الخميس، 7 نوفمبر 2013

مع نفسى ... 26









فكرة الموت مش جديدة عليا .. عارفة ان فيه حاجة اسمها موت من وانا صغيرة .. اشوف الناس زعلانة وبيبكوا او لابسين اسود واسأل مالهم ترد عليا  اصل طنط فلانة او عمو فلان راح عند ربنا.. كانت الجملة شيك بس ماكنتش فاهمة هم ليه زعلانين.. عند ربنا يعنى راحو فى مكان حلو!
كبرت شوية وعرفت ان اللى بيروحوا عند ربنا دول معناها انهم ماعدوش موجودين بينا .. وان الناس بتزعل على الفراق.. وبدأت انا كمان ازعل على فراق جدى ومن بعده جدتى .. بس فضلت الفكرة عندى مش مخيفة اوى.. بنزعل وبننسى وبتفضل ذكريات حلوة 
لحد ما ربنا اختبرنى فيك انت..
ان جيت للحق فكرة ان الناس تمرض وتموت كانت واردة للكل بس ماجاش فى بالى خالص انك انت اللى يحصلك كده .. او بمعنى اصح ان انا اللى يحصلى كده فيك
كان شعرك ابيض من يوم مانا وعيت على الدنيا بسبب عامل وراثى فى العيلة عندك.. فكان بالنسبالى بابا ده مابيكبرش ..ثابت.. مافيش عوامل زمن بتأثر فيه!
كنت لما بتتألم فى ايامك الاخيرة مش بتبين.. او مش بتبين ليا انا بمعنى اصح..فكان بالنسبالى بابا ده مابيعياش او لو حصل ده مش بيتألم !
اى حاجة انت تقدر تتغلب عليها .. وبهدوءك المعروف عنك.. مافيش مشكلة مابتتحلش .. مافيش ازمة نقف قدامها..  وحتى لو ماعرفناش نقف ووقعنا .. علمتنى نبتسم ونقول مايقع الا الشاطر ونقوم ننفض هدومنا ونكمل..
وفجأة مشيت.. ماوقفتش المرة دى.. سيبتنى مع الحاجات اللى انت علمتهالى ..
اختبار صعب الحقيقة.. اتعلمت منه ليه الناس فعلا بتزعل رغم انك اكيد فى مكان احسن
بس الفراق هو المشكلة..
وحشتنى اوى
الله يرحمك

هناك 6 تعليقات:

زينب علي حبيب يقول...

الف رحمة على روحه ..

ربنا يصبّرك ان شاء الله ويديكي بمصيبتك اجر كبير وتتلاقو بالجنة ان شاء الله تعالى

ابراهيم رزق يقول...

ربنا يرحمه و يسكنه فسيح جناته

تعرفى يا نور انا لا اخشى الموت ابدا
و لكنى دائما اخشى موت من احب

beautiful mind يقول...

ربنا يتغمده برحمته
لا تتوقفي عن الدعاء له
فإن الدعاء خير ما ينفع الميت

سواح في ملك اللــــــــــــــــــه- يقول...

فيه مثل شعبي يانور عندنا

بيقول اللي خلف ماماتش

والظاهر ان باباكي رحمة الله عليه

وأدخله فسيح جناته

زرع فيكي صفاته الحلوة

علشان كدة بيقولوا اللي خلف ماماتش

يعني لما ابنه يتكلم الناس بتشوفه

نفس كلامه وتصرفاته

رحمة الله علي باباكي يانور

rona ali يقول...

رحمه الله على من علقوا قلوبنا معهم

انا كمان ادركت الموت في سن صغير

وعجبتنى كلمه الخال ابراهيم

انا لا اخشي الموت ابدا
ولكنى اخشي موت من احب

دة حقيقي علشان موتنا بيكون مرة واحده وخلاص انما موت اللي بنحبهم بيقتلنا في الدقيقه الف مرة

وحشتينى جدااا <3

reemaas يقول...

ميرسى لكل اللى علق على التدوينة دى واسفة لكل اللى قالى انها المته والله ماكنت اقصد

@Rona
انتى وحشانى جدا جدا والله اى اخبارك؟