السبت، 6 يوليو 2013

مع نفسى 19..








حالة من التوتر الشديدة بين الاصدقاء على الفيس قدرت تقسم الاصدقاء عندى ل4انواع
. نوع وهو معارض ليا (يعنى مؤيد لمرسى)  النوع ده قرر انه ياخد جنب كده اللى هو مابيردش على اى ستيتوس مش بس السياسية لا ولو حتى عادية منعا للاستفزاز
وطبعا انا نفس الحكاية ولا حتى بيسلم فى الشات ..حالة من تجميد العلاقات والترقب الحذر والمراقبة بغيظ الى حين اشعار اخر.. عملا بالمثل يا نحلة لا تقرصينى ولا عاوز عسل منك..

. نوع تانى برده معارض ليا .. ده بقى لحقنا نفسنا من الاول  واشترطنا على بعض كل واحد رأيه فى صفحته ولما نتقابل مانتكلمش سياسة نهائى..ولو حصل غصب وجه سيرة او تلميح لاى تنتوفة سياسة تلاقى التانى برقله وقاله هااااااااا هتتلم ولا المك..الطيب احسن.. بس النوع ده بقى ناقصه يكون فيه اوبشن فى الفيس نمنع اننا نشوف كلام بعض من غير ما نبلك بعض لان كل واحد بيبقى ماسك نفسه بالعافيه انه يروح يضرب التانى بوكس على اساس انه بيفوقه من اللى هو فيه

.  نوع تالت بقى وده اللى خلاص مافيش فيه امل وللاسف الاعصاب اتهورت وحصل بلوك او انفريند وهذا السلاح الخطير مالجأتش ليه الا مرة واحدة لما الطرف التانى ماقدرش يمسك اعصابه وتحول الخناق لالفاظ نابية بقى وتشكيك فى الدين والولاء للوطن وحاجات كده تحس ان لو فى ايدك مسدس كنت ضربت نار  فالدليت ارحم..للاسف

. النوع الرابع وهو المؤيدين ليا (المعارضين لمرسى يعنى) ودول والحمد لله فى حالتى اكتر بكتييييييييييييييير من الثلاث انواع السابق ذكرها فعملولى حبة توازن والا الفيس كان هيبقى جحيم..ولهؤلاء اقول.. شكرا لانكم موجودين :)

*****************

لبعض الاصدقاء اقول ان الاراء السياسية ليست مبادئ او عقيدة راسخة لا تتغير واذا تغيرت نتهم صاحبها بالنفاق وحاجات كده وحشة كتير ..ابسلوتلى لاء يعنى ..يا اصحابى اللى عارفين نفسكم كويس الاراء السياسية هى مجرد اراء تتغير حسب المعطيات الجديدة وحسب نتائج الاراء القديمة ..ارااااااااااااء تختلف باختلاف طريقة تفكير البنى ادم واولوياته.. هنعمل ايه هى كده طبيعتها كده  !!

******************

انا نفسى قصير فى العناد.. يعنى لو بنتناقش فى موضوع فانا مع الطرف التانى لحد ما احس ان الموضوع قلب عند..عندى قدرة افضل اوضح فى رأى واسمع رأيه لحد ما احس ان الحوار خرج من نطاق النقاش لمرحلة( هو كده..لا هو كده..لا بقى هو كده ) فى الغالب انا بسكت او بنهى الحوار باى طريقة اعرف انهيه بيه حتى لو وصلت بيا انى اقول خلص الكلام.. فعلا فعلا نفسى قصير فى العناد

*******************

اول مره اكتب مع نفسى سياسية.. بس هعمل ايه ماقدرتش افصلها عن الواقع اللى احنا فيه..بامانة حاولت بس ماعرفتش


 

هناك 5 تعليقات:

ابراهيم رزق يقول...

هههههههههههههههههههههه
صباح الفل يا نوووووووووووووووور
عندك واحد سياسة و صلحه

كنا فى التبرع بالدم الجمعة اللى فاتت و ازهرى اتهمنى انى عصبى و عنيد فى خلافاتى السياسية لكن انا مش شايف نفسى كده خالص
انا عندى قدرة للنقاش فى السياسة لابعد مدى الا لو احسست ان اللى قدامى ينظر لى على انى كافر او يفقد الحجة و يبقى هو كده

كتب علينا الاختلاف الايدلوجى
و انا فى كتير من صحابى مختلف ايدلوجيا معهم لكن السر انى متواصل انسانيا

تحياتى

aya mohamed يقول...

ياااااه هى دى معاناتى بالظبط
اللى خلتنى اقفل الاكونت بتاعى
لانى كنت خلاص خمس دقايق كمان و كنت هعمل لكل لمعظم اصحابى بلوك ههههههه
فقلت على ايه بقى انا ابعد خالص واسيبلهم الفيس بوجع الدماغ اللى عاملينه واريح نفسى
استمتعت للبوست و حسيت ان مش انا لوحدى وده فى حد ذاته يدعو للتفاؤل
صباحك بيضحك :)

E73 يقول...

بصي يا ريمى فعلا لكل واحد وجهة نظره لكن اللي بيحدد كيفية التصرف مع الآخر هو أسلوبه زي مانتي قلتي بالظبط

يعني انا ان كنت آه ضد مرسي إلا إني أبدًا غير مؤيدة للي حصل وعندي أسبابي

أنا كمان بصراحة يمكن نفسي أقصر من نفسك في الحوار وخاصة لإن الناس اللي بتحاورني بتبقى واخدة كلامها من لميس وتوفيق عكاشة فبحس بالشلل العقلي قدامهم الحقيقة

وبالتالي انا ريحت دماغي خالص وكل اللي عملته "بعد ما كنت قافلة الفيس اصلا لمدة سنة" رجعته وعملت أن فرند لكل الناس اللي عندي :D

يا شيخة بلا وجع دماغ خلينا صحاب أحسن

ولما بنتقابل على أرض الواقع كل واحد فينا عارف ان أحسنله وأحسن للي قدامه ميتكلمش في السياسة

لإن أديكي شايفة الجاهل لما بيتكلم في السياسة بيحول مصر لحرب أهلية :D وكل واحد متمسك برأيه زي مايكون الصواب الذي لا يحتمل الخطأ

مع ان النظرية النسبية مقالتش كدا خالص

E73 يقول...

وارجع واقولك طبعا ان فعلا فيه ناس مش بتخسريها عالفيس بس لكن كمان على أرض الواقع ودول اللي بلاقيهم فقدوا أخلاقهم لمجرد اختلاف في الرأي

أما بالنسبة للأوبشن اللي بيخلي الناس متظهرش عندك عشان متعمليلهمش بوك فالأوبشن موجود يا فندم

لما تروحي تقفي بالماوس على اسم واحد او صورته هتلاقي مربع ظهر فيه صورته واسمه وكلمة فرند

اقفي على كلمة فرند او دوسي عليها بالماوس هتظهرلك قائمة شيلي الصح من على جملة "شو ان نيوز فيد ^_^ أي خدمة يا فندم

انا بستخدم الأوبشن دا لما ألاقي حد متعود يشير اشاعات أو نكت او صور دموية "اللي بتعمليهاله مش هيبقى عارف" لكن انا بعرفهم عشان يحرموا يشيروا الحاجات دي تاني ^_^

Bent Men ElZman Da !! يقول...

بصي هو ده اللي حاصل معانا كلنا اصلا
فـ أحسن حاجة الواحد يكبر دماغه خالص من اللي مضايقه ويعمل مش شايفه وهي مصيرها فتره وتعدي ونبقي كلنا كويسين تاني مع بعض بعد ما السياسه تخرج من تفكيرنا شوية ونبطل العنداللي إحنا فيه ده

ماتزعليش نفسك الأختلاف بعقل شئ صحي :)