S.M.S 4

الايام مابترجعش لورا..مش ممكن نرجع الاحداث الحلوة ولا نرجع بزمنا علشان نتفادى لحظات الالم..اقصى مايمكن عمله مع الماضى هو تحويله لذكريات ..ونحاول نعيش كل ايامنا واوقاتنا لحظة بلحظة ..نحسها اوى قبل ما تسهينا وتبقى ماضى

وقال عم صلاح...

بالاسبرين..والسكاكين

وبالمسدس مقتولين

على اعمدة كل الجرايد مصلوبين

شبان صغار

ازهار فى فجر العمر ماشفتش النهار

متكلبشين فى الزنازين او مغروزين

فى الطين فى قصر النيل وعايزين غطاسين

ع المشرحة انسان نحيف

بشنب خفيف اصفر لطيف

خدوده من قيمة يومين مش محلوقين

عنيه على جدار الفراغ متسمرين

وعلى الجبين رفرف سلام الميتين

ماتسألوش كان اسمه ايه

اسمه على المحضر بقى المجنى عليه

اسمه بقى الجثة فى اوراق الدوسيه

ماتسألوش عن قصته كان موته ليه

المسألة صبحت فى ايد المسؤلين

على ذمة التحقيق سجين

انسان حزين

فى قلبه احساس الغريق

مالهش عون

فى دماغه اكتر من حريق

لابس قميص مربعات وبنطلون

وف رجله صندل من زمان مالهش لون

يبص على اخر الطريق

يلاقيه مابين رجليه تمام

ثابت عليه الاتهام

وحياته بين الناس حرام

حرام عليه يركب ترام

حرام عليه الاوتوبيس

حرام عليه الارصفة والفوانيس

والمدرسة والسينمات

مكتوب عليه يعيش مابين المحابيس

فى اللومنات

ماتسألوش ده يبقى مين

شفتوه وبتشفوه كتير فى الجرانين

بلاش سؤال

على اى حال

المسألة صبحت فى ايد المسؤلين

على ناصية الشارع امين

واقف مع حسين واسماعين

وبنيامين

متسرحين ومشمرين

وشوية يوصل مصطفى وعبد السلام

ويبتدى يحمى الكلام

ويغمزوا بعينهم ويمكن يشتموا

ويقولوا لفظ بذئ وهم بيضحكوا

ماتفرحوش لما تشفوهم من بعيد

نازلين هزار وقزقزة

وماتقولوش ياريت زمان التلمذة

يعود علينا من جديد

بيشتموا

وف كل قلب صراخ يحاول يكتمه

بيضحكوا

وف كل صدر عويل ونار راح تهلكه

وتفركه

متفرحوش

وفكروا ازاى نحوش

اللى هيشربله ازازة اسبرين

واللى هيطعن امه اربع سكاكين

من قبل ما الميت يموت

من قبل ما الايام تفوت

والمسألة تصبح فى ايد المسؤلين

 

عنها3....

قالتلى تعالى معايا اشترى هدية رجالى لصديقى فلان عيد ميلاده قرب ومش عارفه اجيبله ايه..

قلتلها وماله....فى دماغك حاجة معينه؟

قالتلى لا بس عاوزاها حاجة حلوة قيمة ورقيقة..وماتبقاش شبه اى هدية هتجيله انتى عارفه التميز حلو بردو

قلتلها..بتعزيه انتى فلان ده !

قالتلى صديق جدع يابنتى..

ومرت فترة من الصمت افتكرتها هتكتفى بهذا الرد وخلاص لكنى فوجئت بيها بتكمل..

عارفة..حد مريح جدا فى الكلام بحب احكيله احداث يومى..بحب اسمع منه حكاياته واخباره

بحب اخد رأيه فى اى حاجة..على فكرة هو كمان بيعمل كده بيهتم جدا برأيى

تعرفى..بحب اشتكيله حتى لو ماكنش عنده حل لمشكلتى كفاية انى احكيله وخلاص..

بحس انى ضحكتى من القلب معاه ومابعرفش ازعل منه..

كنت اراقب ملامحها وهى بتحكى فلاحظت هى وسكتت..ثم قالت يعنى تقدرى تقولى اعز اصحاب..

ابتسمت انا وقلت اه طبعا فاهمة 

وف سرى لقتنى بقول يارب هو يكون فاهم....