مش عارفة والله شبكات المحمول دى ناوية على ايه ومين فينا اللى بيستعبط التانى بالظبط
امبارح بشحن موبايلى لقيت جالى هديه 1000 دقيقه مجانيه لمدة 12 ساعه يوميا لمدة اسبوع
غير عرض الرسايل المجانيه
غير تظام حكاوى اللى اصلا عندى فيه نص اليوم الساعه ببلاش والنص التانى تعتبر ببلاش برده
وطبعا اصحابى شرحه
النهاردة صحبتى استغلت العرض وفضلنا نرغى اكتر من ساعتين رغى بقى على تفاصيل اليوم
قفلت معاها وهوب حاصلى فلاش باك بالذاكرة لورا
ايام الكليه
ايام ماكان الموبايل ده امنية لا ينالها اى حد يعنى
كان احدث موديل منه مش فاكرة رقمه بس فكرة النيك نيم بتاعه"فردة الشبشب"
وااااو يعنى لو كان حد معاه الموبايل ده سواء كان بانتنه ولا من غير
فاكرة كويس اول حد شفته ماسك موبايل كان يسمع من ودنه ويجى يتكلم يحط على بؤه
اينعم ده كان غلط طبعا ومضحك جدا بس كان بيحصل
فاكرة كويس اول عدة جاتلى كنت فى بكالوريوس وبابا فرحان انى طلعت من 3 صيدلة صافى"مش عاوزة تريقه كل خريجى صيدله عارفين 3 صعبه ازاى"كانت 3310 كانت كحلى وب2000 جنييييييه وكان الخط ايامهاب220 جنيه
فاكرة كويس ان الدقيقه كانت ب 1,50قرش وكان اخرنا رنات
رنة علشان المحاضرة ورنه علشان السكشن ورنة علشان احنا فى الكافيتريا ......الخ
ويويله يا سواد ليله اللى يفتح فى الرنة دة يعنى طلبه والكارت ب10جنييييه
فاكرة كويس لما كان فى الموبايل مؤلف نغمات وكنا ناخد الكود من بعض ونظبط الاجهزة
اييييييييييييييه.....................ذكريات
فكرة كويس اوى لما الموبايل ده اتباع جاب 50 جنيه!!!!!!!!!!!يا بلاش
ارجع للواقع بقى الاقى الكلام كتر وبقى ببلاش والموبايل مالوش كبير حاليا مافيش حد ماشى من غيره
تفتكروا ده كويس ؟ظاهرة صحية يعنى؟ولا نشغل نظرية المؤامرة؟؟؟؟؟؟؟؟؟؟
تفتكروا الشركات بقى عندها كرم حاتمى؟؟
تفتكروا لازم نشغل دماغنا فى الحكاية دى اصلا ولا نتكلم وخلاص وبلاش نبقى من اللى بيتقال عليهم هو لاكده عاجب ولا كده عاااااااااجب
هناك 16 تعليقًا:
لا يا بنوتة تالتة صيدلة مش صعبة السنة الصعبة هي الترم التاني من سنة تانية والترم الاول من سنة تالتة
صح الفارماكولوجي اصعب حاجة بس تحليلية تانية مملة بس الترم التاني من تالتة سهل جدا
بالنسبة لشركات المحمول كل اللي بيعملوه ده علشان يعودونا نتكلم وندمن الكلام بالموبايل وقتها هتتعودي تكلمي صاحبتك عن تفاصيل اليوم ولما يخلص العرض ممكن متتكلميش نفس المدة بس علي الاقل هتتكلمي اكتر من العادي
عجبتني طريقة طرحك الجميلة
ياستى ريماس تحية تقدير واعجاب --انك بتصويبك لهذا الموضوع قد اصبت ايما صواب فالحقيقة انزعاجى يكون شديدا ونكرانى يكون اشد وقت رؤيتى لهذا الجهاز مع الصغير قبل الكبير ومع الفقير قبل الغنى ومع الجاهل قبل العالم ومع العاطل قبل العامل .. والغريب ان الكل يتكلم--- بيتكلم مين وبيتكلم فى ايه؟؟؟؟ وعندما ارى هذه المشاهد وانا فى الطريق اسرع باخراج موبايلى حتى اشارك بدورى فى هذه المشاهدومنتظرا ان يكلمنى من يكلم هؤلاء الناس .. موضوع حقيقة يستحق اكثر من كلامك واكثر من تعليقى
بصي يانور
اولا هما بيدوكي الهدية دي بشروطهم
يعني من 12بالليل لحد 6 الصبح
وده وقت صعب جدا انك تكلمي او عن نفسي اني اكلم
اي حد لان الواحد خلاص بقي بيبقي قرب ينام
انا بتجيلي الهدية دي كل مابشحن
3مرات جاتلي
ومبهتمش بهذا النوع من الاغراءات
لاني مؤمن جيدا ان الحداية مبتحدفش كتاكيت
تحياتي يانور
انا مع الاخ سواح ان دى شركات ذكية ولا يمكن ان تخسر
ودى سياستها فى جذب العملاء
اقولك ولا نشغل دماغنا ولا حاجة اهم حاجة ان الدقيقة رخصت وبقينا نتكلم براحتنا
صباحك فل يا اجمل نور
ياااه يا نور فكرتيني بسنه أولى موبايل كانت أيام تحفه و الكليه يا سلام فعلاً سنه تالته أصعب سنه عندك حق جداً
أنا بحس ان كل عروض المحمول نصب فنصب و بصراحه بتغاظ أوي لما واحده تكلمني و تتطول بس عشان عايزه تستغل العرض!!!
موضوع ظريف يا أجمل بنوته
تحياتي الخالصه لكي
لا لا يا مصطفى اعترض وبشدددددة الفايتو كان ارخم حاجة مرت عليها يعنى كان بشششع فولاتيل بجد
ربنا يخليك وانا بقى هكبسهم ومش هتعود بس هستغلهم جداااااااا خلال العرض
هههههههههههه احلى حاجة يافاروق انك رغم اعتراضك حابب تشارك
فى حد اتصل طيب؟
لااااااااااا مانت مش واخد بالك يا خالد العرض من 12 الصبح ل 6 المغرب ياعنى يا اما اسهر مانمش يا اما اقضيها كلام وماشتغلش
واخدش بالك انت
مؤامرة مؤامرة يعنى
صباحك سكر يا هوبا ايون مانا هعمل كده وهستغل الموقف
تسلميلى يا شيرى كانت سنة بشععععععععه بكل المقاييس
ري...ماس..
صباحك مسك وعنبر :)
سؤال صغنون آآآآد كده..
هو انت مواليد كام..؟؟
اصلك تقريبا بتتكلمي بنفس طريقتي :)
وبعدين انا كمان كان اول موبايل جبته 3310 بس كان وقتها الدقيقة 1.75 قرش..
بس على مييين..
انا كنت نظام موجة..والدقيقة بـ 25 قرش والاشتراك 200 جنيه..!!
يعني اللي باوفره دقايق..بادفعة اشتراك... هههههههه..
باحب قوي الذكريات والفلاش باك :)
ههههههههههههه سؤال فظيع يعنى يا تيمو انا جيت مع الريس هههههههههههههههههههههههههههههه
انا ههريك ذكريات ماعنديش غيرها اصلا
صباح الفل على اجمل نور منور البلوجر كله
اخبارك ياقمر؟
انا الحمدلله سكهت من وجع دماغ الموبايل والكروت الي طالعه نالة باليوم كرت كرتين
وسكهت من الشركات الي طول اليوم هي تعمل عروض
واختصرتها ومااشتريت موبايل
ماعنديش موبايل
الي عايز يكلمني يتصل للبيت يلاقيني
هههههههه
حبيت الموضوع
اعذريني على تاخري
شغلت الدراسه وبحث التخرج
تقبلي مروري
سلامي لاجمل وارق نور.
لا دى بقى اللى غرييييييييييييييييييييبه يا رشا ماعكيش موبايل
تصدقى فكرة
يعنى تجربه مميزة تستحق انى اعملها
الدكتور فى الجامعه قال قبل كدة جمله فى المحاضرة عجبتنى جداا وفضلت فى ذهنى " كلما زاد تقدم شئ كلما زادت سلبياته" والجمله دى بتنطبق على كلامك او اى شئ بيزيد عن حدة فطبيعى بينقلب لضدة ..وتداول تليفونات المحمول الآن اصبح شئ عادى فالآن الغنى والفقير حتى الآطفال يحملون تليفون محمول واحدث الآصدرات العالميه كمان للمحمول ..قبل ان يكون مخطط مستهدف به شباب العالم العربى وبالتحديد بلدنا العزيز مصر فهو قائم على استخداماتنا نحن فبكل اسف اصبحنا شعب مستهلك فقط .. اغلقنا على انفسنا الدائرة من جميع الاتجاهات ..فشركات المحمول تتنافس بضراوة علينا لتحقيق مكايب ماديه لها .. انا أرى ان الآنسان لا يتبع الحياة ويسايرها فى كل اتجاهاتها لآنها مش فى كل شئ صح ..
وللعلم كتير بتجيلى هديه الشركه دى اوقات كتير مش بلاقى لها استخدام من كثرتها فبتروح فرصتها عليا فالوقت المحدد لها ..مش شرط عشان هديه فأستغلها اكثر الحقيقة والمستفز انهم بيشترط انك تتكلمى من ساعة كذا لساعة كذا وممكن اوى يكون وقتك دة مشغوله نايمه بتذكرى مفيش شئ ممكن تكلمى حد فيه فتروح عليكى الدقائق المجانيه عادى وفى المسمى انها هديه هههه
تحياتى
ايون يابنوته ماهم بيختاروا وقت الشغل او وقت النوم نفسى افهم اى النظرية
نورتينى ياقمرايه
إرسال تعليق