#الخوف

الخوف

مش عارفة احدد إن كان عيب ولا ميزة  من كتر مابقى إحساس ملازم يكاد يكون لازمة..

بنخاف من اللى جاى..

بنخاف من التجربة الجديدة حتى لو أمنة..

بنخاف من أفكارنا الجديدة ومن أحلامنا الجديدة.. بنخاف نحارب علشانها لنخسر الحرب ونعيش فى ألم أملنا فيها.. ونخاف مانحاربش لنندم عليها..

بنخاف على الناس اللى فى حياتنا ليمشوا منها بإرادتهم أو غصب عنهم..

 بنخاف على اللى فى إيدنا لنقصر ويروح مننا.. ونخاف من اللى مش فى ايدنا ونفسنا فيه لمنخدوش أو يروح مننا قبل مانبذل باقى المجهود..

بنخاف من الزبادى وهرينه نفخ بعد ماتلسعنا من ألف شوربة..

إحساس سخيف موجود حتى لو عملنا جدعان.. بنسميه حذر بنسميه ترقب بنجمله بس هو خوف.. اتربينا على لما كنا زمان بنخاف من البعبع.. وكبرنا بيه لحد مابقينا بنخاف من أحلامنا..

عنها .. 19

وبقى لينا  أغنيت(نا).. ولعبت(نا)..

بقى  لينا يوم(نا)..ومشروب(نا)..

بقى لينا كلام(نا) اللى بنتقوله فى نفس ذات الوقت..

بقى لينا كلام(نا) اللى أخدناه من بعض وبقى لازمة لكل واحد فينا ..

بقى لينا أحلام(نا)..

 الحرفين دول بقوا  رمز لحاجات بتجمعنا سوا  وتصنع ذكرياتنا

#الاحلام

# الأحلام

مش هى خالص لقطات الافلام اللى بتجيلك وانت نايم.. لا بتاتا وخصوصا معايا لانها فى الغالب بتبقى افلام اكشن مابقتش بحاول افكر فيها .. ولا بفتكرها اصلا ده لو حلمت من الاساس

الحلم عندى فكرة مجنونة تطق فى بالى مرة واحدة وماتكنش فى حساباتى..

أمل فى حاجة مش عارفة احققها دلوقتى لاى اسباب وابقى عاوزة احققها..

اللحظات اللى تغمض عينك وسط زحمة اليوم ومشاكله وضغوطاته وتلاقيها نطت ادام عنيك ولو لثوانى علشان ترسم ابتسامة على وشك وتخليك تقدر تكمل اللى انت فيه ده..

حلمك ده ممكن يكون مكان نفسك تروحه او حاجة نفسك تملكها او احساس نفسك تعيشه او انسان نفسك تبقى معاه ..او حتى كل دول مع بعض..

حلمك ده لو عرف يرسم على وشك الابتسامة اللى قلت عليها يبقى حلم صح جدا حاول على اد ماتقدر تحققه..

ولو ماتحققش لاى سبب (خارج عن ارادتك ) اوعى تخليه هم شايل همه وهم انك ماحققتوش.. اوعى تشوهه كده

خليه زى ماهو حلم .. اعمل اللى عليك وخلى الباقى على ربنا

ويكفيه شرفا ان فرحك فى لحظة من اللحظات 

يوم من العمر :)

اول مرة فى حياتى اروح معرض الكتاب  تبقى هى اول مرة برده فى حياتى اعمل حفل توقيع.. وتصادف انه يكون حفل توقيع معطف من القيود وده اقرب الكتب الجماعية اللى شاركت فيها لقبى  لانى اشتركت فى الفكرة وشاركت فى التحضير والتجميع وفى الحلم بيه فحساه مختلف عن اى كتاب جماعى تانى..

وتكون بردو اول مرة اشوف فيها ناس اعرفهم من سنين.. الجمييييله دعاء العطار  اخيييرا يا دودو اتقابلنا انا مش مصدقة اصلا اصلا :).. اه بس لو كنتى جيتى بدرى كنا عملنا شغل رائع

 ابو زياد(ابراهيم رزق) واولاده زياد وساليناز.. وخالد(سواح فى ملك الله) وشيرين سامى  اللى فرحت بيها وبكتابها وبالاهداء اللى كتبتهولى عليه وكنت اول حد تقريبا تكتبله اهداءها الجديد اليوم ده :).. اسامة ناصر والرائعة شمس النهار اللى ادتنى شيكولاتاية من اروع ما يكون :)

الدكتورصابر عبد القادر واولاده الجمال جدا ربنا يحميهم

كان يوم فيه كل حاجة بعملها لاول مرة وده كان احد اسرار حلاوته

كنت فرحانة من قلبى بجد وميرسى جدا لكل اللى شرفونا وخصوصا جوجو ورامى واسامة الازهرى اللى حساه تعب معانا من اول الانفتيشن :)

مصطفى سيف .. كان نفسى تحضر جدااااااااا .. انت الوحيد تقريبا اللى كلنا كتبنالك اهداء على كتابك بالرغم من انك شريك اساسى فيه :)

طب بالزمة كل الحاجات الحلوة دى مش تخلى اليوم ده يتحفر فى ذاكرتى ^_^

 

ولا فى الاحلام..

اه والله حد كان يصدق.. فكرة تتحول لحلم وبعدين يشارك فيه ناس كتير فيبقى حلم مشترك :)

والحلم المشترك يتحول لكتاب جماعى ضامم ناس معظمهم اصحابى والباقى بقوا اصحابى .. يعنى تحس انه حلم عائلى كده :)

انا بقى جاية ادعيكم على الحلم العائلى ده

يوم الثلاثاء ان شاء الله حفل توقيع  كتابنا الجماعى معطف من قيود

يارب اقدر اشوف كل الناس يااااااارب

منتظرينكم

:)