# الوحدة

اسم بيتوصف بيه احساس معين بيعيشه صاحبه فى اشكال كتير..

واحد عايش لوحده حياته مافيش فيها خُد وهات من اى نوع دى .. وحدة

واحد حواليه ناس كتير وحياته مليانه احداث بس احساسه بيها منعدم بيقوم فيها بدور وكأنه مكتوب مش طالع من قلبه دى كمان..وحدة

واحد  حواليه ناس كتير برده بس الناس اللى هو محتاجهم وعاوزهم مش موجودين ده كمان بيحس ب .. وحدة

واحد احلامه باظت او هو فرط بيها .. بيبص حواليه بيلاقى نفسه من غيرها بطوله من غير امل فى بكرة لو كل الدنيا حواليه برده بيحس ب..وحدة

وواحد شايف اللى بيحبه بيتألم..بيتوجع..فى ضيق وهو واقف عاجز لا عارف يحل ولا الطبطبة نافعة .. صوت العقل مش مسموع من كتر الهم وصوت القلب مخنوق من كتر الوجع.. بيحس انه متكتف وبرده بيحس ب ....وحدة 

#النيل

اخذت تنظر للنيل فى تأمل وصمت..كم هو جميل بصفائه وهدوئه وبطئه.. بطء يشبه الركود..جمال ساكن يكاد يكون لا يتحرك..

تماما كعلاقتها به..علاقة هادئة محببة ولكنها ساكنة لا تتحرك..

يحبها ويغار عليها وينظر لها بعشق.. وفقط.

تعلم ظروفه وظروف البلد القاسية لكنها تحلم بالمزيد.. تحلم بتلك اللحظة التى سوف يطلب منها فيها ان تحدد معاد مع ابيها ليطلب يدها.. من كثرة انتظارها لتتحسن تلك الظروف وتأتى تلك اللحظة تشعر انها بعيدة بعد اخر نقطة فى هذ النيل..

صديقتها تقول لها انه (بيستهبل) لكنها لا تظن.. رغم انها فى اوقات الغضب تتهمه بنفس الاتهام.. 

ذات يوم قررت ان تخبره انه قد جاءها عريس .. قررت ان تضرب بهذا المجداف مياهها  الراكدة .. ولكن هيهات..

نظر اليها فى الم صامت .. وحتى اليوم لا يعلم ماذا حدث..

هو لم يتكلم وهى ايضا..

بكل ما بداخلها من الم وصراع القت نظره اخيرة على النيل الجميل.. الساكن وانصرفت

مع نفسى 29

كل شوية بعيد ترتيب قايمة احلامى والحاجات اللى نفسى اعملها واللى بقى عندى شريك  بحلم احققها معاه ..

. نفسى اتعلم سواقة جدا

.نفسى يبقى عندى شقة ولا حتى ستدويو صغير فى اى مدينة فيها بحر

.نفسى اخد اجازة من شغلى واسافر اسكندرية او شرم 

.نفسى اروح تركيا ولبنان وايطاليا وفرنسا الاربع بلاد دول  نفسى يكون ليا ذكريات فيها

.نفسى اركب عجل

.نفسى اتعلم اركب خيل

.نفسى اتعلم العب بيانو وقانون جداا

.نفسى اخلص كل الكتب اللى عندى سواء pdf او ورق

.نفسى اقدم برنامج فى اذاعة نجوم fm

.نفسى اتعلم سباحة

.نفسى ابقى كويسة جدا فى الانجليزى  قراية ونطق زى اهلها

.نفسى اشتغل شغلانة جديدة غير شغلى وليكن مثلا مصممة ازياء

.نفسى اعمل عمرة او احج

.نفسى اصطاد سمك

.نفسى اتعلم التصوير صح واجيب كاميرا كويسة كده وبنت ناس وامارس الهواية دى بقى

.نفسى اواظب على صلاة الفجر حاضر صيف وشتا مش صيف بس

.نفسى يبقى عندى اولاد  جداااااااااااااااااااااااااااااا

.نفسى ادرب نفسى ابقى اهدى  وعصبيتى تقل

ياسلام بقى لو اتحقق دول باقى السنة دى والسنة الجاية مثلا  تبقى فلة ^_^

على الهامش ..23

لما تبص للصورة كاملة وتتخنق او ماتعجبكش او تزعلك حاول تكسرها..بص لكل تفصيلة فيها لوحدها .. تأملها وفكر فيها .. هتفهمها وزعلك منها هيقل...

وكذلك اى موقف تتحط فيه نتيجة تصرفات وافكار مجموعة الناس اللى حواليك.. لو بصيت على الموقف النهائى كله هتزعل وممكن تاخد رد فعل غلط او قاسى..

فصص بقى كل تصرف لكل واحد وحاول تفهمه .. تأثير الموقف هيقل وزعلك هيقل او هياخد حجمه الطبيعى وكذلك رد فعلك..

# افرح

لو جالك الفرح حاول على اد ماتقدر تحافظ عليه..

حتى لو كل اللى حواليك متضايق وزعلان.. حاول تنقل لهم حالة فرحك وافرح..

حتى لو اللى حواليك شايفينك بالسالب ومواقفه معاك محبطة.. طنش وافتكر اللى مفرحك وافرح..

لو ظروفك ضاغطة عليك وعلى اعصابك وحاسس انك هتدخل فى مود مهبب.. افتكر اللحظة الحلوة اللى لسه عايشها من كام يوم وافرح..

احتفظ بلحظة فرحك لاخر ثانية تقدر عليها لحد ماربنا يكرم ويرزقك بلحظة تانية..

 

عنها..30

اتذكر جيدا يوم كنت صغيرة يا ابى .. اتذكر وانا واقفة بجوارك وانت تحلق ذقنك .. اتذكرنى وانا اسألك متى سأكبر يا أبى واحلق ذقنى انا ايضا فتضحك وتحملنى وتطبع قبلة على وجنتى وتقول لى.. لن يحدث ذلك يا صغيرتى فانتى فتاة جميلة والفتايات لا تحلقن ذقونهن..

اتذكر عندما ارتدى ملابسى واذهب معك لنجلس على القهوة مع اصدقائك.. كنت دائما تحملنى على ساقيك وانت تشرب الشاى او تلعب الزهر.. وكنت اعترض فانا اريد مقعد خاص بى مثل الكبار.. كنت تطبع قبلة على جبينى وتقول لى لما العجلة يا صغيرتى غدا سوف تكبرين..

حدث وكبرت قليلا..ولم تعد تصحبنى معك للمقهى..ظننتك غاضب منى لسبب لا اعلمه.. جئت وسألتك لما انت غاضب منى؟ لما تعاقبنى ولا تصحبنى معك ؟

ضحكت واحتضتنى وقلت لى لست غاضب ابدا بل انتى صرتى صبية والصبايا لا تذهبن للمقاهى..

يومها لم اعلم هل افرح لانى صرت صبية وكبرت ام احزن لانك لن تصحبنى بعد اليوم!!

اتذكر عندما لم استسلم واشتريت  من مصروفى لعبة زهر صغيرة ودخلت عليك مبتسمة وقلت انه طالما لن استطيع ان اخرج معك فلنلعب بالبيت.. ومن يومها وانا العبها معك خاصة بعدما كبرت انت وقلت عدد مرات خروجك..

اتذكر يا ابى عندما مرضت وذهبنا بك للطبيب يومها كنت تستند علىً انا وامى ويومها نظرت لى نظرة لن انساها وابتسمت وقلت لى لقد كبرتى ياصغيرتى..لم اعلم يومها ايضا هل افرح لانى كبرت واصبحت سندك او احزن لانك مريض..

وها انت رحلت يا ابى  وبرحيلك شعرت كم انا صغيرة ولم اكبر بعد..وكم انا اكبر فى العمر كل دقيقة تمضى وانت لست معى!!

يا ابى كم اتمنى ان اعود صغيرتك...

على الهامش 22

كل واحد فينا فيه الحاجة وعكسها..العقل والجنان , الرومانسية والواقعية , الانانية والتضحية...

بنتولد بيها بكمية معينة وبتزيد معانا كل ما بنكبر ونسب معينة.. ربعها تقريبا بيكبر معانا مع التربية.. بس الباقى بقى علينا احنا.. لا والاجمل اننا ممكن نغير فى ربع التربية ونشتغل عليه.. وكل واحد وشطارته 

عنها..29

ديما لما كنت بحلم او اتمنى اعمل حاجة حتى ولو مجنونة_ وده كان فى الغالب يعنى_

او تكسر روتينى اللى انا والناس اللى حوليا اتعودونى فيه كنت بتحمس جدا.. واقعد 

اخطط.. اجى وقت التنفيذ  اخاف .. او اعمل نفسى كسلانة وانا عارفة انى خايفة

خايفة افشل ,خايفة مايتطلعش زى مانا كنت عاوزة,خايفة اغير من حالى اللى اتعودت

عليه.. 

معاك.. كل الاحلام المجنونة وحتى المستحيلة بقت ممكنة وعندى الجرأة انى احققها <3

صورة 3

وقفت امام مراًتها واخذت تضع زينتها بكل عناية..امسكت بكريم الاساس ووزعت منه

 على وجهها لتدارى اثار تركها الزمن والحزن والوحدة..

امسكت بقلم الكحل واخذت تدارى به اثار السهر والتفكير بعمرها الماضى والاتى  ,بكل ذكرياتها واحلامها..

واخيرا امسكت باحمر الشفاه وطلت به شفتيها بعناية فائقة لتظهر به قوة مزعومة تحاول ان تواجه بها عالمها..

#الخوف

كل ما بنكبر وتعدى بينا السنين كل ما بتزيد مخاوفنا.. احساسنا بالخوف من كل شئ ومن اى شئ بيكبر وبنكبر..

 كنت بروى زرع النهاردة واذ بدبور صغير واقف على وردة.. بدأت اهش فيه علشان يطير.. كنت خايفة منه ! .. افتكرت وانا صغيرة كنت بجرى على الدبور الصغير وامسكه عادى.. ماكنتش بخاف من حاجة

دلوقتى بخاف من الفراشة .. من الدبور .. من العصفور.. من الناس.. من اللى عدا.. من اللى جاى.. من الاحلام لما تجيش ولو جت ماتتحققش او تضيع.. بخاف على الفرحة لا متستمرش.. بخاف على اللى فى ايدى ليروح..بخاف من الامل ..بخاف من العمر..
واحنا صغيرين مافيش خوف من اى حاجة.. يارتنا فضلنا صغيرين

على الهامش 21

ماتستناش معجزة تحققلك حلمك.. ماتستناش معجزة تحصلك..انت فى حد ذاتك معجزة.. حقق بيك كل اللى بتحلم بيه

كن انت.. فانت اجمل ما يكون :)

على الهامش 20

وكل ما يجى الحزن يهجم على قلبك اوعى تسلم.. اوعى تسيبه لنفسك اللى غاوية نكد

فكر فى أى نعمة ربنا كرمك بيها ,هتلاقى الحزن انكمش وكش..

مش هيختفى بس هياخد حجمه الطبيعى..

وهتلاقى نفسك بتقول الحمد لله على كل شئ من قلبك مش كلام وخلاص