الأحد، 23 مارس، 2014

مرايتهم عامية









*مالك فيك إيه؟
 *هطق مش قادر أستحمل..حاسس إنى أخدت مقلب حياتى فى الجوازة دى

*ليه بس كده؟ ده انت فضلت عمر تدور على عروسة تفصيل فيها كل متطلباتك ولما تلاقيها تقول كده وبعد كام شهر جواز بس؟!

*أصلك مش فاهم.. دى بنى أدمة تافهة.. مالهاش أى اهتمامات فى الدنيا تروح شغلها الصبح وتيجى تطبخ وتقعد قدام التليفزيون.. اشى مسلسلات تركى وفديو كليبات وبرامج طبيخ وموضة .. أكلمها سياسة ولا  ثقافة ولا اناقشها فى اى حاجة  تبصلى نظرة خاوية كده تحسسنى إن الكلام مش هاممها أو انها من كوكب تانى وماتعرفش أنا بقول ايه.. تبصلى وتبتسم ابتسامة عجيبة كده وتقولى يلا ربنا يصلح الحال وتتابع اللى كانت بتتفرج عليه!
حاجة تشل

*أيوه بس أنا اللى مستغربله إن دى هى الصفات اللى عجبتك فى الخطوبة .. إنت قولتلى أحلى حاجة فيها إنها طيبة جدا ومالهاش فى المناكفة ورغم انها بتشتغل لكن حاسسها من ستات البيوت بتوع زمان  وبالقمارة قلت انها بتفكرك بستى وستك وده اللى شدك فيها.. شدك ليها انك كل حياتها وانها مابتفكرش الا فيك 
قلتلى انك زهقت من البنات اللى عندها شخصية وعاوزة تريح دماغك إنت اللى إخترت كدة يا صاحبى

مش فاهم ليييييه زعل وسابنى قاعد على القهوة ومش !

*********

*على فكرة أنا بفكر جديا أسيب خطيبتى

*يانهار اسود..ليه يابنى ده إنت فلقتنى عاوز اخطبها عاوز اخطبها .. بحبها وماقدرش اعيش من غيرها ايه اللى حصل راح فين ده كله؟!

*اللى حصل انها شبطة خنقتنى بطلباتها وبإلحاحها..مابتعرفش تعمل حاجة من غيرى عاوزانى اكون معاها كل ثانية ولو مش كده تتقمص .. دى ناقص تدبدب فى الارض زى العيال.. مابتقدرش ظروفى عاوزة حاجة ولا عاوزة تروح فى حتة يبقى فى التو لازم اسيب مشاغلى واللى ورايا وافضالها .. زهقت

* لا حول ولا قوة الا بالله (وخبطت كف بكف)

*ايه مالك مستغرب انت مش شايف ان دى عيوب؟

*لا انا شايف بس مستغرب انك انت اللى شايف كده.. انت كنت فرحان بده وحبيتها علشان متعلقة بيك.. حبيتها علشان حسيتها طفلة محتجالك وبتكبر على ايدك.. كنت فرحان بسنها الصغير.. فرحان بده وكنت شايفه طبيعى.. ازاى سبب الحب يبقى هو سبب الفراق؟!

*مش عارف بس انا مش قادر اتعامل

هناك تعليق واحد:

Smsma Ahmed يقول...

سؤ تفكير لما الواحد يدور على الحاجة اللى هو عايزها وبس بيدور بانانية مبيفكرش فى انة فى بيت وولاد ومستقبل وبييجى على راسة فى الاخر لانة فكر فى اللى يريحة بس ولما تعب برضو محاولش يغير اللى قدامة استسهل الانفصال ببساطة هو دا مشكلت الانانية