الأربعاء، 25 نوفمبر 2015

begin again










انا من زمان ماكتبتش تدوينة عن فيلم.. اعتقد من وقت تدوينة فيلم holiday ..
اعتقد دى علامة يا مان :)

طبعا من اسم الفيلم تعرف انه حدوتة كلها امل..
ازاى تعرف تبدأ من جديد..
ازاى تخللى فشلك او ألمك مايخدكش معاه لتحت, لاتطلع بيه انت.. تطلع انت فوقه..
عارف وقتها هيحصل ايه؟
مش بس هتنجح..لا.. 
انت كمان هتعرف تسامح اللى وجعك , هتعرف تبص فى وشه تانى.. ده انت حتى ممكن تتعامل معاه من جديد, ممكن تسمعه ,تفهمه, هتبطل تكرهه..
مش هيبقى هو شماعة فشلك..

كمان هتقدر تشوف حاجات حلوة حواليك ماكنتش شايفها لانك كنت مشغول.. مشغول انك تقدر بس تاخد نفَسك من الوجع..
كمان هتخليك تقدر تتعامل مع ذكرياتك مع الحد اللى وجعك ده بطريقة احلى.. هتحترمها وتعزها ومش هتربطها بالألم .. هتقدر تربطها بأوقات عمرك ماهتقدر تنكر انك كنت فرحان فيها.. مهما حصل
هتخليك ماتكسرش حاجات كانت حلوة لمجرد انك تفش غللك..

حدوتة الفيلم اثبتتلى ان مش لازم كل قصة تخلص بان المجروحين يتلموا ويحبوا بعض  وينتقموا من اللى غدر بيهم ! لا لا .. دى بقت نهايات قديمة..

ممكن المجروحين يتلموا على بعض ويزقوا بعض.. وينجحوا.. هدفهم بس ينجحوا , وكل واحد فيهم لما ينجح يبدأ تانى يتعامل مع مشكلاته من جديد بإيجابية ويبدأ بقى يتصالح مع نفسه قبل غيره..

الفيلم فيه اللى بيوفى بالجميل وشايله فوق دماغه ومستنى  لحظة بس تشاورله علشان يقف جنبك..

الفيلم فيه اللى بيشوف حاجة حلوة وبيقول هى دى من غير ما يحاول يقلل من قيمتها علشان يستغلها..

الفيلم فيه اللى ممكن يقف جنب غيره وينتظر المقابل فى الاخر على ما ننجح, على ما تفرج.. ولو مانجحتش تحسه عادى هيقلب الصفحة ويكمل..

الفيلم فيه اللى بيغلط وبيجرح وبيعرف غلطه وبيحاول يعتذر ولو قدر يعوضك عادى ممكن يعملها مش بس علشان يصالحك  .. كمان علشان يقدر يحترم نفسه تانى

الفيلم فيه اللى ممكن يتخلى عن حاجة ثابته فى حياته علشان حلم او مغامرة هتسعده ايا كانت نتيجتها.. مش هيندم..

الفيلم فيه اللى مش بساوم على نجاحه واللى عارف قيمة نفسه ومش مستنى سبوبة وخلاص..

الفيلم فيه ناس بتعرف تحلم حتى لو حلم مجنون.. مابتكسرش مقاديف بعض..

الفيلم فيه حد بيعرف يبدأ من جديد..

الفيلم ده بسيط.. بس مبهج ^_^

هناك تعليقان (2):

momken يقول...

.....

عجبنى اوى تحليلك للفيلم
وانا متقف معاكى .. ان المخرجين والسيناريست شوهوا خيلنا
بمعنى
اى واحد يقابل وحده فى اى فيلم يبقى هيحبوا بعض
اى واحد يتخانق ويقفش على وحده يبقوا هيحبوا بعض
اى واحده تساعد واحد فى فيلم يبقى معجبه بيه وهتتجوزوا فى الاخر
الشرير دايما بيخسر فى الاخر فى الافلام
الخير دايماً بينتصر فى الافلام

معرفش جابوا المسلمات دى منين

مش عاوز اطول عليكى
بس طريقتك فى التدوين ممتعه

تحياتى

....

مكتب شغالات يقول...

الفلم حلو فعلا