الجمعة، 18 فبراير 2011

زعلانة بجد

للمرة المليون بنقول الثورة كانت مجرد بداية لحاله من التغيير لازم كلنا نمر بيها

للمرة المليون قولنا لو سقط نظام ده مش معناه اننا بقينا كويسين لان لو جه نظام تانى واحنا زى ماحنا  يبقى مش هيحصل حاجة بالعكس احنا اللى هنفسد اللى جاى

للمرة المليون بقول بلاش نخون بعض

لما خرج الشباب فى 25 يناير كان فيه كتير مستهون ومش متوقع تغيير ويوم 28 كلنا اجتمعنا على الغضب والقهر 

ولما خرج خطاب الريس انقسم الشارع وكتير بكى

هل اللى بكى خاين؟هل اللى بكى عميل؟
لا طبعا والف لا
لما بدخل على الفيس دلوقتى بلاقى مهازل بحس معاها ان مافيش اى تغيير حصل

ادخل امبارح الاقى لينك مبعوتلى ومطلوب منى اعمل شير له اللينك ده بعنوان القائمة السوداء لعملاء النظام والخونة

دخلت قلت اكيد جايب الوزراء مثل او الفاسدين او اللى اخدوا فلوس البلد والاقى الفاجعه الكبرى

فيه صور واسامى لمشاهير كل الل ى قالوه لا لاهانة الريس  ونعم للبقاء حتى سبتمبر
المشاهير دول منهم صحافيين وفنانين 

اى التهريج ده هو احنا هنبدء نخون بعض ونحجر على رائ بعض ولا ايه

ياجماعه دول رائيهم كده وبحييهم عليه زى اللى كان رائيه انه يمشى وبرده بحييه عليه ومش معنى ان مطلب الرحيل اتحقق ان دول انتصروا على دول لا معناه بمنتهى البساطة ان التغيير بالطريقه دى هو اللى هيحصل لان كده كده فيه تغيير


ياجماعه احنا كنا بننقد النظام السابق علشان ماكنش بيسمعنا او مابيسمعش الا نفسه
طيب امال اى الحال دلوقتى مابرده كده مش عاوزين نسمع الا نفسنا وان اللى قام بالثورة او شجعها يبقى هو اللى صح والبقى غلط وياريتها غلط بس لا لا ده بقى عميل وخاين كمان


اى معنى ان بلال فضل امبارح يطلع على دريم ويقول مظاهرة عرفان الجميل دى تهريج وعماله ولازم نفوق طب فرق ايه عن اللى قال ان المطالب بالرحيل عميل


اللى حابب يتظاهر علشان حاجة طالما بطريقه سلميه هو حر مانحجرش عل بعض ونحط ادينا فوق افواه بعض علشان نخرس الصوت لان الصوت مش هيتخرس وكبت التعبير بيولد انفجار وادينا شفنا مثال حى له


مش من حق اى حد يتهم مصرى بانه عميل او خاين علشان قال رائيه ده انا حتى اللى غيروا رائيهم وكانوا مع وقلبوا ضد ماجرؤتش انى اتهمه بالعماله وكلت اللى قلته انى مش هعرف اثق فيهم تانى


لو خونا بعض مش هنعرف نبنيها تانى وهنفضل ندور فى دواير مفرغه  لسنين جاية


الخاين هو اللى ولع فى البلد ونهبها  ودول القانون والقضاء كفيل انه يظهرهم ويحاسبهم ده مش دورنا احنا دورنا نتغير علشان نواكب اللى جاى ونعرف مين الخاين ونتعظ بس ونبنى بقى كفايه خساير


وفى النهاية ارجو اننا نتبع دعوة عمرو خالد ونعمل شير بس فى الخير ارجوكم ماتخدناش الحماسة ونزايد على بعض فى وطنيتنا
                                                                                ويجعله عامر

هناك 20 تعليقًا:

Casper يقول...

ما حدث من أحداث بعد الثورة مؤسف بكل المقاييس لابد أن نتعلم أخلاق الثورة وأخلاق التظاهر وأخلاق حرية التعبير عن الرأي

_________

مثل هذه الثقافات لن نتعلمها في يوم وليلة بل ستحتاج منا إلى سنين كي نربي أبنائنا عليها

_________

نتمنى أن تمر هذه الفترة على خير ونفكر جديا في الحفاظ على بلدنا

________

خالص التقدير والاحترام لابداعك وقلمك
وأحييكِ على هذا البوست المتميز الذي وإن دل فيدل على فكر راقي ونظرة ثاقبة للأحداث

بالتوفيق دائما
ويارب احفظ بلدنا مصر من كل سوء

تقبلي مروري
Casper

سواح في ملك اللــــــــــــــــــه- يقول...

بصي يانور
انتي كلامك كويس بس عايز اقوللك حاجه
ماحدش بيطالب بعودة جلاده الا المستفيدين من وجوده
يعني مثلا لو كانت الثورة دي لاقدر الله فشلت
كل اللي كان هيتقال ان الحكومة المصرية
قبضت علي مشاغبين بينظموا انقلاب لنظام الحكم
وكان هيتقال انهم عملاء وحزب الله وحماس وامريكا
طبقا للروايات اللي قالها التلفزيون المصري
وطبقا للبنت الللي جابها الاخ سيد علي والاخت هناء
السمري دون التاكد
وكنتي هتشوفي اعدامات بالجملة
وكان هيتقال وجبة الكنتاكي والخمسين جنيه
هما اللي حركوا الناس
والمؤسف ان الكلام ده اتقال في يوم الاربعاء الدامي
اللي كان بلطجية الحزن الوثني كانوا بيضربوا
دون تمييز
قطعا كل من شارك في الاتهامات
زنب كل واحد مات في رقبته

مصطفى سيف الدين يقول...

احب احيييكي على طرحك الموضوع المهم
وانا متفق معاكي في كل حرف كتبتيه ومش متفق بس لا انا حاولت اعرض وجهة النظر دي في اماكن كتير وكنت باعاني الامرين علشان اقنع الناس واقولهم
اقول احنا طلعنا ومات مننا شهداء علشان كانوا عايزين يعبروا عن حريتهم في ظل نظام مكنش بيسمع غير نفسه دلوقت بعد مانتصرنا هنعمل زي النظام السابق ومش هنسمع غير نفسنا
اي مصري مؤيد او معارض من حقه يقول ويتكلم ويعرض وجهة نظره لأن ده هو هدف الثورة الحقيقي
احنا بندمر ثورتنا بطريقة غريبة و كل اللي حصل انه راح مبارك الديكتاتور و هييجي مبارك غيره هيرسخ حكاية الصوت الواحد دي ويبقى يا ريت يا ابوزيد ما غزيت وضاع دم الشهداء اللي راح بس علشان يعبر عن رايهم
انا بقول مبارك ونظامه واعوانه لازم يتحاكموا ويتجازوا اكبر جزاء كمان بس المؤيدين له من اخواننا قبل فنانينا لازم نحترمهم لازم نحط قواعد ومباديء جديدة لمصر الجديدة والا هنرجع تاني لعهد اتصورنا انه انتهى وكونهم انهم لسه مؤيدين له بعد التنحي ده دليل انهم مش منافقين وده يخلينا نحترمهم
تحياتي واشكرك لطرحك الموضوع المهم

ثـــوره الــغضب يقول...

احنا محتاجين وقت كبيييييييير

عشان نكمل حلمنا

موضوعك هايل ومحتاج كلام اكتربس انا موبيل

بس بجد كلامك كبير جدا وجميل

أحمد الصعيدي يقول...

.لا تستعجلي قدر الله فينا

فشعب مصر تحت كنف الله ولن يتأذي


تقبلي مروري

هبة فاروق يقول...

يا نور اللى قال مبارك يستمر لا خاين ولا عميل
بس الشباب لما عمل قائمة سوداء لبعض المذيعيين والفنانين كان رد فعل طبيعى للسمعنا دول اتهمو الشباب اللى فى التحرير بانهم مدربين فى الخارج وانهم خايينين وانهم بيمارسو الدعارة وانهم لازم يتحرقو بجاز وانهم بياخدو فلوس
انا شايفة ان لكل فعل رد فعل واللى حصل دة امر طبيعى

reemaas يقول...

اللهم امين يارب العالمين
تسلم يا كاسبير وربنا يعديها على خير

reemaas يقول...

طيب يا خالد تمام انت بتتكلم عن اللى ليهم مع النظام مصالح لكن
لما يطلع يتقال ابو تريكة كان مع ان الريس يقعد ل6 شهور يبقى ابو تريكة لازم يتعزل
عمرو دياب غنى للريس يبقى مايغنيش للشهدا

انا واحده كنت مع الريس انه يفضل ال 6 شهور
وماليش مصالح
وغيرى الاف ولا عمرى ولا عمر اصحابى كانوا حتى منتمين لحزب

الحكايه بقى فيها تقسيمة ياخالد

reemaas يقول...

ياريت يا مصطفى ده يحصل انت مش عارف لما بيبقى قاعد ناس من اصحاب مؤيد ومعارض الحكايه بقت بتنتهى بخناقه بسبب القوايم السودا دى
عاوزة اقولك انى بقيت على راسها
هههههههههههههههههههههه

واللهم حاجة تحزن

reemaas يقول...

تسلم يا ادم والحكايه فعلا محتاجة نقاش

reemaas يقول...

لا ياهبه مش امر طبيعى لكذا سبب
اولا اللى فى القايمة السودا مش كلهم قالوا كده وبالتالى يبقى القايمة السودا جمعت الصالح على الطالح

ثانيا مش مبرر ابدا فى الوقت اللى احنا فيه انك ترد الاساءة بالاساءة لان ده مش هنكسب منه الاى عداوة بعضنا لبعض

تخيلى كده لو مافيش قوايم سودا هنكسب ان كلنا نقف ايد واحدة علشان خاطر بلدنا

reemaas يقول...

ربنا معانا يا احمد
بس لازم نعمل علشان ربنا يقف معانا

;كارولين فاروق يقول...

انت علي حق لابد من الديمقراطيه
وحريه الرأي ولابد من التغيير في
سلوكنا واحترام الرأي المخالف
ولابد ان تكون اول ثمره للثوره
تغيير سلوكنا

سواح في ملك اللــــــــــــــــــه- يقول...

لا هي مش تقسيمة ولا حاجة
من حقك تكوني مع الريس
ومن حق غيرك يكون ضده
بس محبين الريس من المشاهير اول من اساءوا ليه
لانه في هذاالوقت كان الطرف القوي اللي بيده
مقاليد الامور واضفوا عليه مبالغات اسطورية
كانت بتغيظ الشعب المصري
يعني بطل الضربة الجوية لاننكرها
ولكن مش محرر مصر من اسرائيل لوحده
الحرب ده عمل جماعي
وكان فيه ابطال كتير
المفارقة ان اول السنه الجديدة
يعني قبل الثورة باكتر من عشرين يوم
كان البطل الاسطوري جمعة الشوان قاهر
الموساد مرمي في المستشفي
مش لاقي تمن علاجه
مش ده برضه اعطي لمصر الكثير
ولا عشان مش ريس

Emtiaz Zourob يقول...

مرحلة التغيير مستمرة وتاخد وقت علشان تغير البلد والنظام مش كل شيء في يوم وليلة ، وكمان مش لازم الواحد يخون الأخر لمجرد اختلافه معه في الرأي ، في ناس كانت بتحب مبارك وكانت نفسها يظل ، وفي ناس بدها الثورة وبدها الحرية ، كل واحد بده اشي ولكن هذا لا يفسد للود قضية ، ربنا يحفظ لكم الثورة يارب ويديمها عليكم حرية وكرامة ويبعد عنك الشر يارب .

reemaas يقول...

ياريت والله يا كارولين نتمنى على الله

reemaas يقول...

اه طبعا اعطى لمصر كتير واكيد له حق على البلد زى زيه اى وطنى

reemaas يقول...

اللهم امين يا وجع البنفسج ونورتينى

غير معرف يقول...

أولا اشكرك على شهادة التقدير اللي اعطيتهاني في البوست اللي قبل اللي فات
و معندكيش فكرة الموضوع ده اسعدني ازاي
و انا اسف جدا اني اتأخرت في شكرك

بالنسبة لموضوع البوست انا بتفق معاكي بنسبة كبيرة لكن برضو الناس معاها حق , انتي لو شوفتي البلطجية اللي شفناهم بيأيدوا الريس أكيد هتغيري رأيك
الحق كان ظاهر تماما و الباطل ايضا كان ظاهر تماما

reemaas يقول...

لا شكر على واجب ياشحات دى شهادة حق نيجى للى بتقوله طبعا اللى شفته مكون ليك رائ احترمه لكن بينى وبينك سكرته بقى لانهم لو عرفوا هتمسك حالياهههههههههههههانا كنت من اللى طلعوا فى مظاهرات انه يفضل 6 شهور ومش شايفه على الوضع الحالى ان رحيله من بقائه فارق ماهى نفس الخطوات اللى بتحصل ماكسبناش الا اهانته وكسب قاعده عريضه من الاشاعات اللى مطالب التحقيق فى صحتها من عدمه فى وقت صعب اصلا

وكنت من مؤيدى مظاهرات الاعتراف بالجميل لانى شايفه انه على الاقل نص فترة حكمه الاول كانت جيدة جدا وبشهادة ناس كتير من المعارضين قبل المؤيدين

سر ماشى

المهم يعنى انى لاانا ولا غيرى من اللى شفتهم بعينى له مصلحه معاه ولاضد مطالب الثورة ولا كمان خيانين لبلدنا ده اللى حبيت اوصله