الخميس، 18 يوليو 2013

NOW>>>> وتمشى مع نفسى 20 !






المفروض اصحى دلوقتى علشان اليوم خلاص بدأ ولو اتأخرت اكتر من كده هيخلص..
المفروض اتغدى دلوقتى علشان الحق انزل شغلى..
المفروض البس وانزل حالا معاد شغلى جه واللى ماسكة شفت الصبح لازم تمشى حالا بردو..
 المفروض افتح التليفزيون واتفرج على المسلسل اللى انا دبست نفسى وبتفرج عليه بقالى عشرومية يوم..
المفروض اقفل الدرج وامشى دلوقتى علشان معاد مرواحى من شغلى خلاص جه..
المفروض اقعد معاهم فى البيت حبة والعب شوية على النت او اشوفلى اى فيلم على اللاب والحق انام علشان الحق اصحى..
احساس فظيع بان فيه منبه فى دماغى واقفلى على راس الساعة وبيقولى على مفروضات كتير فرضتها على نفسى او اتفرضت عليا..مش هتفرق..
نفسى المنبه ده حجارته تخلص بقى..
***********************

امنيات كتير مفروض تتحقق دلوقتى..ده وقتها.. كل المعطيات بتقول ان ده وقتها
الجرس فى دماغى عمال يرن بيقولى كده بيقولى ان الساعة اللى ظبطه عليها من كام سنة خلاص بترن ولو اتأخرتى عن كده الامنيات دى هتقدم ومش هيبقى ليها معنى ولا طعم.. انجزى بقى ..اتحركى بقى..
ولا عارفة اتحرك ازاى ولا فى اى اتجاه..والمنبه عمال يرن لما صدعنى
خلاص تعبت يارب حجارة المنبه ده تخلص بقى...

هناك 11 تعليقًا:

E73 يقول...

يا بنتي بتدعي على حجارة المنبه ليه متدعي احسن ربنا يسهلك التساهيل وكل حاجة تتعمل في وقتها لوحدها ومنغير تعب قلب ودماغ بقى

بحس كتير بالمود دا وببقى نفسي اسيب الاوضة والمنبه وحياتي كلها واروح اتأمل في ملكوت آخر لا يوجد به منبهاااااات

Unknown يقول...

حلو وصفك يا نور للحاله دي
كلنا بنمر بيها على فكره..الروتين..و مبيكسروش غير الأوقات الحلوه و التغيير.
يعني حاولي تغيري عاداتك..مواعيد نومك..المسلسل اللي بتابعيه..الموسيقى اللي بتسمعيها..إكسري المنبه بشوية تغيير..و الأمنيات سيبيها على ربنا هو اللي هيحسنلك التدبير.

كل سنة و إنت طيبة :)

نهر الحب يقول...

كلنا كدة والله يا نور ديما عاوزين نلحق حاجة مافيش حاجة بنعملها علي راحتنا عشان احنا عاوزين نعملها دلوقتي


لكن الامنيات...
مش عارفة مش جايز يكون منبه مش حقيقي ومافيش زمن ولا وقت للامنيات
هي بس مستنية....كن...فتكون

AhMeD RaDy يقول...

البوست دا .. وكانك بتكتبى عنى .. شكرا يا صيدلانية .. :D ... بس انا مش بستخدم منبه ... انا بفضل قلقان

reemaas يقول...

E73

والله بدعى :)

ايوووووووون اهو انا نفسى بده
كل سنة وانتى طيوبة يارب

reemaas يقول...

شيرين سامي

كل سنة وانتى وكل اسرتك بخير يا شيرين ايون مانا اكتشفت ان اصحابى كلهم عندهم نفس الحالة !

reemaas يقول...

نهر الحب

مش عارفة بس انا لو مها كنت زهقت من الانتظار ده :(

reemaas يقول...

AhMeD RaDy


كل سنة وانت طيب يا احمد ..كل الطرق تؤدى لنفس الدوامة :)

غير معرف يقول...

After looking at a handful of the blog posts on your web site, I honestly
appreciate your way of writing a blog. I added it to
my bookmark webpage list and will be checking back in the near future.
Please check out my web site as well and tell me your opinion.


My web-site :: wine

AhMeD RaDy يقول...

ازيك يا صيدلانية .. ايه الاختفاء دا ؟ يارب يكون خير

reemaas يقول...

AhMeD RaDy

والله مانا عارفة يا احمد ممكن تقول رمضان على مافيش حاجة تتقال كله وارد