كلنا شايفين ان حال البلد بيتغير وان حال الناس كمان بيتغير ولازم يتغير فى مننا اللى شايف التغيير ده للاحسن وفى مننا اللى شايفه للاسوء وفى مننا اللى مش عارف احنا رايحين فين

انا نفسى طول الشهر اللى فات ده تضاربت مشاعرى تجاه الاحداث بطريقه متفاوتة

الاول كان فيه قلق وبعدين ترقب ويليه غضب ثم حزن ثم شك فشك فشك وتتسارع المشاعر بع كده من فرح لقلق تانى لعدم فهم ولحد دلوقتى حاسة انى مش فاهمه وان ماحدش فاهم علشان يفهمنى وكل واحد فهمه مقضيه وعايش على كده ويبقى السؤال
هو مين مع مين ومين ضد مين؟؟؟؟؟؟؟؟؟؟؟؟؟؟؟؟؟؟؟؟؟؟

صدعتكم انا بدماغى واللى فيها بس حبيت اختصر الحكايه لو صديقتى هبه حبة تدخل دماغى هههههههه مانصحهاش الصراحة

المهم قررت انى وسط كله ده محتاجة انى افرح بحاجة اوابتسم بسبب حاجة غير القذافى طبعا
فقررت انى اشوف اى اللى اتغير فى الناس اللى حواليا شخصيا من يوم 25 يناير لحد النهاردة
واحد:رغم انى من مشجعى كرة القدم بس مبسوطة اوى ان فيه حاجة لامة الناس وشاغله تفكيرهم غير الكورة

اتنين:عمرى ماتخيلت ان ممكن حوار يحصل بينى وبين سمسمة وشوشو صحباتى
          ويكون مضمونه الدستور ومواده 

تلاتة:عمرى ماتخيلت انى هدخل على البنت اللى معايا فى الصيدليه والاقيها فاتحة 
            على قناة غير الاغانى والافلام وياللعجب اخبارتطور مذهل
اربعه:ماتخيلتش ان ممكن يجى اليوم اللى تبقى السياسة محور حديث بين اى تنين
           من غير ما الاول يقول للتانى اى الكلام الكبير ده

خمسة:عمرى ماتخيلت انى ممكن انقد وضع معين ولا حد معين من غير ما امىمثلا
           تقولى بس يانور ماتقوليش الكلام ده بره مش عاوزين مشاكل

ستة:عمرى ماتخيلت انى ممكن اقول اى نقد ومحدش يقولى شووووووو وطى صوتك
          هتودينا فى داهيه

سبعة:عمرى ماتخيلت انى هفتح الفيس بوك مالاقيش ناس بتلعب كويزيز ولا بتكلم 
        خالتى فتحية(وطبعا المتقدمين فى الفيس بس اللى هيعرفوا فتحية دى

ثمانية:ماتخيلتش انى هشوف علم مصر مرفوع على العربيات فى مناسبة غير
             المباريات الدولية

تسعة :ماجاش بردة فى بالى انى ماعتش هسمع كلمة معلش اصلى ماليش فى 
             السياسة والجميل بقى ان لما حد قال لحد تانى قدامى وانت ايش عرفك
               ولا فهمك فى السياسة رد عليه وهو ينفى تلك التهمة الفظيعه ومافهمش
                ليه يعنى لا افهم ونص

عشرة: وهى الاهم بالنسبالى  يا جماعة انى من يومها مابقتش اتسأل السؤال المعهود
            هو انتى ليه ماتجوزتيش لحد دلوقتى؟!
          بقالى دلوقتى شهر بالظبط ماسمعتوش لان الناس فى بلدنا انشغلت بحاجة
            تانيه وهى مصر وطبعا مصر اهم من الموضوع ده بكتير وياااااااااااااارب
              ياااااااااااااااااااارب يفضلوا مشغولين بيه وينسونى شوية

ومن السابق ذكره وردا على اللى بيقولوا مش شايفين تغيير ايجابى انا شفت ولمست  
 وحصلى تغييرات ايجابية ممكن يشوفها البعض تفاهة او مش مهمة بس انا شايفاها 
غير كده لانى ماتخيلتش فى يوم انها ممكن تحصل وبالتالى هى تغييرات تغييرات دىولا مش تغييرات؟
                                                                    ويجعله عامر     

هناك 19 تعليقًا:

سواح في ملك اللــــــــــــــــــه- يقول...

احنا يانور في هذا العهد البائد
كاننا كنا عايشين في البرزخ مستنيين يوم الحساب
انا كنت وانا ماشي في الشارع قبل 25 يناير بشوية
كنت بشوف الناس بتكلم نفسها بجد وكل ماتخرج من نقرة
تقع في دحديرة
انا كنت لما اشوف ناس بتهرب من الشغل
عشان ماتش كورة كنت باتخنق من عقلية الشعب الفاضية
احيانا الناس كانت بتبقي في عرض عشرة جنيه
وتزوغ من الشغل عشان ماتش
علما باننا عمرنا ماجبنا كاس العالم لمصر
مش دي كانت خيبة تقيلة
وكاننا كنا اهل الكهف واستيقظنا من رقدة طويلة

Ahmed Sabry يقول...
أزال المؤلف هذا التعليق.
Ahmed Sabry يقول...

كلام جميل اوي وانا معاكي في كل كلامك حتى احنا الي بره مصر بقى في اختلاف في كل حاجه وتفكير في مصر واهل مصر ومصر جديده ازي وامتى محدش عارف بس في تغير في التفكير في الاهتمام زي ما اقلتي
بس عارفه سعات بسال نفسي لو مصر حتكون كويسه هل اقدر ارجع مصر واشتغل واعيش في بلدي من غير اي حجات كنت بشوفها او كانت بتحصل كل الناس هنا بتقول لي اي حد مصر لو مصر حتكون كويسه حترجع ولا في ناس تقولك طبعا لو حتكون زي ما احنا عايزين طبعا اكيد ارجع مصر واعيش في مصر
نقسي مصر تكون بي اهل ديما فوق الجميع
يارب مصر تكون في احسن حال يارب
تحياتي

faroukfahmy يقول...

اختى نور
اول مرة اقرأ كلام ايجابى كلام مبشر وليس منفر ، كلام صريح وليس جريح ، كلام يغلب عليه الحلاوة والنقاوة، اول مرة تلتقى عينى بعين ترى ان هناك تغيير ، عين نرى النور ولا تنكر ضياه ، اكثر اله من تفاؤلك نور

;كارولين فاروق يقول...

احنا اتغيرنا كتير بعد الثوره
والخوف اللي كان جوانا اتمحي
من قاموسنا واصبحنا اكثر وعيا
وادراكا حتي اطفالنا اصبحوا يتكلمون
عن السياسه واصبحوا محللون سياسيون

هبة فاروق يقول...

انا شايفة ان الثورة غيرت حاجات كثير جدا فى حياتنا كفاية اننا اتغيرنا للاحسن وبقينا عندنا شجاعة اننا نتكلم بدون خوف ولا قلق ولا رهبة اتمنى نفضل كدة على طول احرار فى كلامنا وافعالنا
ومتخفيش يا نور مش ناوية ادخل جوة دماغك ههههههههه
لانى عارفة انك ذكية ولماحة ومع الوقت كلنا حنفهم اية الحكاية ونستوعب الاحداث لان الثورة شىء جديد علينا
تحياتى لارق بنوتة فى الدنيا

Unknown يقول...

و لسه التغيرات اللي جيه كتييير أنا بعيش أسعد أيامي و أنا بشوف الناس اللي كانوا ماليين الدنيا فساد و مأخرين مصر سنيين و هما بيتساقطوا سعيده بالشباب الايجابي اللي خلف كل ظنون الناس و أثبت للعالم اننا مش هنسكت تاني و مش هنضيع حقنا و لو بعد حين, حاجه واحده اللي مزعلاني هي الناس اللي كانت بتنافق النظام و دلوقتي بينافقوا الشباب الأمور اللي قام بالثوره و المنتفعين اللي لسه بيدافعوا عن نظام عقيم خلى الناس تبيع ولادها و تعيش في المجاري لمجرد انهم مشافوش غير نفسهم و محسوش بغيرهم و لسه بيحاولوا يحبطوا الثوره بأساليب مختلفه
ان شاء الله اللي جي أحسن

ابراهيم رزق يقول...

احنا بنتنفس هواء مختلف
كلنا اتغيرنا حتى اطفالنا الصغار اتغيروا
هاقولك حاجة اطفال الشوارع اللى باتوا فى التحرير اتغيروا

عارفة ايه اللى متغيرش انتى لسه لى لحد دلوقتى متجوزتيش ههههههههه
خالص تحياتى

reemaas يقول...

طب يارب يصلح الحال وتبقى وردى كده على جميع الناس يا خالد

reemaas يقول...

يارب يا احمد وترجع تانى تعيش فيها وكل متغرب كذلك

reemaas يقول...

طب الحمد لله انى قدرت انقل الصورة الايجابيه دى يا فاروق

reemaas يقول...

فعلا يا كارولين هو الخوف اتمحى بس يارب القيم والاحترم يفضلوا

reemaas يقول...

تسلميلى يا هوبا انا بس بقولك علشان لو نويتى قوليلى ارتبها الاول

reemaas يقول...

دول ياشيرين فاقعنى يعنى ياربت اللى كان متخوف او مختلف يفضل زى ماهو لان ده فكر ويحترم بس كدابين الزفه دول اللى مشكله بجد

reemaas يقول...

ههههههههههههههههههه
اى الذل ده بقىىىىىىىىىىى
ماشى يا ابراهيم ربنا يسامحك

موناليزا يقول...

ولسه:)
القادم أجمل

همس الحنين يقول...

مساء العطر نور

وعمار يامصر

ويارب دائماً تبقى مصر ماشية للافضل

واكيد الثورة دي ليها ايجابيات صحيح

واكيد المصريين اتغيرو للاجمل

على الاقل شعرو بحريتهم

وزي ماقلتي اترفعت اعلام مصر ودا يعني

ان الجميع يد وحدة لرفع راية البلاد

وكل واحد بيحب مصر حيكون سعيد بيها

ويارب الايام الجاية تجون اجمل واجمل

سعدت جداً بإكتشاف ركنك الراقي

تحياتي

reemaas يقول...

والله يا موناليزا حاليا انا مش متطمنه

reemaas يقول...

تسلمى يا همس ويارب ديما منورانى ويارب يبقوا فعلا ايد واحدة