السبت، 1 يناير 2011

خليك ادها

وحشتونى جدا ووحشتنى الفضفضه معاكم
كل سنة وانتم كلكم طيبين وسنة سعيدة عليكم يارب

ماعرفش ليه يا جماعه انا مقلقه من السنة دى واوعوا تقولولى بطلى تشاؤم

انا عمرى ماكنت متشائمة على فكرة بس بدايتها  كانت رخمه معايا على المستوى الشخصى وهبقوا اقلكم ليه بعدين بس ابقوا فكرونى

وعلى المستوى العام كانت بداية اكتر من حزينة بعد تفجيرات الكنيسة

كلنا متابعين الاخبار طبعا وعارفين ردود الفعل بين المستاء والغاضب واللى مشيا الدولة الذنب واللى مشيل الناس الذنب واللى مشيل امريكا واسرائيل والقاعده الذنب

كل واحد وتفكيره وطريقه تعبيره عن غضبه

بس اللى يغيظ بقى انى دخلت اتفرج على اليو تيوب طبعا انتم اخدتم فكرة عنى انى متصفحة جيدة له

لقيت كليب بينقل وقائع الصلاة فى الكنيسة وقت الاعتداء الكليب اتعرض فى قنوات كتير عموما
ده لينكه
http://www.youtube.com/watch?v=ilBjjlOJuV8

الكليب طبعا حزين بس اللى يتعب اكتر ويحزن بجد التعليقات اللى جايه عليه

اى كميه الاستخفاف بالمشاعر دى!
اى كميه عدم المبالاه دى!
اى كميه الغباء فى التعامل مع الموقف وعدم الاحساس بيه دى!

حريه التعبير عن الرأي موجودة لكن مصحوبه ديما لمقوله انت حر مالم تضر

واللى بيكتب تعليقات زى دى لازم يعرف ان فيه ناس مترصده بالمواقع وهدفها كله نشرالاراء دى وتصويرها كاراء عامة الشعب المصرى


عندما تكتب انا مسلم فى اى موضوع بتقول فيه رائيك لازم تاخد بالك ان مايلى تلك العبارة لابد ان يليق بك كمسلم


انا مسلمة وضد اى عمل ارهابى يستهدف اى انسان ايا كانت ملته وايا كانت عقدته وايا كانت جنسيته واى كان رائيه فى كمسلمة وايا كان حجم خطئه فى وفى عقيدتى


هكذا علمنا نبينا محمد وهكذا تقول عقيدتى


 فعلى كل مسلم  ان يكون اد الكلمة دى
 

هناك 12 تعليقًا:

مصطفى سيف الدين يقول...

اختي العزيزة معتقدش ان في مسلم يؤمن بالله ويعرف قواعد الاسلام يوافق علي ماحدث في الاسكندرية من ترويع وارهاب وقتل
انتهاك دور عبادة يذكرني بمقولة قيلت في فيلم وااسلاماه (هيضربوهم وهم بيصلوا )هؤلاء من فعلوا ذلك كانوا مثل التتار الذين لا يحترمون اي انسانية

بداية سيئة لعام جديد ربنا يستر علي باقي العام
وكل سنة وانتي طيبة

سواح في ملك اللــــــــــــــــــه- يقول...

سلام عليكم
ازيك يانور
انشاء الله ربنا يبعد عننا اي شر
كل اللي عايز اقوله
ان فيه مخطط خارجي لتقسيم مصر وشرزمتها
وكلنا من دلوقتي مسئولين عن بلدنا
ولازم نخاف عليها

هبة فاروق يقول...

حبيبتى نور احنا فعلا فى حالة عدم توازن من اللى حصل والخوف اكثر من اللى حيحصل يارب سلم بلدنا
وارحم شهدائنا وصبر اهاليهم
مشكورة حبيبتى

صيدلانيه طالعه نازله يقول...

مش المسلم بس اللى يكون قد الكلمه دى
الانسان اصلا المفروض يكون قد انسانيته
ده اللى لازم يحصل

reemaas يقول...

فعلا بدايه سيئه جدا يا مصطفى وتصدق انت افتكرت جمله فعلا تصوير جيد جدا للحدث

وانت بالف خير يارب

reemaas يقول...

وانا معاك يا خالد لازم كلنا نخاف وحتى اللى له رائ معاكس يحتفظ بيه مش وقته خالص

reemaas يقول...

اللهم امين يارب العالمين
ربنا يسترها ياهوبه

reemaas يقول...

صح يا علا قبل كل شئ احنا بشر وعندنا مشاعر انسانيه لازم تسمو فوق كل شئ

faroukfahmy يقول...

الاخت العزيزة نور -----اللى حصل ده بيحصل فى كل بلد قوية وهو ضريبة النجاح من الحاقدين الضعفاء ولكننا اقوياء بحضارتنا وقيمنا وسمونا ورجالنا ونسائنا امثالك.........

اسماء عبدالعزيز يقول...

بصراحة دا عمل غر انسانى
واكيد انه ارهابي جدا
ممن لا ينتمون لديننا الحنيف
الدين الاسلامى لم يجبر احد قط على الدخول به
ونحن كلنا اخوه
والدين لله
وحده الذي يحاسب
ولكن حسبي الله على كل من له يد بارهاب البشر وزعزعة الامان ونشر الفتن والفساد
دمت متالقه حبيبتي
وعامك سعيد ان شاء الله

reemaas يقول...

فعلا يا فاروق المفروض كلنا نفهم ده
تسلم

reemaas يقول...

وانتى بالف خير يا اسما
وربنا ديما موجود